BANTFU LABASHA BAYABUTA

Yini Lengingayenta Lapho Batali Bami Badivosa?

Kudivosa kwebatali simo lesenta bantfu labasha bakhatsateke. Yini longayenta kuze ubeketelele lesimo?

Kulesihloko

Tintfo letintsatfu lokufanele ungatenti

1. Kutisola

“Make wake wangitjela kutsi tinkinga tabo nababe tacala ngalesikhatsi kutalwa mine, ngako ngacabanga kutsi ngimi lowabangela kutsi umshado wabo ungaphumeleli.”—Diana.

Khumbula naku: Akusiwe lobangele kutsi batali bakho badivose. Badivose ngoba banetinkinga tabo. Akusiwe lobangele letinkinga ngako angeke ukhone kuticatulula. Batali bakho lokufanele bacatulule tinkinga tabo temshado.

“Nguloyo naloyo utawutetfwalela umtfwalo wakhe.”—KubaseGalathiya 6:5.

2. Kuhlale ukwatile

“Kungikwatisa kakhulu kutsi babe waphinga. Kumatima kutsi ngiphindze ngimetsembe.”—Rianna.

Khumbula naku: Ufanele kukwata ngenca yaloko lokwenteka kubatali bakho, kodvwa akusiko kahle kuhlale ukwatile. Kuhlale ukwatile kungakugulisa. Kungako kuhlale kushiwo kutsi nawuhlale utfukutsele kufanana nekutsi unatsa shevu kodvwa ugadze kutsi kugule lolomunye umuntfu.a

“Yekela kutfukutsela, uyekele nekuba nelulaka.”—Tihlabelelo 37:8.

3. Kungabata kutsi ungaba nemshado lophumelelako

“Ngiyesaba kutsi ngitawenta loko babe lakwenta. Ngiyesaba kutsi nangingashada futsi ngibe nebantfwana, ngingasuke ngente loko lokwenta batali bami badivosa.”—Jessica.

Khumbula naku: Kutsi umshado webatali bakho awukaphumeleli akusho kutsi newakho angeke uphumelele. Kunaloko ungafundza tifundvo letibalulekile kuloko lokwenteke kubatali bakho. Sibonelo nje, unganaka kutsi ngubuphi buntfu lobufuna kumuntfu lofuna kushada naye. Umshado webatali bakho longakaphumeleli ungakukhutsata kutsi ube nebuntfu lobutakusita ube yindvodza nobe umfati lokahle.

“Nguloyo naloyo akahlole tento takhe.”—KubaseGalathiya 6:4.

Umfana loseminyakeni yekutfomba ufake simende elunyaweni futsi uhleti kusofa njengoba asebentisa i-laptop. — Kwemukela kudivosa kwebatali bakho kufanana nekuphola kwelitsambo lebeliphukile. Kucale kube buhlungu kakhulu kodvwa ngekuhamba kwesikhatsi kubese kuba ncono

Tintfo letintsatfu longatenta

1. Khuluma. Bantfu labasebuhlungwini kodvwa labangayiveti indlela labativa ngayo, bavame kwenta imikhuba lemibi lengabalimata njengekusebentisa kabi tjwala nobe tidzakamiva. Kunekutsi wente njalo, yetama naku lokulandzelako:

Khuluma nebatali bakho. Nangabe batali bakho bafuna kukufaka etindzabeni tabo temshado, bachazele ngemoya lophansi kutsi loko kukuphatsa njani. Nangabe kumatima kukhuluma nabo, ungababhalela incwadzi.

Intfombatana leseminyakeni yekutfomba ibhala incwadzi.

Khuluma nemngani lometsembako. Kungakusita kakhulu kuba nemuntfu longakulalela. LiBhayibheli litsi, “umngani sibili ukutsandza ngaso sonkhe sikhatsi futsi ungumnakenu longetsembela kuye ngesikhatsi sekuhlupheka.”—Taga 17:17.

Khuluma neMdali wakho. Jehova Nkulunkulu ‘longuMuvi wemithantazo’ uhlale akulalele. (Tihlabelelo 65:2) LiBhayibheli litsi, ‘ungaphonsa konkhe kukhatsateka kwakho kuye, ngobe uyakukhatsalela.’—1 Phetro 5:7.

Ngumuphi umtali longakhona kukhuluma naye ngemoya lophansi?
Ngumuphi umngani lometsembako (lomdzala nobe lomncane) longakusita kutsi ukhone kubeketelela lesimo?
Ngutiphi tinkinga longathantaza ngato ngalokucondzile?

2. Yemukela lushintjo

Batali bakho nabadivosa, kungaba nelushintjo ekuphileni kwakho lolufaka ekhatsi, likhaya lelisha, sikolwa lesisha, indlela leniphila ngayo ingasafani neyasekucaleni ngisho nebangani labasha. Loko kungakwenta kutsi ucindzeteleke kakhulu, futsi kungakwenta utive ngatsi tintfo ekuphileni kwakho tibheke phansi. Yini lengakusita kutsi ukhone kubhekana nalolushintjo? Yetama kutfola indlela yekuphila nalo lolushintjo.

Nguluphi lushintjo lolukhulu lokudzingeke kutsi ulwente ngenca yekudivosa kwebatali bakho?
Yini longayenta kuze ukhone kwemukela lolushintjo?

“Sengifundze kwenetiseka kunobe ngutiphi timo lengikuto.”—KubaseFiliphi 4:11.

3. Naka buntfu bakho lobuhle

Nanobe kudivosa kwebatali bakho kungakubangela kukhatsateka lokukhulu, kodvwa kungaphindze kukufundzise kunaka buntfu bakho lobuhle. Kungakusita ube nebuntfu lobuhle lobusha. “Kudivosa kwebatali bami kwangenta kutsi ngisheshe ngikhule,” kusho Jeremy, batali bakhe labadivosa nakaneminyaka lengu-13. “Bekungimi lomdzala kubantfwana ekhaya, ngako bekufanele ngisite make kanye nabhuti wami lomncane.”

Intfombatana leseminyakeni yekutfomba isita sisi wayo lomncane ngemsebenti wesikolwa njengoba make wabo apheka ekhishini. — Kudivosa kwebatali bakho kungakwenta kutsi ube nemisebenti leyengetiwe lokufanele uyente ekhaya

Ngubuphi buntfu lobuhle lobe nabo ngenca yekutsi batali bakho badivosile?
Ngukuphi lawungatsandza kutfutfukisa khona?

“Yonkhe imiBhalo iphefumulelwe nguNkulunkulu, ilusito . . . ekulungiseni tintfo.”—2 KuThimothi 3:16.

a Kuze utfole lokunyenti, fundza sihloko lesitsi “Ngingayilawula Kanjani Intukuthelo Yami?” letfolakala ngesiZulu