Taga 16:3​—“Shiyela Konkhe Lokwentako ENKHOSINI”

“Shiyela kuJehova konkhe lokwentako, nawenta njalo emacebo akho atawuphumelela.”​—Taga 16:3, Lihumusho Lemhlaba Lomusha.

“Shiyela konkhe lokwentako eNKHOSINI, futsi tinhloso takho tiyawuphumelela.”​—Taga 16:3, New International Version.

Tisho kutsini Taga 16:3?

Lesaga sicinisekisa labo labakhonta Nkulunkulu weliciniso kutsi noma yini labayihlelile itawuphumelela nangabe betsembela kuNkulunkulu ngekutsi bafune sicondziso sakhe baphindze basilandzele.

“Shiyela kuJehova konkhe lokwentako.” Ngaphambi kwekutsi tikhonti taJehovaa tente tincumo, ngekutitfoba tifuna sicondziso kuye. (Jakobe 1:5) Leni? Kungobe bantfu abakhoni kulawula tonkhe tintfo letenteka ekuphileni kwabo. (Umshumayeli 9:11; Jakobe 4:13-15) Ngetulu kwaloko, kungenteka bete kuhlakanipha kwekwenta loko labakufunako. Ngenca yaloku, bantfu labanyenti ngekuhlakanipha bashiyela konkhe labakwentako kuNkulunkulu. Loko bakwenta ngekuthantaza kuye kuze bacele sicondziso futsi baphile ngekuvumelana nentsandvo yakhe njengobe ivetwe eVini lakhe, liBhayibheli.​—Taga 3:5, 6; 2 KuThimothi 3:16, 17.

Emavi latsi “shiyela konkhe lokwentako eNKHOSINIb” ngalokucondzile asho kutsi “yekelela konkhe lokwentako eNKHOSINI” Ngekusho kwalenye incwadzi, lamavi akha sitfombe “sendvodza leyetfula umtfwalo wayo iwetfwese lenye indvodza lenemandla kunayo.” Labo labatitfobako futsi betsembele kuNkulunkulu bangaciniseka kutsi utawubasita futsi abanakekele.​—Tihlabelelo 37:5; 55:22.

Emavi latsi “konkhe lokwentako” awasho kutsi Nkulunkulu utawuphumelelisa nobe abusise noma ngabe yini bantfu labafuna kuyenta. Kuze batfole sibusiso saJehova, kufanele loko labafuna kukwenta kuvumelane netimiso taNkulunkulu kanye nentsandvo yakhe. (Tihlabelelo 127:1; 1 Johane 5:14) Nkulunkulu akababusisi bantfu labangamlaleli. Ecinisweni, “emacebo alababi uwenta angaphumeleli.” (Tihlabelelo 146:9) Ngesikhatsi lesifanako, uyabasekela labo labatitfoba kuye ngekutsi baphile ngetimiso takhe letiseBhayibhelini.​—Tihlabelelo 37:23.

“Emacebo akho atawuphumelela.” Lamanye emahumusho abeka lamavi ngalendlela: “tinhloso takho tiyawuphumelela.” EmiBhalweni yesiHebheru levamise kubitwa ngekutsi Lithestamente Lelidzala, ligama lelihunyushwe ngekutsi “tiyawuphumelela” liveta umcondvo wekubeka sisekelo, futsi ngalesinye sikhatsi lingasho kuphumelela kwendalo yaNkulunkulu. (Taga 3:19; Jeremiya 10:12) Ngendlela lefanako, Nkulunkulu utawuphumelelisa tinhloso talabo labenta lokulungile emehlweni akhe, abasite baphile imphilo lejabulisako.​—Tihlabelelo 20:4; Taga 12:3.

Loko Taga 16:3 letikhuluma ngako

Lesaga sabhalwa yiNkhosi Solomoni, leyabhala incenye lenkhulu yencwadzi yeTaga. Yasho taga letinyenti ngenca yekuhlakanipha lebeyikuphiwe nguNkulunkulu.​—1 Emakhosi 4:29, 32; 10:23, 24.

Kusehluko 16, Solomoni ucala ngekudvumisa kuhlakanipha kwaNkulunkulu nekuveta indlela labenyanya ngayo bantfu labatigcabhako. (Taga 16:1-5) Lesehluko siholela umfundzi esiphetfweni lesibalulekile lokusihloko lesivela kanyenti kulencwadzi yaTaga lesitsi: Bantfu bangahlakanipha mbamba futsi baphumelele nabangatfobeka baphindze bavumele Nkulunkulu kutsi acondzise tinyatselo tabo. (Taga 16:3, 6-8, 18-23) Leliciniso livela kanyenti eBhayibhelini.​—Tihlabelelo 1:1-3; Isaya 26:3; Jeremiya 17:7, 8; 1 Johane 3:22.

Bukela le-video lemfisha kuze ubone loko lokukhulunywa ngako kulencwadzi yeTaga.