Kusho Kutsini Kungalutsatsi Luhlangotsi?

Jesu wafundzisa balandzeli bakhe kutsi akukafaneli babe ‘yincenye yalelive.’ (Johane 15:19) Loku kufaka ekhatsi, kungalutsatsi luhlangotsi etindzabeni tepolitiki talelive nasetimphini. Ecinisweni, akusiko melula kungalutsatsi luhlangotsi, futsi bantfu bangahle bahlekise ngatsi ngenca yaloko. Singahlala njani singalutsatsi luhlangotsi futsi sichubeke setsembekile kuJehova Nkulunkulu?

1. EmaKhristu eliciniso anamuphi umbono ngabohulumende bebantfu?

EmaKhristu ayamhlonipha hulumende. Senta njengobe Jesu asho, “nikani Khesari lokukwakhe,” lokusho kutsi siyayihlonipha imitsetfo yelive, lefana nalona wekukhokha umtselo. (Makho 12:17) LiBhayibheli lifundzisa kutsi bohulumende bebantfu babusa ngobe bavunyelwe nguJehova kutsi babuse. (KubaseRoma 13:1) Loku kusenta sibone kutsi ligunya labohulumende bebantfu lingephansi kwelaJehova. Setsembele kuNkulunkulu naseMbusweni wakhe losezulwini kutsi ucatulule tinkinga tebantfu.

2. Singakhombisa njani kutsi asilutsatsi luhlangotsi?

NjengaJesu, asitingeneli tepolitiki. Ngemuva kwekubona timangaliso lebetentiwa nguJesu, bantfu betama kumbeka kutsi abe yinkhosi emhlabeni kodvwa akabavumelanga. (Johane 6:15) Leni? Ngenca yaloko lakusho ngekuhamba kwesikhatsi, “uMbuso wami awusiyo incenye yalelive.” (Johane 18:36) Njengobe sibafundzi baJesu, kungalutsatsi luhlangotsi sikukhombisa ngetindlela letinyenti. Sibonelo nje, asiyi emphini. (Fundza Mikha 4:3.) Siyatihlonipha timphawu telive, njengema-flag, kodvwa asitikhonti. (1 Johane 5:21) Asimelani nemacembu etepolitiki nobe emalunga awo futsi asiwasekeli. Ngekulandzela letindlela kanye naletinye, sikhombisa kutsi setsembeke ngalokuphelele eMbusweni waNkulunkulu.

CHUBEKA UFUNISISA

3. EmaKhristu eliciniso awalutsatsi luhlangotsi

Jesu nebalandzeli bakhe basibekela sibonelo. Fundza KubaseRoma 13:1, 5-7 na-1 Phetro 2:13, 14, nidlala le-VIDEO, bese nicoca ngalemibuto lelandzelako.

I-VIDEO: EmaKhristu Eliciniso Awalutsatsi Luhlangotsi—Incenye 1 (4:28)

• Kungani kufanele sihloniphe bohulumende bebantfu?

• Ngutiphi tindlela lesingakhombisa ngato kutsi siyatitfoba kubo?

Nakunemphi, lamanye emave angatsi akalutsatsi luhlangotsi kodvwa abe asita lelinye live kuloyomphi. Kushoni mbambambamba kungalutsatsi luhlangotsi? Fundza Johane 17:16, nidlala le-VIDEO, bese nicoca ngalombuto lolandzelako.

I-VIDEO: EmaKhristu Eliciniso Awalutsatsi Luhlangotsi—Incenye 2 (3:11)

• Kusho kutsini kungalutsatsi luhlangotsi?

Utawenta njani nangabe hulumende afuna wente intfo lephambene nemtsetfo waNkulunkulu? Fundza Imisebenti 5:28, 29, nidlala le-VIDEO, bese nicoca ngalemibuto lelandzelako.

I-VIDEO: EmaKhristu Eliciniso Awalutsatsi Luhlangotsi—Incenye 3 (1:18)

• Nangabe umtsetfo webantfu uphambene nemtsetfo waNkulunkulu, ngumtsetfo wabani lokufanele siwulalele?

• Kukhona yini timo longacabanga ngato lapho khona umKhristu angeke abalalele bohulumende bebantfu?

4. Ungalutsatsi luhlangotsi ngetento nangendlela locabanga ngayo

Fundza 1 Johane 5:21, nidlala le-VIDEO, bese nicoca ngalemibuto lelandzelako.

I-VIDEO: Lokwenta EmaKhristu Eliciniso Adzinge Sibindzi Sekungatingeneli Tembangave (2:49)

• Kule-video, yini leyenta Ayenge wakhetsa kungabi lilunga lelicembu letepolitiki, nekutsi angayingeneli imicimbi yelive lenjengekushayela i-flag indesheni?

• Ucabanga kutsi wakhetsa kahle yini?

Ngutiphi letinye timo letingasivivinya nasingalutsatsi luhlangotsi? Dlala le-VIDEO, bese nicoca ngalemibuto lelandzelako.

I-VIDEO: Tifundvo Lesititfole Ku-Sicongosekulindza—Kungatingeneli Tepolitiki Kulelive Lelibi (5:16)

• Singakhombisa njani kutsi asilutsatsi luhlangotsi nangabe sibukela temidlalo lakucudzelana khona bantfu labavela emaveni lahlukahlukene?

• Singakhombisa kanjani kutsi asilutsatsi luhlangotsi ngisho nobe tincumo tabosopolitiki tisilimata nobe tisizuzisa ngalokucondzile?

• Tintfo lesitiva etindzabeni nobe kubantfu lesitihlanganisa nabo tingasitsintsa njani njengobe singalutsatsi luhlangotsi?

LOKO LESICOCE NGAKO

EmaKhristu asebenta matima kuze angalutsatsi luhlangotsi endleleni lacabanga ngayo, endleleni lakhuluma ngayo nangaloko lakwentako.

Yini Loyifundzile?

• Yini lesiyikweleta bohulumende bebantfu?

• Kungani singalutsatsi luhlangotsi etindzabeni tepolitiki?

• Ngutiphi timo letingavivinya kungalutsatsi kwetfu luhlangotsi?

LOKUNYE LONGAKUHLOLA

Ngukuphi kutidzela lokudzingeka sikwente kuze sichubeke singalutsatsi luhlangotsi?

Jehova Akazange Sekasilahle (3:14)

Imindeni ingatilungiselela njani kusenesikhatsi kuze ibhekane neluvivinyo lwekungalutsatsi luhlangotsi?

Kungatingeneli Tindzaba Tepolitiki Emibutsanweni Yawonkhewonkhe (4:25)

Yini leyenta kuvikela live kungabi yintfo lebaluleke kakhulu?

“KuNkulunkulu Tonkhe Tintfo Tingenteka” (5:19)

Tfola kutsi ungatigcina njani ungasiyo “incenye yalelive” nawukhetsa umsebenti.

“Yilowo Nalowo Uyothwala Owakhe Umthwalo” (Sicongosekulindza, saMarch 15, 2006 lesitfolakala ngesiZulu)

Bantfu batawetama kusiyekelisa kukhonta Jehova, baze basiphatse kabi. Kufanele kusetfuse yini loko?

1. Yini leyenta silindzele kuphatfwa kabi?

LiBhayibheli litsi: “Bonkhe labafuna kuphila ngekutinikela kuNkulunkulu ebunyeni naKhristu Jesu, nabo batawuphatfwa kabi.” (2 KuThimothi 3:12) Jesu waphatfwa kabi ngobe bekangesiyo incenye yelive laSathane. Natsi asisiyo incenye yalelive, ngako asimangali nasiphatfwa kabi bohulumende netinhlangano tenkholo.—Johane 15:18, 19.

2. Yini lesingayenta kuze silungele kuphatfwa kabi?

Kufanele simetsembe kakhulu Jehova nyalo. Tinike sikhatsi sekuthantaza nekufundza liVi lakhe onkhe malanga. Bani khona njalo emihlanganweni yelibandla. Konkhe loku kutakusita ube nesibindzi sekubhekana nekuphatfwa kabi, ngisho nobe uphatfwa kabi ngemalunga emndeni. Umphostoli Pawula lowaphatfwa kabi tikhatsi letinyenti wabhala watsi: “Jehova ungumsiti wami; angeke ngesabe.”—KumaHebheru 13:6.

Kushumayela njalo kungasisita kutsi sibe nesibindzi. Kushumayela kusifundzisa kutsi simetsembe Jehova futsi sincobe kwesaba bantfu. (Taga 29:25) Kuba nesibindzi sekushumayela nyalo, kutakusita uchubeke ushumayela ngisho nobe hulumende angavimba umsebenti wetfu.—1 KubaseThesalonika 2:2.

3. Kusizuzisa ngani kuchubeka setsembekile kuJehova nasiphatfwa kabi?

Kuliciniso kutsi asikujabuleli kuphatfwa kabi, kodvwa nangabe sicinisela nasiphatfwa kabi, kukholwa kwetfu kuyacina. Sisondzela kakhulu kuJehova nasibona indlela lasisita ngayo nasiphelelwa ngemandla. (Fundza Jakobe 1:2-4.) Jehova uva buhlungu nakasibona sihlupheka, kodvwa uyajabula nakasibona sicinisela. LiBhayibheli litsi: “Nangabe ubeketelela kuhlushwa ngobe wenta lokulungile, loku kuhle kuNkulunkulu.” (1 Phetro 2:20) Nasihlala setsembekile, Jehova utasinika kuphila lokuphakadze emhlabeni lomusha. Ngaleso sikhatsi, bonkhe labatawube baphila batawukhonta Jehova futsi kute lotobaphikisa.—Matewu 24:13.

CHUBEKA UFUNISISA

4. Ungacinisela nawuphatfwa kabi ngemalunga emndeni wakho

Jesu bekati kahle kutsi lamanye emalunga emindeni yetfu angahle angajabuli nasikhonta Jehova. Fundza Matewu 10:34-36, bese nicoca ngalombuto:

• Yini emalunga emndeni langayisho nobe ayente nangabe lotsite akhetsa kukhonta Jehova?

I-VIDEO: Jehova Wasemukela (5:13)

• Yini longayenta nangabe sihlobo sakho nobe umngani etama kukuyekelisa kukhonta Jehova?

Fundza Tihlabelelo 27:10 naMakho 10:29, 30. Ngemuva kwekufundza umbhalo ngamunye, cocani ngalombuto:

• Lesetsembiso singakusita njani nangabe uphikiswa ngemalunga emndeni nobe bangani?

5. Chubeka ukhonta Jehova ngisho nobe uphatfwa kabi

I-VIDEO: Kuba Nesibindzi Ngisho Nobe Uphatfwa Kabi (6:27)

• Tikucinisa njani tibonelo letikule-video?

Fundza Imisebenti 5:27-29 naKumaHebheru 10:24, 25. Ngemuva kwekufundza umbhalo ngamunye, cocani ngalombuto:

• Kungani kubaluleke kakhulu kuchubeka sikhonta Jehova ngisho kushumayela nobe imihlangano ivinjelwe?

6. Jehova utakusita kutsi ucinisele

I-VIDEO: Jehova Nkulunkulu Utangicinisa (3:40)

• Kule-video, yini lesite laboFakazi kutsi bacinisele?

Fundza KubaseRoma 8:35, 37-39 naKubaseFiliphi 4:13. Ngemuva kwekufundza umbhalo ngamunye cocani ngalombuto:

• Lombhalo ukucinisekisa njani kutsi ungakhona kubeketelela nobe nguluphi luvivinyo?

Fundza Matewu 5:10-12, bese nicoca ngalombuto:

• Kungani ungajabula ngisho nobe uphatfwa kabi?

LOKO LESICOCE NGAKO

Jehova uyajabula ngemetamo lesiyentako yekumkhonta nanobe siphatfwa kabi. Ngekusitwa nguye, singakhona kucinisela!

Yini Loyifundzile?

• Kungani emaKhristu kufanele akulindzele kuphatfwa kabi?

• Yini longayenta nyalo kuze ukulungele kuphatfwa kabi?

• Yini lengakusita uciniseke kutsi ungakhona kukhonta Jehova ngisho nobe uvivinywa?

LOKUNYE LONGAKUHLOLA

Bukela lomunye umzalwane losemusha achaza indlela Jehova lamsite ngayo kutsi acinisele ngesikhatsi aboshelwe kungalutsatsi luhlangotsi.

Kucinisela Nanobe Sihlushwa (2:34)

Buka loko lokwasita labanye labashadene kutsi bakhonte Jehova ngekwetsembeka iminyaka leminyenti nanobe bebaphikiswa.

Khonta Jehova Ngesikhatsi Selushintjo (7:11)

Fundza kutsi yini lengakusita ube nesibindzi nawuphatfwa kabi.

“Tilungiselele Nyalo Kubeketelela Lushushiso” (Sicongosekulindza, saJuly 2019)

Kufanele sikutsatse njani kuphikiswa ngemalunga emndeni wetfu, futsi singabhekana njani nako?

“Liciniso Aliletsi ‘Kuthula Kodvwa Liletsa Inkemba’” (Sicongosekulindza, sa-October 2017)