Jesu Uyasindzisa—Kanjani?

Lokushiwo liBhayibheli

Jesu wasindzisa bantfu labetsembekile ngesikhatsi anikela ngekuphila kwakhe kutsi kube yinhlawulo. (Matewu 20:28) Kungako liBhayibheli libita Jesu ngekutsi “nguMsindzisi welive.” (1 Johane 4:14) Liphindze litsi: “Insindziso ngeke ite ngalomunye umuntfu, ngobe kute lelinye libito ngephansi kwelizulu lelinikwe bantfu, nalabangasindziswa ngalo.”—Imisebenti 4:12.

Jesu ‘wafela bonkhe bantfu’ labanekukholwa kuye. (Hebheru 2:9; Johane 3:16) Ngemuva kwaloko, “Nkulunkulu wamvusa ekufeni,” futsi Jesu wabuyela ezulwini waba sidalwa semoya. (Imisebenti 3:15) Njengoba asezulwini, Jesu “uyakwati nekubasindzisa ngalokuphelele labo labaya kuNkulunkulu ngaye, ngobe uhlale aphila khona atewubancusela.”—Hebheru 7:25.

Kungani sidzinga kuncuselwa nguJesu?

Sonkhe sitoni. (Roma 3:23) Sono sisehlukanisa naNkulunkulu futsi sisiholela ekufeni. (Roma 6:23) Nome kunjalo, Jesu ‘unguMmeli’ walabo labanekukholwa enhlawulweni yakhe. (1 Johane 2:1) Uyabancusela kuNkulunkulu kutsi eve imithantazo yabo baphindze batsetselelwe tono tabo ngesisekelo senhlawulo yekufa kwakhe. (Matewu 1:21; Roma 8:34) Nkulunkulu wenta ngekuvumelana nekuncusa kwaJesu ngobe leticelo tivumelana nentsandvo yakhe. Nkulunkulu watfumela Jesu emhlabeni ‘kuze live lisindziswe ngaye.’—Johane 3:17.

Kukholwa kuJesu ngiko kuphela yini lokungenta umuntfu asindziswe?

Cha. Nanobe kufanele sibe nekukholwa kuJesu, kuze sisindziswe kunalokunyenti lokudzingekako. (Imisebenti 16:30, 31) LiBhayibheli litsi: “Njengobe umtimba ngaphandle kwemoya ufile, nekukholwa ngaphandle kwemisebenti kufile.” (Jakobe 2:26) Naku lokudzingekako kuze sisindziswe:

• Kufundza ngaJesu nangaBabe wakhe, Jehova.—Johane 17:3.

• Kukholwa kubo.—Johane 12:44; 14:1.

• Kukhombisa kutsi siyakholwa kubo ngekutsi silalele imiyalo yabo. (Lukha 6:46; 1 Johane 2:17) Jesu wafundzisa kutsi akusiye wonkhe umuntfu lombita ngekutsi “Nkhosi” lotawusindziswa kodvwa ngulabo “labenta intsandvo yaBabe losezulwini.”—Matewu 7:21.

• Kuchubeka sikhombisa kukholwa kwetfu nangetulu kwebumatima. Jesu wakwenta kwacaca loku nakatsi: “Loyo loyawucinisela kudzimate kube sekugcineni, nguye loyawusindziswa.”—Matewu 24:13.