BANTFU LABASHA BAYABUTA
Lingangisita Njani LiBhayibheli?—Incenye 2: Yenta Kufundza Kwakho LiBhayibheli Kujabulise
Will losemusha utsi: “Kufundza liBhayibheli kungabonakala kucedza emandla nawungalifundzi ngendlela lekahle.”
Ungatsandza yini kwati tindlela letingakusita wente kufundza kwakho liBhayibheli kujabulise? Lesihloko sitakusita.
Yenta imiBhalo iphile
Tifake kulendzaba loyifundzako. Kuze wente loko, ungasebentisa nati tindlela:
Khetsa indzaba leseBhayibhelini longatsandza kutadisha ngayo. Ungakhetsa sentakalo lesitsite lesiseBhayibhelini nobe indzaba lesemaVangelini, ungaphindze ukhetse indzaba letfolakala ekufundvweni kweliBhayibheli lokuyidrama kuleto letitfolakala ku-jw.org.
Fundza lendzaba. Ungayifundza wedvwa, nobe uyifundze nebangani nobe umndeni wakho. Munye angafundza incenye yalolandzisa ngalendzaba, labanye bafundze tincenye talabakhona kulendzaba.
Yetama kunye nobe lokunyenti kwalokusikisela lokulandzelako:
Dvweba titfombe kuze ufanekise leyo ndzaba. Nobe udvwebe titfombe letikhombisa kulandzelana kwetentakalo taleyo ndzaba. Bhala imisho lechaza kutsi kwentekani esitfombeni ngasinye.
Dvweba ema-diagrams. Sibonelo salako kutsi njengobe ufundza ngemuntfu lowetsembekile, ungahlobanisa buntfu bakhe netintfo latenta kanye netibusiso latitfola.
Yenta lendzaba ibe ngatsi ingumbiko. Bika lendzaba ngetindlela letehlukahlukene, letifaka ekhatsi “tincociswano” nemnikati waleyondzaba kanye nalabo lebebakhona nayenteka.
Nangabe munye walabakhona kulendzaba wenta sincumo lesingakahlakaniphi, cabanga kutsi bekutawubanjani kube wenta lokwehlukile. Sibonelo nje, cabanga ngaPhetro lowaphika Jesu. (Makho 14:66-72) Phetro bekufanele aphendvule njani ngesikhatsi acindzetelwa?
Nangabe unelikhono lekubhala indzaba letsite, ungatibhalela idrama yakho loyitsatsele endzabeni yeliBhayibheli loyifundzile. Bhala phansi netifundvo letingafundvwa kuleyondzaba.—KubaseRoma 15:4.
Ungalenta liphile liBhayibheli!
Cwaninga!
Hlolisisa imininingwane kuze utfole emaphuzu langekho ebaleni kuleyondzaba. Ecinisweni, kungaphuma emaphuzu lamanyenti egameni linye nobe lamabili endzabeni leseBhayibhelini.
Sibonelo, catsanisa Matewu 28:7 naMakho 16:7.
Kungani Makho afaka imininingwane yekutsi Jesu madvutane utawubonakala kubafundzi bakhe kanye ‘nakuPhetro’?
Lokungenteka kusizatfu: Makho bekangekho ngesikhatsi kwenteka loku, ngako kungentaka kutsi wayitjelwa nguPhetro lendzaba.
Liphuzu lelingekho ebaleni: Yini leyenta Phetro waciniseka kutsi Jesu bekafuna kuphindze ambone? (Makho 14:66-72) Jesu wativeta njani angumngani lokahle kuPhetro? Ungamlingisa njani Jesu ngekutsi ube ngumngani lokahle kulabanye?
Kwenta imiBhalo iphile nekucwaninga ngemininingwane letsite kungakwenta ukujabulele kufundza liBhayibheli!