SIFUNDVO 26
Kungani Kunebubi Nekuhlupheka?
Nakwenteke intfo lembi, kuvamile kutsi bantfu batibute, “Kungani loku kwentekile?” Kujabulisa kakhulu kwati kutsi liBhayibheli lisiniketa timphendvulo leticacile talombuto!
1. Sathane wabucalisa njani bubi emhlabeni?
Sathane Develi wavukela Nkulunkulu. Bekafuna kubusa, ngako wayenga bantfu bekucala, bo-Adamu na-Eva kutsi nabo bavukele Nkulunkulu. Sathane wakwenta loku ngekutsi atjele Eva emanga. (Genesisi 3:1-5) Wamenta wacabanga kutsi kukhona lokuhle Jehova lamufihlele kona. Bekatsi bantfu bangajabula nabangamlaleli Nkulunkulu. Sathane wakhuluma emanga ekucala ngekutjela Eva kutsi bekangeke afe. Kungako, liBhayibheli libita Sathane ngekutsi “ungumcambimanga nababe wemanga.”—Johane 8:44.
2. Yini bo-Adamu na-Eva labakhetsa kuyenta?
Jehova bekabaphe tintfo letinyenti bo-Adamu na-Eva. Watsi bebangadla kuto tonkhe tihlahla letisengadzeni yase-Edeni ngaphandle kwasinye. (Genesisi 2:15-17) Bona bakhetsa kudla sitselo salesihlahla lebekungakafaneli basidle. Eva “wakha sitselo saso wasidla.” Kamuva, na-Adamu naye ‘wasidla.’ (Genesisi 3:6) Bobabili abazange bamlalele Nkulunkulu. Ngenca yekutsi bo-Adamu na-Eva bebete sono, bekungekwemvelo kutsi bangakwenti lokubi. Nobe kunjalo, bakhetsa kungamlaleli Nkulunkulu. Ngekwenta njalo, bona futsi bala kubuswa nguye. Lesincumo sabo senta kutsi bahlupheke kukhulu.—Genesisi 3:16-19.
3. Sincumo lesentiwa bo-Adamu na-Eva sisitsintsa njani tsine?
Ngesikhatsi bo-Adamu na-Eva bona, baba nesono futsi basendlulisela kubo bonkhe bantfwana babo. Nalikhuluma nga-Adamu, liBhayibheli litsi: “Sono sangena ngemuntfu munye eveni, nekufa kwangena ngesono, ngenca yaloko kufa kwasakatekela kubo bonkhe bantfu.”—KubaseRoma 5:12.
Sihlupheka ngenca yetizatfu letehlukahlukene. Ngaletinye tikhatsi sihlupheka ngenca yetincumo letimbi lesititsatsako. Siphindze sihlupheke ngenca yetincumo letimbi letentiwa ngulabanye, kanye nangekuba sendzaweni lengakafaneli ngesikhatsi lesikabi.—Fundza Umshumayeli 9:11.
CHUBEKA UFUNISISA
Buka kutsi kungani kungesuye Nkulunkulu lobangela bubi nekuhlupheka emhlabeni lamuhla kanye nekutsi utiva njani nasihlupheka.
4. Ngubani losibangela kuhlupheka?
Bantfu labanyenti bakholelwa kutsi nguNkulunkulu lobusa umhlaba. Kuliciniso yini loko? Dlala le-VIDEO.
Fundza Jakobe 1:13 na-1 Johane 5:19, bese nicoca ngalombuto:
NguNkulunkulu yini lobangela bubi nekuhlupheka?
5. Yini leyentekile kusukela Sathane acala kubusa?
Fundza Genesisi 3:1-6, bese nicoca ngalemibuto:
Ngumaphi emanga lashiwo nguSathane?—Buka emavesi 4 na-5.
Sathane wakusho ngayiphi indlela kutsi Jehova ubagodlele lokuhle bantfu?
Ngekusho kwaSathane, bantfu bebakudzinga yini kubuswa guJehova kuze bajabule?
Fundza Umshumayeli 8:9, bese nicoca ngalombuto:
Yini leyentekile njengobe umhlaba ungabuswa nguJehova?
Bo-Adamu na-Eva bebete sono futsi bebahlala ePharadisi. Ngenca yekutsi balalela Sathane, bavukela Jehova
Ngemuva kwalokuvukela, umhlaba wagcwala sono, kuhlupheka kanye nekufa
Jehova utasicedza sono, kuhlupheka kanye nekufa. Bantfu batawuphindze babebete sono futsi baphile ePharadisi
6. Jehova unendzaba nekuhlupheka kwetfu
Nkulunkulu akanendzaba yini nekuhlupheka kwetfu? Cabanga ngaloko lokwabhalwa yiNkhosi Davide kanye nemphostoli Phetro. Fundza Tihlabelelo 31:7 na-1 Phetro 5:7, bese nicoca ngalombuto:
Kukwenta utive njani kwati kutsi Jehova uyakubona kuhlupheka kwetfu futsi unendzaba natsi?
7. Nkulunkulu utakucedza konkhe kuhlupheka kwebantfu
Fundza Isaya 65:17 neSembulo 21:3, 4, bese nicoca ngalombuto:
Kungani kudvudvuta kwati kutsi Jehova utawususa imiphumela yabo bonkhe bubi lobentiwe kubantfu?
Bewati yini?
Ngesikhatsi Sathane akhuluma emanga ekucala, wakhuluma kabi ngaJehova. Lokusho kutsi wenta bantfu bacabanga tintfo letimbi ngaJehova ngekutsi atsi unguMbusi longakalungi nalote lutsandvo. Esikhatsini lesitako, Jehova nasekasusa kuhlupheka kwebantfu, utawungcwelisa libito lakhe. Ngalamanye emavi, utawufakazela kutsi kubusa kwakhe ngiko lokuncono kakhulu. Kungcweliswa kwelibito laJehova kubaluleke kwendlula yonkhe intfo lekhona.—Matewu 6:9, 10.
LABANYE BANTFU BATSI: “Kuhlupheka kuyincenye yenjongo yaNkulunkulu ngatsi.”
Wena ungatsini?
LOKO LESICOCE NGAKO
NguSathane Develi kanye nebantfu lababili bekucala lababangela kutsi kube nebubi emhlabeni. Kumvisa buhlungu kakhulu Jehova kuhlupheka kwetfu, futsi utakucedza madvutane.
Yini Loyifundzile?
Ngumaphi emanga Sathane Develi lawatjela Eva?
Kuvukela kwa-Adamu na-Eva kusitsintsa njani sonkhe?
Sati njani kutsi Jehova unendzaba nekuhlupheka kwetfu?
LOKUNYE LONGAKUHLOLA
Fundza kutsi liBhayibheli litsi siyini sono.
Fundza kabanti ngemphikiswano leyacaliswa nguSathane Develi ensimini yase-Edeni.
“Nkulunkulu Ukuvumele Leni Kuhlupheka?” (Sicongosekulindza, saMarch 1, 2014)
Hlola timphendvulo letidvudvutako temibuto lematima.
“Kungani Kwabulawa Bantfu Labanyenti? Nkulunkulu Wakuvumelelani?” (Sihloko lesiku-internet)
Buka kutsi yini leyafundvwa ngulenye indvodza ngekuhlupheka lebeyikubona.