I-Watchtower ONLINE LIBRARY
I-Watchtower ONLINE LIBRARY
WeSicongosekulindza
SiSwati
  • LIBHAYIBHELI
  • LOKUTFOLAKALAKO
  • IMIHLANGANO
  • ijwbq sihloko 149
  • Kusho Kutsini Kutsi “Liso Ngeliso”?

Kute i-video kulolokukhetsile.

Siyacolisa. Kube nenkinga nayisavuleka le-video.

  • Kusho Kutsini Kutsi “Liso Ngeliso”?
  • Timphendvulo Temibuto Lemayelana NeliBhayibheli
  • Tihlokwana
  • Tincwadzi Letinemaphuzu Lafanako
  • Lokushiwo liBhayibheli
  • Beyiyini injongo yemtsetfo ‘weliso ngeliso’?
  • Lomtsetfo ‘weliso ngeliso’ usasebenta yini kumaKhristu?
  • Lokungasilo liciniso ngalomtsetfo ‘weliso ngeliso’
  • UMtsetfo Nkulunkulu Labewunike Ema-Israyeli Bewulungile Futsi Ungakhetsi Yini?
    Sicongosekulindza Simemetela UMbuso WaJehova—2014
  • Lilula Yini Liso Lakho?
    Umsebenti Wetfu WeMbuso—2010
Timphendvulo Temibuto Lemayelana NeliBhayibheli
ijwbq sihloko 149
Emehlo endvodza

Kusho Kutsini Kutsi “Liso Ngeliso”?

Lokushiwo liBhayibheli

Umtsetfo ‘weliso ngeliso’ bewuyincenye yeMtsetfo waNkulunkulu lawuniketa ema-Israyeli asebentisa Mosi, futsi naJesu wacaphuna wona eNshumayelweni yakhe yaseNtsabeni. (Matewu 5:38; Eksodusi 21:24, 25; Dutheronomi 19:21) Lomtsetfo bewusho kutsi nangabe kwehlulelwa bantfu labonile, sigwebo bekufanele silingane naleso sono lesentiwe.a

Lomtsetfo bewentelwe kuvimbela bantfu kutsi bangalimati labanye ngemabomu. Mayelana nemuntfu lolimete lomunye ngemabomu, umtsetfo waMosi bewutsi: “Nangabe amephule litsambo, nelakhe liyakwephulwa, liso ngeliso, litinyo ngelitinyo. Njengobe naye alimatile, kufanele naye alinyatwe.”—Levithikhusi 24:20.

  • Beyiyini injongo yemtsetfo ‘weliso ngeliso’?

  • Lomtsetfo ‘weliso ngeliso’ usasebenta yini kumaKhristu?

  • Lokungasilo liciniso ngalomtsetfo ‘weliso ngeliso’

  • Jesu ulungisa umbono loliphutsa

Beyiyini injongo yemtsetfo ‘weliso ngeliso’?

Lomtsetfo ‘weliso ngeliso’ bewungasho kutsi umuntfu akatiphindzisele. Kunaloko, bewusita behluleli lebebabekiwe kutsi bakhokhe sigwebo lesifanele, lesingesiso lesimatima kakhulu nome lesincane kakhulu.

Lomtsetfo bewuphindze usebente njengesecwayiso kunome ngubani lebekangase alimate nome acabange kulimata lomunye ngemabomu. LoMtsetfo bewutsi: “Labanye bantfu bayawutsi bangeva ngaloko bese bayesaba, leyontfo ingaphindzi yentiwe emkhatsini wenu.”—Dutheronomi 19:20.

Lomtsetfo ‘weliso ngeliso’ usasebenta yini kumaKhristu?

Cha, lomtsetfo awuwaphoceleli emaKhristu kutsi awusebentise. Bewuyincenye yeMtsetfo waMosi, lowacedvwa yinhlawulo yekufa kwaJesu.—Roma 10:4.

Nome ungasasebenti, lomtsetfo usinika umcondvo waNkulunkulu wekwenta tintfo. Ngekwesibonelo, ukhombisa kutsi Nkulunkulu uyakutsandza kwehlulela kahle. (Tihlabelelo 89:14) Uphindze uvete indlela lafuna kwehlulelwe ngayo—njengekutsi, loyo lowonile kufanele ahlulelwe “ngebucotfo bemtsetfo.”—Jeremiya 30:11.

Lokungasilo liciniso ngalomtsetfo ‘weliso ngeliso’

Lokungasilo liciniso: Lomtsetfo ‘weliso ngeliso’ bewunesibhuku.

Liciniso: Lomtsetfo awuzange unike bantfu ligunya lekukhokha sehlulelo lesimatima, nalesinelunya. Kunaloko, nangabe bewusetjentiswa kahle, behluleli labasemtsetfweni bebakhokha sehlulelo ngemuva kwekuhlolisisa kucala timo lebetitsintseka kanye nekutsi vele loyo lowonile wente ngemabomu yini. (Eksodusi 21:28-30; Numeri 35:22-25) Ngako lomtsetfo ‘weliso ngeliso’ bewusita ekutseni kungakhokhwa sigwebo lesimatima ngalokungakafaneli.

Lokungasilo liciniso: Lomtsetfo ‘weliso ngeliso’ bewubangela kutiphindziselela lokungapheli.

Liciniso: UMtsetfo waMosi wona ngekwawo bewutsi: “Ungatibuyiseleli nome ube nemagcubu nebantfwana bebantfu bakini.” (Levithikhusi 19:18) Kunekutsi loMtsetfo ubhebhetele kutiphindziselela, bewukhutsata bantfu kutsi betsembele kuNkulunkulu, kanye nasemtsetfweni lawubekile kuze kulungiswe bubi.—Dutheronomi 32:35.

Jesu ulungisa umbono loliphutsa

Jesu bekati kutsi labanye bebawucondza kabi lomtsetfo ‘weliso neliso.’ Wakulungisa kucabanga kwabo lokubi nakatsi: “Niyati kutsi kwatsiwa: ‘Liso ngeliso, litinyo ngelitinyo.’ Kepha mine ngitsi kini: Ningalwisani nemuntfu lomubi, kodvwa nobe ngubani lokushaya esihlatsini sangesekudla, mvumele akushaye nakulesi lesinye.”—Matewu 5:38, 39.

Naka emavi aJesu latsi “niyati kutsi kwatsiwa.” Ngalamavi bekakhuluma ngalabanye baholi benkholo bemaJuda lebebafundzisa ngekutiphindziselela. Lomunye umbhali weliBhayibheli longu-Adam Clarke watsi: “Kubonakala shengatsi emaJuda enta lomtsetfo lotsi [liso ngeliso] . . . waba sisekelo sekuvumela kutiphindziselela ngansense, kanye nekuvumela konkhe kona lokwentiwe ngalokungekho emtsetfweni ngenca yekutiphindziselela.” Ngekuvumela kwabo umoya wekutiphindziselela, labaholi benkholo bahlaneketela injongo yaloMtsetfo waNkulunkulu.—Makho 7:13.

Ngalokwehlukile kuloko, Jesu wagcizelela kutsi uMtsetfo waNkulunkulu bewubuswa lutsandvo. Watsi: “Kufanele utsandze Jehova Nkulunkulu wakho . . .’ Lona ngiwo umtsetfo lomkhulu newekucala. Wesibili lofana nawo utsi: ‘Kufanele utsandze makhelwane wakho njengobe utitsandza wena.’ Wonkhe uMtsetfo waMosi kanye nalokwashiwo baPhrofethi kusekelwe kulemitsetfo lemibili.” (Matewu 22:37-40) Jesu wafundzisa kutsi balandzeli bakhe sibili bebatawubonakala ngelutsandvo, hhayi ngekutiphindziselela.—Johane 13:34, 35.

a Lesimiso lesisemtsetfweni, ngaletinye tikhatsi lobekutsiwa yi-lex talionis ngesi-Latin, besiphindze sitfolakale nasetincwadzini temtsetfo tetinhlangano tasendvulo.

    Tincwadzi TesiSwati (2002-2025)
    Phuma
    Ngena
    • SiSwati
    • Share
    • Khetsa Lokufunako
    • Copyright © 2025 I-Watch Tower Bible and Tract Society of Pennsylvania
    • Imibandzela Yekuyisebentisa
    • Kusetjentiswa Kwemininingwane Yakho
    • Privacy Settings
    • JW.ORG
    • Ngena
    Share