Kusita Nakuvele Tehlakalo Nga-2023​—“Sitibonele Ngewetfu Lutsandvo LwaJehova”

LiBhayibheli laphrofetha kutsi “sive sitawuvukela lesinye sive” futsi kutawuba netehlakalo ngesikhatsi “sekuphela kwalelive.” (Matewu 24:3, 7) Sikubonile kugcwaliseka kwalesiphrofetho kulomnyaka wemsebenti wa-2023.a Nanobe kube netimphi kanye netehlakalo temvelo emaveni lacishe abengu-100, BoFakazi BaJehova bakhombise lutsandvo lolufana nelwaJehova. Kanjani?

Kulomnyaka wemsebenti wa-2023, tehlakalo temvelo kanye netehlakalo letibangwa bantfu titsintse bazalwane betfu labangetulu kwa-200. Kuze basite kuletehlakalo, BoFakazi BaJehova basebentise imali lengetulu kwa-10 million dollarsb letsetfwe emnikelweni leyentelwa umsebenti wemhlaba wonkhe. Loku kwengete emnikelweni lowentiwe bazalwane bendzawo kuze basite bazalwane nabodzadze labatsintsekile. Naka kutsi iminikelo isetjentiswe njani kuze kusitwe bazalwane labatsintfwe tehlakalo letimbili kuletinyenti letentekile.

“Lutsandvo Sibili Lukhona Mbamba”

Letinye tindzawo taseNigeria tiba netikhukhula njalo ngemnyaka. Nobe kunjalo, tikhukhula letenteka nga-October 2022 taba nguletimbi kakhulu kunaleto labake babhekana nato eminyakeni lengu-10 leyengcile. Konakala emasimu langetulu kwema-hectare langu-676 000 futsi nebantfu labangetulu kwa-2 million basala bete emakhaya. Ngekushesha, ligatja laseNigeria lamisa emaKomidi Lasita Nakuvele Tehlakalo, kuze asite bazalwane ngetintfo labatidzingako futsi abasite nasebuhlotjeni babo naNkulunkulu.

Batsintseke Njani Bazalwane Betfu Nabodzadze?

• Bamemeteli labangu-7 505 basala bete emakhaya

• Emakhaya langu-860 alimala futsi lamanye abhidlika

• Kwakhukhuleka emaHholwa eMbuso langu-90 kanye neLihholwa Lemhlangano linye

Kusetjentiswa kwemnikelo

Kwasetjentiswa imali lengetulu kwa-$250 000 nakuvele tehlakalo kuze:

• Kutsengwe kudla lokufaka ekhatsi i-rice, emabhontjisi, kanye nema-noodles

• Kutsengwe tintfo tasekhaya letifaka ekhatsi bo-mattress kanye nemanethi lavikela timbuzulwane

• Kulungiswe emakhaya lalimele nobe kwakhiwa kabusha lawo labhidlikile

Yini leyentiwa bazalwane betfu kuze baciniseke kutsi iminikelo isetjentiswa kahle? Lenye indlela kwaba kubuka sakhiwo ngasinye kutsi singalungiseka yini. Nangabe leso sakhiwo sidzinga kwakhiwa kabusha, bebasakha basebentisa indlela lemelula yekwakha levamile kuleyo ndzawo.

Bazalwane betfu nabodzadze labatfole lolusito babonga kakhulu. Lomunye dzadze watsi: “Letikhukhula takushintja kuphila kwetfu, ngobe talimata emasimu etfu taphindze tabhidlita nemakhaya etfu. Sajabula nakufika bazalwane nabodzadze batosisita ngalo lelolanga futsi basiniketa nendzawo lekahle yekuhlala. Lusito lolukhulu lolwafika kwaba ngalesikhatsi lihhovisi leligatja lisitfumelela kudla. Samangala nasibona umbhalo waJohane 13:34, 35 ugcwaliseka ekuphileni kwetfu. . . . Lutsandvo sibili lukhona mbamba. Mine nemndeni wami sibabonga kakhulu bazalwane ngekusiniketa lusito ngesikhatsi lesifanele.”

Labanye endzaweni yakitsi babona nasitfola lolusito. Lesinye sikhulu saseSabagreia, eBayelsa State, satsi: “Tinyenti tinhlangano kanye nemasontfo emhlabeni, kodvwa boFakazi BaJehova kuphela labente intfo lenjengalena. . . . Inhlangano [yenu] ingulencono kakhulu emhlabeni wonkhe.”

“Satibonela Ngewetfu Lutsandvo LwaJehova”

NgaFebruary 2023, imililo lengetulu kwa-400 yabanga umonakalo lomkhulu eChile. Lomlilo washisa indzawo lengetulu kwa-430 000 hectares waphindze wabhidlita umgwaco, takhiwo, emaphayiphi, kanye nalokunye lokunyenti. Bantfu labacishe babe ngu-8 000 babalekiswa bamikiswa endzaweni lephephile. Ngekushesha ngemuva kwalesehlakalo, leligatja lacala kulungisa tintfo tekusita.

Batsintseke Njani Bazalwane Betfu Nabodzadze?

• Bamemeteli labangu-222 babalekiswa

• Emakhaya langu-20 abhidlika

Kusetjentiswa kwemnikelo

Kwasetjentiswa imali lengetulu kwa-$200 000 nakuvele lesehlakalo kuze:

• Kutsengwe kudla nemanti

• Kutsengwe gasolina, tintfo teku-cleaner kanye nemaphilisi

• Kwakhiwe kabusha emakhaya labhidlikile

Lomunye umndeni wamangala kakhulu nawutfola kutsi ulahlekelwe ngiko konkhe lebewunako, lokufaka ekhatsi likhaya lawo kanye nelibhizinisi. Loko kwenta lomndeni kutsi ubebete kwekutiphilisa. Ngemuva kwemalanga lambalwa loku kwentekile, lomndeni weva buhlungu kakhulu nawubona lendzawo lapho bekunendlu yawo khona seyingena lutfo. Batsi nababona bazalwane bakha kabusha emakhaya abo, base bativa bancono. Lutsandvo labaluboniswa ngulamavolontiya lwabasita bakhona kubeketelela lesimo. Lokwakhelwa likhaya lawo, kwenta lomndeni kutsi nawo usite lamavolontiya nawakha likhaya lalomunye umzalwane.

Banyenti bazalwane nabodzadze labatsintseka nababona lomsebenti wekusita. Lomunye umzalwane waze watsi: “Lihle kakhulu lelilungiselelo laJehova lemaKomidi Lasita Nakuvele Tehlakalo. Ngelilanga lelilandzela lelesehlakalo bazalwane befika kuze basisite ngetintfo letisisekelo. Siyatsintseka nasifundza ngelusito bazalwane kulamanye emave labalutfolako nakuvele tehlakalo. Kodvwa kwehluka kakhulu nakwenteka kuwe, ubese uyitsandza kakhulu inhlangano yaJehova, utsandze nendlela bazalwane lababulingisa ngayo buntfu baJehova kanye nendlela labatimisele ngayo kusisita ngetintfo lesitidzingako, ngebuhlobo betfu naNkulunkulu kanye nangendlela lesitiva ngayo. Sitibonele ngewetfu lutsandvo lwaJehova.”

Njengobe kuphela kwalelive kusondzela, sitochubeka sibhekana netehlakalo. (Lukha 21:10, 11) Nobe kunjalo, siyabona kutsi iNkhosi yetfu Jesu Khristu isebentisa libandla lebuKhristu kuze ikhombise kutsi inatsi “onkhe emalanga kuze kube sekupheleni kwalelive.” (Matewu 28:20) Nikhombisa kutsi nisekela uMbuso kanye neNkhosi yawo lenelutsandvo njengobe ninikela ngesikhati senu nangemandla enu futsi ninikelela umsebenti wemhlaba wonkhe nisebentisa i-website letsi, donate.jw.org kanye nangaletinye tindlela. Sibonga kakhulu ngekwephana kwenu.