SIFUNDVO 51

Ungamjabulisa Njani Jehova Ngendlela Lokhuluma Ngayo?

Printed Edition

Ngesikhatsi Jehova asidala, wasipha sipho lesimangalisakos, lokulikhono lekukhuluma. Unendzaba yini nekutsi sisisebentisa njani lesipho? Yebo! (Fundza Jakobe 1:26.) Ngako, singalisebentisa njani likhono letfu lekukhuluma ngendlela lejabulisa Jehova?

1. Singalisebentisa njani likhono lekukhuluma?

LiBhayibheli lisitjela kutsi ‘sichubeke sikhutsatana futsi sakhana.’ (1 KubaseThesalonika 5:11) Bakhona yini lobacabangako labadzinga kukhutsatwa? Yini longayenta kuze ubente bative bancono? Bacinisekise kutsi unendzaba nabo. Mhlawumbe ungabatjela loko lokutsandzako ngabo. Ukhona yini umbhalo lowucabangako longakhutsata lotsite lomatiko? Minyenti imibhalo longakhetsa kuyo. Khumbula nekutsi indlela lokusho ngayo ingamkhutsata kakhulu umuntfu. Ngako, ngasosonkhe sikhatsi, yetama kukhuluma ngendlela lenemusa.—Taga 15:1.

2. Yinkhulumo lenjani lokufanele siyibalekele?

LiBhayibheli litsi: “Akungaphumi ligama lelibolile emlonyeni wenu.” (Fundza Kubase-Efesu 4:29.) Loko kusho kutsi asiwasebentisi emagama lamabi nobe sisho emavi lalimatako langavisa umuntfu buhlungu. Kufanele siyibalekele nenhlebo lelimatako nekunyundzela.—Fundza Taga 16:28.

3. Yini lengasisita sikhulume ngendlela leyakhako?

Ngalokuvamile, tintfo lesikhuluma ngato tiveta loko lokusetinhlitiyweni tetfu nasetingcondvweni tetfu. (Lukha 6:45) Ngako, kufanele sitifundzise kucabanga ngetintfo letilungile, letimsulwa, letitsandzekako, naletidvunyiswako. (KubaseFiliphi 4:8) Kuze sihlale sicabanga ngaletintfo, kufanele sikukhetse kahle lesitijabulisa ngako futsi sibakhetse kahle nebangani betfu. (Taga 13:20) Kuyasita nekutsi sicabange kucala ngaphambi kwekutsi sikhulume. Cabanga ngekutsi tintfo lotishoko titobatsintsa njani labanye. LiBhayibheli litsi: “Emavi lakhulunywe angakacatjangwa ahlaba njengenkemba, kodvwa lulwimi lwemuntfu lohlakaniphile luyaphilisa.”—Taga 12:18.

CHUBEKA UFUNISISA

Fundza kukhuluma ngendlela lejabulisa Jehova nalekhutsata labanye.

4. Gadza indlela lokhuluma ngayo

Sonkhe kuyenteka sisho tintfo lesibese sitisola ngato ngekuhamba kwesikhatsi. (Jakobe 3:2) Fundza KubaseGalathiya 5:22, 23, bese nicoca ngalemibuto:

Ngutiphi titselo temoya longatithantazela kuze ukhone kugadza lulwimi lwakho? Letitselo temoya tingakusita njani?

Fundza 1 KubaseKhorinte 15:33, bese nicoca ngalombuto:

Bangani bakho kanye netintfo lotijabulisa ngato kungayitsintsa njani indlela lokhuluma ngayo?

Titfombe: Tintfo letenta indvodza igcine ikhuluma kabi nemfati wayo. 1. Ilalela umculo lokhutsata budlova. 2. Ijabulela kubukela umdlalo wesibhakela ku-TV nemngani wayo. — Yini lengatsintsa indlela lokhuluma ngayo?

Titfombe: Tintfo letenta lendvodza lefanako ikhulume kahle nemfati wayo. 1. Ifundza liBhayibheli. 2. Lendvodza nemfati wayo bacoca nemngani wabo eHholweni leMbuso. — Yini lengatsintsa indlela lokhuluma ngayo?

Fundza Umshumayeli 3:1, 7, bese nicoca ngalombuto:

Kunini lapho kungaba kuhlakanipha khona kuthula nobe kumela sikhatsi lesikahle sekukhuluma?

5. Khuluma kahle ngalabanye

Singakubalekela njani kukhuba labanye nobe kusho tintfo letingabavisa buhlungu? Dlala le-VIDEO, bese nicoca ngalemibuto lelandzelako.

I-VIDEO: “Khuluma Loko Lokulungele Kwakha Labanye” (4:07)

Kule-video, yini leyente lomzalwane wafuna kushintja indlela lakhuluma ngayo ngalabanye?
Yini layentile kuze ashintje?

Fundza Umshumayeli 7:16, bese nicoca ngalombuto:

Yini lokufanele siyikhumbule nasilingeka kutsi sikhulume kabi ngalotsite?

Fundza Umshumayeli 7:21, 22, bese nicoca ngalombuto:

Lamavesi angakusita njani kutsi ungatfukutseli nangabe lomunye akhuluma kabi ngawe?

6. Bani nemusa nawukhuluma nemalunga emndeni wakho

Jehova ufuna sibe nemusa nelutsandvo nasikhuluma nemalunga emindeni yetfu. Dlala le-VIDEO, bese nicoca ngalombuto lolandzelako.

I-VIDEO: Lutsandvo Nenhlonipho Kwenta Imindeni Ibe Nebunye (3:08)

Yini letakusita kutsi ukhulume ngemusa nemalunga emndeni wakho?

Fundza Kubase-Efesu 4:31, 32, bese nicoca ngalombuto:

Singakhuluma njani nemalunga emindeni yetfu ngendlela letawajabulisa?

Jehova wayiveta indlela lativa ngayo ngeNdvodzana yakhe, Jesu. Fundza Matewu 17:5, bese nicoca ngalombuto:

Ungamlingisa njani Jehova ngendlela lokhuluma ngayo nemalunga emndeni wakho?

Make uncoma intfombatanyane yakhe ledvwebe lokutsite. — Funa ematfuba ekuncoma labanye

LABANYE BANTFU BATSI: “Ngikhuluma nobe yini lengiyicabangako, anginendzaba nekutsi labanye bantfu bativa njani ngako.”

Uyavumelana yini naloko? Yini lekwenta uvumelane nako, nobe ungavumelani nako?

LOKO LESICOCE NGAKO

Loko lesikushoko kunemandla. Ngako, kufanele sicabangisise kutsi sikusho nini nekutsi sikusho kanjani.

Yini Loyifundzile?

Ungayisebentisa njani indlela lokhuluma ngayo kuze usite labanye?
Yinkhulumo lenjani lofuna kuyibalekela?
Yini lengasisita kutsi sihlale sikhuluma ngemusa nangendlela leyakhako?

Lilanga locedze ngalo lesifundvo:

Umgomo

Kuleliviki, yetama kuncoma lotsite emndenini wakho nobe ebandleni.

Leminye Imigomo Lotibekela Yona:

Your other goal

LOKUNYE LONGAKUHLOLA

Yini lengasisita sikhulume ngendlela lengakhutsata labanye?

Khuluma Njengalabahlakaniphile (8:04)

Fundza ngaloko longakwenta kuze ubalekele kwetfuka inhlamba.

“Kubi Yini Vele Kwetfuka Inhlamba?” (Sihloko lesiku-internet)

Fundza indlela longakubalekela ngayo kukhuluma kabi ngalabanye.

Ungayicedza Njani Inhlebo? (2:36)

Buka indlela Jehova lasita ngayo lenye indvodza kutsi iyekele kwetfuka inhlamba.

“Ngacala Kucabangisisa Ngesiphetfo Semphilo Lebengiyiphila” (Sicongosekulindza, sa-August 1, 2013)