Kuhunyushwa Kwemhlangano Wesifundza Wa-2020 Lonesihloko Lesitsi, “Hlalani Nijabula”!

NgaJuly nanga-August 2020, kutawube kukwekucala ngca kutsi bazalwane betfu emhlabeni wonkhe babukele umhlangano wesifundza ngesikhatsi lesifanako. Kuze loko kuphumelele, kudzingeke kutsi uhunyushwe futsi urekhodwe ngetilwimi letingetulu kwa-500. Ngalokuvamile, bekungatsatsa umnyaka nobe ngetulu kuwuhlela nekuwenta wonkhe lomsebenti. Kodvwa ngenca yetimo letibangelwe yi-coronavirus, kudzingeke kutsi bahumushi batsatse sikhatsi lesingephansi kwetinyanga letine kutsi bacedze kuhumusha Umhlangano Wesifundza Wa-2020 lonesihloko lesitsi, “Hlalani Nijabula”!

I-Translation Services ne-Global Purchasing leseNdlunkhulu Yemhlaba Wonkhe yaBoFakazi BaJehova yasita kulomsebenti lomkhulu kangaka. I-Translation Services yabona kutsi emacembu ebahumushi bewadzinga tintfo letengetiwe tekusebenta, ikakhulukati ema-microphone lasezingeni lelisetulu, kuze afeze lomsebenti. I-Global Purchasing yatsenga ema-microphone langu-1 000 futsi yahlela kutsi amikiswe etindzaweni letingaba ngu-200.

Kuze kongiwe imali, kwatsengwa ema-microphone lamanyenti futsi atfunyelwa endzaweni lesedvutane, abese apakishwa kabusha futsi atfunyelelwa bahumushi emhlabeni wonkhe. Kuwatsenga abe manyenti kwenta kutsi iyinye ibite imali lengaba ngu-E3 000 lokufaka ekhatsi nemali yekuyitfumela, futsi loko kwashipha kakhulu kunekuyitsenga ngayinye.

Kwadzingeka kutsi i-Global Purchasing iwatsenge futsi iwatfumele nga-April nangaMay 2020, ngaleso sikhatsi emabhizinisi lamanyenti besekangasebenti ngendlela levamile ngenca ye-coronavirus. Nanobe kunjalo, ngasekupheleni kwaMay, emahhovisi ekuhumusha lamanyenti, emahhovi eligatja kanye naletinye tindzawo tekuhumusha besekawatfolile.

Jay Swinney, lobuke i-Global Purchasing utsi: “Bekunekubambisana lokukhulu emkhatsini wematiko aseBethel kanye nemabhizinisi lehlukene lasita kulomsebenti. Sakhona kuwenta ngekushesha lomsebenti futsi sawusebentisa kahle kakhulu umnikelo webazalwane betfu nabodzadze ngenca yekusitwa ngumoya longcwele waJehova.”

Nicholas Ahladis, losebenta ne-Translation Services, utsi: “Bahumushi lebebaku-lockdown ngaleso sikhatsi bakhutsateka kakhulu nabatfola lama-microphone. Nanobe bebangekho ndzawonye nalabanye bahumushi kepha bebakhona kusebenta kanye kanye kuze buhumushe futsi barekhode tinkhulumo, ema-drama, kanye netingoma ngetilwimi letingetulu kwa-500.”

Lona ngulomunye wemisebenti lowentiwa kuze bazalwane emhlabeni wonkhe batfole Umhlangano Wesifundza Wa-2020 lonesihloko lesitsi, “Hlalani Nijabula”! Iminikelo yenu leniyente ku donate.jw.org nangaletinye tindlela yente sakhona kutsenga letintfo lebetidzingeka.