• INkhosi Icenga Buhlobo Bantfu Bayo Labanabo NaNkulunkulu
    UMbuso WaNkulunkulu Uyabusa!

    • 1-3. Yini Jesu layenta ngesikhatsi atfola kutsi lithempeli belingcoliswa?

      JESU bekalihlonipha kakhulu lithempeli lebeliseJerusalema ngenca yekutsi bekakwati loko lebelikumelela. Bese kusikhatsi lesidze lelithempeli liyindzawo leyinhloko yekukhonta kweliciniso emhlabeni. Kodvwa lokukhonta​—lokukukhonta Nkulunkulu longcwele, Jehova—​bekufanele kuhlanteke futsi kube msulwa. Asewucabange nje kutsi Jesu wativa njani ngesikhatsi efika ethempelini ngaNisan 10, 33 C.E., futsi akhandza kutsi belingcolisiwe. Yini lebeyenteka?​—Fundza Matewu 21:12, 13.

      2 Ebaleni lebantfu beTive, batsengisi labanebugovu kanye nebantjintji bemali bebasitakala ngetikhonti lebetite kutewunikela imihlatjelo kuJehova.a Jesu “wacosha bonkhe lebebatsengisa nalabebatsenga, waketula nematafula alabo lebebantjintja timali.” (Catsanisa naNehemiya 13:7-9.) Wawalahla lamadvodza lanebugovu ngenca yekutsi abegucule indlu yaBabe wakhe yaba ‘ngumhume wetigelekece.’ Ngekwenta kanjalo, Jesu bekakhombisa kutsi bekalihlonipha lithempeli kanye naloko lebelikumelela. Kukhontwa kwaBabe wakhe bekufanele kuhlale kuhlantekile.

  • INkhosi Icenga Buhlobo Bantfu Bayo Labanabo NaNkulunkulu
    UMbuso WaNkulunkulu Uyabusa!

    • a EmaJuda labesuke avakashile bekufanele asebentise lolunye luhlobo lwemali kute abhadale umtselo welithempeli lobewentiwa minyaka yonkhe, futsi bantjintji bemali bebawabhadalisa kute bawashintjele lemali ibe luhlobo lawalufunako. Ngetulu kwaloko, kungenteka kutsi tivakashi bekudzingeka titsenge tilwane letitawuba yimihlatjelo. Jesu wabita labatsengisi ngekutsi ‘tigelekece,’ futsi kungenteka kutsi loko bekubangelwa kutsi labatsengisi bebatidulisa kakhulu tintfo lebebatitsengisa.