Kwenta EmaHholwa EMbuso Aphephe Ngesikhatsi Se-COVID-19

“Sigungu Lesibusako sincume kutsi kusukela ngeliviki la-April 1, kutawubuyelwa etindzaweni tekukhontela kuze kubanjelwe khona imihlangano. Loku kutawentiwa ngekuvumelana nemitsetfo lebekwe nguhulumende wendzawo mayelana nekuhlangana.” Lesimemetelo sakhishwa ku-website letsi jw.org ekucaleni kwaMarch 2022, futsi sajabulisa BoFakazi BaJehova emhlabeni wonkhe, kodvwa i-COVID-19 beyingakapheli.a Nguluphi lushintjo, emathulusi kanye naletinye tintfo lebekudzingeka kuze kuvikelwe labo lebebatakuta kulemihlangano ngesikhatsi salomkhuhlane? Ngemuva kweminyaka lemibili kungayiwa emaHholweni eMbuso, lamaHholwa bekatawube akulungele yini kutsi kuphindze kubanjelwe kuwo imihlangano?

Ecinisweni, besekuphele tinyanga bazalwane balungiselela kutsi kuphindze kubanjelwe imihlangano emaHholweni eMbuso.

Tisombululo Letingafani, Tetinkinga Letingafani

Ngemuva kwenyanga kuya emaHholweni eMbuso kumisiwe, i-Worldwide Design/Construction Department (WDC), leseWarwick, eNew York, yacala kuhlolisisa indlela i-COVID-19 beyitawutsintsa ngayo kusetjentiswa kwemaHholwa eMbuso kanye nalebekutawudzingeka kwentiwe kuze letindzawo tetfu tekukhontela tiphephe.

Lebekudzingeka eveni lelitsite bekwehlukile kulebekudzingeka kulelinye. Matthew De Sanctis, losebenta neWDC utsi: “Kulamanye emave inkinga bekukuswelakala kwetindzawo tekugeza tandla. Nangabe emaHholwa eMbuso ete emanti, kudzingeka bawatsenge nobe bayowakha emfuleni. Kulamanye emave, labanye bohulumende babeke imitsetfo lemayelana nekutsi tindzawo lokuhlanganelwa kuto kufanele tingenise kahle umoya futsi tibe netimphawu letimayelana nekuhlanteka.”

Yini bazalwane betfu labayentile kuze babhekane naletinkinga? Matthew uchubeka atsi kutfolakele kutsi emaHholweni eMbuso lamanyenti “letinkinga tingancotjwa ngendlela lemelula nalengakaduli.” Sibonelo nje, ePapua New Guinea kwentiwa tindzawo tekugeza tandla kusetjentiswa tigubhu letingema-20 liters letifakwe timpompi. Ngako bazalwane bakhona kutfola letintfo tekugeza tandla ngemali lengaba ngu-$40 (U.S.). Kuze kusitwe emaHholwa eMbuso e-Afrika, kwatsengwa titeshi tekugezela tandla letisezingeni lelisetulu letingu-6 000 e-Asia.

Lolunye lushintjo lolwentiwe lufaka ekhatsi kufaka ema-fan kanye naletinye tintfo letingenisa umoya kuze emaHholwa eMbuso abe nemoya lohlantekile. Emabandla lamanyenti atsenge tinsimbi letindze tekuhambisa imibhobho kuze lemibhobho ingatsintfwa ngetandla. Kwentiwe nemetamo yekugcina tindzawo letitsintfwa kakhulu njengema-handle etivalo kanye netimpompi kuhlantekile kuze kungatselelwana lomkhuhlane. Kulamanye emabandla, etindlini tangasense kufakwe timpompi letitivulekelako nawusondzeta sandla. Kuze kwentiwe lushintjo loludzingekile eHholweni leMbuso ngalinye eChile, kusetjentiswe imali lelinganiselwa ku-$1 400 (U.S.).

Ngisho nobe bazalwane basebente kamatima kuze bente emaHholwa etfu aphephe, kudzingeke baciniseke kutsi bonga iminikelo. Sibonelo nje, kulamanye emave basebentise lusito lwahulumende kuze batsenge titeshi tekugeza tandla kanye netinsimbi letindze tekuhambisa imibhobho. Emahhovisi emagatja abambisene kuze atsenge letintfo ngebunyenti kunangesikhatsi lesendlulile. Ngalokuvamile, emagatja kanye ne-Global Purchasing Department bahlela kutsenga tintfo ngalokucondzile lapho takhiwa khona, lokwenta letintfo tishiphe futsi tiletfwe ngekushesha.

“Kwangenta Ngaciniseka Kutsi Ngiphephile”

Lamalungiselelo ekwenta emaHholwa eMbuso aphephe, avikele aphindze acinisekisa labo labeta matfupha emihlanganweni. Dulcine, dzadze wasePeru, uyavuma kutsi ‘wesaba’ nakeva kutsi sesitawubuyela emaHholweni eMbuso. Utsi: “Ngabanjwa yi-COVID-19 ngekushesha nje nayisandza kucala. Ngako bengingakhululeki kuya eHholweni leMbuso ngobe bengati kutsi kungenteka ngiphindze ngiyitfole. Nobe kunjalo, ngatsi nangifika eHholweni leMbuso ngabona kutsi labadzala bente lokunyenti kuze siphephe, njengekwenta titeshi tekugeza tandla, tinsimbi letindze tekuhambisa umbhobho kanye neluhlelo lwekuhlanta lihholwa ngaphambi kanye nangemuva kwemhlangano ngamunye. Loku kwangenta ngaciniseka kutsi ngiphephile.”b

Sara, dzadze waseZambia, wabhekana nenkinga leyehlukile. Utsi: “Etinyangeni letimbalwa letendlulile, umyeni wami wabulawa yi-COVID-19. Bengikhatsateke ngekutsi ngitativa njani nangiya matfupha emhlanganweni kwekucala ngaphandle kwakhe.” Nyalo Sara utiva njani ngekuya eHholweni leMbuso? Utsi: “Kuya matfupha emhlanganweni kungikhombisile kutsi Jehova uyasisekela kulamalanga ekugcina. Nyalo ngiva shengatsi ngitfola tikhutsato, lutsandvo kanye nekusekelwa lengikudzingako kulabadzala belibandla kanye nakubo bonkhe bazalwane nabodzadze kunangesikhatsi lesendlulile.”

Bazalwane betfu labatsandzekako emhlabeni wonkhe bayajabula ngelitfuba lekubuyela emaHholweni eMbuso. Siyabonga ngeminikelo yenu, leminyenti yayo leyentiwa kusetjentiswa i-website letsi donate.jw.org. Leminikelo isisite saciniseka kutsi tindzawo tetfu tekukhontela tiphephile kuze sihlanganele kuto.