Indlela 2
Ungaticatsanisi Nalabanye
LIFUNDZISANI LIBHAYIBHELI? “Kodvwa akube ngulowo atihlolele wakhe umsebenti, khona uyawuba nekutibonga ngekwakhe yedvwana, hhayi ngekwalomunye umuntfu.”—Galathiya 6:4.
INKINGA LEKHONA. Kungenteka kutsi sitsandza kuticatsanisa nalabanye—ngaletinye tikhatsi nalabo labanalokuncane kunatsi, labanemandla, umcebo, nobe emakhono lendlula lawo lesinawo. Kodvwa umphumela wekuticatsanisa nalabanye awubi muhle. Siba nembono loliphutsa wekutsi kubaluleka kwemuntfu kubangelwa nguloko lanako nobe loko lakhona kukwenta. Singacala kuba nemona futsi sibe nemoya wekuncintisana.—Umshumayeli 4:4.
YINI LONGAYENTA? Yetama kutibuka ngendlela Nkulunkulu lakubuka ngayo. Vumela umbono wakhe ulawule indlela lotibuka ngayo. ‘Umuntfu ubuka lingaphandle lemuntfu, kodvwa Jehova,a ubuka inhlitiyo.’ (1 Samuweli 16:7) NguJehova lokala kubaluleka kwakho, hhayi ngekukucatsanisa nalabanye, kodvwa ngekutsi ahlole inhlitiyo, imicabango, imiva, kanye netinhloso takho. (Hebheru 4:12, 13) Jehova uyati kutsi uyawenta emaphutsa futsi ukukhutsata kutsi ukwemukele loko. Nangabe ukala kubaluleka kwakho ngekuticatsanisa nalabanye, utawugcina sewutibona uncono kunalabanye, nobe utawuhlala ungenetiseki ngaloko lonako. Ngekutitfoba, kwemukele kutsi angeke ukutfole konkhe lokufunako.—Taga 11:2.
Yini ngalokukhetsekile lokufanele uyente kute ube ngulobalulekile emehlweni aNkulunkulu? Nkulunkulu waphefumulela umphrofethi Mikha kutsi abhale: “Simakadze usitjelile lokungukona kukuhle. Lakufunako kitsi ngunaku: Ufuna sente kulunga, siphatsane ngemusa, siphilele Nkulunkulu ngentfobeko.” (Mikha 6:8) Nangabe usilalela leseluleko, Nkulunkulu utawuhlala akukhatsalela. (1 Phetro 5:6, 7) Lesi sizatfu lesibaluleke kutendlula tonkhe sekwenetiseka.
[Umbhalo longentansi]
a Libito laNkulunkulu lelitfolakala eBhayibhelini.
[Sitfombe ekhasini 5]
Jehova ukala kubaluleka kwetfu ngaloko lokusetinhlitiyweni tetfu