Yini Leyenta BoFakazi BaJehova Bangawugubhi Khisimusi?
Imibono leliphutsa levamile
Lokuliphutsa: Lokwenta boFakazi BaJehova bangawugubhi Khisimusi kutsi abakholelwa kuJesu.
Liciniso: SingemaKhristu. Sikholelwa kutsi kusindziswa kuvela ngaJesu Khristu kuphela.—Imisebenti 4:12.
Lokuliphutsa: Nehlukanisa imindeni ngekufundzisa emalunga enu kutsi angawugubhi Khisimusi.
Liciniso: Siyikhatsalela kakhulu imindeni futsi sisebentisa liBhayibheli kuze siyisite ibe nebunye.
Lokuliphutsa: Niyalahlekelwa ngekungagubhi Khisimusi, ngobe ngaleso sikhatsi kuphiwana tipho, kuba nekuthula emhlabeni kuphindze kube litfuba lekutsi bantfu babonisane umusa.
Liciniso: Senta konkhe lokusemandleni etfu kutsi siphe labanye siphindze sibe nekuthula nebantfu malanga onkhe. (Taga 11:25; Roma 12:18) Sibonelo saloko kutsi, indlela lesichuba ngayo imihlangano yetfu nendlela lesishumayela ngayo ihambisana nalokwashiwo nguJesu nakatsi: “Nemukeliswe ngesihle, ngako-ke nani phanini ngesihle.” (Matewu 10:8) Ngetulu kwaloko, sifundzisa bantfu kutsi uMbuso waNkulunkulu ngiwo lolitsemba lekuthula kwemhlaba.—Matewu 10:7.
Yini leyenta boFakazi BaJehova bangawugubhi Khisimusi?
Jesu watsi kufanele sikhumbule lusuku lwakhe lwekufa, hhayi lwekutalwa.—Lukha 22:19, 20.
Baphostoli baJesu kanye nebafundzi bekucala abazange bawugubhe Khisimusi. I-New Catholic Encyclopedia itsi: “Lidzili Lekutalwa KwaJesu lacala kwentiwa ngemuva kwa-243 [C.E.],” sekuphele iminyaka lengetulu kwelikhulu kwafa wekugcina kubaphostoli baJesu.
Abukho bufakazi bekutsi Jesu watalwa nga-December 25; lilanga latalwa ngalo alitfolakali eBhayibhelini.
Sikholelwa kutsi Nkulunkulu akawemukeli Khisimusi ngobe usukela emasikweni ebantfu labebangamkhonti.—2 Khorinte 6:17.
Yini lenenta nifune kwehluka kulabanye ngekungawugubhi Khisimusi?
Bantfu labanyenti bayawugubha Khisimusi nobe bati kutsi wacalwa kugujwa bantfu labebangamkhonti Nkulunkulu nekutsi liBhayibheli aliwusekeli. Bantfu labanjalo bangatibuta kutsi: Yini leyenta emaKhristu afune kwehluka? Kungani atihlupha ngalendzaba?
LiBhayibheli lisikhutsata kutsi sicabange, lokusho kutsi sisebentise ‘emandla ekucabanga.’ (Roma 12:1, 2, NW) Lisifundzisa kutsi silatise liciniso. (Johane 4:23, 24) Nanobe sinendzaba kutsi bantfu labanye banamuphi umbono ngatsi, sinamatsela etimisweni teliBhayibheli ngisho nobe loko kuyintfo lengakavami.
Nanobe sikhetsa kungawugubhi Khisimusi, siyalihlonipha lilungelo lemuntfu ngamunye lekutsi atincumele latakwenta kulendzaba. Asibaphazamisi labanye nabagubha Khisimusi.