7. (a) Ngusiphi sifungo lesentiwa nguHana, kungani asenta futsi waba yini umphumela? (b) Sifungo Hana lasenta besisho kutsi kutakwentekani kuSamuweli? (Buka umbhalo longentasi.)

⁷ Hana bekangulomunye lebekatsembekile ekugcineni tifungo latenta kuJehova. Wenta setsembiso ngalesikhatsi acindzetelekile futsi akhatsatekile ngenca yekutsi bekangabatfoli bantfwana, nazakwabo bekametfuka njalo. (1 Sam. 1:4-7, 10, 16) Hana watfululela sifuba sakhe kuNkulunkulu waphindze wenta nesifungo watsi: “Awu, Simakadze Somandla, nawungamane ubukisise lusizi lwencekukati yakho, ungikhumbule, ungayikhohlwa incekukati yakho, kodvwa incekukati yakho uyiphe indvodzana, leyo ndvodzana ngiyakunikela ngayo kuSimakadze, tonkhe tinsuku tekuphila kwayo, kuyawubate insingo leyawutsintsa inhloko yayo.”a (1 Sam. 1:11) Umthantazo waHana waphendvulwa futsi watala indvodzana yakhe yekucala. Loku kwamjabulisa kakhulu Hana! Nanobe kunjalo, bekasolo angakasikhohlwa sifungo lebekasente kuNkulunkulu. Nakacedza nje kumbeleka umfana wakhe, watsi: “Ngamcela kuSimakadze.”​—1 Sam. 1:20.