Kusita ‘Nakunetimphi Nemibiko Yetimphi’

Kulamalanga ekugcina silindzele ‘kuva ngetimphi kanye nemibiko yetimphi’ (Matewu 24:6) Nangabe bazalwane betfu babhekene nekucindzeteleka ngenca yaletentakalo, bayalutfola lusito labaludzingako. Kwatiswa Kwakamuva Lokuvela Esigungwini Lesibusako Kwa-2022 #3 kuvete kwatiswa lokudvudvutako mayelana nemsebenti wekusita lowentiwa e-Eastern Europe kulabo labatsintsekile ngenca yemphi lese-Ukraine. Bazalwane betfu basitene njani ngisho kunemphi? Lolusito lubatsintse njani bazalwane betfu base-Ukraine?

Yini Ledzingekako? Itawumikiswa Njani?

Mhlaka-24 February 2022, lokulilanga leyacala ngalo imphi e-Ukraine, iKomidi Yebachumanisi yaniketa imvume yekutsi kusetjentiswe imali letsite kuze kusitwe bazalwane e-Ukraine. Ngekushesha ligatja lase-Ukraine latsenga tintfo kulelive kuze litimikise kubazalwane lisebentisa emaKomidi Ekusita Nakuvele Tehlakalo langu-27

Ngetulu kwelusito loluvela egatjeni lase-Ukraine, ngekushesha bazalwane labavela Endlunkhulu Yemhlabawonkhe yaBoFakazi BaJehova bacala kucabanga ngetindlela lebebangasita ngato bazalwane. IKomidi Yebachumanisi kanye neKomidi Yekushicilela lokungemakomidi eSigungu Lesibusako acela bazalwane labatsite labasebenta nelitiko le-Global Purchasing kutsi basebente nebazalwane basemahhovisini eligatjeni lase Ukraine nelasePoland kuze batfole tindlela labangasita ngato. Bazalwane labasebenta e-Purchasing, e-Shipping, kanye nasetikweni letemitsetfo kulamagatja lamabili, LiKomidi Leligatja lase-Ukraine kanye nebazalwane labasebenta ku-Global Purchasing Department bebahlangana onkhe malanga kuze bacoce ngetindlela tekusita.

Jay Swinney we-Global Purchasing Department utsi: “Besifuna kumikisa kudla kanye netintfo tekugeza bazalwane bendzawo lebetijwayele. Nobe kunjalo, kwati loko lebekudzingeka bekuyincenye lencane yalenkinga. Bekudzingeka simikise letintfo eUkraine ngendlela lephephile nalesheshako.”

Mhlaka 9 March, 2022, bazalwane bese bati kutsi ngutiphi tintfo lebetidzingeka. Bekutawumikiswa emabhokisi ekudla, lokufaka ekhatsi kudla lokusetikoteleni njengenyama, ifishi, i-rice emabhotjisi kanye netintfo tekugeza letifaka ekhatsi tinsipho kanye nalokunye. Ngaleso sikhatsi bekucatjangwa kutsi tintfo tenyanga temuntfu munye betingabita ema-dollar aseMelika lacishe abe ngu-65. Ngenca yekutsi tinkhulungwane tebazalwane betfu betidzingile iKomidi Yebachumanisi yagunyata kutsi kusetjentiswe imali lenyenti kuze basitwe. Kodvwa letintfo betitawumikiswa njani kulabazalwane ngendlela lephephile?

NgaMarch 13, bazalwane lababili basuka e-gatjeni lasePoland bamikisa tintfo e-Lviv, e-Ukraine kuze bahlole kutsi tintfo tingamikiseka yini. Emalangeni lambalwa ngaphambi kwekutsi bahambe, ligatja lasePoland kanye nelase-Ukraine asita labazalwane kutsi balungele indlela. Ligatja lasePoland labalungisela timphepha tekwewela luthaka kuze bamikise letintfo tekusita, futsi bacinisekisa kutsi netimoto talabazalwane tibhalwe ngalokucacile kutsi tiyoniketa lusito. Baphindze basebentelana neligatja lase-Ukraine kuze kutfolakale indlela lejubelako nangabe labazalwane sebaluwelile luthaka sebase-Ukraine. Ngekulungiselela kahle kanye nangesibusiso saJehova, letintfo tendluliselwa emaKomidini Lasita Nakuvele Tehlakalo angakendluli ema-awa langu-24, ngemuva kwekutsi tifike e-Lviv, futsi labazalwane babuyela ePoland ngekuphepha.

Ngisho nobe loluhlolo lwekucala lwekumikisa tintfo tekusita lwaphumelela, labazalwane bamikisa tintfo tekusita letingephansi kwelithani. Kucatjangwa kutsi kudzingeka tintfo tekusita letingaba ngemathani langu-200! Tintfo letinyenti kangaka betingahanjiswa njani tiphindze tisakatwe ngekushesha lokukhulu?

“Bantfu Bakho Batatinikela Ngekutitsandzela”

Ngemuva kwekufundza imibiko leku-jw.org ngendlela bazalwane betfu labatsintseke ngayo ngenca yalemphi lese-Ukraine, bantfu labehlukahlukene emhlabeni wonkhe bafuna kusita. Bantfu labanyenti labahlala khashane banikela ngemali emsebentini wemhlabawonkhe waBoFakazi BaJehova, bati kutsi iminikelo yabo itawusetjentiswa kahle. Labanye labahlala emaveni labomakhelwane bakwati kunikela ngamandla abo, sikhatsi sabo kanye netintfo tabo kuze basite. Naka nati tibonelo letimbalwa.

E-Poland, emavolontiya ahlanganisa tinkhulungwane tetintfo tekusita kanye nemakhadi lebekadvwetjwe bantfwana. Bartosz Kościelniak, lolilunga le-Purchasing Department egatjeni lasePoland utsi: “Ngalifundza kanyenti lelivesi lelikuTihlabelelo 110:3, lelitsi, ‘Bantfu baJehova batatinikela ngekutitsandzela’. Kutibonela ngewami emavolontiya lamanyenti lebekanesifiso sekusita futsi akulungele kusebenta kwangikhombisa kubaliciniso kwalamavi.”

Lomunye waBoFakazi BaJehova lonenkapani yekuhambisa tintfo kulamanye emave, futsi lowanikela nge-truck yakhe nanga-petrol kuze kusite kulesimo utsi, “Kimi, leli kwaba litfuba lekutsi ngikhombise kutsi ngiyamtsandza Jehova kanye nebazalwane bami. Ngakujabulela kusita.” Kucatjangwa kutsi kwanikelwa emalitha langu-7 700 a-petrol, futsi bazalwane basebentisa emandla abo kanye nesikhatsi sabo kuze bashayele emakhilomitha langu-48 000 nabamikisa letintfo!

Ngenca yelutsandvo kanye nesifiso bazalwane kanye nabodzadzewetfu lebebanaso, ngaMarch 28​—emalangeni nje langu-15 ngemuva kwekumikiswa kwetintfo tekusita tekucala bese kumikiswe emathani langu-100 ekudla, tintfo tekugeza, kanye netintfo tekwelapha e-Ukraine! Ngenca yetintfo letinyenti bazalwane labanikela ngato, yase iyancipha imali yeminikelo leyasetjentiselwa kutsenga letintfo tekusita. Kuze kube ngunamuhla, BoFakazi BaJehova bamikise tintfo letingetulu kwemathani langu-190 kuze tiyosita e-Ukraine. Letintfo tibasite njani bazalwane betfu?

“Betikhombisa Indlela Lenisitsandza Ngayo!”

Tatsi letintfo natifika e-Lviv, emaKomidi Lasita Nakuvele Tehlakalo kulo lonkhe lase-Ukraine atimikisa kulabo lebebatidzinga. Letintfo tamikiswa emadolobheni lamanyenti, lamanye awo akhashane ngemakhilomitha langu-1 300 nawusuka e-Lviv. Ngisho nobe lomsebenti waphumelela, kodvwa watsatsa sikhatsi lesidze.a

Markus Reinhardt, lolilunga leKomidi Yeligatja e-Ukraine, utsi: “Ngesikhatsi salesehlakalo, bazalwane labanyenti batibonela ngewabo indlela Jehova labatsandza ngayo kanye netibusiso tekulandzela ticondziso tenhlangano yakhe ngisho nangaphambi kwekutsi kugadle inhlekelele. Nasi sibonelo, bonkhe bakhutsatwa kutsi bagcine kudla nemanti lokungatsatsa liviki emakhaya abo. Mayelana nalesicondziso, lomunye umzalwane longulomdzala lokutsiwa ngu-Anton e-Kyiv watsi: ‘Inhlangano yaJehova isente salungela timo letimatima, futsi sibonga kakhulu ngaloko. Kuba nekudla, emanti kanye ne-radio kusindzise kuphila kwetfu.’ Sibabonga kakhulu bazalwane labalandzele lesicondziso ngekutitsandzela ngobe loko kunikete Lihhovisi Leligatja sikhatsi sekubalungiselela tintfo labatidzingako.”

Bazalwane bative njani ngaletintfo tekusita? Mykola naZinaida, labahlala e-Kharkiv, baveta indlela labativa ngayo nabatsi: “Sitsintseke kakhulu ngendlela lenisinakekele ngayo. Sibonga kakhulu ngekusiniketa kudla kanye netintfo tekwelapha. Jehova bekanatsi kuko konkhe loku.” Valentyna lohlala endzaweni lefanako utsi: “Kusukela lemphi yacala bekunemalayini lamadze etitolo. Bekumatima kutsenga tintfo lebesitidzinga. Kodvwa Jehova bekayati futsi ayibonile lenkinga. Wamisa bazalwane kuze basiletsele tintfo lebesitidzinga emakhaya, futsi letintfo bekunguleto lebesitidzinga mbamba! Kusetimeni letimatima njengaleti, ngesikhatsi simo singetsembisi lapho uva uphindze ubone khona indlela Jehova kanye nenhlangano yakhe labakukhatsalela ngayo. . . . Kujabulisa kakhulu kutfola lusito nekusekelwa lokudzingako ngesikhatsi lokudzinga ngaso.”

Yevhen na-Iryna, lababaleka basuka e-Mariupol, batsi: “Sibonga kakhulu ngekusekela kanye nekunakekela umndeni wetfu. Lolusito lufike ngesikhatsi. Ekucaleni besicabanga kutsi lamabhokisi anetintfo lesitidzingako nje kuphela, kodvwa sitsite nasiwavula sabona kutsi akhombisa nendlela lenisitsandza ngayo!”

Siyaciniseka kutsi nikubonile kusebenta kwemoya waJehova kanye nesicondziso sakhe nakumikiswa letintfo tekusita ngesikhatsi ‘kunemphi.’ Iminikelo yenu yekutitsandzela leyentelwa umsebenti wemhlaba wonkhe, leminyenti yayo leyentiwa kusetjentiswa i-website letsi, donate.jw.org, nayo idlale indzima lebalulekile. Sinibonga kakhulu ngemoya wenu wekwephana!

Kusita Ngendlela Lesheshako Nalephephile

1. 

   NgaFebruary 24, 2022: IKomidi Yebachumanisi yagunyata kutsi kusetjentiswe imali letsite kuze kusitwe e-Ukraine, lokwenta kutsi ligatja likhone kucala kuniketa lusito

2. 

   NgaFebruary 24–March 8, 2022: Ligatja lase-Ukraine latsenga tintfo futsi lacala kutitfumela etindzaweni letehlukahlukene lisebentisa EmaKomidi Lasita Nakuvele Tehlakalo. Ligatja lase-Ukraine laphindze lemukela tintfo letivela e-Poland futsi latimikisa etindzaweni letehlukahlukene

3. 

   NgaMarch 9, 2022: IKomidi Yebachumanisi yagunyata kutsi kumikiswe tintfo tekusita e-Ukraine

4. 

   NgaMarch 10–12, 2022: Kwentiwa emalungiselelo ekuhlola kutsi kudla kungamikiseka yini e-Lviv, e-Ukraine kusuka e-Poland

5. 

   NgaMarch 13, 2022: Kudla kanye naletinye tintfo kutfunyelwa eLviv, e-Ukraine kusuka ePoland

6. 

   NgaMarch 14–16, 2022: Ehholweni lemhlangano lelisedvute nasePoznan, ePoland, emavolontiya e-Local Design/Construction ahlangana kuze apakishe kudla kanye netintfo tekugeza

7. 

   NgaMarch 17, 2022: Ngemuva kwemalanga lamane kumikiswe tintfo tekusita kwekucala, kwamikiswa tintfo tekusita letingemathani langu-13 emnceleni wase-Ukraine

8. 

   NgaMarch 21–27, 2022: Kwentiwa lokufanako ngetintfo lebetisele, tapakishwa ePoland tamikiswa e-Ukraine futsi lapho tamikiswa etindzaweni labetidzingeka khona angakapheli ema-awa langu-24

9. 

   NgaMarch 28, 2022: Angakapheli emalanga langu-20 kutfolakele imvume yekumikisa tintfo tekusita e-Ukraine, kwamikiswa emathani langu-100 etintfo letifaka ekhatsi kudla, tintfo tekugeza, kanye netintfo tekwelapha e-Ukraine

Kuze kube ngunamuhla, BoFakazi BaJehova sebatfumela tintfo tekusita letingetulu kwemathani langu-190 e-Ukraine.