Emhlabeni wonkhe, bantfu banemibono lengafani ngetjwala. Labanye bakhetsa kunatsa tjwala nabahlangene nebangani babo. Labanye bakhetsa kungabutsintsi sanhlobo. Kantsi labanye banatsa baze badzakwe. Litsini liBhayibheli ngetjwala?

1. Kubi yini kunatsa tjwala?

LiBhayibheli alisho kutsi kubi kunatsa tjwala. Kunaloko, nalikhuluma ngetipho Nkulunkulu lasiphe tona, libala “neliwayini lelenta inhlitiyo yemuntfu ijabule.” (Tihlabelelo 104:14, 15) Lamanye emadvodza nebesifazane labetsembekile lokukhulunywa ngabo eBhayibhelini bebabunatsa tjwala.—1 KuThimothi 5:23.

2. LiBhayibheli libaniketa siphi seluleko labo labakhetsa kunatsa tjwala?

Jehova uyakulahla kunatsa kakhulu nekudzakwa. (KubaseGalathiya 5:21) LiVi lakhe litsi: “Ungabi ngulomunye walabo labanatsa kakhulu liwayini.” (Taga 23:20) Ngako nasikhetsa kunatsa tjwala, sisodvwa nobe sinalabanye, akukafaneli sinatse kakhulu size singasakhoni kucabanga kahle, kulawula indlela lesikhuluma ngayo netento tetfu, nobe size silimate imphilo yetfu. Ngako nasingakhoni kulawula indlela lesinatsa ngayo tjwala, kufanele singabunatsi sanhlobo.

3. Singatihlonipha njani tincumo talabanye endzabeni yekunatsa tjwala?

Umuntfu ngamunye kufanele atikhetsele kutsi utabunatsa yini tjwala. Akukafaneli simehlulele lomunye umuntfu lokhetsa kunatsa tjwala ngelizinga lelifanele, futsi akukafaneli simphocelele nalongafuni kubunatsa kutsi abunatse. (KubaseRoma 14:10) Sikhetsa kungabunatsi tjwala nangabe kubunatsa kutawukhuba labanye. (Fundza KubaseRoma 14:21.) Asitifuneli ‘lokusita [tsine], kodvwa sichubeka sifuna lokusita lomunye umuntfu.’—Fundza 1 KubaseKhorinte 10:23, 24.

CHUBEKA UFUNISISA

4. Khetsa kutsi utabunatsa yini tjwala

Jesu bekanamuphi umbono ngekunatsa tjwala? Kuze utfole imphendvulo, cabanga ngesimangaliso sekucala lasenta. Fundza Johane 2:1-11, bese nicoca ngalemibuto:

• Kulesimangaliso, yini lesingayifundza ngembono waJesu ngetjwala kanye nangalabo lababunatsako?

• Njengobe Jesu angazange akulahle kunatsa tjwala, umKhristu kufanele abe namuphi umbono ngalabo labakhetsa kubunatsa?

Nobe kunjalo, kutsi umKhristu ukhululekile kunatsa tjwala, akusho kutsi kufanele ahlale abunatsa. Fundza Taga 22:3, bese ucabanga ngaletimo letilandzelako kutsi tingakuvumela yini kutsi unatse tjwala:

• Utawushayela nobe usebentise umshini lotsite.

• Ukhulelwe.

• Dokotela utsite ungabunatsi tjwala.

• Awusakhoni kulawula indlela lonatsa ngayo tjwala.

• Umtsetfo awukuvumeli kutsi unatse tjwala.

• Unemuntfu lokhetsa kungabunatsi tjwala ngobe wake waba nenkinga yekulawula indlela lebekanatsa ngayo.

Kufanele yini kutsi kube netjwala emshadweni nobe kuleminye imibutsano? Kuze utfole kutsi yini lengakusita wente sincumo, dlala le-VIDEO.

I-VIDEO: Kufanele Yini Kube Netjwala Emibutsanweni? (2:41)

Fundza KubaseRoma 13:13 na-1 KubaseKhorinte 10:31, 32. Ngemuva kwekufundza umbhalo ngamunye, cocani ngalombuto:

• Kusebentisa lesimiso kungakusita njani kutsi wente sincumo lesitawujabulisa Jehova?

5. Yenta sincumo sekutsi utawunatsa kangakanani

Nawukhetsa kunatsa tjwala, khumbula naku: Nanobe Jehova angakulahli kunatsa tjwala, uyakulahla kunatsa ngalokwecile. Leni? Fundza Hoseya 4:11, 18, bese nicoca ngalombuto:

• Yini lengasita umuntfu lonatsa kakhulu?

Yini lengasisita singanatsi kakhulu? Sidzinga kwati kutsi bunganani tjwala lesingabunatsa ngaphandle kwekwephula umtsetfo waJehova. Fundza Taga 11:2, bese nicoca ngalombuto:

• Kukahle ngani kutikalela kutsi utawunatsa tjwala lobungakanani?

6. Ncoba kusebentisa kabi tjwala

I-VIDEO: ‘Bengingasayijabuleli Indlela Lebengiphila Ngayo’ (6:32)

• Kule-video, kunatsa tjwala kwayitsintsa njani indlela Dmitry lebekenta ngayo tintfo?

• Wakhona yini kubuyekela ngekushesha tjwala?

• Wakhona njani kuyekela kunatsa kakhulu?

Fundza 1 KubaseKhorinte 6:10, 11, bese nicoca ngalemibuto:

• Kubi kangakanani kudzakwa?

• Yini lekhombisa kutsi umuntfu lonatsa kakhulu tjwala angashintja?

Fundza Matewu 5:30, bese nicoca ngalombuto:

• Ngesikhatsi Jesu akhuluma ngalomfanekiso wekujuba sandla, bekasho kutsi kudzingeka sidzele lokutsite kuze sijabulise Jehova. Yini longayenta nawukutfola kumatima kuncoba kusebentisa kabi tjwala?a

Fundza 1 KubaseKhorinte 15:33, bese nicoca ngalombuto:

• Bangani bakho bangayitsintsa njani indlela lonatsa ngayo tjwala?

LOKO LESICOCE NGAKO

Jehova wasipha tjwala kuze sibujabulele, kodvwa uyakulahla kunatsa ngalokwecile nekudzakwa.

Yini Loyifundzile?

• Uyini umbono weliBhayibheli ngetjwala?

• Ngutiphi tingoti tekunatsa kakhulu tjwala?

• Singatihlonipha njani tincumo talabanye endzabeni yekunatsa tjwala?

LOKUNYE LONGAKUHLOLA

Bantfu labasha bangatenta njani tincumo letikahle nakutiwa endzabeni yekunatsa tjwala?

Cabanga Ngemiphumela Yekunatsa Tjwala (2:31)

Tfola tinyatselo longatitsatsa kuze uncobe inkinga yekunatsa kakhulu.

“Kugcina Tjwala Busendzaweni Yabo” (Sicongosekulindza, saFebruary 1, 2010)

Kufanele yini umKhristu ahlanganyele ekushayiseni tingilazi nakunatfwa tjwala (toasting)?

“Imibuzo Evela Kubafundi” (Sicongosekulindza, saFebruary 15, 2007 lesitfolakala ngesiZulu)

Endzabeni letsi “I Was a Bottomless Barrel,” tfola kutsi lenye indvodza yayekela njani kunatsa kakhulu tjwala.

“The Bible Changes Lives” (Sicongosekulindza, saMay 1, 2012, lesitfolakala ngesiNgisi)

Sonkhe siyatikhetsela indlela lesifuna kugcoka ngayo nalesifuna kubukeka ngayo. Nasilandzela timiso letimelula letiseBhayibhelini, singakukhetsa kahle loko lesifuna kukugcoka, siphindze sijabulise Jehova. Asesihlole letinye taletimiso.

1. Ngutiphi timiso letingasisita nasikhetsa loko lesifuna kukugcoka, kanye nendlela lesitawubukeka ngayo?

Kufanele sikhetse timphahla “letilungiswe kahle, ngekuzitsa nangekuvutfwa,” futsi sibukeke sihlantekile kuze bantfu babone kutsi ‘sihlonipha Nkulunkulu.’ (1 KuThimothi 2:9, 10) Cabanga nganati timiso letine: (1) Timphahla tetfu kufanele tibe ‘nguletilungiswe kahle.’ Kungenteka ubonile emihlanganweni yetfu yelibandla kutsi bantfu baJehova bagcoka ngetindlela letingafani, kodvwa indlela lesigcoka ngayo nalesitilungisa ngayo ikhombisa kutsi siyamhlonipha Nkulunkulu. (2) Nasigcoka “ngesizotsa” asenti labanye babe nemicabango lengakafaneli nome sente labanye basinake ngalokungenasidzingo. (3) Sikhombisa ‘kuvutfwa’ nasingatilandzeli tonkhe titayela nemafashini lafikako. (4) Indlela lesibukeka ngayo kufanele ihlale ikhombisa kutsi ‘sihlonipha Nkulunkulu,’ kuze kutsi labanye babone kutsi sikhonta Nkulunkulu weliciniso.—1 KubaseKhorinte 10:31.

2. Indlela lesibukeka ngayo ingabatsintsa njani lesikholwa nabo?

Ngisho nanobe sinenkhululeko yekukhetsa kutsi sitawugcokani, kufanele sicabange kutsi indlela lesibukeka ngayo itawubatsintsa njani labanye. Kufanele sente konkhe lesingakwenta kuze singabakhubi labanye, kunaloko, ‘sentele makhelwane wetfu lokuhle futsi simakhe.’—Fundza KubaseRoma 15:1, 2.

3. Indlela lesibukeka ngayo ingabasita njani labanye bafune kufundza ngaJehova?

Setama kugcoka kahle ngaso sonkhe sikhatsi, kodvwa sinaka kakhulu lapho siya emihlanganweni yelibandla nobe nasiya emsebentini wekushumayela. Asifuni kutsi bantfu bangatinaki tindzaba letimnandzi ngenca yendlela lesibukeka ngayo. Kunaloko, indlela lesibukeka ngayo kufanele yente bantfu bafune kuva liciniso, futsi ihlobise “imfundziso yeMsindzisi wetfu.”—KuThithusi 2:10.

CHUBEKA UFUNISISA

4. Nasibukeka kahle sikhombisa kutsi siyamhlonipha Jehova

Ngusiphi sizatfu lesibaluleke kakhulu lesisenta sinake indlela lesibukeka ngayo? Fundza Tihlabelelo 47:2, bese nicoca ngalemibuto:

• Ngusiphi sincumo lokufanele sisente ngedlela lesigcoka ngayo nasikhumbula kutsi itsintsa umbono bantfu labanawo ngaJehova?

• Ucabanga kutsi kubalulekile yini kunaka indlela lesibukeka ngayo nasiya emihlanganweni nobe emsebentini wekushumayela? Yini lekwenta usho njalo?

5. Singatenta njani tincumo letikahle nakutiwa endzabeni yekugcoka nekutilungisa?

Dlala le-VIDEO.

I-VIDEO: “Tonkhe Tintfo Tenteleni Kukhatimulisa Nkulunkulu” (10:18)

Kunobe ngabe ngusiphi simo lesititfola sikuso, kufanele siciniseke kutsi timphahla tetfu tiyafaneleka futsi tihlobile, ngisho nome tidulile nome tingakaduli. Fundza 1 KubaseKhorinte 10:24 na-1 KuThimothi 2:9, 10, bese nicoca ngekutsi kungani kungakafaneli sigcoke timphahla . . .

• letite sizotsa naletingakahlobi.

• letimpintjako, letiveta umtimba nobe letenta bantfu babe nemicabango lemibi.

Ngisho nobe emaKhristu angekho ngaphansi kweMtsetfo waMosi, angafundza lokunyenti kuwo ngendlela Jehova lacabanga nayo. Fundza Dutheronomi 22:5 bese nicoca ngalombuto:

• Kungani kufanele siyibalekele indlela yekugcoka nekutilungisa leyenta emadvodza abukeke njengebafati nebafati babukeke njengemadvodza?

Fundza 1 KubaseKhorinte 10:32, 33 na-1 Johane 2:15, 16, bese nicoca ngalemibuto:

• Kungani kufanele sibe nendzaba kutsi indlela lesigcoka ngayo iyabakhuba yini labanye emmangweni lesihlala kuwo nobe ebandleni?

• Ngutiphi titayela tekugcoka letivamile endzaweni lohlala kuyo?

• Ucabanga kutsi letinye taletitayela tingamfanela yini umKhristu? Kungani usho njalo?

LOKO LESICOCE NGAKO

Nasiyikhetsa kahle indlela lesibukeka ngayo sikhombisa kutsi siyamhlonipha Jehova kanye nalabanye.

Yini Loyifundzile?

• Yini leyenta indlela lesigcoka ngayo nalesitilungisa ngayo ibaluleke kuJehova?

• Ngutiphi letinye timiso lokufanele tisicondzise nasenta tincumo endleleni lesibukeka ngayo?

• Indlela lesibukeka ngayo ingawutsintsa njani umbono walabanye ngekukhonta kweliciniso?

LOKUNYE LONGAKUHLOLA

Buka kutsi yini labanye labayicabangako nababuka indlela logcoke ngayo.

“Ngibukeka Kanjani?” (Sihloko lesiku-internet)

Kukuhlakanipha kucabangisisa ngemiphumela ngaphambi kwekutsi wente i-tattoo.

“Litsini LiBhayibheli Ngema-Tattoo?” (Sihloko lesiku-internet)

Cabanga ngaletinye timiso letingasisita sente tincumo.

“Indlela Logcoka Ngayo Iyamkhatimulisa Yini Nkulunkulu?” (Sicongosekulindza saSeptember 2016)

Yini leyasita lowesifazane lofuna kujabulisa Nkulunkulu kutsi emukele indlela labanye labakhetsa kugcoka ngayo?

“Dress and Grooming Was My Stumbling Block” (Phaphama!, yaDecember 22, 2003 letfolakala ngesiNgisi)