Kungani Kufanele Sente Umsebenti WaJehova Ute Kucala Ekuphileni Kwetfu?

“Umlomo wami uyawulandza ngekulunga kwakho, uvakalise insindziso yakho onkhe emalanga.”—HLA. 71:15.

UNGAPHENDVULA NJANI?

Yini leyabangela kuphila kwaNowa, Mosi, Jeremiya kanye naPawula kwajabulisa?

Yini letakusita kute wente sincumo sekutsi utawentani ngekuphila kwakho?

Kungani utimisele kubeka Jehova kucala ekuphileni kwakho?

1, 2. (a) Umuntfu nakatinikela kuJehova usuke akhombisa ini? (b) Yini lesingayizuza nasicabanga ngalokwentiwa nguNowa, Mosi, Jeremiya kanye naPawula?

NAWUBA ngumlandzeli waJesu lotinikele waphindze wabhajatiswa, usuke utsatsa sinyatselo lesibalulekile. Kutinikela kwakho kuNkulunkulu kusincumo lesibalulekile longasenta. Kuba shengatsi utsi: ‘Jehova, ngifuna kutsi ube yiNkhosi yami kuko konkhe kuphila kwami. Ngiyinceku yakho. Ngifuna ungitjele kutsi kufanele ngisisebentise njani sikhatsi sami, ngutiphi tintfo lokufanele ngitente tite kucala nekutsi loko lenginako nemakhono ami kufanele ngikusebentise njani.’

² Nangabe ungumKhristu lotinikele, nguloko vele lowakwetsembisa Jehova. Siyakubonga ngesincumo lowasitsatsa ngobe saba ngulesihle nalesihlakaniphile. Utasisebentisa njani-ke sikhatsi sakho njengobe sewemukele Jehova njengeNkhosi yakho? Tibonelo taNowa, Mosi, Jeremiya kanye nemphostoli Pawula tingasisita kute sitihlole. Onkhe lamadvodza enta umsebenti waJehova ngemphefumulo wonkhe. Simo setfu siyafanana nesawo. Tincumo latenta letikhombisa kutsi yini leyayita kucala ekuphileni kwawo, tingasikhutsata kute sitihlole kutsi sisisebentisa njani sikhatsi setfu.—Mat. 28:19, 20; 2 Thim. 3:1.

ASENGAKEFIKI ZAMCOLO

3. Sikhatsi lesiphila kuso lamuhla sifana njani nesaNowa?

³ Jesu wafananisa sikhatsi saNowa nesetfu. Watsi: “Njengasemalangeni aNowa kuyawuba njalo nekufika kweNdvodzana yeMuntfu. . . . Babedla banatsa, labadvuna nalabasikati batsatsana, kwaze kwaba lilanga langena ngalo Nowa emkhunjini: abazange bati, kwaze kwefika zamcolo wabacedza.” (Mat. 24:37-39) Bantfu labanyenti lamuhla banake kuphila kwabo abasinaki secwayiso sekuphutfuma kwetikhatsi, lesimenyetelwa tinceku taNkulunkulu. Labanyenti abakholelwa kutsi Nkulunkulu utawubhubhisa bantfu lababi—bafana ncamashi nebantfu bangesikhatsi saNowa. (2 Phet. 3:3-7) Nowa wasisebentisa njani sikhatsi sakhe nanobe bantfu bangaleso sikhatsi bebangamlaleli?

4. Nowa wasisebentisa njani sikhatsi sakhe ngemuva kwekuba Jehova amnikete umsebenti lobekufanele awente, futsi kungani?

⁴ Ngemuva kwekuba asatjelwe ngaloko Nkulunkulu latakwenta futsi sekatfole nemsebenti lokufanele awente, Nowa wakha umkhumbi kute kusindze tilwane nebantfu. (Gen. 6:13, 14, 22) Nowa waphindze wamemetela sehlulelo saJehova. Umphostoli Phetro umbita ngekutsi ‘ngumshumayeli wekulunga,’ aveta kutsi Nowa wasebenta kamatima kute asite bantfu bacondze kutsi simo labebakuso sasimatima. (Fundza 2 Phetro 2:5.) Ucabanga kutsi bekutawuba yintfo lenhle yini ngaNowa nemndeni wakhe kutsi bacale libhizinisi, bafake umfutfo kute baphumelele kakhudlwana etintfweni kunalabanye nobe baphile imphilo lentofontofo? Bekungeke kube kuhle kwenta njalo. Ngesizatfu sekutsi bebakwati lokuseta, abazange bafune kutsi tintfo letinjalo tibaphatamise.

KUKHETSA LOKWENTIWA YINKHOSANA YASEGIBHITHE

5, 6. (a) Imfundvo Mosi layitfola kungenteka yayimceceshela ini? (b) Kungani Mosi angatinakanga tikhundla labekatatitfola eGibhithe?

⁵ Ase sicoce ngesibonelo saMosi. Wakhuliswa esigodlweni saseGibhithe njengemntfwana wekutfolwa wendvodzakati yaFaro. Njengenkhosana lebeyiseyincane, ‘abefundziswe yonkhe inhlakanipho yemaGibhithe.’ (Imis. 7:22; Eks. 2:9, 10) Lemfundvo yayilungiselelwe kutsi imsite akwati kulungela imisebenti letsite embusweni waFaro. Abetawuba ngumuntfu lobalulekile embusweni wangaleso sikhatsi, atfole tintfo letinhle nemalungelo laphakeme leso sikhundla lebesitamniketa wona. Kodvwa tonkhe letintfo tatibalulekile yini kuMosi?

⁶ Ngesizatfu sekuceceshwa labekakutfole kubatali bakhe mbamba, Mosi kufanele kutsi bekakwati loko Jehova bekakutsembise bokhokho bakhe bo-Abrahama, Isaka kanye naJakobe. Mosi waba nekukholwa kuleto tetsembiso. Kufanele kutsi wacabangisisa kahle ngelikusasa lakhe kanye nekwetsembeka kwakhe kuJehova. Ngako nakufika sikhatsi sekutsi akhetse emkhatsini wekuba yinkhosana yaseGibhithe nobe kuba sigcili lesingumIsrayeli, wakhetsani? Mosi “wakhetsa kuhlupheka nesive saNkulunkulu kunekutijabulisa esonweni kwesikhashana.” (Fundza Hebheru 11:24-26.) Ngekuhamba kwesikhatsi, walandzela ticondziso taJehova ngendlela lobekufanele aphile ngayo. (Eks. 3:2, 6-10) Kungani Mosi enta njalo? Kungobe abetetsemba tetsembiso taNkulunkulu. Waphetsa ngekutsi abete likusasa eGibhithe. Leso sive saseGibhithe ngekushesha sabhujiswa tishayo letilishumi letivela kuNkulunkulu. Uyasibona yini sifundvo lesitfolwa tinceku taJehova talamuhla letitinikele? Esikhundleni sekutsi sinake umsebenti lotsite kulelive laSathane lesiphila kulo, kufanele sinamatsele kuJehova nasemsebentini wakhe.

JEREMIYA ABEKWATI LOBEKUSETA

7. Simo Jeremiya labekuso sifanana njani nesetfu?

⁷ Lenye indvodza leyenta umsebenti waJehova weta kucala ekuphileni kwayo, kwakungumphrofethi Jeremiya. Jehova watfuma Jeremiya njengemphrofethi wakhe kutsi ashumayele umlayeto wesehlulelo kulabo labebahlubuka eJerusalema nakaJuda. Jeremiya abephila ‘emalangeni ekugcina’ angaleso sikhatsi. (Jer. 23:19, 20) Bekati kamhlophe kutsi live labephila kulo belitawubhujiswa.

8, 9. (a) Kungani kucabanga kwaBharuki kwakudzinga kulungiswa? (b) Nasihlela kwenta lokutsite yini lokufanele siyikhumbule?

⁸ Ngesizatfu saloko abekukholelwa, yini Jeremiya langazange ayente? Akazange etame kutakhela likusasa kulelo live lebelitawubhujiswa, ngobe bekungeke kube kuhlakanipha kwenta njalo. Nobe kunjalo, mabhalane wakhe longuBharuki, abete umbono lonjalo. Ngako Nkulunkulu waphefumulela Jeremiya kutsi atjele mabhalane wakhe loku: “Loko lesengikwakhile ngiyawukuketula, ngikuzuphune naloko bengikuhlanyelile eveni lonkhe. Pho, ungatifunela yini wena tintfo letinkhulu? Ungatifuni. Ngobe ngiyakwehlisela inhlekelele etikwabo bonkhe bantfu, kodvwa wena nome ngukuphi lapho uya khona, ngiyawukwenta uphunyule kanye nemphilo yakho.”—Jer. 45:4, 5.

⁹ Angeke sitati ngalokucondzile “tintfo letinkhulu” lebetifunwa nguBharuki.a Kodvwa siyati kutsi bekutintfo lebetite likusasa, tintfo lebetitawubhujiswa liBhabhulona nalihlasela liJerusalema nga-607 B.C.E. Ngusiphi sifundvo lesisitfola kulendzaba? Kutfola tintfo lesitidzingako kute siphile kudzinga kutsi silihlelele kahle likusasa. (Taga 6:6-11) Kungaba kuhlakanipha yini kucitsa sikhatsi setfu lesinyenti nemandla sifuna tintfo letingeke tihlale njalo? Kuliciniso kutsi inhlangano yaJehova iyachubeka ihlela kwakha emaHholwa eMbuso, takhiwo temagatja naleminye imisebenti. Kuhlela lokunjalo kwehlukile ngobe umgomo wako loyinhloko kusekela uMbuso. Kungaba kuhle nangabe tonkhe tikhonti taJehova letitinikele natihlela kwenta lokutsite, tente uMbuso waNkulunkulu ute kucala kuloko letikwentako. Uyaciniseka yini kutsi ‘ufuna kucala umbuso waNkulunkulu kanye nekulunga kwakhe’?—Mat. 6:33.

“NGIKUSHAYA TIBI”

10, 11. (a) Asengakabi ngumKhristu, Pawula wacitsa sikhatsi sakhe entani? (b) Kungani imigomo yaPawula yashintja ngalokuphelele?

¹⁰ Sibonelo sekugcina lesitawukhuluma ngaso saPawula. Ngembikwekutsi abe ngumKhristu, bantfu labanyenti bebacabanga kutsi utawuba nelikusasa lelihle. Abefundze umtsetfo wemaJuda analomunye thishela lodvumile wangesikhatsi sakhe. Abetfole neligunya kumphristi lomkhulu wemaJuda, futsi abetfutfuka kahle enkholweni yakhe yebuJuda kwendlula bontsanga yakhe. (Imis. 9:1, 2; 22:3; 26:10; Gal. 1:13, 14) Nobe kunjalo, konkhe loko kwashintja ngalesikhatsi Pawula acaphela kutsi Jehova akasawabusisi emaJuda njengesive.

¹¹ Pawula wati kutsi umsebenti lonjalo webuJuda wawungenamsebenti ngembono waJehova, futsi wawute likusasa. (Mat. 24:2) Pawula wachubeka watsi nakacabanga ngekucondza labesanako ngenjongo yaNkulunkulu nelilungelo lekushumayela, loko lake wakwenta esikhatsini lesendlulile labekutsatsa njengalokubalulekile, bese akubona ‘kunjengetibi.’ Wehlukana nenkholo yebuJuda wasebentisa sonkhe sikhatsi sakhe nakalapha emhlabeni kute ashumayele tindzaba letimnandzi.—Fundza Filiphi 3:4-8, 15; Imis. 9:15.

HLOLISISA LOKO LOKUTA KUCALA KUWE

12. Yini Jesu layenta ngemuva nje kwekubhajatiswa?

¹² Nowa, Mosi, Jeremiya, Pawula kanye nalamanye emaKhristu lafana nabo, acitse sikhatsi sawo lesinyenti nemandla enta imisebenti lejabulisa Jehova. Asibonelo lesihle kitsi. Kuliciniso kutsi inceku yaJehova letinikele lehamba embili nguJesu. (1 Phet. 2:21) Ngemuva nje kwekubhajatiswa, Jesu wasebentisa kuphila kwakhe asesemhlabeni kute ashumayele tindzaba letimnandzi futsi advumise Jehova. Kuyacaca kutsi kukhonta Jehova njengeNkhosi kufanele kute kucala kumaKhristu. Kuta kucala yini kuwe kukhonta Jehova? Singakwenta njani lokwengetiwe emsebenti waJehova sibe sinakekela netidzingo tetfu?—Fundza Tihlabelelo 71:15; 145:2.

13, 14. (a) Onkhe emaKhristu latinikele akhutsatwa kutsi acabangele kwentani? (b) Ngukuphi kwenetiseka tinceku taJehova letingakujabulela?

¹³ Sekuphele iminyaka leminyenti inhlangano yaJehova ikhutsata emaKhristu kutsi akucabangele ngemthandazo kuba ngemahlahlandlela. Nobe kunjalo, letinye tinceku taJehova letetsembekile timo tato atitivumeli kutsi tisebente ema-awa langu-70 ngenyanga. Akukafanele tiphatseke kabi ngaloko. (1 Thim. 5:8) Kodvwa kutsiwani ngawe? Angeke yini sewukhone kuba lihlahlandlela?

¹⁴ Cabanga ngenjabulo tinceku taNkulunkulu letibe nayo ngesikhatsi seSikhumbuto kulomnyaka. Ngenyanga yangaMarch, kube nelilungiselelo lelikhetsekile lelivumela kutsi emahlahlandlela lasitako akhetse kutsi atawusebenta ema-awa langu-30 nobe langu-50 ensimini. (Hla. 110:3) Tigidzi tihlanganyele ekubeni ngemahlahlandlela lasitako futsi emabandleni lamanyenti kube nenjabulo lenkhulu. Ungakhona yini kuhlela timo takho kute ube nenjabulo lenjalo kakhudlwana? Ekupheleni kwelilanga ngalinye, umKhristu lotinikele utiva enetisekile nakasho emavi latsi: “Jehova, ngente konkhe lokusemandleni ami emsebentini wakho.”

15. UmKhristu losemusha kufanele abe namiphi imigomo nakasafundza?

¹⁵ Nangabe sewutawucedza esikolweni, usuke usenemphilo lenhle nemitfwalo lemincane lokufanele uyinakekele. Uke wakucabangela yini kuba lihlahlandlela lelivamile? Kuliciniso kutsi bothishela bakho bakholelwa kutsi kutakuzuzisa kakhulu kutfola imfundvo lephakeme nemsebenti lokahle. Nobe kunjalo, litsemba labo likulelive nasemalini, lokutintfo letite likusasa. Ngakulolunye luhlangotsi, nawenta umsebenti waJehova, utawube usisebentise kahle sikhatsi sakho futsi utawube wente intfo letakuletsela likusasa lelihle. Nawenta njalo utawube ulandzela sibonelo saJesu. Sincumo lesinjalo lesihlakaniphile sitakwenta ujabule futsi uvikeleke. Utawukhombisa kutsi utimisele kuphila ngekutinikela kwakho kuJehova.—Mat. 6:19-21; 1 Thim. 6:9-12.

16, 17. Ngumiphi imibuto lesingatibuta yona mayelana nemisebenti yekutiphilisa nangaleminye imisebenti?

¹⁶ Tinceku taNkulunkulu letinyenti tisebenta ema-awa lamanyenti kute tinakekele tidzingo letisisekelo temindeni yato. Nobe kunjalo, labanye bangase basebente ema-awa lamanyenti sibe singekho sidzingo sekwenta njalo. (1 Thim. 6:8) Live lesiphila kulo lente konkhe lokusemandleni kute lisente sikholelwe kutsi angeke siphile ngaphandle kwetintfo letinyenti lelititsengisako netintfo letisemfashinini. Kodvwa emaKhristu eliciniso awafuni live lelibuswa nguSathane liwancumele kutsi yini lokufanele ayente ite kucala. (1 Joh. 2:15-17) Kulabo lasebatsetse umhlalaphansi, bangasisebentisa kahle sikhatsi sabo ngekutsi babe ngemahlahlandlela, bente umsebenti waJehova ute kucala.

¹⁷ Tonkhe tinceku taJehova letitinikele kufanele titibute: Yini lebalulekile ekuphileni kwami? Ngiwenta ute kucala yini umsebenti weMbuso waJehova? Ngiyamlingisa yini Jesu ngekukhombisa kutidzela? Ngiyasilalela yini seluleko saJesu sekumlandzela njalo? Ngingakhona yini kulungisa timo tami kute ngibe nesikhatsi lesinyenti emsebentini wekushumayela ngeMbuso nobe kwenta leminye imsebenti yaJehova? Nanobe timo tami tingangivumeli kutsi ngente lokunyenti nyalo emsebentini waJehova, ngiyachubeka yini ngetama kutfola tindlela tekusebentisa sikhatsi sami emsebentini wakhe?

“KUTSANDZA NEKWENTA”

18, 19. Kufanele sithandazele ini, futsi yini leyenta umthandazo lonjalo ujabulise kuJehova?

¹⁸ Iyajabulisa inkhutsalo leboniswa bantfu baNkulunkulu. Nobe timo tabo tibavumela, labanye bangase babe nemuva wekutsi angeke bakhone kuba ngemahlahlandlela nobe abafaneleki kutsi bangaba ngiwo. (Eks. 4:10; Jer. 1:6) Kutsiwani nangabe utiva njalo? Thandaza kuJehova ucele lusito. Pawula watjela emakholwa labekanye nawo kutsi Jehova ‘usebenta kuwo ngekutsandza nekwenta ngekwentsandvo yakhe lenhle.’ (Fil. 2:13) Nangabe ute sifiso sekwandzisa umsebenti wakho, cela Jehova akuphe leso sifiso nelikhono lekuwenta.—2 Phet. 3:9, 11.

¹⁹ Nowa, Mosi, Jeremiya, Pawula kanye naJesu bonkhe bebangemadvodza latinikele. Basebentisa sikhatsi sabo nemandla bashumayela umlayeto waJehova. Kute labakuvumela kutsi kuphatamise umsebenti wabo. Kusedvute kutsi lelive lelibuswa nguSathane liphele. Ngako-ke sonkhe tsine lesitinikele kuNkulunkulu kufanele sente konkhe lokusemandleni kute siciniseke kutsi siyatilingisa tinceku taNkulunkulu lokukhulunywe ngato emiBhalweni. (Mat. 24:42; 2 Thim. 2:15) Nasenta njalo, sitamjabulisa Jehova futsi sitfole netibusiso takhe letinhle.—Fundza Malakhi 3:10.

[Umbhalo longentansi]

[Sitfombe ekhasini 21]

Bantfu abasinakanga secwayiso saNowa

[Sitfombe ekhasini 24]

Uke wakucabangela ngalokujulile yini kuba lihlahlandlela lelivamile?