SIFUNDVO 17

Ungumuntfu Lonjani Jesu?

Printed Edition

Njengobe sifundza ngetintfo Jesu latisho nalatenta ngesikhatsi alapha emhlabeni, sitfola buntfu lobusenta sisondzele kuye kanye nakuBaba wakhe Jehova. Ngubuphi buntfu bakhe lobuhamba embili? Singamlingisa njani Jesu ekuphileni kwetfu?

1. Jesu ufana naBabe wakhe ngatiphi tindlela?

Kwaphela tigidzigidzi teminyaka Jesu asezulwini naBabe wakhe lonelutsandvo futsi afundza kuye. Loko kwamenta wacabanga njengaye, wativa njengaye futsi wenta tintfo njengaye. (Fundza Johane 5:19.) Ecinisweni, Jesu wabukhombisa ngendlela lecacile buntfu baBabe wakhe, kangangekutsi waze watsi: “Loyo longibonile mine umbonile naBabe.” (Johane 14:9) Njengobe ufundza ngebuntfu baJesu, utawumati kancono naJehova. Sibonelo saloko kutsi indlela Jesu lebekabakhatsalela ngayo bantfu ikhombisa indlela Jehova lakukhatsalela ngayo.

2. Jesu wakhombisa njani kutsi uyamtsandza Jehova?

Jesu watsi: “Ngenta njengobe nje Babe angiyalile, kuze lelive lati kutsi ngiyamtsandza Babe.” (Johane 14:31) Ngesikhatsi alapha emhlabeni, Jesu wakhombisa kutsi bekamtsandza kakhulu Babe wakhe ngekutsi amlalele ngisho nobe bekumatima kwenta kanjalo. Bekahlale akhuluma ngaye futsi asita nalabanye kutsi babe bangani baKhe.—Johane 14:23.

3. Jesu wakhombisa njani kutsi uyabatsandza bantfu?

LiBhayibheli litsi Jesu ‘ubatsandza kakhulu bantfu.’ (Taga 8:31) Wakhombisa kutsi uyabatsandza ngekutsi abakhutsate futsi abasite ngekungatigodli. Timangaliso latenta betingakhombisi emandla akhe nje kuphela, kodvwa betikhombisa neluvelo. (Makho 1:40-42) Bekaphatsa bantfu ngemusa futsi angakhetsi. Tintfo lebekatikhuluma betidvudvuta futsi tiniketa litsemba kubantfu labanetinhlitiyo letinhle lebebamlalela. Jesu bekakulungele kuhlupheka kanye nekufa ngenca yekutsi bekabatsandza bonkhe bantfu. Nobe kunjalo, bekatsandza kakhulu labo lebebalalela loko bekakufundzisa.—Fundza Johane 15:13, 14.

CHUBEKA UFUNISISA

Fundza lokunyenti ngebuntfu baJesu, futsi uhlole kutsi ungabakhombisa njani labanye kutsi uyabatsandza futsi uyephana njengaye.

4. Jesu uyamtsandza Babe wakhe

Sibonelo saJesu sisifundzisa indlela lesingakhombisa ngayo kutsi siyamtsandza Nkulunkulu. Fundza Lukha 6:12 naJohane 15:10; 17:26. Ngemuva kwekufundza umbhalo ngamunye, cocani ngalombuto:

Singamlingisa njani Jesu futsi sikhombise nekutsi siyamtsandza Jehova?

Jesu uyathantaza. — Jesu bekamtsandza Babe wakhe losezulwini futsi bekahlale akhuluma naye ngemthantazo

5. Jesu bekatikhatsalela tidzingo talabanye bantfu

Jesu bekabeka tidzingo talabanye kucala kunetakhe. Ngisho nobe adziniwe, bekasebentisa sikhatsi sakhe nemandla akhe kuze asite bantfu. Fundza Makho 6:30-44, bese nicoca ngalemibuto:

Kulendzaba, ngutiphi letinye tindlela Jesu lakhombisa ngato kutsi uyabakhatsalela bantfu?—Buka vesi 31, 34, 41 kanye na-42.
Yini leyenta Jesu wasita bantfu?—Buka vesi 34.
Njengobe Jesu anebuntfu lobufana nebaJehova, lobuntfu bakhe bukufundzisani ngaJehova?
Ngutiphi letinye tindlela lesingakhombisa ngato kutsi siyabakhatsalela labanye bantfu njengaJesu?

Jesu wondla bantfu labanyenti ngalokusimangaliso ngekutsi andzise tinkhwa letisihlanu kanye netimfishi letimbili. Bafundzi baniketa emadvodza, besifazane kanye nebatfwana kudla.

6. Jesu uyephana

Jesu bekephana ngisho nobe bekete tintfo letinyenti, futsi natsi usikhutsata kutsi sephane. Fundza Imisebenti 20:35, bese nicoca ngalombuto:

Ngekusho kwaJesu, yini lengasenta sijabule?

Dlala le-VIDEO, bese nicoca ngalombuto lolandzelako.

I-VIDEO: “Kunenjabulo Lenkhulu Ekupheni”—Incenye (4:00)

Ngutiphi letinye tindlela lesingakhombisa ngato kutsi siyephana, ngisho nobe site tintfo letinyenti?

Bewati yini?

LiBhayibheli lisifundzisa kutsi kufanele sithantaze kuJehova egameni laJesu. (Fundza Johane 16:23, 24.) Nasithantaza kanjalo, sisuke sikhombisa kutsi siyabonga ngaloko Jesu lasentela kona kuze asisite sibe bangani baJehova.

LABANYE BANTFU BATSI: “Nkulunkulu akanendzaba nekuhlupheka kwetfu.”