Tehlakalo Letisiniketa Litsemba

“Emalangeni ekugcina kuyawufika tikhatsi letimatima.”—2 THIMOTHI 3:1.

UKE weva yini nobe wabona letinye taletehlakalo letibuhlungu letilandzelako?

● Sifo lesibulalako lesesicedze bantfu labanyenti.

● Indlala lenkhulu lebulala bantfu labanyenti.

● Kutamatama kwemhlaba lokubulala tinkhulungwane tebantfu, futsi lokushiya labanyenti bete emakhaya.

Emakhasini lalandzelako, utawubona lamanye emaciniso latawukwenta ucabangisise ngetehlakalo letifanana naleti. Utawuphindze ubone nekutsi liBhayibheli labiketela kutsi letehlakalo betitawuba khona “emalangeni ekugcina.”a

Nanobe kunjalo, injongo yaletihloko akusiko kukucinisekisa kutsi siphila eveni leligcwele tinkinga. Kungenteka kutsi nawe letinkinga utibona ngewakho emehlo. Kunaloko, letihloko tentelwe kutsi tikunikete litsemba. Titawuveta kutsi kugcwaliseka kwaletiphrofetho letisitfupha kusho kutsi ‘emalanga ekugcina’ sekatawuphela ngekushesha. Letihloko titawuphindze tikhulume ngemibono levame kuvetwa kute kuphikiswe lobufakazi, futsi tivete tizatfu letinhle tekukholelwa kutsi kukhona lokutsite lokuncono lesingakulindzela.

[Umbhalo longentansi]

Siphrofetho 1. Kutamatama Kwemhlaba

“Kuyawuba nekutamatama kwemhlaba lokwesabekako.”—LUKHA 21:11.

● EHaiti, Winnie lonetinyanga letingu-16 budzala ukhishwa endlini ledzilikile. Licembu letintsatseli te-TV limvile ngalesikhatsi akhala kabuhlungu. Uyasindza kulokutamatama kwemhlaba, kodvwa batali bakhe abasindzi.

YINI LEVETWA NGEMACINISO? Nga-January 2010, ngesikhatsi kutamatama kwemhlaba lokunemandla langaba ngu-7.0 kuhlasela eHaiti, kwafa bantfu labangetulu kwa-300 000. Kantsi kutsiwa labatigidzi letingu-1.3 basala bete emakhaya. Nanobe kutamatama kwemhlaba lokwenteka eHaiti kwaba ngulokukhulu kakhulu, bekungasiko kwekugcina. Emkhatsini wa-April 2009 kanye na-April 2010, kube nekutamatama kwemhlaba lokukhulu lokungaba ngu-18 emhlabeni wonkhe.

NGUMUPHI UMBONO LOVAMILE? Akusiko kutsi kutamatama kwemhlaba sekunyenti, kodvwa ngesizatfu sebucwephesha balamuhla, sesikunaka kakhulu kwendlula bantfu bangesikhatsi lesengcile.

ULICINISO YINI LOMBONO? Cabanga nganali liciniso: LiBhayibheli aligcizeleli linani lekutamatama kwemhlaba lokutawukwenteka emalangeni ekugcina. Kodvwa litsi ‘kutamatama kwemhlaba lokwesabekako’ kutawukwenteka “etindzaweni letinyenti,” futsi lamuhla sekwenteka kakhulu.—Makho 13:8; Lukha 21:11.

WENA UTSINI? Siyakubona yini kutamatama kwemhlaba lokwesabekako njengobe liBhayibheli labiketela?

Kutamatama kwemhlaba kukodvwa kungase kungabi bufakazi lobenetisako bekutsi siphila emalangeni ekugcina. Kodvwa-ke, siphrofetho sekutamatama kwemhlaba akusiso kuphela lesigcwalisekako. Cabanga ngesiphrofetho sesibili.

[Emavi lahambisana nesitfombe ekhasini 4]

“Tsine [tati tekuma kwemhlaba] sikubita ngekutsi kutamatama kwemhlaba lokwesabekako. Kodvwa labanye bantfu batsi kumane kutinhlekelele nje.”—KEN HUDNUT, WE-U.S. GEOLOGICAL SURVEY.

[Emavi laveta Umtfombo wesitfombe ekhasini 4]

© William Daniels/Panos Pictures

Siphrofetho 2. Indlala

“Kuyawuba netindlala.”—MAKHO 13:8.

● Indvodza letsite iya endzaweni lebitwa ngekutsi yiQuaratadji, eNiger, kute ikhosele khona. Tihlobo talendvodza, bomnakabo kanye nabodzadzewabo nabo babalekele indlala beta kulendzawo. Lendvodza ilele phansi ecansini yodvwana. Kungani iyodvwa? Sidi, losikhulu salendzawo utsi: “Lendvodza iyehluleka kondla [umndeni wayo], futsi seyinemahloni nobe seyiyesaba kutsi itawubukelwa ngubani.”

YINI LEVETWA NGEMACINISO? Emhlabeni wonkhe, lokungenani umuntfu loyedvwa kulabasikhombisa akakutfoli kudla lokwenele lilanga ngalinye. Lelinani likhulu kakhulu emaveni lase-Afrika leseningizimu yeSahara, ngobe khona umuntfu loyedvwa kulabatsatfu uba bete kudla lokwenele emalanga lamanyenti. Kute ukucondze loku, asewucabange ngemndeni lonababe, make, kanye nemntfwana. Nangabe lomndeni unekudla lokwenele bantfu lababili kuphela, ngubani longeke adle? Ngulobabe yini? Ngulomake, nobe ngulomntfwana? Lesi simo imindeni leminyenti lehlangabetana naso malanga onkhe.

NGUMUPHI UMBONO LOVAMILE? Umhlaba ukhicita kudla lokunyenti kakhulu lokungenela wonkhe umuntfu. Intfo ledzingekako nje kutsi imicebo yemhlaba inakekelwe kahle.

ULICINISO YINI LOMBONO? Kuliciniso kutsi lamuhla balimi bangakhicita kudla lokunyenti futsi bakutfumele nakuletinye tindzawo. Ecinisweni, bohulumende kufanele ngabe bakunakekela kahle kwabiwa kwekudla emhlabeni kute kucatululwe lenkinga yendlala. Nobe kunjalo, nangemuva kwekwetama emashumi eminyaka, abakhoni kukwenta loku.

WENA UTSINI? Sewuyagcwaliseka yini Makho 13:8? Nangetulu kwekutfutfuka kutebuchwephesha, indlala ihlasela bantfu kuwo wonkhe umhlaba yini?

Kutamatama kwemhlaba kanye nendlala kuvame kwendvulela letinye tinkinga letiletfwa ngulesinye sentakalo semalanga ekugcina.

[Emavi lahambisana nesitfombe ekhasini 5]

“Bantfwana labangetulu kwaloyedvwa kulabatsatfu lababulawa yinyumoniya, sifo semsheko kanye naletinye tifo bebangasindza kube bebangalambi.”—ANN M. VENEMAN, LOBEKANGUMCONDZISI LOMKHULU WE-UN CHILDREN’S FUND.

[Emavi laveta Umtfombo wesitfombe ekhasini 5]

© Paul Lowe/Panos Pictures

Siphrofetho 3. Tifo

“Bantfu bayawuhlaselwa . . . tifo letesabekako.”—LUKHA 21:11, Contemporary English Version.

● Bonzali, losebenta ngekwelapha sive kulelinye live lase-Afrika lelihlaselwe timphi, wenta konkhe langakwenta kute elaphe tisebenti tasetimayini letiphetfwe sifo lokutsiwa yi-Marburg, edolobheni lakubo.a Wacela lusito kubaphatsi balelinye lidolobha lelikhulu, kodvwa solo akakaphendvulwa. Ngemuva kwetinyanga letine, lolo sito luyafika, kodvwa Bonzali sewufile. Watfola lesifo kuletisebenti tasemayini ngesikhatsi atelapha.

YINI LEVETWA NGEMACINISO? Tifo letifanana nenyumoniya, sifo semsheko, i-HIV ne-AIDS, sifuba sengati, kanye namalaleveva tinguletinye tetifo letibulalako letihlasela bantfu. Ngemnyaka wa-2004, letifo tibulele bantfu labalinganiselwa etigidzini letingu-10.7. Nasingakubeka ngalenye indlela, singatsi umnyaka wonkhe, letifo tibulele umuntfu loyedvwa njalo ngemuva kwemizuzwana lemitsatfu.

NGUMUPHI UMBONO LOVAMILE? Linani lebantfu emhlabeni liyandza, ngako-ke nelizinga letifo nalo liyandza. Banyenti bantfu labangatfola letifo.

ULICINISO YINI LOMBONO? Linani lebantfu emhlabeni selandze kakhulu, futsi nelikhono lebantfu lekubona tifo, kutivikela, kanye nekutelapha, selitfutfukile. Ngaloko-ke, akukafaneli yini kutsi lizinga letifo linciphe? Kodvwa-ke kwenteka lokwehlukile kuloko.

WENA UTSINI? Bantfu bahlaselwa tifo yini, njengobe liBhayibheli labiketela?

Kutamatama kwemhlaba, indlala, kanye netifo, kutintfo letingaphili letibangela umonakalo lomkhulu etigidzini tebantfu. Bantfu labanyenti bahlushwa ngulabanye bantfu—linyenti labo lihlushwa ngulabo lokufanele ngabe bayabavikela. Naka loko siphrofetho seliBhayibheli lesitsi kutawukwenteka.

[Umbhalo longentansi]

[Emavi lahambisana nesitfombe ekhasini 6]

“Kubuhlungu kudliwa libhubesi nobe lenye intfo. Kungulokufananako nekudliwa sifo lesibuhlungu, kanye nekubona leso sifo sichubeka sikhula nobe sidlondlobala kuwo wonkhe umtimba.”—MICHAEL OSTERHOLM, LOSATI SEKUSAKATEKA KWETIFO.

[Emavi laveta Umtfombo wesitfombe ekhasini 6]

© William Daniels/Panos Pictures

Siphrofetho 4. Kuphela Kwelutsandvo

‘Bantfu . . . bayawubabete lutsandvo.’—2 THIMOTHI 3:1-3, God’s Word Bible

● Chris usebentela licembu laseNyakatfo yeWales lelisita bantfu labahlushwa budlova emakhaya. Utsi: “Ngikhumbula kufika lomunye make lobekashaywe kabuhlungu kangangekutsi ngangingasamboni ngisho nekumbona kutsi ngubani. Nalabanye bomake nabo balimele kakhulu emoyeni kangangekutsi behluleka ngisho nekukubuka.”

YINI LEVETWA NGEMACINISO? Kulelinye live lase-Afrika, cishe umfati loyedvwa kulabatsatfu wahlukunyetwa ngekwelicasi asengumntfwana. Luhlolo lolwentiwa kulelo live lwaveta kutsi emadvodza langetulu kwencenye leyodvwa kuletintsatfu anemuva wekutsi kwemukelekile kushaya bafati bawo. Kodvwa-ke, akusibo bafati bodvwa labahlushwa budlova basekhaya. Sibonelo saloku kutsi eCanada, cishe emadvodza lamatsatfu kulalishumi ayashaywa nobe ahlukunyetwe ngandlela tsite bafati bawo.

NGUMUPHI UMBONO LOVAMILE? Budlova basekhaya bebusolo bukhona. Kutsi nje lamuhla bunakwa kakhulu kunakadzeni.

ULICINISO YINI LOMBONO? Kulamashumi eminyaka lengcile, budlova basekhaya bebubukwe ngeliso lelibukhali. Kodvwa loku kuyinciphisile yini lenkinga? Cha! Seluphele kakhulu lutsandvo kubantfu.

WENA UTSINI? Sewuyagcwaliseka yini 2 Thimothi 3:1-3? Bantfu labanyenti sebete yini vele lutsandvo ngemindeni yabo, lokulutsandvo lokufanele lutivelele ngekwemvelo?

Siphrofetho sesihlanu lesigcwalisekako lamuhla sitsintsa likhaya letfu, lokungumhlaba. Caphela loko liBhayibheli lelikushoko ngalendzaba.

[Emavi lahambisana nesitfombe ekhasini 7]

“Budlova basekhaya butsatfwa njengalamanye emacala lakhona emhlabeni bantfu labangawabiki kakhulu. Umfati angase ashaywe yindvodza yakhe tikhatsi letingu-35, kube ngukhona ayewubika leyo ndzaba emaphoyiseni.”—UMKHULUMELI WE-WALES DOMESTIC ABUSE HELPLINE.

Siphrofetho 5. Kungaphatfwa Kahle Kwemhlaba

‘[Nkulunkulu] utawubhubhisa babhubhisi bemhlaba.’—SEMBULO 11:18.

● Umsebenti wemnumzane Pirri kukhipha liwayini etihlahleni telusundvu eKpor, eNigeria. Lomsebenti wakhe uphelile ngesizatfu sekucitseka lokukhulu kwa-oyili eNiger Delta. Utsi: “Lo-oyili ubulala tinhlanti, ulimata tikhumba tebantfu, futsi ungcolisa nemifudlana yetfu. Sengiphelelwe nangumsebenti wekutiphilisa.”

YINI LEVETWA NGEMACINISO? Ngekusho kwaletinye tati, tibi letingemathani latigidzi letingu-6.5 ticitfwa elwandle umnyaka ngamunye. Emaphesenti langaba ngu-50 aleto tibi ngemapulasitiki latawuntanta emakhulu eminyaka ngembikwekutsi abole. Ngephandle kwekungcolisa umhlaba, bantfu bayisebentisa kabi imicebo yemvelo ngelizinga lelikhulu kakhulu. Luhlolo luveta kutsi umhlaba udzinga umnyaka lowodvwa kanye netinyanga letisihlanu kute ukwati kuvusetela imicebo bantfu labayisebentisa ngemnyaka lowodvwa. Liphephandzaba lase-Australia, i-Sydney Morning Herald, litsi: “Nangabe linani lebantfu kanye netintfo labatisebentisako landza, ngemnyaka wa-2035 sitawube sesidzinga indzawo lelingana nemihlaba lemibili.”

NGUMUPHI UMBONO LOVAMILE? Bantfu bahlakaniphile futsi bayakwati kucatulula tinkinga. Singakwati kutilungisa letinkinga futsi siwuvikele umhlaba.

ULICINISO YINI LOMBONO? Bantfu labanyenti kanye netinhlangano letisebenta kamatima basecwayise ngemonakalo lowenteka endzaweni lesiphila kuyo. Nanobe kunjalo, umhlaba uyachubeka ungcoliswa ngelizinga lelikhulu.

WENA UTSINI? Sikhona yini sidzingo sekutsi Nkulunkulu angenele futsi avikele umhlaba ekungcolisweni, njengobe nje etsembisile?

Ngetulu kwaletiphrofetho letisihlanu lesekucocwe ngato, liBhayibheli laphindze labiketela tintfo letinhle lebetitawukwenteka emalangeni ekugcina. Cabanga ngalokunye kwako, lokusiphrofetho sesitfupha.

[Emavi lahambisana nesitfombe ekhasini 8]

“Ngiva shengatsi esikhundleni sekutsi ngiphile endzaweni lelipharadisi sengiphila kamdodi.”—ERIN TAMBER, LOSAKHAMUTI SASE-GULF COAST, EMELIKA, AKHULUMA MAYELANA NEMIPHUMELA LEYABANGELWA KUCITSEKA KWA-OYILI E-GULF OF MEXICO NGA-2010.

[Libhokisi ekhasini 8]

NguNkulunkulu Yini Lokubangelako?

Njengobe kuliBhayibheli lelabiketela letimo letimbi lesitibonako lamuhla, loko kusho kutsi tibangelwa nguNkulunkulu yini? Nguye yini lobangela kuhlupheka? Ungatfola timphendvulo letenetisako talemibuto esehlukweni 11 sencwadzi letsi Lifundzisani Mbambambamba LiBhayibheli? leshicilelwa boFakazi BaJehova.

[Emavi laveta Umtfombo wesitfombe ekhasini 8]

U.S. Coast Guard photo

Siphrofetho 6. Umsebenti Wekushumayela Lowentiwa Emhlabeni Wonkhe

“LeliVangeli ngembuso liyawushunyayelwa emhlabeni wonkhe.”—MATEWU 24:14.

● Vaiatea uhlala esichingini sasePacific lesikhashane, eTuamotu Archipelago. Nanobe iTuamotu inetichingi letingaba ngu-80 letisendzaweni lengaba ngemakhilomitha sikwele langetulu kwa-802 900, kunebantfu labangaba ngu-16 000 kuphela labahlala khona. Nanobe kunjalo, boVaiatea kanye nabomakhelwane bakhe sebake bavakashelwa boFakazi BaJehova. Kungani? Kungobe boFakazi bafuna kucocela bonkhe bantfu tindzaba letinhle teMbuso waNkulunkulu—ngisho nobe bahlalaphi.

YINI LEVETWA NGEMACINISO? Umlayeto weMbuso ushunyayelwa emhlabeni wonkhe. Ngemnyaka wa-2010 kuphela, boFakazi BaJehova bacitse ema-awa langetulu kwetigidzigidzi letingu-1.6 bashumayela tindzaba letinhle emaveni langu-236. Loku kusho kutsi Fakazi ngamunye ucitsa imizuzu lecishe ibe ngu-30 emsebentini wekushumayela lilanga ngalinye. Kuleminyaka lelishumi leyengcile, bashicilele futsi basakata tincwadzi tekufundzisa ngeliBhayibheli letingetulu kwetigidzigidzi letingu-20.

NGUMUPHI UMBONO LOVAMILE? Sekuphele tinkhulungwane teminyaka solo umlayeto weliBhayibheli ushunyayelwa.

ULICINISO YINI LOMBONO? Kuliciniso kutsi bantfu labanyenti bashumayela lokutsite ngemlayeto weliBhayibheli. Nanobe kunjalo, labanyenti babo bakwente sikhashana futsi bashumayela endzaweni lencane nje kuphela. Ngalokwehlukile, boFakazi BaJehova bashumayela kubantfu labanyenti kakhulu emhlabeni wonkhe, futsi loku bakwenta ngekuhleleka. Bayacinisela emsebentini wabo wekushumayela nangetulu kwekuphikiswa lokumatima lokuvela etinhlanganweni letinemandla naletikhohlakele.a (Makho 13:13) Ngetulu kwaloko, boFakazi BaJehova ababhadalwa ngekushumayela. Kunaloko, banikela ngesikhatsi sabo ngekutitsandzela, futsi bahambisa tincwadzi tabo mahhala. Umsebenti wabo usekelwa ngeminikelo yekutitsandzela.

WENA UTSINI? ‘LiVangeli ngembuso’ lishunyayelwa emhlabeni wonkhe yini? Kungenteka yini kutsi kugcwaliseka kwalesiphrofetho kusho kutsi kukhona lokutsite lokuhle lokutawukwenteka madvutane?

[Umbhalo longentansi]

[Emavi lahambisana nesitfombe ekhasini 9]

“Nangabe nje Jehova asasivumela, sitawuchubeka sishumayela tindzaba letinhle teMbuso ngenkhutsalo, futsi setame ngato tonkhe tindlela kufinyelela bantfu.”—INCWADZI YEMNYAKA YABOFAKAZI BAJEHOVA YA-2010.

Tikhatsi Letincono Setisedvute!

“Emvakwesikhashana benti balokubi bayawunyamalala, . . . Kodvwa labamnene bayawulidla lifa lemhlaba, bahlale kahle, batijabulise ngekuthula lokukhulu.”—TIHLABELELO 37:10, 11.

UNGATSANDZA yini kubona lesiphrofetho lesicashunwe ngenhla sigcwaliseka? Akungabateki kutsi ungatsandza. Kunetizatfu letivakalako tekukholelwa kutsi sitawugcwaliseka ngekushesha.

Letihloko letengcile tikhulume ngaletinye tetiphrofetho teliBhayibheli letiveta ngalokucacile kutsi siphila “emalangeni ekugcina.” (2 Thimothi 3:1-5) Nkulunkulu waphefumulela babhali beliBhayibheli kutsi babiketele letentakalo kute sibe nelitsemba. (Roma 15:4) Kugcwaliseka kwaletiphrofetho kusho kutsi tinkinga lesihlangabetana nato titawuphela madvutane.

Kutawukwentekani ngemuva kwemalanga ekugcina? UMbuso waNkulunkulu utawubusa bonkhe bantfu. (Matewu 6:9) Asewucabange ngendlela liBhayibheli lelitichaza ngayo timo letitawube tikhona emhlabeni ngaleso sikhatsi:

● Indlala itawuphela. “Shangatsi kungaba nenala emasimini, lenala isibekele ticongo tetintsaba, kube tiphihli.”—Tihlabelelo 72:16.

● Tifo titawuphela. “Kute lohlala [khona] loyakutsi: ‘Ngiyagula.’”—Isaya 33:24.

● Umhlaba utawulungiswa. “Lihlane nelive lelihamukile kuyawujabula, lugwadvule luyawujabula luchakaze timbali.”—Isaya 35:1.

Leti nguletinye tetiphrofetho teliBhayibheli letisikhutsatako letitawugcwaliseka ngekushesha. Kungani ungaceli boFakazi BaJehova bakukhombise loko lokubenta baciniseke kutsi tikhatsi letincono setisedvute?