Kufika KwaMesiya

JEHOVA wabasita yini bantfu kute babone kutsi Jesu abenguMesiya lobekatsenjisiwe? Yebo. Cabanga ngaloko Nkulunkulu lakwenta. Besekuyiminyaka lengu-400 imiBhalo yesiHebheru yacedvwa kubhalwa. Edolobheni laseNazaretha, lelisesigodzini lesisenyakatfo yaseGalile, intfombi lenguMariya yavakashelwa sivakashi lebeyingakasilindzeli. Ingilosi Gabhriyeli yefika kuye, yamtjela kutsi Nkulunkulu utawusebentisa umoya wakhe longcwele lotawumenta kutsi akhulelwe futsi atale indvodzana, nanobe abeyintfombi-ntfo. Lendvodzana beyitawuba yiNkhosi letsenjisiwe, letawubusa kuze kube phakadze! Lomntfwana bekatawuba yiNdvodzana yaNkulunkulu, leyo Nkulunkulu labetawudlulisela kuphila kwayo esibeletfweni saMariya.

Mariya walemukela ngekutfobeka lelilungelo lelibalulekile. Singani sakhe lesasingumbati, Josefa, samshada ngemuva kwekutsi Nkulunkulu atfumele ingilosi leyamtjela kutsi Mariya abekhulelwe ngoba Nkulunkulu abendlulisele kuphila kwendvodzana yakhe esibeletfweni sakhe. Kutsiwani-ke ngesiphrofetho lesitsi Mesiya abetawutalelwa eBhetlehema? (Mikha 5:2) Lelo dolobhana lalingaba ngemakhilomitha langu-140 kusuka eNazaretha!

Umbusi waseRoma wakhipha umyalo wekutsi kube nelubalo. Bantfu bacelwa kutsi bayobhalisa emadolobheni labatalelwa kuwo. BoJosefa naMariya bebadzabuka eBhetlehema, ngako-ke Josefa watsatsa umkakhe lobekakhulelwe baya khona. (Lukha 2:3) Mariya wabelekela esitebeleni, wase ulalisa loluswane emkhombeni. Nkulunkulu wase utfumela sicumbi setingilosi kutsi tiyewutjela belusi lebebaluse entsabeni, kutsi kunemntfwana losadza kutalwa longuMesiya lotsenjisiwe nobe Khristu.

Nalabanye bebatakufakazela kutsi Jesu unguMesiya lotsenjisiwe. Umphrofethi Isaya wabiketela kutsi bekuyawuvela indvodza, ilungisele indlela yemsebenti lobalulekile waMesiya. (Isaya 40:3) Lendvodza bekunguJohane uMbhabhatisi. Kwatsi lapho abona Jesu watsi: “Nalo liWundlu laNkulunkulu lelisusa sono selive!” Labanye bafundzi baJohane balandzela Jesu ngekushesha. Lomunye wabo watsi: “Sesimtfolile Mesiya.”​—Johane 1:29, 36, 41.

Kwakunalobunye futsi bufakazi. Kwatsi lapho Johane abhabhatisa Jesu, Jehova wakhuluma asezulwini. Wagcoba Jesu kutsi abe nguMesiya ngemoya longcwele, futsi watsi: “Lena yiNdvodzana yami, letsandzekako, lengijabula ngayo.” (Matewu 3:16, 17) LoMesiya lobekatsenjisiwe besekafikile!

Kwenteka nini loku? Ngemnyaka wa-29 C.E., lapho kuphela iminyaka lengu-483 leyabiketelwa nguDanyela. Loko bekuyincenye yebufakazi lobungenakuphikiswa bekutsi Jesu unguMesiya, nobe Khristu. Ngumuphi umlayeto labetawumemetela ngesikhatsi aphila emhlabeni?

​—Lendzaba itsetfwe encwadzini yaMatewu sahluko 1-3; Makho sahluko 1; Lukha sahluko 2; Johane sahluko 1.