“Ngenta Konkhe Lengingakhona Kukwenta”

Irma, uhlala eJalimane futsi uneminyaka lecishe ibe ngu-90. Akasakhoni kushumayela emtini ngemuti njengobe bekenta, loku kungenca yekutsi watfola tingoti letimbili letimbi futsi wahlindvwa kanyenti. Nyalo Irma ucoca nalabanye ngekukholwa kwakhe ngekutsi abhalele tihlobo takhe kanye nebantfu labatiko tincwadzi. Bantfu bayatitsandza tincwadzi ta-Irma letikhutsatako naletidvudvutako kangangekutsi baze bambute kutsi batatitfola nini letinye. Labanye bayambhalela bambonge futsi bacele kutsi ababhalele letinye tincwadzi. Irma utsi, “Konkhe loku kuyangijabulisa futsi kungenta ngihlale nginake tintfo letiphatselene naNkulunkulu.”

Irma uphindze atfumele tincwadzi takhe lakunakekelwa khona bantfu lasebakhulile. Utsi: “Lomunye make losakhulile wangishayela futsi watsi incwadzi lengambhalela yona yamdvudvuta kakhulu ngemuva kwekushona kwendvodza yakhe. Lomake utsi ugcina lencwadzi eBhayibhelini lakhe futsi uvame kuyifundza njalo ntsambama. Lomunye make losandza kushonelwa yindvodza yakhe utsi incwadzi lengamtfumelela yona yamsita kakhulu kwendlula inshumayelo yemfundisi. Bekanemibuto leminyenti ledzinga kuphendvulwa futsi wacela kungivakashela.”

Lomunye make lobekajwayelane na-Irma futsi lobekahlala khashane naye, wacela Irma kutsi ambhalele tincwadzi. Irma utsi: “Lomake watigcina tonkhe tincwadzi lengambhalela tona. Ngemuva kwekushona kwakhe, indvodzakati yakhe yangishayela. Yangitjela kutsi itifundze tonkhe tincwadzi lengatibhalela make wayo futsi ngemusa, yacela kutsi nayo ngiyibhalele tincwadzi letimayelana neliBhayibheli.”

Irma uwujabulela kakhulu umsebenti wekushumayela. Utsi: “Ngihlale ngicela Jehova kutsi angiphe emandla ekutsi ngichubeke ngimkhonta. Ngisho nobe ngingakhoni kushumayela emtini ngemuti, ngenta konkhe lengingakhona kukwenta.”