1 Kungani Kufanele Sithandaze?

UMTHANDAZO. Kunetihloko letimbalwa letitfolakala eBhayibhelini letivusa inshisekelo kanye nelilukuluku letfu lekwati. Cabanga ngemibuto lesikhombisa levamise kubutwa mayelana nemthandazo, bese uhlola kanye natsi timphendvulo tayo letitfolakala eBhayibhelini. Injongo yaletihloko kukusita kutsi ukwati kuthandaza—kungaba kutsi ucale kuthandaza, nobe utfutfukise indlela lothandaza ngayo.

EMHLABENI wonkhe, bantfu labaphila ngaphansi kwetimo letingafanani, nalabasetinkholweni letehlukene bayathandaza. Bathandaza babodvwa; baphindze bathandaze njengemacembu. Bathandaza emasontfweni, emathempelini, emasinagogeni, etindzaweni tekuthandaza temaMoslem, kanye nakuletinye tindzawo tekukhontela. Basebentisa tingubo tekuthandaza, buhlalu, emasondvo ekuthandaza, titfombe, tincwadzi temithandazo, nobe imithandazo lebhalwe emabhodini.

Umthandazo nguwo lowenta bantfu behluke kuto tonkhe tintfo letiphilako letisemhlabeni. Kuliciniso kutsi kunekufanana lokutsite emkhatsini wetfu netilwane. Njengato, siyakudzinga kudla, umoya kanye nemanti. Natsi siyatalwa, siphile futsi sife. (Umshumayeli 3:19) Kodvwa bantfu kuphela labathandazako. Kungani kunjalo?

Imphendvulo lemelula nje kutsi tsine sinesidzingo sekuthandaza. Umthandazo utsatfwa njengendlela yekusondzela endzaweni lengcwele nalehlala njalo. LiBhayibheli litsi sadalwa sinesifiso sekwenta njalo. (Umshumayeli 3:11) Jesu Khristu watsi: “Babusisiwe labamphofu emoyeni, ngobe umbuso welizulu wabo.”—Matewu 5:3.

‘Kuba mphofu emoyeni’ ngiko lokubangela kutsi kube netindzawo kanye netintfo letinyenti tekukhonta, futsi kucitfwe nema-awa lamanyenti kuthandazwa. Labanye bantfu batetsemba bona nobe betsembe labanye kute benetise sidzingo sabo sekwati Nkulunkulu. Awucabangi yini kutsi bantfu bete emandla lenele ekusisita? Sonkhe site emandla, siphila sikhatsi lesifishane, futsi kucabanga kwetfu kufishane. Ngumuntfu lohlakaniphe kusendlula sonkhe, lonemandla lamakhulu, nalokwati kubeketela kwendlula tsine longasinika loko lesikudzingako. Ngutiphi letidzingo takamoya letisenta kutsi sithandaze?

Asewucabange ngaloku: Uke wasilangatelela yini sicondziso, kuhlakanipha nobe timphendvulo temibuto lokubonakala kungasimelula kutitfola? Uke wativa yini udzinga kudvudvutwa ngemuva kwekuva buhlungu bekulahlekelwa, udzinga sicondziso nakufanele utsatse sincumo lesitsintsa kuphila kwakho, nobe udzinga kutsetselelwa nawutiva unelicala?

Ngekusho kweliBhayibheli, leti tizatfu letibalulekile lokufanele tisente sithandaze. LiBhayibheli liyincwadzi lesingayetsemba kulendzaba, futsi licuketse imithandazo leminyenti yemadvodza kanye nebesifazane labetsembekile. Bathandaza bacela indvudvuto, sicondziso, kutsetselelwa, kanye netimphendvulo temibuto lokumatima kutitfola.—Tihlabelelo 23:3; 71:21; Danyela 9:4, 5, 19; Habakhuki 1:3.

Lemithandazo beyehlukehlukene, kodvwa kunalokutsite lebeyifanana ngako. Ngamunye walabo labebathandaza abenesici lesibaluleke kakhulu lesenta umthandazo wakhe uphendvulwe, labanye labangasati nobe labangenandzaba naso lamuhla. Bebati kutsi kufanele bathandaze kubani.

2 Kufanele Sithandaze Kubani?

NKULUNKULU ulalela yonkhe imithandazo yini, ngisho nemithandazo lecondziswe kulabanye bonkulunkulu? Kulelive lalamuhla, sekuyintfo levamile kucabanga kanjalo. Lenkholelo itsandvwa kakhulu bantfu labanyenti labahlanganisa tinkholo, futsi labafuna kutsi tonkhe tinkholo temukeleke ngisho nobe tingafanani. Iliciniso yini lenkholelo?

LiBhayibheli lifundzisa kutsi etikhatsini letinyenti bantfu abathandazi kunkulunkulu lofanele. Esikhatsini sekubhalwa kweliBhayibheli, bekuvamisile kutsi bantfu bathandaze emifanekisweni lebatiwe. Nanobe kunjalo, Nkulunkulu abecwayisa ngalokuphindzaphindziwe ngalomkhuba. Encwadzini yeTihlabelelo 115:4-6 sitfola sibonelo saloko ngobe itsi ngetithico: “Tinetindlebe, kodvwa ativa.” Ngako-ke, kuyacaca kutsi asikho sidzingo sekuthandaza kunkulunkulu longeke akuve.

Indzaba lemfishane letfolakala eBhayibhelini ilicacisa kabanti leliphuzu. Umphrofethi weliciniso Elija wabekela baphrofethi baBhali insayeya yekutsi bathandaze kunkulunkulu wabo, ngemuva kwaloko naye Elija abetawuthandaza kuNkulunkulu wakhe. Elija watsi Nkulunkulu weliciniso utawuphendvula kodvwa lona wemanga angeke aphendvule. Baphrofethi baBhali bayemukela lensayeya, futsi bathandaza sikhatsi lesidze, baze bakhala nekukhala—kodvwa kwaba bete imphumelelo! Lokulandzisa kufundzeka ngalendlela: “Kute lowaphendvula, kute nalowanaka.” (1 Emakhosi 18:29) Kwentekani ngesikhatsi sekuthandaza Elija?

Elija wathandaza, futsi Nkulunkulu wakhe wamphendvula ngaleso sikhatsi, ngekutfumela umlilo lowachamuka ezulwini wawushisa wonkhe umhlatjelo wakhe. Bewuyini umehluko kulemithandazo lemibili? Imfihlo yemthandazo wa-Elija beyiyinye nje kuphela, ibhalwe ku-1 Emakhosi 18:36, 37 (catsanisa ne-NW.) Lona ngumthandazo lomfishane kakhulu lonemagama langaba ngu-30 kuphela emibhalweni yekucala yesiHebheru. Kodvwa kulamavi lambalwa, Elija wabita Nkulunkulu katsatfu ngelibito lakhe lelitsi Jehova.

Bhali, lokusho kutsi ‘umnikati’ nobe ‘inkhosi,’ abengunkulunkulu wemaKhenani futsi bekunetindlela letinyenti labechazwa ngato. Nanobe kunjalo, libito laJehova alifanani nalamanye, nguye yedvwa lonalo kuyo yonkhe indzawo. LoNkulunkulu watjela bantfu watsi: ‘NginguJehova; lelo libito lami! Inkhatimulo yami ngingeke ngiyinike lomunye.’—Isaya 42:8, NW.

Umthandazo wa-Elija newebaphrofethi baBhali, bewuya kunkulunkulu munye yini? Kukhonta Bhali bekufaka ekhatsi bugwadla nekwenta bantfu babe ngumhlatjelo. Ngalokwehlukile kuloko, Jehova wayala bantfu bakhe baka-Israyeli kutsi bamkhonte ngendlela lehloniphekile, lebakhulula kulemikhuba lengcolile. Asewucabange nje ngaloku: Nangabe ubhala incwadzi uyitfumela kumngani wakho lomhlonipha kakhulu, bewungalindzela yini kutsi lencwadzi ifikele kulomunye umuntfu longasiye umngani wakho nalongamhloniphi, futsi lonemikhuba lengafanani neyakhe? Cha, bewungeke!

Nangabe uthandaza kuJehova, uthandaza kuMdali, longuBabe wabo bonkhe bantfu.a Umphrofethi Isaya wathandaza watsi: “Wena [Jehova] unguBabe wetfu.” (Isaya 63:16) Lona Nguye Jesu Khristu lakhuluma ngaye ngalesikhatsi atsi kubalandzeli bakhe: “Sengiyenyuka ngibuyela kuye longuBabe wami neYihlo, Nkulunkulu wami naNkulunkulu wenu.” (Johane 20:17) Jehova unguBabe waJesu. UnguNkulunkulu, loyo Jesu labethandaza kuye, futsi nguye loNkulunkulu Jesu latsi balandzeli bakhe bathandaze kuye.—Matewu 6:9.

LiBhayibheli liyasikhutsata yini kutsi sithandaze kuJesu, kuMariya, kubosanta nobe etingilosini? Cha! Kodvwa lisikhutsata kutsi sithandaze kuJehova kuphela. Cabanga ngetizatfu letimbili tekutsi kungani kunjalo. Kwekucala, umthandazo usici sekukhonta, futsi liBhayibheli litsi kukhonta lokunjalo kufanele kuyiswe kuJehova kuphela. (Eksodusi 20:5) Kwesibili, liBhayibheli liveta kutsi nguye ‘lova imithandazo.’ (Tihlabelelo 65:2) Nanobe Jehova angumuntfu lophanako, lomsebenti angeke awunikete lomunye umuntfu. Nkulunkulu wetsembisa kuyilalela yena matfupha imithandazo yetfu.

Ngako-ke, nangabe ufuna kutsi Nkulunkulu ayive imithandazo yakho, khumbula lesikhutsato semBhalo lesitsi: “Labo-ke, labayawubita libito leNkhosi [Jehova], bayawusindziswa.” (Imisebenti 2:21) Jehova uyilalela yonkhe yini imithandazo ngaphandle kwemibandzela letsite? Nobe kukhona yini lokunye lesidzinga kukwati nangabe sifuna imithandazo yetfu iviwe nguJehova?

[Umbhalo longentansi]

[Sitfombe ekhasini 5]

Insayeya Elija layibekela baphrofethi baBhali yaveta kutsi yonkhe imithandazo ayiyi kunkulunkulu munye

3 Kufanele Sithandaze Njani?

ENDZABENI yemthandazo, emasontfo lamanyenti anaka kakhulu tintfo umuntfu latentako nakathandaza, lokufaka ekhatsi simo semtimba, emagama lawasebentisako, kanye naloko lokufanele akwente ngaso sonkhe sikhatsi nakathandaza. Nanobe kunjalo, liBhayibheli lisisita kutsi singanaki kuphela simo semtimba nobe loko lokufanele sikwente nasithandaza, kodvwa siphindze sinake netincenye letibalulekile talombuto lotsi: “Kufanele sithandaze njani?”

LiBhayibheli likhuluma ngetinceku taNkulunkulu letetsembekile lebetithandaza etindzaweni letehlukehlukene futsi time ngetindlela letingafanani. Betivumelanisa imithandazo yato nesimo, ngalesinye sikhatsi betithandaza ngenhlitiyo nobe tiphumisele. Betithandaza tibuke ezulwini nobe tigucile. Esikhundleni sekusebentisa titfombe, buhlalu nobe tincwadzi temithandazo kute tifundze imithandazo yato phansi, betivele tithandaze ngalokusuka enhlitiyweni tisebentisa emavi ato. Yini leyenta imithandazo yato yaviwa nguNkulunkulu?

Njengobe kuchaziwe esihlokweni lesengcile, beticondzisa imithandazo yato kuNkulunkulu loyedvwa kuphela—longuJehova. Kunalokunye lokubalulekile lebeticiniseka ngako. Ku-1 Johane 5:14 siyafundza: “Sinesibindzi kutsi nasicela lutfo kuNkulunkulu ngekwentsandvo yakhe, uyasiva.” Imithandazo yetfu kufanele ivumelane nentsandvo yaNkulunkulu. Kusho kutsini loko?

Kute sikwati kuthandaza ngekuvumelana nentsandvo yaNkulunkulu, kudzingeka sati kucala kutsi iyini intsandvo yakhe. Kufundza liBhayibheli kubalulekile kute sikwati kuthandaza. Loku kusho kutsi Nkulunkulu angeke ayilalele yini imithandazo yetfu nangabe singasito tifundziswa teliBhayibheli? Cha akusinjalo, kodvwa ulindzele kutsi sifundze ngentsandvo yakhe, siyicondze kutsi iyini bese siyayenta. (Matewu 7:21-23) Kufanele sithandaze ngekuvumelana naloko lesikufundzako.

Njengobe sifundza ngaJehova nangentsandvo yakhe, siyakhula ekukholweni—lokungulenye incenye lebalulekile emthandazweni. Jesu watsi: “Konkhe leniyakucela ngekukhuleka nikholwa, niyakukwemukeliswa.” (Matewu 21:22) Kuba nekukholwa akusho kwetsemba yonkhe intfo. Kodvwa kusho kwetsemba intfo lokutsi ngisho nobe ingakabonwa, isekelwe bufakazi lobucinile. (Hebheru 11:1) LiBhayibheli ligcwele bufakazi lobuveta kutsi Jehova, lesingeke sikwati kumbona, ukhona mbamba, singametsemba futsi utimisele kuphendvula imithandazo yalabo lababa nekukholwa kuye. Ngetulu kwaloko, singacela kukholwa lokwengetiwe kuJehova, futsi uyakujabulela kusipha loko lesikudzingako.—Lukha 17:5; Jakobe 1:17.

Nayi lenye indlela lebalulekile lesingayisebentisa nasithandaza. Jesu watsi: “Kute longeta kuBabe nakangeti ngami.” (Johane 14:6) Ngako Jesu uyindlela yekusondzela kuBabe, Jehova. Kungaleso sizatfu atjela balandzeli bakhe kutsi bathandaze egameni lakhe. (Johane 14:13; 15:16) Loku akusho kutsi kufanele sithandaze kuJesu. Kodvwa kusho kutsi sithandaza egameni lakhe, sikhumbula kutsi nguye lowenta kutsi kube melula ngatsi kusondzela kuBabe wetfu lote sono futsi longcwele.

Balandzeli baJesu labesondzelene kakhulu nabo, batsi kuye: “Nkhosi, sifundzise kuthandaza.” (Lukha 11:1) Bebangafuni nje kutsi abafundzise indlela yekuthandaza njengobe sesicoce ngako lapha ngenhla. Ecinisweni, bebafuna kwati kutsi ‘yini lokufanele bayithandazele?’

[Emavi lacashuniwe lasekhasini 6]

Imithandazo leviwa nguNkulunkulu ivumelana nentsandvo yakhe, ishiwo ngekukholwa futsi yendluliswa egameni laJesu

4 Yini Lokufanele Siyithandazele?

UMTHANDAZO waJesu losibonelo kutsiwa nguwo losetjentiswa kakhulu kuyo yonkhe imithandazo yemaKhristu. Ngisho nobe loku kuliciniso nobe cha, bantfu labanyenti abawucondzi kahle lomthandazo, loye ubitwe ngekutsi nguMthandazo WeNkhosi nobe Babe Wetfu. Tigidzi tebantfu tiwusho njengesilandzelo malanga onkhe, mhlawumbe ngisho netikhatsi letinyenti emkhatsini welilanga. Jesu abengakahlosi kutsi lomthandazo usetjentiswe ngalendlela. Sikwati njani loku?

Asengakawusho nje lomthandazo, Jesu watsi: ‘Nanithandazako, ningalibali kuphindzaphindza tintfo letifananako.’ (Matewu 6:7, NW.) Jesu wabese uyatiphikisa yini ngekutsi asho emavi lokufanele akhunjulwe futsi aphindvwaphindvwe? Cha! Kunaloko, Jesu abesifundzisa ngetintfo lokufanele sitithandazele, futsi asiniketa netintfo lokufanele tite kucala nasithandaza. Asesinakisise loko lakusho. Lomthandazo utfolakala encwadzini yaMatewu 6:9-13.

“Babe wetfu losezulwini, alingcweliswe libito lakho.”

Jesu abekhumbuta balandzeli bakhe kutsi ngaso sonkhe sikhatsi kufanele bathandaze kuBabe wakhe, longuJehova. Uyati yini kutsi kungani libito laNkulunkulu libaluleke kangaka futsi lidzinga nekungcweliswa?

Kusukela ekucaleni kwemlandvo webantfu, libito laNkulunkulu lelingcwele liye lahlanjalatwa. Sitsa saNkulunkulu lesinguSathane siye sambita ngekutsi nguMbusi lonemanga, lonebugovu, kanye nalote ligunya lekubusa indalo yaKhe. (Genesisi 3:1-6) Bantfu labanyenti bayavumelana naSathane, futsi bafundzisa kutsi Nkulunkulu akanandzaba, unelunya, futsi akacoleli, nobe bavele baphike kutsi unguMdali. Labanye balihlasele libito lakhe lelitsi Jehova, bate balikhipha emahumushweni eliBhayibheli, futsi batsi akukafaneli lisetjentiswe.

LiBhayibheli litsi Nkulunkulu utawukulungisa konkhe lokungalungi. (Hezekeli 39:7) Ngekwenta njalo, utawenetisa tonkhe tidzingo takho futsi acatulule netinkinga takho. Utawukwenta njani loko? Emavi lalandzelako emthandazo waJesu asiniketa imphendvulo.

“Umbuso wakho awute.”

Lamuhla, bafundisi betinkholo badideke kakhulu mayelana neMbuso waNkulunkulu. Kodvwa njengobe tilaleli taJesu betati, baphrofethi baNkulunkulu bebavele babiketele kutsi Mesiya, longuMsindzisi lokhetfwe nguNkulunkulu, abetawubusa eMbusweni lotawugucula umhlaba. (Isaya 9:6, 7; Danyela 2:44) Utawungcwelisa libito laNkulunkulu ngekutsi weneke emanga aSathane, futsi uncobe nayo yonkhe imisebenti yakhe. UMbuso waNkulunkulu utawucedza timphi, kugula, indlala—ngisho nekufa imbala. (Tihlabelelo 46:9; 72:12-16; Isaya 25:8; 33:24) Nawuthandazela kutsi uMbuso waNkulunkulu ute, usuke uthandazela kutsi tonkhe letetsembiso tigcwaliseke.

“Intsandvo yakho ayentiwe emhlabeni, njengobe yentiwa ezulwini.”

Lamavi aJesu asho kutsi intsandvo yaNkulunkulu itawukwenteka mbamba emhlabeni, njengobe kunjalo nasezulwini lapho Nkulunkulu ahlala khona. Intsandvo yaNkulunkulu ezulwini ayizange ivinjwe lutfo; iNdvodzana yakhe yalwa naSathane kanye nebangani bakhe, futsi yabajikijela emhlabeni. (Sembulo 12:9-12) Njengeticelo tekucala letimbili, lesicelo sesitsatfu salomthandazo losibonelo sisisita kutsi sinake intfo lebaluleke kakhulu—lokuyintsandvo yaNkulunkulu, hhayi yetfu. Intsandvo yakhe ihlale iyizuzisa yonkhe indalo. Ngako-ke, ngisho naJesu, longumuntfu lote sono watsi kuBabe wakhe: “Noko kungabi ngentsandvo yami, kodvwa akwenteke intsandvo yakho.”—Lukha 22:42.

“Siphe lamuhla kudla kwetfu.”

Jesu wase uveta nekutsi singatithandazela tidzingo tetfu. Akusikubi kuthandaza kuNkulunkulu mayelana netintfo lesitidzingako tamalanga onkhe. Ecinisweni, kwenta njalo kusikhumbuta kutsi nguJehova “loniketa imphilo nekuphefumula nako konkhe kubantfu bonkhe.” (Imisebenti 17:25) LiBhayibheli lisitjela kutsi ungumtali lonelutsandvo lokujabulelako kuniketa bantfwana bakhe tintfo labatidzingako. Nanobe kunjalo, njengemtali lomuhle, angeke atiphendvule ticelo letingeke tisizuzise.

“Sitsetselele tono tetfu.”

Uyatenta yini vele tono kuNkulunkulu? Uyayidzinga yini intsetselelo yakhe? Lamuhla, bantfu labanyenti abasacondzi kutsi sono siyini kanye nekutsi siyintfo lenkhulu kangakanani. Kodvwa liBhayibheli lifundzisa kutsi sono siyimbangela yetinkinga tetfu letinkhulu, ngobe ngiso lesenta kutsi bantfu bafe. Njengobe satalwa njengetoni, sonkhe siyona tikhatsi letinyenti, futsi kute sitfole litsemba lelikusasa lelihlala njalo sidzinga intsetselelo yaNkulunkulu. (Roma 3:23; 5:12; 6:23) Kuyasikhutsata kwati kutsi liBhayibheli litsi: “Wena, Nkhosi, ulungile futsi ulungele kutsetselela.”—Tihlabelelo 86:5.

‘Usisindzise kulomubi.’

Uyacaphela yini kutsi sivikelo saNkulunkulu usidzinga kakhulu nangekushesha kangakanani? Bantfu labanyenti abafuni kukholelwa kutsi ‘lomubi’ longuSathane ukhona. Jesu wafundzisa kutsi Sathane ukhona mbamba, wate wambita ngekutsi ‘ngumbusi walelive.’ (Johane 12:31; 16:11) Sathane wente kutsi lelive lalibusako libe libi, futsi angatsandza nekukwenta kutsi ube ngumuntfu lomubi, akuvimbele ekutseni wakhe buhlobo lobusedvute naBabe wakho longuJehova. (1 Phetro 5:8) Nanobe kunjalo, Jehova unemandla kakhulu kunaSathane futsi uyakujabulela kuvikela labo labamtsandzako.

Ngekuhlolisisa emaphuzu layinhloko emthandazo waJesu, asikatihlanganisi tonkhe tintfo lesingatithandazela. Khumbula kutsi umbhalo wa-1 Johane 5:14 usho naku ngaNkulunkulu: “Nasicela lutfo kuNkulunkulu ngekwentsandvo yakhe, uyasiva.” Ngako-ke, ungakhatsateki ngekutsi tinkinga takho atikabaluleki kangako kutsi ungathandaza ngato kuNkulunkulu.—1 Phetro 5:7.

Kutsiwani-ke, ngesikhatsi kanye nendzawo? Kunendzaba yini kutsi sithandaza nini futsi kuphi?

5 Kunendzaba Yini Kutsi Sithandaza Nini Futsi Kuphi?

KULICINISO kutsi uye wanaka kutsi tinkholo letinyenti tiye takha tindlu letiyinkimbinkimbi lapho tithandaza khona. Tiphindze tibe netikhatsi letihleliwe tekuthandaza. LiBhayibheli liyayibeka yini imincele endzabeni yekuthandaza, lokukutsi sikhatsi nobe indzawo lokufanele sithandaze kuyo?

LiBhayibheli liyasho kutsi kunetikhatsi letitsite lapho kufaneleka khona kuthandaza. Ngembikwekudla nebalandzeli bakhe, Jesu wathandaza, wabonga Nkulunkulu. (Lukha 22:17) Nalapho bafundzi bakhe bahlangana kute bakhonte Nkulunkulu, bebathandaza ndzawonye. Ngako-ke, bachubeka nalomkhuba lebesekukadze wentiwa emasinagogeni emaJuda kanye nasethempelini eJerusalema. Nkulunkulu abehlose kutsi lithempeli libe “yindlu lapho kuthandaza khona tonkhe tive.”—Makho 11:17.

Lapho tinceku taNkulunkulu tihlangene futsi tithandaza ndzawonye, imithandazo yato iba nemiphumela. Nangabe lelo cembu limunye kuloko lelikucelako futsi nemthandazo lowentiwa esikhundleni salo uvumelana netimiso teliBhayibheli, Nkulunkulu uyajabula. Lomthandazo ungase umbangele kutsi ente intfo lokungenteka abengakahlosi kuyenta. (Hebheru 13:18, 19) BoFakazi BaJehova bathandaza njalo emihlanganweni yabo. Siyakumema kutsi ute eHholweni leMbuso lelisedvutane nawe kute utewutivela leyo mithandazo.

Nobe kunjalo, liBhayibheli alibeki mincele endzabeni yekuthandaza, lokukutsi sikhatsi nobe indzawo lokufanele kuthandazwe kuyo. EBhayibhelini, sifundza ngetinceku taNkulunkulu lebetithandaza ngetikhatsi nasetindzaweni letehlukehlukene. Jesu watsi: “Kepha wena nawuthandaza, ngena endlini yakho uvale umnyango, uthandaze kuYihlo losekusitsekeni, khona uYihlo lobona ekusitsekeni utawukunika umvuzo.”—Matewu 6:6.

Akajabulisi yini lawo mavi? Ecinisweni, nobe nini nawusendzaweni lesitsekile, ungathandaza kuMbusi wendzawo yonkhe, futsi utawukulalela nobe kanjani. Kuyacaca-ke kutsi kungani Jesu abehlala afuna kuba yedvwana kute athandaze. Ngalelinye lilanga, wacitsa busuku bonkhe athandaza kuNkulunkulu, afuna sicondziso sakhe esincumeni lesimatima lokwakufanele asente.—Lukha 6:12, 13.

Kunalamanye emadvodza nebesifazane lokukhulunywa ngabo eBhayibhelini labathandaza lapho kufanele bente tincumo letimatima nobe lapho bahlangabetana netinkinga letinkhulu. Bebathandaza baphumisela kantsi ngaletinye tikhatsi bebathandaza ngenhlitiyo. Bebaphindze bathandaze njengemacembu, kanye nalapho babodvwana. Intfo lebeyibalulekile nje kutsi bathandaza. Nkulunkulu ute ameme tinceku takhe kutsi ‘tithandaze tingayekeli.’ (1 Thesalonika 5:17) Utimisele kutsi abalalele ngaso sonkhe sikhatsi labo labenta intsandvo yakhe. Lesi akusiso yini simemo selutsandvo?

Kuliciniso kutsi kulelive leligcwele kungetsembeki, bantfu labanyenti bayatibuta mayelana nekubaluleka kwemthandazo. Nawe kungenteka utibuta nangu umbuto: “Umthandazo utawungisita yini vele?”

[Emavi lacashuniwe lasekhasini 9]

Singathandaza nganobe ngusiphi sikhatsi futsi sikunobe nguyiphi indzawo

Umthandazo

6 Ungasisita Yini?

KUTHANDAZA kuyasisita yini? LiBhayibheli liveta kutsi imithandazo yetikhonti taNkulunkulu letetsembekile iyatizuzisa. (Lukha 22:40; Jakobe 5:13) Ecinisweni, kuthandaza kungasisita kakhulu ebuhlotjeni betfu naNkulunkulu, ngekwemivelo, ngisho nangekwenyama. Kanjani?

Asesitsi umntfwana wakho uphiwa sipho. Bewungamfundzisa yini kutsi kwenele nje kumane abe nemuva wekubonga? Nobe bewungamfundzisa kutsi akuvete kubonga kwakhe? Nasiyibeka ngemavi imiva yetfu lebalulekile, siyacabangisisa ngayo futsi siyente icine kakhulu. Kuyasebenta yini loku ekukhulumeni kwetfu naNkulunkulu? Yebo! Asewucabange ngaletinye tibonelo.

Imithandazo yekubonga. Nasibonga Babe wetfu ngetintfo letinhle lasentela tona, lesikubonga kakhulu tibusiso takhe. Ngesizatfu saloko, singativa sinekubonga lokukhulu, injabulo kanye nembono lofanele.—Filiphi 4:6.

Sibonelo: Jesu wambonga Babe wakhe ngekutsi abeyiva futsi ayiphendvule imithandazo yakhe.—Johane 11:41.

Imithandazo yekucela intsetselelo. Ngekucela kutsi Nkulunkulu asitsetselele, sicinisa bonembeza betfu, siphendvuke ngebucotfo, futsi sicaphele kutsi sono siyintfo lenkhulu kakhulu. Siphindze sikhululeke ekutiveni sinelicala.

Sibonelo: Davide wathandaza kute avete kuphendvuka kanye nekutisola kwakhe.—Tihlabelelo 51.

Imithandazo yekucela sicondziso kanye nekuhlakanipha. Kucela Jehova kutsi asicondzise nobe asinikete kuhlakanipha lesikudzingako kute sitsatse tincumo letifanele, kungasisita kutsi sitfobeke ngebucotfo. Kungasikhumbuta nekutsi sinesono futsi kusisite setsembele kuBabe wetfu wasezulwini.—Taga 3:5, 6.

Sibonelo: Ngekutfobeka, Solomoni wacela sicondziso kanye nekuhlakanipha kute abuse ema-Israyeli.—1 Emakhosi 3:5-12.

Imithandazo yangetikhatsi tekucindzeteleka. Nasitfulula sifuba setfu kuNkulunkulu lapho sicindzeteleke kakhulu, inhlitiyo yetfu iyakhululeka futsi setsembe Jehova kunekutsi sitetsembe tsine.—Tihlabelelo 62:8.

Sibonelo: INkhosi Asa yathandaza ngesikhatsi iyawukulwa nesitsa lesiyingoti kakhulu.—2 Tikhronike 14:11.

Imithandazo lemayelana nenhlalakahle yalabanye labahluphekile. Imithandazo lenjalo isisita kutsi sibalekele kuba nebugovu futsi sitfutfukise sihawu kanye neluvelo lwetfu.

Sibonelo: Jesu wabathandazela balandzeli bakhe.—Johane 17:9-17.

Imithandazo yekudvumisa. Nasidvumisa Jehova ngemisebenti kanye netimfanelo takhe letinhle, inhlonipho nekumbonga kwetfu kuyakhula. Imithandazo lenjalo ingasisita nekutsi sisondzele edvute kuNkulunkulu, longuBabe wetfu.

Sibonelo: Ngelutsandvo, Davide wambonga Nkulunkulu ngemisebenti yakhe.—Tihlabelelo 8.

“Kuthula kwaNkulunkulu lokwendlula konkhe kwati” kungulesinye sibusiso lesisitfola ngekuthandaza. (Filiphi 4:7) Kutfola kuthula kulelive lelinetinkinga kusibusiso lesingakavami. Kuphindze kuzuzise ngisho nangekwenyama. (Taga 14:30) Kodvwa-ke sikutfola ngemandla etfu kuphela yini, nobe kukhona lokunye lokubalulekile lokutsintsekako?

[Emavi lacashuniwe lasekhasini 10]

Umthandazo uletsa tinzuzo letinyenti letingekwenyama kanye netemivelo, kantsi lokubaluleke kakhulu tinzuzo takamoya

7 Nkulunkulu Utawuyiva Futsi Ayiphendvule Yini Imithandazo Yetfu?

LOMBUTO longenhla uvusa injabulo lenkhulu kanye nelilukuluku lekwati. LiBhayibheli liveta kutsi Jehova uyayiva imithandazo lamuhla. Kutsi utawuyiva yini imithandazo yetfu, kutawuya ngaloko tsine lesikwentako.

Jesu wabalahla baholi benkholo bangesikhatsi sakhe labebathandaza ngekutentisa; bebanaka kakhulu kutsi babonakale balungile embikwebantfu. Watsi emadvodza lanjalo ‘abetawutfola umvuzo wawo,’ lokusho kutsi abetawutfola kuphela loko labekakufuna kakhulu, lokukunakwa bantfu, kodvwa hhayi loko labekakudzinga, lokukuviwa nguNkulunkulu. (Matewu 6:5) Ngendlela lefananako nalamuhla, bantfu labanyenti bathandaza ngekuvumelana naloko labakutsandzako, hhayi loko lokutsandvwa nguNkulunkulu. Ngesizatfu sekutsi abatinaki letimiso teliBhayibheli lesisandza kucoca ngato, Nkulunkulu akayiva imithandazo yabo.

Kodvwa kutsiwani ngawe? Nkulunkulu utawuyiva futsi ayiphendvule yini imithandazo yakho? Imphendvulo ayiyi ngebuve nobe sikhundla sakho. LiBhayibheli liyasicinisekisa: “Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye.” (Imisebenti 10:34, 35) Unjalo yini wena? Kwesaba Nkulunkulu kusho kumhlonipha kakhulu, kanye nekwesaba kumdvumata. Kwenta lokulungile kusho kufuna kwenta loko Nkulunkulu latsi kulungile kunekufuna kwenta loko lokutsandvwa nguwe nobe bantfu. Ufuna mbamba yini kutsi Nkulunkulu ayive imithandazo yakho? LiBhayibheli likutjela indlela longathandaza ngayo kute uviwe nguNkulunkulu.a

Kuliciniso kutsi bantfu labanyenti bafuna kutsi Nkulunkulu aphendvule imithandazo yabo ngalokusimangaliso. Ngisho nangetikhatsi teliBhayibheli, Nkulunkulu abengakavami kuyiphendvula ngalokusimangaliso imithandazo. Ngaletinye tikhatsi bekwendlula emakhulu eminyaka ngembikwekutsi kuphindze kwenteke lesinye simangaliso. Ngetulu kwaloko, liBhayibheli litsi sikhatsi sekwentiwa kwetimangaliso saphela nakufa baphostoli. (1 Khorinte 13:8-10) Loko kusho kutsi Nkulunkulu akayiphendvuli yini imithandazo lamuhla? Cha! Cabanga ngaleminye yemithandazo layiphendvulako.

Nkulunkulu usiniketa kuhlakanipha. Jehova unguMtfombo lomkhulu wekuhlakanipha kweliciniso. Usipha kona ngekukhululeka, futsi ubapha mahhala labo labafuna sicondziso sakhe nalabafuna kuphila ngaso.—Jakobe 1:5.

Nkulunkulu usipha umoya wakhe longcwele kanye nato tonkhe tinzuzo tawo. Umoya longcwele ungemandla Nkulunkulu lawasebentisako ekwenteni tintfo. Kute emandla lamakhulu kwendlula wona. Ungasisita sibeketelele luvivinyo. Ungasenta sibe nekuthula ngetikhatsi tekucindzeteleka. Ungasisita sakhe timfanelo letinhle naletikhangako. (Galathiya 5:22, 23) Jesu wacinisekisa balandzeli bakhe kutsi Nkulunkulu upha bantfu lesipho ngekukhululeka.—Lukha 11:13.

Nkulunkulu ubapha lwati labo labamfuna ngebucotfo. (Imisebenti 17:26, 27) Emhlabeni wonkhe, kunebantfu labalifuna ngebucotfo liciniso. Bafuna kwati ngaNkulunkulu—kutsi lingubani libito lakhe, kutsi iyini injongo yakhe ngemhlaba nangebantfu, kanye nekutsi bangasondzela njani kuye. (Jakobe 4:8) BoFakazi BaJehova bavame kuhlangana nebantfu labanjalo, futsi bayakujabulela kubaniketa timphendvulo teliBhayibheli talemibuto.

Nguleso sizatfu yini lesikwente watsatsa lomagazini? Ufuna kwati Nkulunkulu yini? Mhlawumbe-ke lena yindlela Nkulunkulu lawuphendvula ngayo umthandazo wakho.

[Umbhalo longentansi]