Kwenteka Njani Kutsi Umhlatjelo WaJesu Ube ‘Yinhlawulo Yalabanyenti’?
Lokushiwo liBhayibheli
Umhlatjelo waJesu uyindlela Nkulunkulu lakhulula ngayo bantfu esonweni nasekufeni. LiBhayibheli litsi ingati yaJesu leyacitseka iyinhlawulo. (Kubase-Efesu 1:7; 1 Phetro 1:18, 19) Ngako Jesu watsi wetela ‘kutonikela ngekuphila kwakhe kuze kube yinhlawulo yalabanyenti.’—Matewu 20:28.
Kungani bekudzingeka ‘inhlawulo yalabanyenti’?
Umuntfu wekucala Adamu wadalwa ete sono. Bekatawuphila phakadze kodvwa loko kwamlahlekela ngobe wakhetsa kungamlaleli Nkulunkulu. (Genesisi 3:17-19) Wendlulisela lesono kubantfwana bakhe. (KubaseRoma 5:12) Ngenca yaleso sizatfu, liBhayibheli litsi Adamu ‘watitsengisa’ yena kanye nebantfwana bakhe ekugcilatweni sono nekufa. (KubaseRoma 7:14) Njengobe bese banesono, kute lebekangakhona kutsenga loko lokwalahlwa ngu-Adamu.—Tihlabelelo 49:7, 8.
Nkulunkulu wayivela buhlungu intalelwane ya-Adamu lebeyite litsemba. (Johane 3:16) Nobe kunjalo, simiso saNkulunkulu sekwenta lokulungile asizange simvumele kutsi angatinaki tono tabo ngaphandle kwesizatfu lesicinile. (Tihlabelelo 89:14; KubaseRoma 3:23-26) Ngenca yekutsi Nkulunkulu uyabatsandza bantfu, ngako wabalungiselela indlela lesemtsetfweni kuze tono tabo titsetselelwe tiphindze tisuswe ngalokuphelele. (KubaseRoma 5:6-8) Inhlawulo ingulendlela lesemtsetfweni.
Isebenta njani lenhlawulo?
EBhayibhelini, ligama lelitsi ‘inhlawulo’ lifaka ekhatsi letintfo letintsatfu letilandzelako:
Ikubhadalwa.—Numeri 3:46, 47.
Iletsa inkhululeko.—Eksodusi 21:30.
Ilingana nelinani laloko lokubhadalelwako.a
Naka kutsi letintfo tisebenta njani emhlatjelweni waJesu Khristu loyinhlawulo.
Kubhadalwa. LiBhayibheli litsi emaKhristu “atsengwa ngelinani lelikhulu.” (1 KubaseKhorinte 6:20; 7:23) Lelinani lelikhulu yingati yaJesu ‘latsengela ngayo Nkulunkulu bantfu kuto tonkhe tinhlanga, tilwimi, bantfu netive.’—Sembulo 5:8, 9.
Inkhululeko. Umhlatjelo waJesu uletsa ‘kukhululwa ngenhlawulo’ esonweni.—1 KubaseKhorinte 1:30; KubaseKholose 1:14; KumaHebheru 9:15.
Ilingana nelinani. Sihlengo lesaletfwa nguJesu silingana ncamashi naloko lokwalahlwa ngu-Adamu lokukuphila lokute sono. (1 KubaseKhorinte 15:21, 22, 45, 46) LiBhayibheli litsi: “Ngobe njengobe ngekungalaleli kwemuntfu munye [Adamu] bantfu labanyenti baba toni, ngendlela lefanako, ngekulalela kwemuntfu munye [Jesu Khristu] bantfu labanyenti kutawutsiwa balungile.” (KubaseRoma 5:19) Loko kuchaza indlela kufa kwemuntfu munye lokwakhona ngayo kukhokha inhlawulo yetoni letinyenti. Ecinisweni, umhlatjelo waJesu “waba yinhlawulo yabo bonkhe,” labatsatsa tinyatselo letidzingekile kuze bazuze kuwo.—1 KuThimothi 2:5, 6.
a EBhayibhelini, emagama ekucala lahunyushwe ngekutsi “inhlawulo” anemcondvo wekutsenga intfo letsite ledulile. Sibonelo nje, sento sesiHebheru lesitsi ka·pharʹ sisho kumbonya. (Genesisi 6:14) Ngalokuvamile sisho kumbonya sono. (Tihlabelelo 65:3) Ligama lelihlobene naso lelitsi koʹpher lisho lokubhadalwako kuze kumbonywe nobe kukhululwe lokutsite. (Eksodusi 21:30) Ngendlela lefanako, ligama leGriki lelitsi lyʹtron ngalokuvamile lelihunyushwa ngekutsi “inhlawulo” lingaphindze lisho “linani lekukhululwa.” (Matewu 20:28) Babhali besiGriki basebentisa leligama nabachaza lokubhadalwako kuze kuhlengwe siboshwa semphi nobe kuze kukhululwe sigcili.