Tincola Letisetjentiselwa “Kushumayela Kuto Tonkhe Tive”

Sekuphele iminyaka lengu-10 sisebentisa tincola tekushumayela letidvonsa emehlo ebantfu. Emhlabeni wonkhe, bantfu nababona letincola etindzaweni letehlukahlukene bayati kutsi taboFakazi. Tentiwe ngendlela leyehlukile futsi kumelula kutisebentisa. Kungenteka uvumelana nadzadze Asenata wasePoland, lotsi: “Letincola tentiwe ngendlela lemelula futsi tiyakhanga, kumelula kutisebentisa.”

Uke watibuta yini kutsi takhiwe njani letincola?

Takhiwe Ngendlela Yekutsi Tisebentiseke Kamelula

Nga-2001, Sigungu Lesibusako saniketa imvume yekutsi bazalwane nabodzadze baseFrance bacale kwenta luhlolo lwekusebentisa tindlela letehlukahlukene tekushumayela etindzaweni tawonkhe wonkhe, lokufaka ekhatsi kusebentisa tincola tekushumayela. Betama tincola letehlukahlukene. Sibonelo nje, bashintja tincola tekutfwala imitfwalo kanye netincola tekufaka tintfo nawutsenga esitolo kuze bakhangise kuto tincwadzi tetfu. Ekugcineni ligatja laseFrance lakhetsa incola lekahle, leyo bamemeteli labayisebentisa iminyaka leminyenti.

Bazalwane baseFrance bajabula ngemiphumela labayitfola ngekucala lendlela yekushumayela etindzaweni tawonkhe wonkhe. Ngako nga-2011, Sigungu Lesibusako sagunyata kutsi kuhlolwe lenye indlela yekushumayela etindzaweni tawonkhe wonkhe eNew York City, e-U.S.A, kusetjentiswa tincola kanye nematafula. Emahlahlandlela lebekayincenye yaloluhlolo, ngekushesha abona kutsi kusebentisa letincola bekukahle kakhulu, nekutsi bekumelula kuhamba nato nobe kuphi. Lamahlahlandlela aphindze aveta kutsi ingatfutfukiswa njani indlela letincola letakhiwe ngayo. Tincola tekucala lebetakhiwe ngesigodvo betisindza futsi bekumatima kwehla nobe kwenyuka nato etitebhisini. Ngako takhiwa kabusha kuze tingasindzi kodvwa ngesikhatsi lesifanako tingabi melula kangangekutsi tingaze tipheshulwe ngumoya. Letincola letinsha letakhiwa betinemasondvo lamakhudlwana lokwenta kutsi tikhone kuhamba nobe kuphi. Ngetulu kwaloko kwengetwa sikhala lapho kungabekwa khona letinye tincwadzi.

Loluhlolo lwaphumelela! Ngako nga-2012, Sigungu Lesibusako saniketa imvume yekutsi kusetjentiswe tincola tekushumayela emhlabeni wonkhe. Bazalwane bakhuluma nenkapane lebeyakha letincola kutsi itakhe tibe tinyenti isebentisa tintfo letingasindzi futsi letingeke tisheshe tiguge.

Njengobe iminyaka ihamba kwentiwa lushintjo loluncane kuletincola. Nasi sibonelo, nga-2015, kwengetwa kwekumbonya letincwadzi lokuli-plastic kuze tinganetfwa. Dina lohlala eveni laseGeorgia, ubonga kakhulu ngaloku. Utsi, “Lencola inekwekwembatsa lokuvikela letincwadzi emvuleni.” Nga-2017, kwentiwa ema-poster lane-magnet ngaletinye tilwimi kuze atokhona kunamatsela kulencola. Tomasz, umzalwane wasePoland, utsi: “Nasisasebentisa ema-poster lananyatsiselwa nge-glue bekubamatima kuwashitja. Ngako lawa lane-magnet enta tintfo tibe melula.” Nga-2019, kwentiwa lolunye futsi lushintjo. Kwashintjwa tintfo letisetjentiswako nakwakhiwa letincola kuze tingasheshi tiguge.

Kwakhiwa Kwaletincola Tekushumayela

Tincola tekushumayela takhiwa yinkapane yinye bese tintfunyelwa emhlabeni wonkhe. Incola yekushumayela iyinye ibita $43 U.S., ingakabalwa imali yekutihambisa kanye naletinye tindleko. Kuze kube ngulamuhla, kusetjentiswe imali lengetulu kwa-$16 million U.S. kuze kutsengwe tincola, futsi letingetulu kwa-420,000 titfunyelwe emabandleni lasemhlabeni wonkhe.

Kuze kusetjentiswe kahle iminikelo, letincola titsengwa ngebunyenti. Ngetulu kwaloko, emabandla sewangakhona ku-order ema-parts latsite lalimele aletincola kuze atilungisele tona kunekutsi kutsengwe tincola letinsha.

Kusebentisa Tincola Kuze Sishumayele

Bamemeteli labasemhlabeni wonkhe bayakujabulela kusebentisa letincola tekushumayela. Martina, waseGhana, utsi: “Etikhatsini letinyenti nasishumayela ngitsi lesiya kubantfu, kodvwa lengikutsandzako ngaletincola kutsi bantfu sengibo labeta kitsi, ngisho nebantfu labatendlulelalako nje bayashumayeleka.”

Kulelinye live e-Africa, lenye indvodza yeta encoleni yekushumayela kuze itfole tincwadzi ngelulwimi lwayo. Ngemuva kweliviki yabuya yatsi: “Ngitifundze tonkhe letincwadzi. Umlayeto lokuto ubalulekile. Ngifuna kuyowucocela umndeni wami lohlala endzaweni lesemakhaya,” lokuyindzawo lekhashane ngemakhilomitha langu-500. Ngemuva kwetinyanga letimbili yaphindze yabuya yatsi: “Labantfu labahlala lendzaweni lesemakhaya batifundze tonkhe letincwadzi tenu futsi bawujabulele lomlayeto lokuto. Bafuna kuba BoFakazi BaJehova. Kodvwa banemibuto. Sibonelo nje, bayati kutsi kuze ubhajatiswe kufanele ucwiliswe emantini. Nobe kunjalo kute umfula lendzaweni yangakitsi. Kufanele site lapha yini kuze sibhajatiswe?” Labamemeteli bachumanisa lendvodza nelihlahlandlela lelikhuluma lulwimi lwayo. Kusukela lapho babe netincocniswano letijabulisako.

Kuyajabulisa kubona tincola tekushumayela tisetjentiswa kuze “tindzaba letimnandzi tiviwe ngito tonkhe tive.” (Matewu 24:14) Siyitsatsa kuphi imali yekutsenga letincola? Siyitsatsa eminikelweni leyentelwa umsebenti wemhlaba wonkhe, leminyenti yayo leyentiwa kusetjentiswa i-website letsi donate.jw.org. Sibonga kakhulu ngekwephana kwenu.