Kufanele Yini Ngithantaze KuboSanta?

Lokushiwo liBhayibheli

Cha. LiBhayibheli likhombisa kutsi kufanele sithantaze kuNkulunkulu kuphela, sisebentisa ligama laJesu. Jesu watjela bafundzi bakhe watsi: “Kufanele nithantaze ngalendlela: ‘Babe wetfu losemazulwini, alingcweliswe libito lakho.’” (Matewu 6:9) Akazange ayale bafundzi bakhe kutsi bathantaze kuboSanta, etingilosini, nobe kulomunye umuntfu ngaphandle kwaNkulunkulu.

Jesu waphindze watjela balandzeli bakhe watsi: “Mine ngiyindlela neliciniso nekuphila. Kute umuntfu lota kuBabe ngaphandle kwekutsi ete ngami.” (Johane 14:6) NguJesu kuphela lovunyelwe nguNkulunkulu kutsi abe lincusa letfu.—KumaHebheru 7:25.

Ngingathantaza yini kuNkulunkulu ngiphindze ngithantaze nakuboSanta?

Encenyeni yeMitsetfo Lelishumi, Nkulunkulu watsi: “Mine Simakadze, Nkulunkulu wakho, nginguNkulunkulu lonesikhwele.” (Eksodusi 20:5, LiBhayibheli LeSiSwati Lelivamile) Nkulunkulu ‘unesikhwele’ ngayiphi indlela? Umbhalo longentansi we-New American Bible utsi “Nkulunkulu ufuna kutsi kukhontwe yena kuphela.” Nkulunkulu ufuna kutsi tento tekukhonta, letifaka ekhatsi kuthantaza, tiyiswe kuye kuphela.—Isaya 48:11.

Sisuke simvisa buhlungu Nkulunkulu nasithantaza kulomunye umuntfu, kungaba boSanta nobe tingilosi letingcwele. Ngesikhatsi umphostoli Johane etama kukhonta ingelosi, lengelosi yamekhuta yatsi: “Ungakwenti loku! Ngobe ngimane nje ngiyinceku njengawe nanjengebazalwane bakho labanemsebenti wekufakaza ngaJesu. Ngako khonta Nkulunkulu.”—Sembulo 19:10.