Utimisele Yini Kuvumelana Netimo?
1. Nguluphi lushintjo lokudzingeka silwente ngenca yetingucuko letenteka emhlabeni?
1 Ku-1 Khorinte 7:31, liBhayibheli lifananisa umhlaba nesiteji lapho kushintjashintjana khona tinkhundla temidlalo wasesiteji kanye nebalingiswa. Tingucuko letisemhlabeni tidzinga kutsi sihle senta lushintjo etindleleni tetfu tekushumayela, eluhlelweni lwetfu kanye nasendleleni lesikhuluma ngayo nebantfu. Utimisele yini kuvumelana netimo?
2. Yini leyenta kudzingeke kutsi sivumelane netimo kuze sihambisane nenhlangano yaJehova?
2 Tindlela Takho Tekushumayela: Libandla lebuKhristu belisolo livumelana netimo. Ngalesikhatsi Jesu atfuma bafundzi bakhe kwekucala, wabatjela kutsi bangakuphatsi kudla nome imali. (Mat. 10:9, 10) Nanome kunjalo, ngemuva kwesikhatsi waphindze wabaniketa ticondziso letehlukile, ngobe bekabona kutsi ngekuhamba kwesikhatsi bebatawuzondwa nanekutsi umsebenti wekushumayela bewutawandza uze ufinyelele nakulamanye emasimu. (Luk. 22:36) Kulelikhulu leminyaka lelendlulile, inhlangano yaJehova isebentise tindlela letehlukehlukene tekushumayela—njengemakhadi ebufakazi, imisakato kanye netimoto letinemibhobho—kuye ngesidzingo sangaleso sikhatsi. Esikhatsini salamuhla, ngesizatfu sekutsi etindzaweni letinyenti bantfu abavami kutfolakala emakhaya, sekugcizelelwa kutsi sishumayele nasetindzaweni lakutfolakala khona bantfu siphindze sifakaze singakahleli. Siphindze sakhutsatwa kutsi sishumayele umuti ngemuti ngesikhatsi sakusihlwa nangabe bantfu bangatfolakali ekhatsi nelusuku. Uyahambisana yini nenkalishi yaJehova, njengoba ishintja indlela lehamba ngayo?—Hez. 1:20, 21.
3. Kuvumelana netimo kusenta njani kutsi sibe lusito kubantfu labasensimini yetfu?
3 Inshumayelo Yakho: Yini lekhatsata bantfu labasendzaweni yangakini kulamalanga? Temnotfo? Tinkinga temndeni? Yimphi? Kumcoka kwati tinkinga netimo bantfu labasensimini yetfu lababhekene nato kuze sitowukhona kulungiselela inshumayelo lehambisana nato. (1 Khor. 9:20-23) Nangabe banikati bemakhaya basichazela ngetimo lababhekene nato, kuncono kutsi sivumelanise inshumayelo yetfu naloko lokubakhatsatako kunekutsi simane siphendvule ngekukha etulu bese sichubeka nenshumayelo yetfu lebesivele siyilungiselele.
4. Kubaluleke ngani kutsi sisheshe sivumelane netimo?
4 Masinyane “inkhundla” yekugcina yalelive itawuphela bese kucalisa lusizi lolukhulu. “Sikhatsi sesinciphile.” (1 Khor. 7:29) Kubaluleke kakhulu kutsi silwele kuvumelana netimo ngaphandle kwekuphotisa emaseko, kuze sitowufeza lokunyenti kulesikhatsi lesincane lesisele.