SIFUNDVO 34
Singakhombisa Njani Kutsi Siyamtsandza Jehova?
Kusukela wacala kufundza liBhayibheli sewumtsandza kakhulu yini Nkulunkulu? Ungatsandza yini kuchubeka ucinisa buhlobo bakho naye? Nangabe kunjalo, khumbula kutsi Jehova nakabona indlela lomtsandza ngayo ikhula, naye utakunakekela futsi akutsandze kakhulu. Ungamkhombisa njani kutsi uyamtsandza?
1. Simkhombisa njani Jehova kutsi siyamtsandza?
Sikhombisa Jehova kutsi siyamtsandza ngekumlalela. (Fundza 1 Johane 5:3.) Akaphoceleli muntfu kutsi amlalele. Kunaloko, uniketa ngamunye wetfu litfuba lekukhetsa kutsi sitamlalela yini nobe cha. Leni? Jehova ufuna ‘simlalele ngalokusuka enhlitiyweni.’ (KubaseRoma 6:17) Loku kusho kutsi ufuna umlalele ngobe umtsandza hhayi ngobe kufanele. Tincenye 3 na-4 talencwadzi tentelwe kukusita ukhombise indlela lomtsandza ngayo Jehova ngekutsi wente loko lokumjabulisako futsi ubalekele loko lokungamjabulisi.
2. Yini lengenta kube matima kukhombisa kutsi siyamtsandza Jehova?
“Tinyenti tinhlupheko letehlela lolungile.” (Tihlabelelo 34:19) Sonkhe silwisana nesono lesikitsi futsi singahle sibe netinkinga tetimali, siphatfwe kabi, siphindze sibe naletinye tinkinga. Nasinetinkinga kungaba matima kwenta loko Jehova latsi asikwente. Loku kungenca yekutsi kungaba melula kungamlaleli Jehova. Nobe kunjalo, nawukwenta ngekwetsembeka loko Jehova lakutjela kona, usuke ukhombisa kutsi umtsandza kwendlula nobe ngabe yini lenye, futsi usuke ukhombisa kutsi wetsembekile kuye. Ngendlela lefanako, naye utawetsembeka kuwe. Ngeke aze akushiye.—Fundza Tihlabelelo 4:3.
CHUBEKA UFUNISISA
Fundza kutsi yini leyenta Jehova ajabule nawumlalela, nekutsi yini lengakusita umlalele.
3. Indzaba lekutsintsako
Encwadzini yaJobe leseBhayibhelini, Sathane wasola Jobe nabo bonkhe bantfu labafuna kukhonta Jehova. Fundza Jobe 1:1, 6–2:10, bese nicoca ngalemibuto:
Sathane watsi yini lebeyenta Jobe alalele Jehova?—Buka Jobe 1:9-11.
Sathane ubasola ngani bonkhe bantfu lokufaka ekhatsi nawe?—Buka Jobe 2:4.
Fundza Jobe 27:5b, bese nicoca ngalombuto:
Jobe wakhombisa njani kutsi bekamtsandza mbamba Jehova?
Jobe wakhombisa kutsi uyamtsandza Jehova ngekuhlala etsembekile kuye
Sikhombisa kutsi siyamtsandza Jehova ngekuhlala setsembekile kuye
4. Jabulisa inhlitiyo yaJehova
Fundza Taga 27:11, bese nicoca ngalemibuto:
Jehova utiva njani nawenta tintfo ngekuhlakanipha futsi umlalela? Yini lementa ative kanjalo?
5. Ungetsembeka kuJehova
Indlela lesimtsandza ngayo Jehova isenta sicocele labanye ngaye. Kwetsembeka kwetfu kuye kusenta sicocele labanye ngaye ngisho nobe kumatima. Dlala le-VIDEO, bese nicoca ngalemibuto lelandzelako.
Ukutfola kumatima yini kucocela labanye ngaJehova?
Kule-video, yini leyasita Grayson kutsi ancobe kwesaba?
Kuba melula kwetsembeka kuJehova nasitsandza loko lakutsandzako futsi sitondza loko lakutondzako. Fundza Tihlabelelo 97:10, bese nicoca ngalemibuto:
Kuloko lokufundzile, ngutiphi letinye tintfo Jehova latitsandzako? Ngutiphi letinye tintfo latitondzako?
Ungafundza njani kutsandza lokuhle futsi utondze lokubi?
6. Siyasitakala nasilalela Jehova
Kulalela Jehova kuhlale kukahle kakhulu. Fundza Isaya 48:17, 18, bese nicoca ngalemibuto:
Ucabanga kutsi singetsemba yini kutsi Jehova uhlale akwati loko lokungasisita? Usho ngani?
Kuze kube ngunyalo kutadisha kwakho liBhayibheli nekufundza ngaNkulunkulu weliciniso, Jehova, kukusite njani?
LABANYE BANTFU BATSI: “Nkulunkulu akanendzaba nalengikwentako.”
Ngumuphi umbhalo longawusebentisa kuze ukhombise kutsi lesikwentako kungenta Jehova ajabule nobe eve buhlungu?
LOKO LESICOCE NGAKO
Singakhombisa kutsi siyamtsandza Jehova ngekumlalela nangekukwenta ngekwetsembeka loko lasitjela kutsi sikwente ngisho nobe kumatima.
Yini Loyifundzile?
Ufundzeni esibonelweni saJobe?
Utawukhombisa njani kutsi uyamtsandza Jehova?
Yini letakusita uhlale wetsembekile kuJehova?
LOKUNYE LONGAKUHLOLA
Tfola kutsi ungetsembeka njani kuJehova nasebandleni.
Fundza lokunyenti ngaloko Sathane lasola bantfu ngako.
“Jobe Ucotfo KuNkulunkulu” (LiBhayibheli—Ngumuphi Umlayeto Leliwucuketse? incenye 6)
Buka kutsi bantfwana bangakhombisa njani kutsi bayamtsandza Jehova.
Umuntfu losemusha angakwenta njani ngekwetsembeka loko Jehova latsi akakwente ngisho nobe labanye bantfu labasha betama kumentisa tintfo letimbi?