BoFakazi BaJehova Bayakholelwa Yini KuJesu?

KUKHOLELWA KUJESU KUBALULEKILE

Njabulo: Kunjani Thabo. Ngiyajabula kuphindze ngikubone.

Thabo: Nami ngiyajabula kukubona.

Njabulo: Ngikuletsele bomagazini bakamuva, Sicongosekulindza ne-“Phaphama!” Ngicabanga kutsi utakujabulela kufundza letihloko letikulabomagazini.

Thabo: Ngiyabonga mnaketfu. Empeleni, ngiyajabula kutsi lamuhla wendlule ngalapha ngobe kunalokutsite lengifisa kukubuta kona.

Njabulo: Khululeka mnaketfu, ungabuta.

Thabo: Ngike ngacoca nalomunye lengisebenta naye. Ngamtjela mayelana nalabomagazini lowangishiyela bona, nendlela lokumnandzi ngayo kubafundza. Kodvwa watsi akukafaneli ngibafundze ngobe BoFakazi BaJehova abakholelwa kuJesu. Kuliciniso yini loko? Ngitsite kuye ngitakubuta nawuphindze ungivakashela.

Njabulo: Ngiyajabula kutsi ubute mine. Wente kahle njengobe vele ngingulomunye waBoFakazi BaJehova. Ecinisweni, ayikho indlela longatfola ngayo loko umuntfu lakukholelwako ngaphandle kwekutsi ubute yena.

Thabo: Nguloko nami lengikucabangile.

Njabulo: Liciniso likutsi BoFakazi BaJehova bakholelwa kakhulu kuJesu. Ecinisweni, siyacaphela kutsi kukholelwa kuJesu kubalulekile kute sisindziswe.

Thabo: Bengicabanga kutsi vele niyakholelwa kuJesu, kodvwa ngesikhatsi lona lengisebenta naye angitjela kutsi anikholelwa kuJesu, loko kungente ngafisa kwati kabanti. Nangikhumbula kahle asikaze sicoce ngalendzaba ngaphambili.

Njabulo: Ngicela kukukhombisa emavesi eliBhayibheli latsite lagcamisa bumcoka bekukholwa kuJesu. Lawa ngemavesi BoFakazi BaJehova labavame kuwasebentisa nabashumayela.

Thabo: Kulungile.

Njabulo: Asesicale nganankha emavi aJesu labhalwe kuJohane 14:6. Lamavi ayincenye yenconciswano Jesu laba nayo nalomunye webaphostoli bakhe. Afundzeka kanje: “Jesu wamphendvula watsi: ‘Mine ngiyindlela neliciniso nekuphila. Kute umuntfu lota kuBabe ngaphandle kwekutsi ete ngami.’” Ngekusho kwalelivesi, nguyiphi indlela leyodvwa yekuta kuBabe?

Thabo: Siya kuye ngaJesu.

Njabulo: Kunjalo. Tsine njengobe siBoFakazi BaJehova siyakukholelwa loku. Asengibute nje mnaketfu: Ngekwati kwakho loko Nkulunkulu lakufunako, nangabe umuntfu athantaza, kufanele athantaze egameni labani?

Thabo: Egameni laJesu.

Njabulo: Ngivumelana nawe. Kungako ngaso sonkhe sikhatsi nangithantaza, ngithantaza egameni laJesu. Nguloko kanye lokwentiwa BoFakazi BaJehova nabathantaza.

Thabo: Ngiyajabula kuva loko.

Njabulo: Lomunye umbhalo lesingawuhlola nguJohane 3:16. Lelivesi libaluleke kakhulu kangangekutsi lize labitwa ngekutsi liVangeli lelifinyetiwe. Umcondvo kutsi nawungahlanganisa loko lokwabhalwa ngaJesu nakasemhlabeni kanye nemsebenti wakhe ukwente livesi linye, bekuyoba nguloku lokushiwo ngulelivesi. Mhlawumbe ungatsandza kuwufundza lombhalo.

Thabo: Ufundzeka kanje: “Ngobe Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.”

Njabulo: Ufundze kahle. Uletayele yini lelivesi?

Thabo: Yebo ngilati kakhulu, futsi ngivame kulibona emabhodini ekukhangisa.

Njabulo: Livesi leletayelekile vele. Asewulinake kahle kuze ubone loko Jesu lakusho. Watsi, ngenca yekutsandza bantfu Nkulunkulu wenta kutsi batfole kuphila lokuphakadze—kodvwa kuphela nabentani?

Thabo: Nangabe bakholwa.

Njabulo: Kunjalo, ikakhulukati nabanekukholwa kuJesu Khristu, iNdvodzana lekuphela kwayo. Futsi leliphuzu lelitsi kukholwa kuvula indlela leya ekuphileni lokuphakadze, likhona kulomagazini lengikuphatsele wona, lapha ekhasini 2. Mayelana nenjongo yalomagazini Sicongosekulindza, utsi: “Ukhutsata bantfu kutsi babe nekukholwa kuJesu Khristu lowasifela kuze sitfole kuphila lokuphakadze futsi nyalo uyiNkhosi lebusako yeMbuso waNkulunkulu.”

Thabo: Sengiyabona, kuwo lomagazini wenu kunebufakazi bekutsi BoFakazi BaJehova bayakholelwa kuJesu.

Njabulo: Kunjalo.

Thabo: Manje mnaketfu kubangelwa yini kutsi bantfu batsi anikholelwa kuJesu?

Njabulo: Kungenteka kutsi kunetizatfu letinyenti tekutsi bantfu basho njalo. Labanye basho njalo ngobe beve ngalabanye bantfu. Nome mhlawumbe labanye bafundziswe bafundisi babo lenkhulumo lengesilo liciniso.

Thabo: Ngiyabona, kodvwa nje ngiyacabanga kutsi mhlawumbe bantfu batsi anikholwa kuJesu ngobe nitibita ngekutsi niBoFakazi BaJehova hhayi BoFakazi ba-Jesu.

Njabulo: Kungenteka kungaba ngulesinye sizatfu naleso.

Thabo: Nentiwa yini vele kukhuluma ngaJehova kangaka?

“NGIBEMBULELE LIBITO LAKHO”

Njabulo: Sikholelwa kutsi kubalulekile kusebentisa libito laNkunkulu, lelitsi Jehova, njengobe nguloko kanye naJesu, iNdvodzana yakhe leyakwenta. Ase ucabange ngaloko Jesu lakusho nakathantaza kuBabe wakhe. Kubhalwe kuJohane 17:26. Ngicela ulifundze lelivesi.

Thabo: Litsi: “Ngibembulele libito lakho, futsi ngiyachubeka ngibembulela, kute batsandzane ngendlela lowangitsandza ngayo, bese ngiba munye nabo.”

Njabulo: Ngiyabonga. Ngicela unake kutsi Jesu watsi ubembulele libito laNkulunkulu. Ucabanga kutsi kungani abembulela lona?

Thabo: Eyi, angiciniseki.

Njabulo: Mhlawumbe singaphindze sibuke lelinye livesi leliyicacisa kahle lendzaba. Ngicabanga ngembhalo weMisebenti 2:21. Utsi: “Wonkhe umuntfu lobita libito laJehova utawusindziswa.” Nyalo ngiyetsemba utawuvumelana nami kutsi kubita libito laJehova kulindzelekile kute sisindziswe, ngako-ke Jesu abekwati loko.

Thabo: Ngivumelana nawe.

Njabulo: Kusindziswa kwebalandzeli bakhe ngulesinye sizatfu lesibalulekile kuJesu, sekutsi bati libito laNkulunkulu futsi balisebentise. Ngulesinye sizatfu lesenta sikhulume ngaJehova kangaka. Sikubona kubalulekile kwembulela bantfu libito laNkulunkulu futsi sibasite balibite.

Thabo: Kodvwa nanobe bantfu bangalati libito laNkulunkulu nome bangalisebentisi ngalokucondzile, bayati kutsi basuke bakhuluma ngabani nabatsi Nkulunkulu.

Njabulo: Yebo ucinisile. Nome kunjalo, ngekusitjela libito lakhe, Nkulunkulu wente kwaba lula kutsi sisondzelane naye.

Thabo: Usho kutsini mnaketfu?

Njabulo: Ase uyicabange kanje lendzaba: Akuzange kudzingeke sati libito laMosi. Besingamati ngekutsi yindvodza leyewela Lwandle Lolubovu nome indvodza leyatfola iMiyalo Lelishumi. Kuyafana nangaNowa, kungani kufanele sati libito lakhe? Abengabitwa nje nangekutsi yindvodza leyakha umkhumbi futsi yasindzisa umndeni wayo netilwane. NaJesu Khristu ngabe watiwa ngekutsi nguloyo lowavela ezulwini wafela tono tetfu. Usangiva yini mnaketfu?

Thabo: Ngiyabona.

Njabulo: Kodvwa Nkulunkulu wenta kutsi siwati emabito alabo bantfu. Kwati emabito abo kwenta loko lesikufundzako ngabo kube yintfo sibili. Nanobe singazange sesimbone Mosi, Nowa nome Jesu, kodvwa kwati emabito abo kwenta kutsi kube shengatsi sake sababona.

Thabo: Angikaze ngiyicabange ngaleyondlela, kodvwa iyevakala manje.

Njabulo: Lesi ngulesinye sizatfu lesibangela kutsi BoFakazi BaJehova basebentise libito laNkulunkulu kangaka. Sifisa kusita bantfu bakhe kukholwa kwabo kuNkulunkulu Jehova, afane neMuntfu labangakhona kusondzelana naye. Ngesikhatsi lesifanako, siyakubona kubaluleka kwendzima leyadlalwa nguJesu ekusindzisweni kwetfu. Mhlawumbe singafundza lomunye umbhalo longenta kutsi ulicondze kahle leliphuzu.

Thabo: Singalifundza.

Njabulo: Ekucaleni sifundze Johane 14:6. Khumbula phela kutsi Jesu watsi yena ‘uyindlela neliciniso nekuphila.’ Ase sibuyele emuva kancane sifundze emavi latfolakala kuJohane 14:1. Ngicela ufundze loko Jesu lakusho encenyeni yekugcina yalelivesi.

Thabo: Litsi: “Kholwani nguNkulunkulu, nikholwe nangimi.”

Njabulo: Ufundze kahle. Ungasho yini kutsi kufanele sikhetse kutsi sikholwa kuJesu nobe sikholwa kuJehova?

Thabo: Chake, Jesu watsi sidzinga kukholwa kubo bobabili.

Njabulo: Ucinisile. Ngiyetsemba uyavuma kutsi akukeneli nje kutsi sitsi sinekukholwa kuNkulunkulu nakuJesu. Ecinisweni, kufanele indlela lesiphila ngayo ivumelana naloko lesikushoko.

Thabo: Liciniso lelo.

Njabulo: Kodvwa umuntfu angakhombisa njani kutsi ukholelwa mbamba kuNkulunkulu nakuJesu? Mhlawumbe singacoca ngalombuto esikhatsini lesitako.a

Thabo: Ngingakujabulela loko.