Wenta Ngekuhlakanipha

1-3. (a) Ingoti beyisondzela njani emtini wa-Abhigayili? (b) Yini lesitayifundza kulomfati lovelele?

ABHIGAYILI watsi nakabuka lelijaha emehlweni, wavele watibonela kutsi letfuke kakhulu. Belesaba kangaka nje kube kufanele. Ingoti lenkhulu beyisondzela kubo. Ngaleso sikhatsi, libutfo lemasotja langaba ngu-400 belisendleleni, litimisele kutewucotfula bonkhe labadvuna labasemtini waNabali, indvodza ya-Abhigayili. Besekwente njani?

² Lolutfuli lwalususwe nguNabali. Njengenhlalayenta, abekhombise kwedzelela nekuba nelunya. Kuloku-ke kodvwa, abehlambalate indvuna letsandzekako yelibutfo lemasotja leletsembekile naleliceceshwe kahle. Kusenjalo, lelinye lijaha lelisisebenti saNabali, lokungenteka kutsi belingumelusi, leta ku-Abhigayili, linelitsemba lekutsi utawuchamuka nelisu lelingabasindzisa. Kodvwa yini lebeyingentiwa ngumfati munye ebutfweni lemasotja?

‘Wawatsela Ngenhlamba’

8. Ngubani lolowatfukwa nguNabali, futsi kungani ungatsi loku bekubulima lobuphindziwe?

⁸ Nabali abente simo sa-Abhigayili saba matima kakhulu kunanini. Lendvodza lebeyetfukwe nguNabali kwakunguDavide. Phela lena bekuyinceku yaJehova lebeyigcotjwe nguSamuweli umphrofethi kute ayembule njengalekhetfwe nguNkulunkulu kutsi ibe yinkhosi ngemuva kwaSawula. (1 Sam. 16:1, 2, 11-13) Davide abesahlala ehlane kanye nemasotja langu-600, njengobe abebalekela iNkhosi Sawula lenemona nalengumbulali.