Umlayeto lobalulekile loseBhayibhelini umayelana neMbuso waNkulunkulu. Jehova utawusebentisa loMbuso kuze afeze injongo yakhe yasekucaleni ngemhlaba. Uyini loMbuso? Sati njani kutsi sewuyabusa? Yini losoyifezile? Yini lotayenta esikhatsini lesitako? Lesifundvo kanye naletimbili letilandzelako titawuphendvula lemibuto.

1. Uyini uMbuso waNkulunkulu futsi ngubani iNkhosi yawo?

LoMbuso unguhulumende lowamiswa nguJehova Nkulunkulu. INkhosi yawo, Jesu Khristu, ibusa isezulwini. (Matewu 4:17; Johane 18:36) Nalikhuluma ngaJesu liBhayibheli litsi: ‘Utawuba yiNkhosi . . . phakadze.’ (Lukha 1:32, 33) Njengobe Jesu ayiNkhosi yeMbuso waNkulunkulu, utawubusa wonkhe umuntfu losemhlabeni.

2. Bobani lababusa naJesu?

Jesu akabusi yedvwana. Bantfu ‘bato tonkhe tinhlanga, tilwimi, bantfu netive . . . batawuba ngemakhosi etikwemhlaba.’ (Sembulo 5:9, 10) Bangakhi labatawubusa naKhristu? Kusukela Jesu eta emhlabeni, emaKhristu lamanyenti aba balandzeli bakhe. Nobe kunjalo, bangu-144 000 kuphela labatawubusa naJesu ezulwini. (Fundza Sembulo 14:1-4.) Onkhe lamanye emaKhristu lasemhlabeni atawuba takhamuti taloMbuso.—Tihlabelelo 37:29.

3. Yini leyenta uMbuso waNkulunkulu ube ncono kunabohulumende bebantfu?

Ngisho nobe babusi lababantfu betama kwenta tintfo letinhle, bete emandla ekwenta yonkhe intfo labayifunako. Batsatselwa sikhundla ngulabanye babusi lokungenteka baticabangela bona futsi abafuni kusita bantfu labababusako. Nobe kunjalo, iNkhosi yeMbuso waNkulunkulu, Jesu, ngeke itsatselwe sikhundla ngulomunye umuntfu. Nkulunkulu ‘ubeke uMbuso longeke uze ubhujiswe.’ (Danyela 2:44) Jesu utawubusa emhlabeni wonkhe, futsi ngeke aze akhetse. Unelutsandvo, umusa nekulunga futsi utawufundzisa bantfu kutsi baphatsane ngendlela lefanako, batsandzane, babenemusa futsi baphatsane kahle.—Fundza Isaya 11:9.

4. Hulumende lonemandla utawubusa emhlabeni wonkhe

Jesu Khristu unemandla lamakhulu kwendlula nobe ngabe ngumuphi  umbusi lowake waba khona emlandvweni. Fundza Matewu 28:18, bese nicoca ngalombuto:

• Emandla aJesu ekubusa makhulu ngayiphi indlela kwendlula emandla ebabusi lababantfu?

Bohulumende bebantfu bashintja njalo, futsi umbusi ngamunye ubusa incenye letsite yemhlaba. UMbuso waNkulunkulu wona-ke? Fundza Danyela 7:14, bese nicoca ngalemibuto:

• Kukahle ngani kutsi uMbuso waNkulunkulu ‘ngeke uze ubhujiswe’?

• Kukahle ngani kutsi utawubusa umhlaba wonkhe?

5. Bohulumende bebantfu kufanele batsatselwe sikhundla

Kungani uMbuso waNkulunkulu kufanele utsatse sikhundla sabohulumende bebantfu? Dlala le-VIDEO, bese nicoca ngalombuto lolandzelako.

I-VIDEO: Uyini UMbuso WaNkulunkulu?—Incenye (1:41)

• Kubusa kwebantfu kube namiphi imiphumela?

Fundza Umshumayeli 8:9, bese nicoca ngalemibuto:

• Ucabanga kutsi kufanele yini uMbuso waNkulunkulu utsatse sikhundla sabohulumende bebantfu? Usho ngani?

6. UMbuso waNkulunkulu unebabusi labasati kahle simo setfu

Ngenca yekutsi iNkhosi yetfu, Jesu, yake yaphila emhlabeni, iyakhona “kuvelana natsi ebutsakatsakeni betfu.” (KumaHebheru 4:15) Emadvodza nebafati labangu-144 000 labatawubusa naJesu, bakhetfwe nguJehova “kuto tonkhe tinhlanga, tilwimi, bantfu netive.”—Sembulo 5:9.

• Kuyakudvudvuta yini kwati kutsi Jesu akanye nabo bonkhe latawubusa nabo bayati kutsi kunjani kuphila emhlabeni? Yini lekwenta udvudvuteke?

7. UMbuso waNkulunkulu unemitsetfo lencono kuneyabohulumende bebantfu

Bohulumende bebantfu babeka imitsetfo lesita iphindze ivikele bantfu balelolive. NeMbuso waNkulunkulu unemitsetfo lokufanele ilandzelwe bantfu labangephansi kwawo. Fundza 1 KubaseKhorinte 6:9-11, bese nicoca ngalemibuto:

• Ucabanga kutsi umhlaba utawuba njani lapho wonkhe umuntfu sekalalela umtsetfo waNkulunkulu wekutiphatsa?a

• Ucabanga kutsi Jehova unalo yini lilungelo lekulindzela kutsi bantfu labangephansi kweMbuso wakhe bahloniphe lemitsetfo? Usho ngani?

• Yini lekhombisa kutsi bantfu labangayilaleli lemitsetfo bangashintja?—Buka vesi 11.

LOKO LESICOCE NGAKO

UMbuso waNkulunkulu unguhulumende mbamba losezulwini lotawubusa umhlaba wonkhe.

Yini Loyifundzile?

• Bobani babusi beMbuso waNkulunkulu?

• UMbuso waNkulunkulu uncono ngayiphi indlela kunabohulumende bebantfu?

• Ngutiphi letinye tintfo Jehova lalindzele kutsi tentiwe bantfu labangephansi kweMbuso wakhe?

LOKUNYE LONGAKUHLOLA

Fundza loko Jesu lakusho mayelana nekutsi ukuphi uMbuso waNkulunkulu.

“Usenhlitiyweni Yakho Yini UMbuso WaNkulunkulu?” (Sihloko lesiku-internet)

Yini leyenta BoFakazi BaJehova betsembeke eMbusweni waNkulunkulu kunekwetsembeka emibusweni yebantfu?

Kutinikela EMbusweni WaNkulunkulu (1:43)

Fundza loko liBhayibheli lelikushoko mayelana nalabangu-144 000, labakhetfwe nguJehova kutsi babuse kanye naJesu.

“Bobani Labaya Ezulwini?” (Sihloko lesiku-internet)

Yini leyacinisekisa lomunye wesifazane lobekaboshiwe kutsi Nkulunkulu utawenta umhlaba ube nekulunga?

“Indlela Engathola Ngayo Ikhambi Lokungabi Nabulungisa (Phaphama! yaNovember 1, 2013 letfolakala ngesiZulu)

Jesu wafundzisa balandzeli bakhe kutsi akukafaneli babe ‘yincenye yalelive.’ (Johane 15:19) Loku kufaka ekhatsi, kungalutsatsi luhlangotsi etindzabeni tepolitiki talelive nasetimphini. Ecinisweni, akusiko melula kungalutsatsi luhlangotsi, futsi bantfu bangahle bahlekise ngatsi ngenca yaloko. Singahlala njani singalutsatsi luhlangotsi futsi sichubeke setsembekile kuJehova Nkulunkulu?

1. EmaKhristu eliciniso anamuphi umbono ngabohulumende bebantfu?

EmaKhristu ayamhlonipha hulumende. Senta njengobe Jesu asho, “nikani Khesari lokukwakhe,” lokusho kutsi siyayihlonipha imitsetfo yelive, lefana nalona wekukhokha umtselo. (Makho 12:17) LiBhayibheli lifundzisa kutsi bohulumende bebantfu babusa ngobe bavunyelwe nguJehova kutsi babuse. (KubaseRoma 13:1) Loku kusenta sibone kutsi ligunya labohulumende bebantfu lingephansi kwelaJehova. Setsembele kuNkulunkulu naseMbusweni wakhe losezulwini kutsi ucatulule tinkinga tebantfu.

2. Singakhombisa njani kutsi asilutsatsi luhlangotsi?

NjengaJesu, asitingeneli tepolitiki. Ngemuva kwekubona timangaliso lebetentiwa nguJesu, bantfu betama kumbeka kutsi abe yinkhosi emhlabeni kodvwa akabavumelanga. (Johane 6:15) Leni? Ngenca yaloko lakusho ngekuhamba kwesikhatsi, “uMbuso wami awusiyo incenye yalelive.” (Johane 18:36) Njengobe sibafundzi baJesu, kungalutsatsi luhlangotsi sikukhombisa ngetindlela letinyenti. Sibonelo nje, asiyi emphini. (Fundza Mikha 4:3.) Siyatihlonipha timphawu telive, njengema-flag, kodvwa asitikhonti. (1 Johane 5:21) Asimelani nemacembu etepolitiki nobe emalunga awo futsi asiwasekeli. Ngekulandzela letindlela kanye naletinye, sikhombisa kutsi setsembeke ngalokuphelele eMbusweni waNkulunkulu.

CHUBEKA UFUNISISA

3. EmaKhristu eliciniso awalutsatsi luhlangotsi

Jesu nebalandzeli bakhe basibekela sibonelo. Fundza KubaseRoma 13:1, 5-7 na-1 Phetro 2:13, 14, nidlala le-VIDEO, bese nicoca ngalemibuto lelandzelako.

I-VIDEO: EmaKhristu Eliciniso Awalutsatsi Luhlangotsi—Incenye 1 (4:28)

• Kungani kufanele sihloniphe bohulumende bebantfu?

• Ngutiphi tindlela lesingakhombisa ngato kutsi siyatitfoba kubo?

Nakunemphi, lamanye emave angatsi akalutsatsi luhlangotsi kodvwa abe asita lelinye live kuloyomphi. Kushoni mbambambamba kungalutsatsi luhlangotsi? Fundza Johane 17:16, nidlala le-VIDEO, bese nicoca ngalombuto lolandzelako.

I-VIDEO: EmaKhristu Eliciniso Awalutsatsi Luhlangotsi—Incenye 2 (3:11)

• Kusho kutsini kungalutsatsi luhlangotsi?

Utawenta njani nangabe hulumende afuna wente intfo lephambene nemtsetfo waNkulunkulu? Fundza Imisebenti 5:28, 29, nidlala le-VIDEO, bese nicoca ngalemibuto lelandzelako.

I-VIDEO: EmaKhristu Eliciniso Awalutsatsi Luhlangotsi—Incenye 3 (1:18)

• Nangabe umtsetfo webantfu uphambene nemtsetfo waNkulunkulu, ngumtsetfo wabani lokufanele siwulalele?

• Kukhona yini timo longacabanga ngato lapho khona umKhristu angeke abalalele bohulumende bebantfu?

4. Ungalutsatsi luhlangotsi ngetento nangendlela locabanga ngayo

Fundza 1 Johane 5:21, nidlala le-VIDEO, bese nicoca ngalemibuto lelandzelako.

I-VIDEO: Lokwenta EmaKhristu Eliciniso Adzinge Sibindzi Sekungatingeneli Tembangave (2:49)

• Kule-video, yini leyenta Ayenge wakhetsa kungabi lilunga lelicembu letepolitiki, nekutsi angayingeneli imicimbi yelive lenjengekushayela i-flag indesheni?

• Ucabanga kutsi wakhetsa kahle yini?

Ngutiphi letinye timo letingasivivinya nasingalutsatsi luhlangotsi? Dlala le-VIDEO, bese nicoca ngalemibuto lelandzelako.

I-VIDEO: Tifundvo Lesititfole Ku-Sicongosekulindza—Kungatingeneli Tepolitiki Kulelive Lelibi (5:16)

• Singakhombisa njani kutsi asilutsatsi luhlangotsi nangabe sibukela temidlalo lakucudzelana khona bantfu labavela emaveni lahlukahlukene?

• Singakhombisa kanjani kutsi asilutsatsi luhlangotsi ngisho nobe tincumo tabosopolitiki tisilimata nobe tisizuzisa ngalokucondzile?

• Tintfo lesitiva etindzabeni nobe kubantfu lesitihlanganisa nabo tingasitsintsa njani njengobe singalutsatsi luhlangotsi?

LOKO LESICOCE NGAKO

EmaKhristu asebenta matima kuze angalutsatsi luhlangotsi endleleni lacabanga ngayo, endleleni lakhuluma ngayo nangaloko lakwentako.

Yini Loyifundzile?

• Yini lesiyikweleta bohulumende bebantfu?

• Kungani singalutsatsi luhlangotsi etindzabeni tepolitiki?

• Ngutiphi timo letingavivinya kungalutsatsi kwetfu luhlangotsi?

LOKUNYE LONGAKUHLOLA

Ngukuphi kutidzela lokudzingeka sikwente kuze sichubeke singalutsatsi luhlangotsi?

Jehova Akazange Sekasilahle (3:14)

Imindeni ingatilungiselela njani kusenesikhatsi kuze ibhekane neluvivinyo lwekungalutsatsi luhlangotsi?

Kungatingeneli Tindzaba Tepolitiki Emibutsanweni Yawonkhewonkhe (4:25)

Yini leyenta kuvikela live kungabi yintfo lebaluleke kakhulu?

“KuNkulunkulu Tonkhe Tintfo Tingenteka” (5:19)

Tfola kutsi ungatigcina njani ungasiyo “incenye yalelive” nawukhetsa umsebenti.

“Yilowo Nalowo Uyothwala Owakhe Umthwalo” (Sicongosekulindza, saMarch 15, 2006 lesitfolakala ngesiZulu)