Imibuto Levela Kubafundzi
Umbuso Wemhlaba WemaNgisi nemaMelika wacala nini kuba ngumbuso wesikhombisa lochazwa siphrofetho seliBhayibheli?
▪ Lesitfombe lesikhulu lesicwebetelako lesabonwa yiNkhosi Nebukhadnezari, asimeleli yonkhe imibuso lesemhlabeni. (Dan. 2:31-45) Simane nje simelela imibuso lesihlanu leyalwa nebantfu baNkulunkulu kusukela ngesikhatsi saDanyela kuchubeke.
Inchazelo yaDanyela yalesitfombe ikhombisa kutsi Umbuso Wemhlaba WemaNgisi nemaMelika bowutawuvela eRoma, hhayi kutsi bowutayibhubhisa iRoma. Kulesitfombe, Danyela ubona insimbi lesemilenteni yaso yehla idzimate ifike etinyaweni nasetintwaneni taso. (Etinyaweni nasetintwaneni, lensimbi ihlangene nelubumba.)a Lenchazelo ikhombisa kutsi Umbuso Wemhlaba wemaNgisi nemaMelika bowutawuvela kulemilente leyinsimbi yalesitfombe. Umlandvo ukhombisa kutsi nguloko vele lokwenteka. EmaNgisi labekayincenye lencane yembuso waseRoma, acala kuba nemandla ekupheleni kwa-1700. Ngekuhamba kwesikhatsi, iMelika yaba sive lesinemandla. Nobe kunjalo, ngaleso sikhatsi umbuso wesikhombisa wesiphrofetho seliBhayibheli bewungakabi khona. Ngani? Ngobe emaNgisi nemaMelika bekangakacali kusebenta ndzawonye ngendlela lekhetsekile. Acala kusebenta ndzawonye ngesikhatsi seMphi Yelive Yekucala.
Ngaleso sikhatsi, “bantfwana bembuso” bebamatasatasa eMelika endlunkulu yabo leseBrooklyn, eNew York. (Mat. 13:36-43) Emalunga esigaba salabagcotjiwe abeshumayela emaveni langephansi kweMbuso wemaNgisi. NgeMphi Yelive Yekucala, emaNgisi nemaMelika ahlangana aba nebudlelwane lobuhle, alwisana netitsa tawo kutepolitiki. Lemphi yenta kutsi emaNgisi nemaMelika atibone ancono ngebuve bawo, ase alwisana nencenye yentalo ‘yemfati’ yaNkulunkulu. Avala tincwadzi letatishicilelwa aphindze afaka ejele labo labebahamba embili emsebentini wekushumayela.—Semb. 12:17.
Ngaloko lesikufundzako etiphrofethweni teliBhayibheli, singabona kutsi umbuso wesikhombisa awucalanga kuba khona ekupheleni kwa-1700 ngalesikhatsi emaNgisi acala kuba ngumbuso lonemandla. Esikhundleni saloko, umbuso wesikhombisa wavela ekucaleni kwelilanga leNkhosi.b
[Imibhalo lengentansi]
a Lubumba loluhlangene nensimbi lumelela bantfu labaseMbusweni Wemhlaba wemaNgisi nemaMelika lonjengensimbi. Sekwendlule sikhatsi lesidze lubumba lwente kwaba lukhuni ngalombuso kutsi ube nemandla ngendlela lobewungafisa ngayo.
b Lenchazelo icacisa kwatisa lokusekhasini 57, sigaba 24, encwadzini letsi “Isiprofetho SikaDaniyeli” nasemashadini lasekhasini 56 na-139, ngesiZulu.
[Sitfombe ekhasini 19]
Bazalwane labasiphohlongo basendlunkulu yeWatchtower bafakwa ejele ngaJune 1918