1, 2. Kwenteka njani kutsi Jesu abe sehlane laseJudiya ngelikwindla la-29 C.E., futsi kwentekani kuye lapho? (Buka sitfombe lesisekucaleni kwalesehluko.)

KUSANDZA kungena likwindla nga-29 C.E., Jesu usehlane laseJudiya, enyakatfo yeLwandle Lolufile. Waholelwa ngumoya longcwele kulendzawo ngemuva kwekubhajatiswa nekugcotjwa kwakhe. Njengobe akulendzawo lelugwadvule, lenemadvwala netindvonga, Jesu besekacitse emalanga langu-40, azile kudla, athantaza futsi azindla. Ngaleso sikhatsi, kungenteka Jehova abekhuluma neNdvodzana yakhe ayilungiselela loko lobekuseta.

² Nyalo, njengobe Jesu besekaphelelwa ngemandla ngenca yendlala, Sathane weta kuye. Lokwenteka ngemuva kwaloko kuveta indzaba lebalulekile letsintsa bonkhe labatsandza kukhonta lokuhlantekile, kuhlanganise nawe.

3, 4. (a) Sathane wacalisa tilingo takhe letimbili tekucala ngemavi latsini, futsi kungenteka bekafuna kutsi Jesu angabate ini? (b) Sathane uwasebentisa kanjani emachinga lafanako lamuhla?

³ Fundza Matewu 4:1-7. Sathane uveta tilingo tekucala letimbili ngendlela lebhacile asebentisa emavi latsi, “nangabe uyindvodzana yaNkulunkulu.” Sathane bekakungabata yini vele kutsi Jesu uyiNdvodzana yaNkulunkulu? Cha. Lengilosi yaNkulunkulu leyawa, beyati kahle kamhlophe kutsi Jesu uyiNdvodzana yaNkulunkulu lelitibulo. (Khol. 1:15) Asingabati nekutsi Sathane abewati emavi Jehova lawasho kuJesu ngesikhatsi abhajatiswa latsi: “Lena yiNdvodzana yami letsandzekako, ngiyemukele.” (Mat. 3:17) Kungenteka Sathane abefuna Jesu angabate Babe wakhe futsi angasametsembi kutsi utawukhona mbamba kumnakekela. Kulesilingo sekucala sekutsi Sathane atsi kuJesu akashintje ematje abe sinkhwa, bekufana nekutsi utsi: ‘Njengobe uyiNdvodzana yaNkulunkulu, kungani Babe wakho angakuniki kudla kulelihlane leliligwadvule?’ Kulesilingo sesibili sekutsi Sathane atsi kuJesu akatijike phansi asuka esicongweni selithempeli, bekufana nekutsi utsi: ‘Njengobe uyiNdvodzana yaNkulunkulu, umetsemba mbamba yini Babe wakho kutsi angakuvikela?’