Incwadzi Yesibili YaSamuweli
14 Jowabe indvodzana yaSeruya+ weva kutsi inkhosi ilangatelela kubona Absalomu.+ 2 Ngako Jowabe watfumela livi eThekhowa+ kutsi kuyobitwa umfati lohlakaniphile, wamtjela lamavi latsi: “Ngicela wente shengatsi uzilile bese ufaka tinzilo, ungawagcobisi emafutsa.+ Ubokwenta njengemfati lesekuphele sikhatsi lesidze azilele umuntfu lowashona. 3 Ngemuva kwaloko ubongena ngekhatsi enkhosini ufike usho emavi lengitakutjela wona.” Jowabe wabese uyamtjela lomfati kutsi atsini.
4 Lomfati waseThekhowa waya enkhosini wefike wawa ngebuso embikwayo wakhotsama, wase utsi: “Ngicela ungisite nkhosi.” 5 Inkhosi yamphendvula yatsi: “Yini inkinga?” Yena watsi: “Maye nkhosi yami, mine ngingumfelokati; indvodza yami yashona. 6 Mine ncekukati yakho, benginemadvodzana lamabili lalwa esigangeni. Kute lobekangawalamula, ngako lenye yabulala lelenye. 7 Nyalo umndeni wonkhe sewumelene nami, incekukati yakho, futsi lomndeni utsi, ‘Sinike lona lowabulala umnakabo kuze simbulalele kutsi wabulala umnakabo,+ ngisho noma ngabe loko kusho kubulala indlalifa.’ Sebafuna kucima lilahle lekugcina lelilotitako* futsi bashiye kungasenalutfo egameni lendvodza yami nobe losaphila* emhlabeni.”
8 Inkhosi yase itsi kulomfati: “Buyela ekhaya lakho, ngitayilungisa indzaba yakho.” 9 Lomfati waseThekhowa wase utsi enkhosini: “Awu nkhosi yami, shengatsi licala lingaba kimi nasendlini yakitsi, futsi inkhosi nesihlalo sayo sebukhosi babe msulwa.” 10 Inkhosi yabese itsi: “Nangabe kukhona lokutjela lokwehlukile, ubomletsa lakimi. Angeke aphindze akuhluphe.” 11 Lomfati waphendvula watsi: “Ngiyakucela nkhosi, khumbula Jehova Nkulunkulu wakho, kuze umphindziseli wengati+ angenti umonakalo futsi angayicotfuli lendvodzana yami.” Inkhosi yaphendvula yatsi: “Ngifunga Jehova Nkulunkulu lophilako,+ kute ngisho nalunye lunwele lwendvodzana yakho lolutawuwela phansi.” 12 Lomfati wase utsi: “Ngiyacela, incekukati yakho ayikhulume livi enkhosini yayo.” Inkhosi yatsi: “Khuluma.”
13 Lomfati watsi: “Kungani-ke ucabange kwenta intfo lenjena kubantfu baNkulunkulu?+ Nangabe inkhosi ikhuluma ngalendlela itetfwesa licala ngobe ayiyibuyisi indvodzana yayo leyabaleka.+ 14 Vele sitawufa futsi sitawufana nemanti lacitfwa phansi emhlabatsini langeke aphindze abutfwe. Kodvwa Nkulunkulu abengeke abulale muntfu futsi uyacabanga ngetizatfu letenta loyo lombalekele kutsi angahlali phakadze lapho abalekele khona. 15 Ngitele kutewusho loko enkhosini yami ngobe bantfu bangesabisile. Ngako incekukati yakho itsite, ‘Ase ngikhulume nenkhosi. Mhlawumbe inkhosi itawenta ngekuvumelana nesicelo sesigcili sayo. 16 Inkhosi ingase ilalele futsi isindzise sigcili sayo kumuntfu lofuna kucotfula mine kanye nendvodzana yami lokukuphela kwayo, futsi basemuke lifa Nkulunkulu lasinike lona.’+ 17 Ngako incekukati yakho itsite: ‘Shengatsi livi lenkhosi yami lingangiletsela kuphumula,’ ngobe inkhosi yami ifana ncamashi nengilosi yaNkulunkulu weliciniso ekwehlukaniseni lokuhle nalokubi. Shengatsi Jehova Nkulunkulu wakho angaba nawe.”
18 Inkhosi yaphendvula lomfati yatsi: “Ngicela ungangifihleli lutfo kuloko lengitakubuta kona.” Yena waphendvula watsi: “Ngicela inkhosi yami ikhulume.” 19 Inkhosi yabese itsi: “NguJowabe yini lokufake kuko konkhe loku?”+ Lomfati waphendvula watsi: “Ngifunga kuphila kwakho nkhosi yami, kunjengoba nje inkhosi yami isho ngoba inceku yakho Jowabe ngiyo lengiyalile futsi yafaka onkhe lamavi emlonyeni wencekukati yakho. 20 Inceku yakho Jowabe yente loku kuze ishintje tintfo, kodvwa inkhosi yami inekuhlakanipha lokufana nekwengilosi yaNkulunkulu weliciniso futsi yati konkhe lokwentekako eveni.”
21 Inkhosi yabese itsi kuJowabe: “Kulungile, ngitakwenta loko.+ Hamba uyolandza lelijaha lelingu-Absalomu.”+ 22 Nakeva loko, Jowabe wawa ngebuso, wakhotsama futsi wadvumisa inkhosi, wase utsi: “Lamuhla inceku yakho iyati kutsi ngitfole umusa kuwe nkhosi yami ngobe inkhosi ikwentile loko inceku yayo lekucelile.” 23 Jowabe wase uyasukuma wahamba waya eGeshuri+ wayolandza Absalomu weta naye eJerusalema. 24 Nome kunjalo, inkhosi yatsi: “Akabuyele endlini yakhe, kodvwa akukafaneli ete kimi.” Ngako Absalomu wabuyela endlini yakhe futsi akayibonanga inkhosi.
25 Kulo lonkhe laka-Israyeli, kute lenye indvodza lebeyidvunyiswa kakhulu ngekuba likhwa kwendlula Absalomu. Kusukela etinyaweni kuya enhloko bekete sici. 26 Inhloko yakhe bekufanele ayihhule njalo ekupheleni kwemnyaka ngobe tinwele takhe betimsindza kakhulu. Sisindvo setinwele takhe besingemashekeli langu-200* natikalwa ngesikali selitje sasesigodlweni.* 27 Absalomu waba nemadvodzana+ lamatsatfu kanye nendvodzakati yinye, ligama layo bekunguThamari. Thamari bekamuhle kakhulu.
28 Absalomu wachubeka nekuhlala eJerusalema iminyaka lemibili legcwele, kodvwa akazange ayibone inkhosi.+ 29 Wabita Jowabe kute amtfume enkhosini, kodvwa Jowabe aketanga. Wambita kwesibili kodvwa waphindze wangeti. 30 Ekugcineni Absalomu watsi etincekwini takhe: “Insimu yaJowabe iseceleni kweyami, futsi ulime ibhali kuyo. Hambani niyoyilumeka ngemlilo.” Ngako tinceku ta-Absalomu tayilumeka ngemlilo lensimu. 31 Ngenca yaloko, Jowabe wahamba waya endlini ya-Absalomu, wafike watsi kuye: “Yini lebangele tinceku takho kutsi tilumeke insimu yami ngemlilo?” 32 Absalomu waphendvula Jowabe watsi: “Lalela-la, ngitfumele umlayeto kuwe ngatsi, ‘Wota ngitokutfuma enkhosini uyoyibuta utsi: “Kantsi ngibuyeleni eGeshuri?+ Bekungaba ncono kube ngachubeka nekuhlala khona. Ngifuna kubona inkhosi futsi nangabe kunalokubi lengikwentile, kufanele ingibulale.”’”
33 Ngako Jowabe waya enkhosini wafike wayitjela loko Absalomu bekamtfume kona. Ngemuva kwaloko, inkhosi yabita Absalomu futsi weta, wakhotsama embikwayo, wawa phansi ngebuso. Inkhosi yase iyamcabuza.+