Tigidzigidzi Temali Leticitfwe Emphini​—Yini Vele Lesilahlekele?

Timphi titsatsa imali lenyenti kakhulu.

• “Umbutfo wetemphi ucophe umlandvo ngekusebentisa imali lengaba ngu-$2.2 trillion etimphini.”​—I-The Washington Post, yaFebruary 13, 2024.

Ngetulu kwemali lecitfwe kuletimphi, kunalokunye lokunyenti lokulahlekile. Cabanga nganasi sibonelo: Imphi lese-Ukraine.

• Emasotja. Kucatjangwa kutsi kufe, nobe kulimele emasotja lacishe abe ngu-500 000 kusukela kucale lemphi eminyakeni lemibili leyendlulile.

• Bantfu labavamile. Ngekusho kwe-United Nations, kufe nobe kwalimala bantfu labangetulu kwa-28 000. Nobe kunjalo, lesinye siphatsimandla se-UN satsi: “Awuchazeki umonakalo lobangelwe ngulemphi kubantfu labavamile.”a

Kuhlupheka kwebantfu ngenca yalemphi kanye nekungevani lokukhona emhlabeni wonkhe kukhulu ngendlela lelingachazeki.

• 114 million. Leli linani lebantfu lababaleke emakhaya abo ngenca yemphi kanye nebudlova emhlabeni wonkhe kusukela ngaSeptember 2023.

• 783 million. Leli linani lebantfu lababulawa yindlala. “Kungevani kuyimbangela lenkhulu yendlala; emaphesenti langu-70 ebantfu labalambako emhlabeni asetindzaweni letihlaselwe timphi nebudlova.”​—I-World Food Programme.

Iyoke iphele yini imphi? Kuyoke kube khona yini kuthula? Umnotfo lokhona emhlabeni, uyoke usetjentiselwe yini kucedza indlala kanye nebuphuya? Litsini liBhayibheli?

Sikhatsi semphi

LiBhayibheli laphrofetha ngetimphi, latichaza ngekutsi ngumgibeli welihhashi lelingekwemfanekiso.

• “Kwaphuma lelinye lihhashi lelinembala lobovu njengemlilo, futsi lobekaligibele wavunyelwa kutsi asuse kuthula emhlabeni kuze bantfu babulalane bodvwa, wanikwa nenkemba lenkhulu.”​—Sembulo 6:4.

Lomgibeli welihhashi longekwemfanekiso ulandzelwa ngulabanye bagibeli labamelela indlala kanye nekufa ngenca yetifo nobe lokunye. (Sembulo 6:5-8) Kuze utfole lokunyenti ngalesiphrofetho seliBhayibheli nekutsi yini lesenta siciniseke kutsi lesiphrofetho siyagcwaliseka kulesikhatsi setfu, fundza sihloko lesitsi “Bobani Labagibeli Bemahhashi Labane?”

Likusasa lelinekuthula

Madvatane, umnotfo lokhona emhlabeni angeke usasetjentiselwa timphi. Nobe kunjalo, loku angeke kwentiwe bantfu. LiBhayibheli litsi:

• Nkulunkulu “[utawucedza] timphi emhlabeni wonkhe.”​—Tihlabelelo 46:9.

• Nkulunkulu utawususa imiphumela lebuhlungu lebangelwe timphi. “Uyakwesula tonkhe tinyembeti emehlweni abo, kufa ngeke kusaba khona, futsi kulila, nekukhala kanye nebuhlungu ngeke kusaba khona. Tintfo letindzala setendlulile.”​—Sembulo 21:4.

• Nkulunkulu utawuletsela bonkhe bantfu kuthula. “Bantfu bami batawuhlala endzaweni lenekuthula kwaphakadze, batawuhlala etindzaweni letiphephile nasetindzaweni tekuphumula letinekuthula.”​—Isaya 32:18.

Ngekusho kwesiphrofetho seliBhayibheli, timphi kanye naletinye tintfo letentekako kulamalanga tikhombisa kutsi lesikhatsi sekutsi kube nekuthula sesidvutane.

Yini Nkulunkulu latawuyenta kuze aletse lelikusasa lelinekuthula? Utawawusebentisa hulumende wakhe losezulwini, nobe uMbuso wakhe. (Matewu 6:10) Kuze utfole kutsi uyini loMbuso, nekutsi loko kusho kutsini kuwe, bukela i-video lemfishane letsi Uyini UMbuso WaNkulunkulu?