BoFakazi BaJehova Babaphatsa Njani Labo Labake Baba Ngemalunga Enkholo Yabo?
Setama kuphatsa bonkhe bantfu ngelutsandvo, ngemusa nangenhlonipho. Nangabe lomunye waBoFakazi BaJehova sekehlise lizinga lakhonta ngalo Nkulunkulu nobe sekayekele kukhonta Nkulunkulu, sitsatsa sinyatselo kute simkhutsate, simcinisekise kutsi siyamtsandza futsi setame kumsita kutsi avusetele buhlobo bakhe naNkulunkulu.a —Lukha 15:4-7.
Kuletinye timo, tintfo umuntfu latentako tingahle timente kutsi asuswe ebandleni. (1 KubaseKhorinte 5:13) Nanobe kunjalo, ngenca yekutsi sibatsandza kakhulu labo lesikholwa nabo, setama kumsita kutsi angasuswa ebandleni. Ngalesinye sikhatsi ngisho angasuswa ebandleni, siyachubeka setama siyamtsandza futsi siyamhlonipha njengobe liBhayibheli lisikhutsata kutsi sente kanjalo.—Makho 12:31;1 Phetro 2:17.
Yini lebangela kutsi umuntfu agcine asusiwe ebandleni?
LiBhayibheli likuveta ngalokucacile kutsi nangabe umKhristu enta sono lesikhulu futsi angafuni kuphendvuka, kufanele asuswe ebandleni.b (1 KubaseKhorinte 5:11-13) LiBhayibheli liyasivetela kutsi ngutiphi tono letinkhulu letingenta umuntfu agcine asusiwe ebandleni. Sibonelo nje, liBhayibheli libala tono letinjengekuphinga, kudzakwa, kubulala, kuhlukubeta nekweba.—1 KubaseKhorinte 6:9, 10; KubaseGalathiya 5:19-21; 1 KuThimothi 1:9, 10.
Nobe kunjalo, asisheshi simsuse ebandleni umuntfu lowente sono lesikhulu. Labadzala belibandlac bacale betame kumsita kuze ashintje tindlela takhe. (KubaseRoma 2:4) Betama kumsita ngemoya lophansi nangemusa. (KubaseGalathiya 6:1) Kwenta njalo kungamsita lona lowonile kutsi abone emaphutsa akhe bese uyaphendvuka. (2 KuThimothi 2:24-26) Nangabe kwentiwe imetamo leminyenti yekumsita umuntfu lowente sono lesikhulu kodvwa achubeka nemkhuba wekwephula timiso teliBhayibheli futsi angaphendvuki, kufanele asuswe ebandleni. Labadzala bakhipha simemetelo ebandleni kutsi loyo muntfu akasesuye lomunye waboFakazi BaJehova.
Labadzala belibandla betama kufinyelela inhlitiyo yalowonile ngemoya lophansi nangemusa
Uba yini umphumela wekususa umuntfu ebandleni lochubeka enta sono lesikhulu? Kwekucala, libandla lisekela timiso taNkulunkulu tekutiphatsa ngendlela lehlantekile futsi liyavikeleka ebubini lobentiwa nguloyo muntfu. (1 KubaseKhorinte 5:6; 15:33; 1 Phetro 1:16) Ngetulu kwaloko, lona lowonile kumenta kutsi ayekele kwenta lokubi futsi ashintje.—KumaHebheru 12:11.
BoFakazi BaJehova babaphatsa njani labo labasusiwe ebandleni?
LiBhayibheli litsi emaKhristu kufanele ‘ayekele kutihlanganisa’ nanobe ngubani losusiwe ebandleni, futsi ‘angadli ngisho nekudla nemuntfu lonjalo.’ (1 KubaseKhorinte 5:11) Ngako asitihlanganisi nemuntfu losusiwe ebandleni. Nobe kunjalo, asimecwayi ngalokuphelele futsi siyamhlonipha. Wemukelekile kutsi ete emihlanganweni yetfu lapho angavuselwa khona ngulabanye boFakazi BaJehova.d Angahle acele labadzala belibandla kutsi bamsite etintfweni letiphatselene naNkulunkulu.
Labo labasusiwe ebandleni, bavumelekile kuba khona emihlanganweni yetfu
Kutsiwani ngemuntfu losusiwe ebandleni kani lashade naye kanye nebantfwana bakhe labasebancane baboFakazi BaJehova? Nanobe angasakhonti Jehova anemndeni wakhe kodvwa bachubeka bangumndeni. Njengoba bahlala ndzawonye, buhlobo babo bemndeni buyachubeka futsi bachubeka baphatsane ngelutsandvo.
Umuntfu lowasuswa angacela labadzala belibandla kutsi bamvakashele, futsi batamniketa teluleko letiseBhayibhelini letiveta lutsandvo baphindze bamkhutsate ngemusa kutsi aphendvuke futsi abuyele kuNkulunkulu. (Zakhariya 1:3) Nangabe awuyekela umkhuba wekwenta lokubi futsi akhombisa kutsi ufuna kuphila ngetimiso teliBhayibheli, angaphidze abuyiselwe ebandleni. Libandla ‘litamtsetselela ngemusa futsi limdvudvute,’ njengoba kwenta amaKhristu aseKhorinte nakuphendvuka soni.—2 KubaseKhorinte 2:6-8.
Bativa njani labo labake basuswa ebandleni?
Naka naku lokushiwo ngulabanye baBoFakazi BaJehova labake basuswa ebandleni kamuva bancuma kubuyela kuNkulunkulu.
“Ngesikhatsi ngincuma kubuyela ebandleni bengicabanga kutsi labadzala batangibuta ngako konkhe lengakwenta kuyo yonkhe leminyaka ngisusiwe. Kunaloko bavele batsi ‘naka loko lokufanele ukwente nyalo.’ Ngemuva kwaloko ngativa ngikhululeke mbamba.”—Maria, eMelika.
“Libandla lajabula kakhulu nangibuya futsi ngativa ngibalulekile. Banaketfu nabodzadzewetfu ebandleni bangisita ngeva kutsi Jehova ungicolele futsi nabo bangicolele, loko kwaphindze kwangisita ngatfutfukisa buhlobo bami naJehova. Labadzala belibandla bebahlale bakulungele kungisita kuze ngiphindze ngicinise buhlobo bami naJehova. Bangidvudvuta, bangisita ngabona kutsi Jehova usangitsandza futsi ngibalulekile kuye.”—Malcom, eSierra Leone.
“Kungijabulisa kakhulu kubona kutsi Jehova ubatsandza kakhulu bantfu bakhe kangangekutsi ufuna kugcina inhlangano yakhe ihlantekile. Nanobe labanye bantfu bangacondzi kutsi kubaluleke ngani kususa umuntfu lochubeka enta lokubi ebandleni kodvwa kwenta njalo kusento lesikhombisa lutsandvo. Ngibonga kakhulu ngekutsi Babe wetfu losezulwini unguNkulunkulu lonelutsandvo futsi locolelanako.”—Sandi, eMelika.
a Lokwatiswa lokukulesihloko kungasebenta kumuntfu wesifazane nome wesilisa.
b Esikhatsini lesendlulile, besitsi umuntfu lowente sono wangaphendvuki uyayakeliswa kuba nguFakazi. Kodvwa nyalo sesisebentisa emavi laseBhayibhelini latsi, umuntfu uyasuswa ebandleni.
c Labadzala belibandla ngemadvodza lavutsiwe langemaKhristu, lafundzisa asebentisa imiBhalo aphindze eluse bantfu baJehova futsi abakhutsate. Ababhadalwa ngalemisebenti labayentako.—1 Phetro 5:1-3.
d Kuletinye timo, umuntfu angahle ashiye libandla futsi akhulume kabi ngalo nobe achubeke akhutsata kutiphatsa lokungakahlanteki. Nakwenteka loko, silandzela umyalo loseBhayibhelini lotsi ‘singambingeleli’ umuntfu lowenta njalo.—2 Johane 9-11.