Kukhona Yini Lowatiko Kutsi Ngubani Lowabhala LiBhayibheli?

Lokushiwo liBhayibheli

Bantfu labanyenti batjelwa kutsi asikho sicinisekiso sekutsi liBhayibheli labhalwa ngubani. Kodvwa liBhayibheli liveta ngalokucacile kutsi ngubani umbhali walo. Letinye tincenye talo ticala ngemavi latsi “Lamavi angumlandvo waNehemiya,” “Lona ngumbono lowabonwa ngu-Isaya,” kanye nalatsi “Livi laSimakadze lefika kuJoweli.”—Nehemiya 1:1; Isaya 1:1; Joweli 1:1.

Babhali beliBhayibheli labanyenti bayavuma kutsi konkhe labakubhala bekuvela kuJehova, lokuphela kwaNkulunkulu weliciniso, nekutsi nguye bekabacondzisa. Baphrofethi lababhala imiBhalo yesiHebheru batsi: “Naku lokushiwo nguSimakadze,” emahlandla langetulu kwa-300. (Amose 1:3; Mikha 2:3; Nahume 1:12) Labanye babhali batfola umlayeto lovela kuNkulunkulu ngetingilosi.—Zakhariya 1:7, 9.

LiBhayibheli labhalwa ngemadvodza langu-40 eminyakeni lengu-1 600. Lamanye emadvodza abhala tincwadzi teliBhayibheli letingetulu kwayinye. Ecinisweni, liBhayibheli lingumtapo lomncane wetincwadzi letingu-66. Licuketse tincwadzi letingu-39 temiBhalo yesiHebheru, labanyenti labatibita ngekutsi Lithestamente Lelidzala, kanye netincwadzi letingu-27 temiBhalo yemaKhristu yesiGriki, letatiwa ngekutsi Lithestamente Lelisha.