KUPHILA KWEMAKHRISTU

Incenye Lensha Yeluhlelo LweMhlangano Wasekhatsi Neliviki

Kusukela nga-January 2018, umhlangano wasekhatsi neliviki utawuba nemaphuzu lacwaningiwe kanye nalokubukelwako lokutawutsatfwa ku-New World Translation of the Holy Scriptures (nwtsty) leku-jw.org, ngisho nobe ingatfolakali ngelulwimi lwenu. Siyaciniseka kutsi lokwatiswa kutakusita kakhulu nawulungiselela imihlangano. Shengatsi lencenye ingakusondzeta kakhulu kuJehova longuBabe wetfu lonelutsandvo!

EMAPHUZU LACWANINGIWE

Lamaphuzu lacwaningiwe asenta sicondze emasiko, kuma kwendzawo kanye nendlela lulwimi lolusetjentiswe ngayo emavesini lamanyenti eliBhayibheli.

Matewu 12:20

Intsambo yesibane lelotitako: Sibane lebesivame kusetjentiswa bekusitja lesentiwe ngelubumba sase sifakwa emafutsa emncuma. Iflekisi yalesibane ngiyo lebeyidvosa lamafutsa kuze lesibane sichubeke sivutsa. Ligama lesiGriki lelitsi “intsambo yesibane lelotitako” lingasho intsambo lesandza kucishwa yesibane ngobe lelilahle layo lisuke lisabhunya. Siphrofetho lesiku-Isaya 42:3 sabiketela kutsi Jesu unemusa; abengeke ayicime intsambo lebhunyako leletsa litsemba kubantfu labatfobekile nalebebacindzetelekile.

Matewu 26:13

Ngicinisile: Leli ligama lesiGriki lelitsi a·menʹ lelisuselwe egameni lesiHebheru lelisho kutsi “akube njalo” nobe “ngalokucinisekile.” Jesu bekavame kusebentisa leligama nakacala kukhuluma, naketsembisa, nobe nakasho siphrofetho kuze agcizelele kuba liciniso nekwetsembeka kwaloko lakushoko. Indlela Jesu lasebentisa ngayo “ngicinisile” nobe akube njalo ivela emibhalweni lengcwele kuphela. Naliphindvwaphindvwa leligama lelitsi a·menʹ a·men,ʹ njengobe kwenteka eVangelini laJohane, lingasho kutsi “ngicinisile, ngicinisile.”—Joh 1:51.

LOKUBUKELWAKO

Titfombe, lokudvwetjiwe, ema-video lete imisindvo kanye nemidvwebo lenyakatako kuchaza tentakalo letiseBhayibhelini.

IBhethifage, INtsaba Yemincuma Kanye NeJerusalema

Le-video ikhombisa indlela lengena eJerusalema nawuchamuka ngasemphumalanga yelidolobha lelibitwa ngekutsi yi-et-Tur, lapho bekuneBhethifage lokukhulunywa ngayo eBhayibhelini. Lendlela iyenyuka iye ngaseNtsabeni Yemincuma. IBhetani ingasemphumalanga yeBhethifage ngentansi kweNtsaba Yemincuma. Ngesikhatsi Jesu kanye nebafundzi bakhe baseJerusalema, bebavame kucitsa busuku bonkhe eBhetani, lidolobha lamuhla lelibitwa ngekutsi yi-el-ʽAzariyeh (El ʽEizariya), lokuligama lesi-Arabhu lelisho “Indzawo YaLazaro.” Jesu bekavame kuhlala naMata, Mariya naLazaro. (Mat 21:17; Mak 11:11; Luk 21:37; Joh 11:1) Nabasuka labahlala khona baya eJerusalema, kungenteka Jesu wahamba ngalomgwaco lesiwubone kule-video. Nga-Nisan 9, 33 C.E., ngesikhatsi Jesu agibele litfole lembongolo eNtsabeni Yemincuma aya eJerusalema, kungenteka wasuka eBhethifage wahamba ngemgwaco loya eJerusalema.

Umgwaco Losuka EBhetani Uye EBhethifage
IBhethifage
INtsaba Yemincuma
Sihosha saseKhidroni
INtsaba Yelithempeli

Sipikili Etsanjeni Lesitsendze

Lesi sitfombe selitsambo lesitsendze semuntfu lesishayelwe ngesipikili lesingemasentimitha langu-11.5 budze. Litsambo lelingilo mbamba latfolakala nga-1968 ngesikhatsi bacwaningi bemlandvo bavubukula enyakatfo yeJerusalema. Lomlandvo uniketa bufakazi bekutsi tipikili betivame kusetjentiswa nakubetselwa umuntfu lotsite elugodvweni. Lesipikili kungenteka siyefana naleso emasotja emaRoma lasisebentisa nakabetsela Jesu elugodvweni. Lelitsambo latfolakala ebhokisini lebelakhiwe ngematje lapho bekufakwa khona ematsambo emuntfu lofile nangabe inyama seyibole yaphela (ossuary). Loku kusho kutsi umuntfu lobekabetselwe elugodvweni bekangcwatjwa.—Mat 27:35.