Uhamba Embili Yini Ekuboniseni Lokholwa Nabo Ludvumo?

‘Tsandzanani ngelutsandvo lwebuzalwane, nijakiselane ngekubonisana ludvumo.’—ROM. 12:10.

1, 2. (a) Ngusiphi seluleko Pawula lasiniketa baseRoma encwadzini yakhe lababhalela yona? (b) Ngumiphi imibuto lesitawucoca ngayo?

ENCWADZINI yakhe layibhalela baseRoma, umphostoli Pawula wagcizelela kutsi kubalulekile ngatsi njengemaKhristu kubonisana lutsandvo ebandleni. Abesikhumbuta kutsi lutsandvo lwetfu kufanele lubete “kutentisa.” Waphindze wakhuluma “ngelutsandvo lwebuzalwane” washo nekutsi kufanele kube “lutsandvo lolujulile.”—Rom. 12:9, 10a, NW.

² Ecinisweni, kuba nelutsandvo lwebuzalwane kusho lokungetulu kwekumane nje ube nemiva yekutsandza labanye. Imiva lenjalo kufanele iboniswe ngetento. Kute longaba nelwati ngelutsandvo lwetfu ngaphandle kwekutsi silubonise. Pawula uchubeka aseluleka atsi: ‘Nijakiselane ngekubonisana ludvumo.’ (Rom. 12:10b) Kufaka ekhatsi ini kubonisa ludvumo? Kungani kubalulekile kujakiselana ekuboniseni lokholwa nabo ludvumo? Singakwenta njani loko?

Kuhlonipha kanye neludvumo

3. Ligama lelitsi ‘ludvumo’ linayiphi inchazelo etilwimini tekucala teliBhayibheli?

³ Ligama lesiHebheru lelitsi ‘ludvumo’ lisho “sisindvo.” Umuntfu loboniswa ludvumo utsatfwa njengaloyo lonesisindvo nobe lobalulekile. Ngalokuvamile leligama lesiHebheru emiBhalweni liphindze lihunyushwe ngekutsi “inkhatimulo.” Loko kuphindze kukhombise kubaluleka kwaloyo muntfu loboniswa ludvumo. (Gen. 45:13) Ligama lesiGriki lelihunyushwe eBhayibhelini ngekutsi ‘ludvumo’ linemcondvo wekuhlonishwa nekuba ligugu. (Luk. 14:10) Bantfu lesibadvumisako babaligugu kitsi futsi sibaphatsa njengalabo lababalulekile.

4, 5. Kuhlobene njani kubonisa ludvumo kanye nenhlonipho? Fananisa.

⁴ Kufaka ekhatsi ini kubonisa labanye ludvumo? Kwekucala, kufanele sibe nenhlonipho. Ecinisweni, sizatfu sekutsi ligama lelitsi ‘ludvumo’ nalelitsi ‘inhlonipho’ asetjentiswe ndzawonye ngulokutsi ayahlobana. Ludvumo lukubonisa inhlonipho ngetento. Ngalamanye emagama, kuhlonipha ngalokuyinhloko kusho indlela lesibuka ngayo lomunye umzalwane kantsi ludvumo lisho indlela lesimphatsa ngayo lomunye umzalwane.

⁵ UmKhristu angalukhombisa njani ludvumo lolucotfo kulabo lakholwa nabo nangabe angabahloniphi ngalokusuka enhlitiyweni? (3 Joh. 9, 10) Njengobe nesitjalo sikhula kahle nangabe sihlanyelwe emhlabatsini lovundzile, neludvumo lungaba cotfo nangabe luhambisana nenhlonipho lesuka enhlitiyweni. Njengobe ludvumo lwekutentisa lungahambisani nenhlonipho lecotfo, lungaphela masinyane. Kungako Pawula achubeka neseluleko sakhe sekubonisa ludvumo nganankha emavi lacacile: ‘Lutsandvo lwenu alubebete kutentisa.’—Rom. 12:9; fundza 1 Phetro 1:22.

Banike Ludvumo Labo “Labentiwe Baba Ngumfanekiso WaNkulunkulu”

6, 7. Kungani kufanele sibahloniphe labanye bantfu?

⁶ Njengobe kuba nenhlonipho lesuka enhlitiyweni kuyintfo lebalulekile ekuboniseni ludvumo, akukafaneli sikhohlwe tizatfu letisemiBhalweni tekubonisa bonkhe bazalwane betfu inhlonipho. Ase sicoce ngaletimbili taletizatfu.

⁷ Ngalokungafanani naletinye tidalwa letisemhlabeni, bantfu badalwa “baba ngumfanekiso waNkulunkulu.” (Jak. 3:9) Kungako sinetimfanelo taNkulunkulu letinjengelutsandvo, kuhlakanipha kanye nekulunga. Naka kutsi yini lenye lesayitfola kuMdali wetfu. Umhlabeli utsi: “Maye, Simakadze . . . , wena ubeke ludvumo lwebukhosi bakho ngetulu kwemazulu. . . . Noko umente [umuntfu] wacishe waba ngangawe, Nkulunkulu, wametfwesa umchele webukhosi neludvumo.” (Hla. 8:1, 4, 5; 104:1)a Kubonisa labanye bantfu ludvumo lolubafanele, kuyindlela yekukhombisa ludvumo kuloyo lonika labanye ludvumo, lokunguNkulunkulu. Nangabe sihlonipha lomunye umuntfu, ecinisweni sisuke sikhombisa kutsi sihlonipha loyo longuMtfombo wenhlonipho, Jehova. Ngako-ke, nangabe sinetizatfu letiphatsekako tekuhlonipha labanye bantfu, kubaluleke kangakanani-ke kuhlonipha labo lesikholwa nabo!—Joh. 3:16; Gal. 6:10.

Emalunga Emndeni Munye

8, 9. Ngusiphi sizatfu Pawula lasiniketa sekuhlonipha labo lesikholwa nabo?

⁸ Lesinye sizatfu lesenta sihloniphane, sichazwe nguPawula. Ngembikwekuba abakhutsate kutsi babonisane ludvumo, naku lakusho: “Tsandzanani ngelutsandvo lwebuzalwane.” Leligama lesiGriki lelitsi “tsandzanani” lisho bunye lobunemandla lobusemndenini lonelutsandvo kanye nalobambisanako. Ngako-ke, ngekusebentisa leligama, Pawula abegcizelela kutsi buhlobo lobusebandleni bufanele bube nemandla futsi bube nelutsandvo njengebemndeni lonebunye. (Rom. 12:5) Ngetulu kwaloko, khumbula kutsi lamavi Pawula wawabhalela emaKhristu lagcotjwe ngemoya, labantfwana baBabe munye, Jehova. Nangendlela lefananako, nabo bebangumndeni losondzelene. Ngako-ke, emaKhristu lagcotjiwe angesikhatsi saPawula abenesizatfu lesivakalako sekuhloniphana. Loku kunjalo nalamuhla ngemaKhristu lagcotjiwe.

⁹ Kutsiwani ‘ngaletinye timvu’? (Joh. 10:16) Nanobe tingasiyo incenye yebantfwana baNkulunkulu labakhetsiwe, nato tingabitana ngekutsi dzadze nobe mzalwane ngobe takha umndeni wemaKhristu emhlaba wonkhe lanebunye. (1 Phet. 2:17; 5:9) Ngako-ke, nangabe letinye timvu tisicondza ngalokugcwele sizatfu sekubitana ngekutsi “mzalwane” nobe “dzadze,” nato titawuba nesizatfu lesivakalako sekubahlonipha ngalokusuka etinhlitiyweni labo labakholwa nato.—Fundza 1 Phetro 3:8.

Kungani Kubalulekile Kubonisa Labanye Ludvumo?

10, 11. Kungani kubalulekile kuhlonipha labanye futsi siphindze sibabonise ludvumo?

¹⁰ Kungani kubalulekile kuhlonipha labanye futsi siphindze sibabonise ludvumo? Kungobe nasihlonipha bazalwane kanye nabodzadzewetfu sisuke sikhulisa bunye lobusebandleni.

¹¹ Ecinisweni, siyacaphela kutsi kuba nebuhlobo lobusedvute naJehova kanye nekutfola lusito lwemoya wakhe, ngiko lokusenta sibe ngemaKhristu eliciniso. (Hla. 36:7; Joh. 14:26) Ngetulu kwaloko, nangabe lesikholwa nabo basihlonipha, siyakhutsateka. (Taga 25:11) Sijabula kakhulu nangabe lotsite abonga ngaloko lesikwentile nobe nakabonisa kutsi uyasihlonipha. Loko kusinika emandla lengetiwe ekuchubeka sijabula futsi sitimisele kuhamba endleleni yekuphila. Kungenteka kutsi nawe uke wativa ngaleyo ndlela.

12. Yini ngamunye wetfu langayenta kute kube nebunye kanye nelutsandvo ebandleni?

¹² Njengobe Jehova asati sidzingo lesitalwe sinaso sekufuna kuhlonishwa, eVini lakhe usikhutsata kutsi ‘sijakiselane ngekuhloniphana.’ (Rom. 12:10, fundza Matewu 7:12.) Onkhe emaKhristu lalalela lamavi, enta kutsi kube nebunye kanye nelutsandvo emkhatsini wawo. Sonkhe senta kahle ngekutibuta, ‘Ngagcina nini kubonisa umzalwane nobe dzadzewetfu ebandleni kutsi ngiyamhlonipha, kungaba ngemavi nobe ngetento?’—Rom. 13:8.

Umtfwalo Sonkhe Lesinawo

13. (a) Bobani lokufanele bahambe embili ekuboniseni ludvumo? (b) Yini leboniswa ngemavi aPawula latfolakala kuRoma 1:7?

¹³ Bobani lokufanele bahambe embili ekuboniseni ludvumo? Encwadzini yakhe layibhalela emaHebheru, Pawula wachaza labadzala belibandla labangemaKhristu ‘njengebaholi betfu.’ (Heb. 13:17) Kuliciniso kutsi labadzala belibandla bayahola emisebentini leminyenti leyentiwako ebandleni. Nobe kunjalo, njengobe babelusi bemhlambi, kufanele bahambe embili ekuboniseni ludvumo kulabo labakholwa nabo—lokufaka ekhatsi labanye labadzala belibandla. Nasi sibonelo: Nangabe labadzala belibandla bahlangana kute bacoce ngetidzingo takamoya talelo bandla, babonisana ludvumo ngekutsi balalelisise imibono yalabanye labadzala belibandla. Ngetulu kwaloko, babonisana ludvumo ngekutsi bacabangisise ngemibono yabo bonkhe labadzala belibandla nangabe bafuna kutsatsa sincumo. (Imis. 15:6-15) Kufanele sikhumbule kutsi nanobe lencwadzi Pawula ayibhalela baseRoma, beyingakacondziswa kuphela kulabadzala belibandla kodvwa nasebandleni lonkhe. (Rom. 1:7) Ngako-ke, leseluleko sekuhamba embili ekuboniseni ludvumo, sisebenta kitsi sonkhe lamuhla.

14. (a) Fananisa umehluko lokhona emkhatsini wekubonisa ludvumo kanye nekuhamba embili ekuboniseni ludvumo. (b) Ngumuphi umbuto lokungenteka sitibute wona?

¹⁴ Ase siphindze sihlole lenye incenye yaleseluleko saPawula. Wagcugcutela bazalwane baseRoma kutsi bangagcini nje ngekubonisana ludvumo kodvwa bahambe embili ekuboniseni ludvumo. Kungani loku kunemehluko? Ase ucabange nganasi sibonelo. Thishela angabakhutsata yini bafundzi labakwatiko kufundza kanye nekubhala kutsi bafundze kufundza? Cha angeke, ngobe vele sebayakwati kufundza. Esikhundleni saloko, lothishela angabasita bafundze nconywana. Nangendlela lefananako, kutsandzana lokusiholela ekutseni sibonisane ludvumo, kuluphawu lwekubona emaKhristu eliciniso. (Joh. 13:35) Nobe kunjalo, njengobe nebafundzi labakwatiko kufundza nekubhala bangatfutfukisa indlela labafundza ngayo, natsi singatfutfuka sihambe embili ekuboniseni labanye ludvumo. (1 Thes. 4:9, 10) Lona ngumtfwalo sonkhe lesinawo. Singatibuta kutsi, ‘Siyakwenta yini loko—kuhamba embili ekuboniseni labanye ebandleni ludvumo?’

Bonisa ‘Lababonakala Baphansi’ Ludvumo

15, 16. (a) Bobani lokungakafaneli sibakhohlwe nasibonisa labanye ludvumo, futsi kungani kunjalo? (b) Yini lengakhombisa kutsi sibahlonipha ngalokusuka enhlitiyweni bazalwane betfu nabodzadze?

¹⁵ Ebandleni, bobani lokungakafaneli sibakhohlwe nasibonisa labanye ludvumo? LiVi laNkulunkulu litsi: ‘Lowo lopha lababonakala baphansi uboleka Jehova; Jehova uyawukumvuza ngaloko lakwentile.’ (Taga 19:17) Lesimiso salamavi kufanele sisitsintse njani njengobe sitimisela ngekuhamba embili ekuboniseni labanye ludvumo?

¹⁶ Bantfu labanyenti bayakwati kubonisa lababaholako ludvumo, kodvwa bona labo bantfu baphatsa labanye lababonakala bangakabaluleki kubo ngekungabahloniphi. Nobe kunjalo, Jehova akasinjalo. Yena utsi: “Ngobe labo labangihloniphako ngiyawubahlonipha.” (1 Sam. 2:30; Hla. 113:5-7) Jehova ubabonisa ludvumo bonkhe labo labamkhontako nalabamdvumisako. Akabakhohlwa ‘lababonakala baphansi.’ (Fundza Isaya 57:15; 2 Khr. 16:9) Natsi sifisa kumlingisa Jehova. Nangabe sifuna kwati kutsi lungakanani ludvumo lesilubonisa labanye, senta kahle kutibuta, ‘Ngibaphatsa njani labo lababonakala baphansi, nobe labo labete tikhundla tekuhola ebandleni?’ (Joh. 13:14, 15) Imphendvulo yalombuto yembula lizinga lesibahlonipha ngalo labanye ngalokusuka enhlitiyweni.—Fundza Filiphi 2:3, 4.

Kubonisa Ludvumo Ngekunikela Ngesikhatsi Setfu

17. Nguyiphi indlela leyinhloko lesingabonisa ngayo kutsi sihamba embili ekuboniseni labanye ludvumo, futsi kungani kunjalo?

¹⁷ Nguyiphi indlela leyinhloko lesingahamba ngayo embili ekuboniseni labanye ludvumo ebandleni? Ngekuniketa labanye sikhatsi setfu. Kungani kunjalo? Njengobe singemaKhristu, siphila imphilo lematasatasa, futsi sinemitfwalo lebalulekile naleminyenti ebandleni futsi idla sikhatsi setfu lesinyenti. Ngako-ke, akumangalisi kutsi sikhatsi setfu siligugu kitsi futsi siyacaphela nekutsi akukafaneli sifune bazalwane nabodzadzewetfu basiphe sikhatsi sabo lesingetulu kwalesi labangasipha sona. Ngendlela lefananako, siyajabula nangabe labanye ebandleni bakucondza kutsi nabo akukafaneli balindzele kutsi sibaphe sikhatsi setfu nobe bangeke bakhone.

18. Singasibonisa njani sifiso setfu sekunika labo lesikholwa nabo sikhatsi?

¹⁸ Siphindze sicaphele nekutsi sifiso setfu sekubekela imisebenti yetfu eceleni kute sinikete bazalwane betfu sikhatsi setfu, (ikakhulukati labo lababelusi ebandleni) sibonisa kutsi siyabahlonipha. Ngayiphi indlela? Ngekuyekela imisebenti yetfu kute sinikete bazalwane betfu sikhatsi, ngalamanye emagama sitsi kubo, ‘Wena uligugu kakhulu kimi kangangekutsi kubaluleke kakhulu ngami kutsi ngicitse sikhatsi sami nginawe kunekutsi ngichubeke nemsebenti lengiwentako.’ (Mak. 6:30-34) Kuyafanana nekwenta lokwehlukile kuloku. Nangabe singayiyekeli imisebenti yetfu kute sinike umzalwane wetfu sikhatsi, singamenta ative shengatsi yena akakabaluleki kitsi. Kuliciniso kutsi kuba khona tikhatsi lapho indzaba letsite lephutfumako ingeke iphatanyiswe. Nobe kunjalo, sifiso setfu—nobe kuvilaphela kwetfu kunika labanye sikhatsi setfu, kwembula lokunyenti ngekujula kwenhlonipho lesinayo ngebazalwane betfu nabodzadze.—1 Khor. 10:24.

Timisele Kuhamba Embili

19. Ngaphandle kwekunikela ngesikhatsi setfu, nguyiphi lenye indlela lesingabonisa ngayo kutsi sibabonisa ludvumo labo lesikholwa nabo?

¹⁹ Kunaletinye tindlela letibalulekile lesingabonisa ngato lesikholwa nabo ludvumo. Nasi sibonelo: Ngalesikhatsi sibanika sikhatsi setfu, kufanele siphindze sibalalele. Nalapha, Jehova usibekela sibonelo. Umhlabeli Davide watsi: “Emehlo aSimakadze akesuki kulabalungile, tindlebe takhe atisuki ekukhaleni kwabo.” (Hla. 34:15) Natsi silwela kulingisa Jehova ngekubanaka bazalwane betfu, ikakhulukati labo labadzinga lusito lwetfu. Ngekwenta njalo, sibabonisa kutsi siyabadvumisa.

20. Ngutiphi tikhumbuto letimayelana nekubonisa labanye ludvumo lokufanele sitigcine engcondvweni?

²⁰ Njengobe sesifundzile, sifuna kukugcina engcondvweni kutsi kungani kufanele sibahloniphe ngalokusuka enhlitiyweni labo lesikholwa nabo. Ngetulu kwaloko, sifuna ematfuba ekuba bekucala ekuboniseni ludvumo kubo bonkhe, lokufaka ekhatsi nalababonakala baphansi. Ngekutsatsa letinyatselo, sitawulicinisa lutsandvo lwebuzalwane kanye nebunye ebandleni. Ngako-ke, shengatsi sonkhe singachubeka singagcini nje ngekubonisa labanye ludvumo kuphela, kodvwa sihambe embili ekuboniseni labanye ludvumo. Utimisele yini kukwenta loko?

[Umbhalo longentansi]

Usakhumbula Yini?

• Ludvumo nenhlonipho, kuhlobana njani?

• Ngutiphi tizatfu lesinato tekubonisa labo lesikholwa nabo ludvumo?

• Kubaluleke ngani kubonisana ludvumo?

• Labo lesikholwa nabo singababonisa ngatiphi tindlela ludvumo?