Uyini UMbuso WaNkulunkulu?

“Letindzaba letinhle tembuso . . .”—MATEWU 24:14.

ENSHUMAYELWENI yakhe yaseNtsabeni ledvumile, Jesu washo umthandazo losibonelo, lobewunanasi sicelo lesiya kuNkulunkulu: “Umbuso wakho awute.” Bantfu labanyenti bawati ngenhloko lomthandazo futsi bawuphindzaphindza kanyenti. Lenye i-encyclopedia itsi “lona ngumthandazo loyinhloko losetjentiswa ngiwo onkhe emaKhristu nawathandaza.” Nanobe kunjalo, bantfu labanyenti labawusebentisako abati kutsi uyini loMbuso nobe kutsi yini lotawuyenta nasewufikile.—Matewu 6:9, 10.

Loku akumangalisi. Baholi beTinkholo Letitsi TebuKhristu baniketa tinchazelo letiphikisanako naletididako mayelana neMbuso. Lomunye utsi uMbuso waNkulunkulu “unemandla langetulu kwalawo emvelo, . . . lasenta sisondzelane naNkulunkulu lophilako . . . , futsi bantfu batfola kusindziswa kuwo.” Lomunye uchaza livangeli leMbuso ngekutsi “ticondziso letimayelana nelisontfo.” I-Catechism of the Catholic Church itsi: “UMbuso waNkulunkulu ukulunga, kuthula, kanye nenjabulo leletfwa nguMoya Longcwele.”

Ekhasini 2 lalomagazini utawutfola inchazelo lecacile. Itsi: “UMbuso waNkulunkulu, longuhulumende sibili wasezulwini, ngekushesha utawucedza bonkhe bubi futsi wente lomhlaba ube lipharadisi.” Asesibone kutsi liBhayibheli liwafakazela njani lamavi.

Labo Labatawubusa Wonkhe Umhlaba Esikhatsini Lesitako

Umbuso nguhulumende lobuswa yinkhosi. INkhosi yeMbuso waNkulunkulu nguJesu Khristu lovusiwe. Kubekwa kwakhe esihlalweni sebukhosi ezulwini kwachazwa embonweni lobewunikwe umphrofethi Danyela, lowabhala: “Embonweni wami wasebusuku, ngabona embikwami kwakume umuntfu labenjengendvodzana yemuntfu [Jesu], abehla ngemafu asezulwini. Wasondzela kuloLophila Phakadze Naphakadze [Nkulunkulu Jehova], waholeleka ebukhoneni bakhe. Wanikwa emandla ekubusa, nenkhatimulo, nebukhosi. Bonkhe bantfu, netive, nebantfu bato tonkhe tilwimi bakhotsama kuye bamkhonta. Kubusa kwakhe kukubusa kwaphakadze naphakadze lokungasoze kwaphela, nembuso wakhe ngulowo longasoze wacitfwa.”—Danyela 7:13, 14.

Incwadzi yeliBhayibheli yaDanyela iphindze ivete kutsi Nkulunkulu utawumisa loMbuso ucine. Utawususa bonkhe bohulumende bebantfu, futsi wona angeke uze ucitfwe. Sehluko 2 sichaza liphupho leliphefumulelwe inkhosi yaseBhabhulona leyaba nalo, lapho yabona khona sitfombe lesikhulu, lebesimelela kulandzelana kwemibuso yemhlaba. Umphrofethi Danyela walichaza leliphupho. Wabhala: ‘Emalangeni letako, Nkulunkulu welizulu uyawumisa umbuso longasoze wabhujiswa lutfo, futsi ngeke unikwe labanye bantfu. Uyawupitjita yonkhe leminye imibuso uyicedze wona uyawukuma kuze kube phakadze.’—Danyela 2:28, 44.

INkhosi yeMbuso waNkulunkulu angeke ibuse yodvwa. Ngesikhatsi asemhlabeni, Jesu wacinisekisa baphostoli bakhe labetsembekile kutsi bona, kanye nalabanye, bebatawuvuselwa ezulwini bese bahlala etihlalweni tebukhosi. (Lukha 22:28-30) Jesu abengakhulumi ngetihlalo tebukhosi mbamba, ngobe njengobe asho loMbuso utawuba semazulwini. LiBhayibheli lichaza labo labatawubusa naye ngekutsi bavela “emindenini yonkhe, nasetilimini tonkhe, nasetiveni tonkhe, nasemaveni onkhe.” Batawuba “ngemakhosi nebaphristi kuNkulunkulu wetfu, bayawubusa etikwemhlaba wonkhe.”—Sembulo 5:9, 10.

Lokwenta Tindzaba TeMbuso Tibe Tinhle

Caphela kutsi Jesu Khristu unikwe lilungelo lekubusa “emindenini yonkhe, nasetilimini tonkhe, nasetiveni tonkhe,” futsi labo latawubusa nabo “bayawubusa etikwemhlaba wonkhe.” Bobani-ke labatawube babuswa nguloMbuso? Ngulabo labalalela letindzaba letinhle letishunyayelwako lamuhla. Labo labatawubuswa bafaka ekhatsi nebantfu labatawuvuselwa ekuphileni kwasemhlabeni futsi labatawuba nelitsemba lekuphila phakadze.

LiBhayibheli litichaza ngalokucacile tibusiso letitawujatjulelwa bantfu ngephansi kwaloMbuso. Nati letinye tato:

“Uvimba acedze timphi kutsi tichubeke emhlabeni wonkhe jikelele. Ufohlota butjoki, ephule sikhali, tincola atishise ngemlilo.”—Tihlabelelo 46:9.

“Bantfu bayakwakha tindlu, bahlale kuto, bayawuhlanyela tivini, badle titselo tato. Bangeke baphindze bakhe tindlu, bese kuhlala labanye bantfu kuto, nome bahlanyele bese kudla labanye.”—Isaya 65:21, 22.

“[Nkulunkulu] uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.”—Sembulo 21:3, 4.

“Emehlo etimphumphutse ayawuvuleka, netindlebe tetihhulu tiyawuva. Labachutako bayawusuka emagonso njengenyamatane, nelulwimi lwesimungulu luyawumemeta ngenjabulo.”—Isaya 35:5, 6.

“Sikhatsi siyeta lapho bonkhe bantfu labasemathuneni bayawuliva livi [laJesu]. Labo labente kulunga bayawuvukela ekuphileni.”—Johane 5:28, 29.

“Labamnene bayawulidla lifa lemhlaba, bahlale kahle, batijabulise ngekuthula lokukhulu.”—Tihlabelelo 37:11.

Leti tindzaba letinhle mbamba! Ngetulu kwaloko, tiphrofetho teliBhayibheli letigcwalisekile tiveta kutsi sekusedvute uMbuso ucale kubusa ngekulunga emhlabeni wonkhe.

Tiyini Tindzaba Letinhle?

“Letindzaba letinhle . . .”—MATEWU 24:14.

EMAKHRISTU kufanele ashumayele ‘tindzaba letihle tembuso’ ngekutjela labanye ngawo, achaze nekutsi loMbuso unguhulumende wesikhatsi lesitako lotawubusa umhlaba ngekulunga. Nanobe kunjalo, leligama lelitsi ‘tindzaba letinhle,’ liphindze lisetjentiswe ngetindlela letehlukehlukene eBhayibhelini. Sibonelo saloku kutsi sitfola emavi latsi ‘memetelani tindzaba letinhle tensindziso yakhe’ (Tihlabelelo 96:2); ‘tindzaba letinhle letiphuma kuNkulunkulu’ (Roma 15:16); ‘tindzaba letinhle ngaJesu Khristu.’—Makho 1:1.

Tindzaba letinhle tifaka ekhatsi onkhe emaciniso Jesu lakhuluma ngawo kanye nalawo labhalwa bafundzi bakhe. Ngembikwekutsi enyukele ezulwini, naku Jesu lakutjela balandzeli bakhe: ‘Ngako-ke hambani, nente tive tonkhe tibe bafundzi bami, nibabhabhatise egameni leYise, neleNdvodzana, nelemoya longcwele, nibafundzise kugcina konkhe lenginiyale ngako.’ (Matewu 28:19, 20) Ngako-ke, umsebenti wemaKhristu eliciniso awusiko kumane nje atjele labanye ngeMbuso; kufanele aphindze ente bantfu babe bafundzi.

Enta njani emasontfo kulendzaba? Bantfu labanyenti labangati kutsi uyini uMbuso, angeke bakwati kufundzisa labanye ngawo. Kunaloko, bashumayela ngetintfo letenta bantfu bajabule letimayelana nekutsetselelwa kwetono kanye nekuba nekukholwa kuJesu. Baphindze betame kutfola emakholwa lengetiwe ngekushintja kuphila kwebantfu nobe kwakha tibhedlela, tikolwa, kanye netindlu tebantfu labahluphekako. Ngisho nobe leto tento tingalandzisa linani lebantfu labaya emasontfweni, atibenti babe ngemaKhristu eliciniso lafuna ngebucotfo kuphila ngekuvumelana naloko Jesu lakufundzisa.

Lesinye sati senkholo sabhala: “Tifundziswa letinyenti nobe baholi benkholo labangemaKhristu bayati kutsi kufanele ngabe benta bantfu bafundzi nobe tikhonti taJesu futsi babafundzise kwenta tonkhe tintfo Jesu latisho. . . . Ticondziso taJesu ngalendzaba ticacile. Simane nje asikwenti loko lakusho. Asetami nekukwenta. Ecinisweni asati kutsi kufanele sikwente njani.”

Ngendlela lefananako, luhlolo lwemaKatolika aseMelika lwaveta kutsi emaphesenti langu-95 ayavuma kutsi kushumayela tindzaba letinhle kuyimfuneko yekukholwa kwabo. Nanobe kunjalo, cishe bonkhe batsi indlela lencono yekwenta loku, kungakhulumi ngato, kodvwa kuphila ngendlela letawuba sibonelo kulabanye. Lomunye walabo labahlolwa watsi: “Kukhuluma ngeTindzaba letinhle akusiyo indlela lencono yekushumayela ngato. Lokubaluleke kakhulu kubeka sibonelo lesihle.” Magazini i-U.S. Catholic, lobewukhuluma ngaloluhlolo, watsi bantfu labanyenti ababatjeli labanye ngaloko labakukholelwako ngobe “emasontfo awasabukwa kahle ngesizatfu selihlazo lawo lekuhlukubeta bantfu ngekwelicasi kanye netimfundziso tawo letingacondzakali.”

Kulenye indzawo, umbhishobhi welisontfo lemaWeseli wakhaliswa kutsi emasontfo akhe ehlukane ekhatsi futsi adidekile, awanaso sibindzi sekwenta umsebenti wawo futsi aphila njengebantfu labangakholwa. Akhuluma ngelivi leliveta kutfukutsela, wabuta: “Bobani lokufanele bashumayele ngalelivangeli leMbuso?”

Lombhishobhi akazange awuphendvule lombuto wakhe. Nanobe kunjalo, ikhona imphendvulo. Utawuyitfola esihlokweni lesilandzelako.

[Emavi lahambisana nesitfombe ekhasini 6]

Letindzaba letinhle timayelana neMbuso waNkulunkulu kanye nekusindziswa ngekuba nekukholwa kuJesu Khristu