Ungavumeli Lutfo Lukuvimbele Ekutfoleni Ludvumo

1, 2. (a) Abaluleke ngani emagama lasetjentiswa etilwimini tekucala lasho ‘ludvumo’? (b) Ngumiphi imibuto lesitawucoca ngayo kulesihloko?

NAWUVA ligama lelitsi “ludvumo,” yini lefika engcondvweni yakho? Ucabanga ngebuhle lobumangalisako bendalo yini? (Hla. 19:1) Ucabanga ngeludvumo lolunikwa bantfu labanjingile, labahlakaniphile nobe labaphumelele etintfweni letitsite yini? EBhayibhelini, emagama lasetjentiswa etilwimini tekucala latsi “ludvumo” anemcondvo wentfo lesindzako. Etikhatsini tasendvulo—ngesikhatsi imali yakhiwa ngetintfo letiligugu—bekutsiwa nangabe loluhlavu lwemali lusindza kusho kutsi ibita kakhulu. Emagama lasetjentiswa kute kuvetwe umcondvo wentfo lesindzako agcine atiwa ngekutsi asho intfo leligugu, lenhle nobe lejabulisako.

² Ngisho nobe kungasijabulisa kubona emandla, sikhundla nobe indlela lomunye umuntfu latiwa ngayo, yini Nkulunkulu layibuka kubantfu? ImiBhalo ikhuluma ngeludvumo Nkulunkulu lalunika bantfu. Nasi sibonelo: Taga 22:4 titsi: “Titfobe, wesabe Simakadze, yena uyakukuvuza ngemcebo, neludvumo, nekuphila.” Umfundzi Jakobe naye watsi: “Titfobeni embikweNkhosi, [Jehova] yona-ke iyawuniphakamisa.” (Jak. 4:10) Nguluphi loludvumo Jehova lalunika bantfu? Yini lengasivimbela ekulutfoleni? Singabasita njani labanye kutsi nabo balutfole loludvumo?

3-5. Nguluphi ludvumo Jehova langasinika lona?

³ Umhlabeli wakhombisa kuciniseka kutsi Jehova abetambamba ngesandla sangesekudla futsi amcondzise ekukhatimuleni sibili. (Fundza Tihlabelelo 73:23, 24.) Jehova ukwenta njani loko? Jehova ucondzisa tinceku takhe letetsembekile kuloludvumo ngetindlela letehlukehlukene. Utibusisa ngekutsi ticondze injongo yakhe. (1 Khor. 2:7) Unika labo labalalela livi lakhe futsi labamhloniphako ludvumo lwekuba nebuhlobo lobusedvute naye.—Jak. 4:8.

⁴ Jehova uphindze anike tinceku takhe umcebo loligugu wemsebenti wekushumayela wemaKhristu. (2 Khor. 4:1, 7) Lomsebenti uniketa ludvumo. Naku Jehova lakutsembisa labo labasebentisa lilungelo labo lekumkhonta kute bamdvumise futsi basite labanye: “Labo labangihloniphako ngiyakubahlonipha.” (1 Sam. 2:30) Bantfu labanjalo bayahlonipheka ngobe bayemukeleka kuJehova, futsi kuvamile kutsi bakhulunyelwe kahle nguletinye tinceku taNkulunkulu.—Taga 11:16; 22:1.

⁵ Kutsiwani-ke ngelikusasa lalabo ‘labetsemba Simakadze, bagcine indlela yakhe’? Betsenjiswa loku: “[Jehova] uyawukuphakamisa udle lifa lemhlaba ubone kushabalaliswa kwalababi.” (Hla. 37:34) Babuke embili ekutfoleni ludvumo loluncono kakhulu lwekuphila lokuphakadze.—Hla. 37:29.

“MINE ANGILWEMUKELI LUDVUMO KUBANTFU”

6, 7. Yini lebeyenta bantfu labanyenti bangafuni kuba nekukholwa kuJesu?

⁶ Yini lengasivimbela ekutfoleni ludvumo Jehova lafuna kusinika lona? Lokunye kungaba kunaka kakhulu umbono webantfu labete buhlobo naNkulunkulu. Cabanga ngaloko umphostoli Johane lakubhala mayelana nalabatsite labebasetikhundleni ngesikhatsi saJesu: “Labanyenti ngisho nakutiphatsimandla bakholwa kuJesu, kodvwa ngenca yekwesaba baFarisi abazange bafakaze ngako, ngobe bebangahle bancunywe esinagogeni. Babetsandza kakhulu kudvunyiswa bantfu kunekudvunyiswa nguNkulunkulu.” (Joh. 12:42, 43) Bekungaba ncono kakhulu kube leto tiphatsimandla atizange tinake kakhulu kutsi baFarisi bebacabangani.

⁷ Ekucaleni kwemsebenti wakhe wekushumayela, Jesu abekuvete ngalokucacile kutsi yini lebeyitawenta bantfu labanyenti bangamemukeli futsi bangamkholwa. (Fundza Johane 5:39-44.) Sive saka-Israyeli besesilindze emakhulu eminyaka kutsi kufike Mesiya. Ngesikhatsi Jesu acala kufundzisa, kungenteka kutsi labanye bantfu bebabonile ngesiphrofetho saDanyela kutsi sikhatsi lebesibekiwe sekufika kwaKhristu besesifikile. Etinyangeni letimbalwa ngembikwaloko, ngesikhatsi Johane uMbhabhatisi ashumayela, bantfu labanyenti bebatsi: “Mhlawumbe kungahle kube nguye loKhristu.” (Luk. 3:15) Ngaleso sikhatsi loMesiya labebasolo bamlindzele abesakanye nabo afundzisa. Kodvwa labo labebawati uMtsetfo, behluleka kumemukela. Kute avete sizatfu saloko, Jesu wababuta: “Ningakholwa kanjani nine nidvumisana nodvwana nje, ningalufuni ludvumo loluvela kuNkulunkulu, lokunguye yedvwa?”

8, 9. Sebentisa umfanekiso wekukhanya, ukhombise kutsi ludvumo loluvela kubantfu lungasenta njani singalunaki ludvumo loluvela kuNkulunkulu.

⁸ Indlela ludvumo lwebantfu lolungasimvimba ngayo kuloludvumo lwaNkulunkulu ingafanekiswa ngekucatsanisa ludvumo nekukhanya. Indzawo yonkhe igcwele kukhatimula lokumangalisako. Usakhumbula ubuka esibhakabhakeni ebusuku nakute emafu, futsi watitfola umangaliswe nguletinkhulungwane tetinkhanyeti? ‘Inkhatimulo yetinkhanyeti’ ikushiya ubambe wangentasi. (1 Khor. 15:40, 41) Nobe kunjalo, siba njani leso sibhakabhaka nangabe usibuka usedolobheni lelinetibani letinyenti temgwaco? Letibani temgwaco tenta kutsi ungakuboni kahle kukhanya lokuvela kuletinkhanyeti. Kungenteka yini kutsi loku kubangelwa kutsi tibani temgwaco, tetinkhundla temidlalo netetindlu tikhanya kakhulu nobe tinhle kunekukhanya kwetinkhanyeti? Cha akusinjalo. Loko kusuke kubangelwa kutsi lokukhanya kwetibani letisedolobheni kusedvutane natsi futsi kungabangela kutsi singakunaki kukhanya kwendalo yaJehova. Kute sikubone kahle kukhanya kwesibhakabhaka ebusuku, kungadzingeka kutsi sivale nobe sisuse lokukhanya kwetibani temgwaco.

⁹ Ngendlela lefananako, nangabe ludvumo loluvela kubantfu lubaluleke kakhulu etinhlitiyweni tetfu, lungasenta singakhombisi kubonga futsi singachubeki sifuna ludvumo Jehova lasinika lona. Bantfu labanyenti bayehluleka kwemukela umlayeto weMbuso ngobe besaba kutsi bangani babo nobe emalunga emndeni batawucabangani ngabo. Kodvwa lesifiso sekutfola ludvumo lwebantfu singatitsintsa yini netinceku taNkulunkulu letitinikele? Asesitsi lijaha lelitsite labelwe kushumayela endzaweni lapho latiwa khona kodvwa lisengakatiwa kutsi linguFakazi waJehova. Litawesaba yini kushumayela? Kutsiwani nangabe lomunye umuntfu bayamhleka kutsi wetama kufinyelela imigomo emsebentini waNkulunkulu? Utawubavumela yini labo labete umbono lomuhle webuhlobo naNkulunkulu kutsi bamentise tincumo letitsite ekuphileni? Nobe asesitsi umKhristu wente sono lesikhulu. Utawusifihla yini ngobe esaba kutsi angeke asemukeleka ebandleni nobe angafuni kudvumata labo labatsandzako? Kuleso simo, nangabe lomKhristu afuna kulungisa buhlobo bakhe naJehova, ‘utawubita babonisi belibandla’ futsi acele lusito lwabo.—Fundza Jakobe 5:14-16.

10. (a) Yini lengenteka nangabe sinaka kakhulu kutsi labanye bacabangani ngatsi? (b) Yini lesingaciniseka ngayo nangabe senta tintfo ngekutfobeka?

¹⁰ Kungenteka siyatfutfuka ekuvutfweni kwebuKhristu kodvwa lotsite lesikholwa naye usinika seluleko. Kusinaka kwakhe lokucotfo kungasisita nangabe singetami kutivikela ngesizatfu sekutsi siyatigcabha, sifuna kwatiwa kahle nobe silingeka kutsi sititsetselele. Nobe asesitsi wenta umsebenti lotsite nemuntfu lokholwa naye. Utawukhatsateka yini ngekutsi ngubani lotawutfola ludvumo ngemibono yakho lemihle nekusebenta kwakho matima? Nangabe utikhandza ukunobe ngusiphi saletimo, ciniseka ngekutsi ‘lotfobekile utfola ludvumo.’—Taga 29:23.

11. Yini lokufanele siyente nangabe sibongwa, futsi yini lebangela loko?

¹¹ Babonisi nalabo ‘labafisa’ umsebenti lonjalo, nabo kufanele bakucaphele kufuna ludvumo lwebantfu. (1 Thim. 3:1; 1 Thes. 2:6) Yini umzalwane lokufanele ayente nangabe abongwa ngekuwenta kahle umsebenti lotsite? Kuliciniso kutsi angeke atentele litje lesikhumbuto, njengobe kwenta iNkhosi Sawula. (1 Sam. 15:12) Nobe kunjalo, utawucaphela yini kutsi kuphumelela kwakhe kwenteke ngemusa waJehova nekutsi nobe nguliphi litsemba lekuphumelela esikhatsini lesitako nalo lidzinga sibusiso saNkulunkulu nelusito lwakhe? (1 Phet. 4:11) Indlela lesenta ngayo nangabe sidvunyiswa ngulabanye iveta kutsi nguluphi ludvumo lesilufunako.—Taga 27:21.

“NITSANDZA KWENTA TINKHANUKO TEYIHLO”

12. Yini leyabangela lamanye emaJuda angamlaleli Jesu?

¹² Lokunye lokungasivimba ekutfoleni ludvumo kuNkulunkulu tifiso tetfu. Tifiso letimbi tingasenta singaliva sanhlobo liciniso. (Fundza Johane 8:43-47.) Jesu watjela lamanye emaJuda kutsi abengawulaleli umlayeto wakhe ngobe ‘atsandza kwenta tinkhanuko teyihlo Develi.’

13, 14. (a) Yini leshiwo bacwaningi ngendlela ingcondvo yetfu lelalela ngayo nangabe kukhuluma bantfu? (b) Yini leyenta sikhetse kutsi sitawulalela bani?

¹³ Loko lesikufisako kutsintsa indlela lesiva ngayo. (2 Phet. 3:5) Jehova wasidala saba nelikhono lelimangalisako lekungayinaki imisindvo lesingayifuni. Ase ubindze kancane unake kutsi mingakhi imisindvo leyehlukehlukene loyivako nyalo. Kungenteka kutsi bowungakayinaki ekucaleni. Ingcondvo yakho beyikusita kutsi unake intfo yinye futsi ubenalo nelikhono lekuva leminye imisindvo. Kodvwa bacwaningi batfole kutsi likhono lekwehlukanisa imisindvo leyehlukehlukene ngesikhatsi sinye liyancipha nangabe kufanele ulalele bantfu bakhuluma. Loku kusho kutsi nangabe uva emavi lamabili ngesikhatsi sinye, kufanele ukhetse kutsi utawulalela liphi. Kukhetsa kwakho kutawuya ngekutsi nguliphi lofuna kulilalela. EmaJuda labefuna kwenta tifiso tababe wawo, longuDeveli, awazange amlalele Jesu.

¹⁴ Sitfola imilayeto levela ‘endlini yekuhlakanipha’ naleyo levela ‘endlini yebulima.’ (Taga 9:1-5, 13-17) Kuba shengatsi kokubili kuhlakanipha nebulima kuyasimemeta, tsine kufanele sikhetse. Sitawemukela siphi simemo? Imphendvulo itawuya ngekutsi sifuna kwenta intsandvo yabani. Timvu taJesu tiyalilalela livi lakhe futsi tiyamlandzela. (Joh. 10:16, 27) Tiyalisekela ‘liciniso.’ (Joh. 18:37) “Atiwati emavi ebafokati.” (Joh. 10:5) Bantfu labatfobeke kanjalo bayalutfola ludvumo.—Taga 3:13, 16; 8:1, 18.

“LOKUNGUKONA KULUDVUMO LWENU”

15. Kuhlupheka kwaPawula bekungaba njani ‘ludvumo’ kulabanye?

¹⁵ Kukhutsatela kwetfu ekwenteni intsandvo yaJehova kutawubasita labanye kutsi batfole ludvumo. Naku Pawula lakubhalela libandla lase-Efesu: “Ngiyanincenga kutsi ningadzinwa kuhlupheka kwami ngenca yenu, lokungukona kuludvumo lwenu.” (Ef. 3:13) Kuhlupheka kwaPawula kwaba njani ‘ludvumo’ kubase-Efesu? Kuchubeka kwaPawula akulungele kushumayela ngisho nobe abelingwa kwakhombisa base-Efesu kutsi emalungelo labebawajabulela njengobe bangemaKhristu abebaluleke kakhulu futsi aligugu. Kube Pawula wehluleka nakalingwa, bekungeke yini kubonakale shengatsi buhlobo babo naJehova, umsebenti wabo nelitsemba labanalo akukabaluleki kangako? Kukhutsatela kwaPawula kwakhombisa kutsi buKhristu bubalulekile nekutsi kufanele utinikele kute ube ngumfundzi.

16. Ngukuphi kulingwa Pawula lahlangabetana nako eListra?

¹⁶ Cabanga ngekutsi inshisekelo nekukhutsatela kwaPawula kwaba namuphi umphumela. Umbhalo weMisebenti 14:19, 20 uyabika: “EmaJuda efika aphuma e-Antiyokhi yasePhisidiya nase-Ikhoniyumi; asasivumisile sicuku, agcoba Pawula ngematje, amhudvulela ngephandle kwelidolobha [laseListra] acabanga kutsi sewufile. Kodvwa ngesikhatsi emakholwa abutsana kuye, wasukuma wabuyela edolobheni. Ngelilanga lelilandzelako yena naBhanabasi bahamba baya eDebe.” Cabanga ngekushiywa lilanga lonkhe ucishe ufa nekuhamba emakhilomitha langu-100 ngelilanga lelilandzelako, uhamba ngetinyawo.

17, 18. (a) Thimothi wakulandzela ngamuphi umcondvo kuhlupheka kwaPawula eListra? (b) Kukhutsatela kwaPawula kwamtsintsa njani Thimothi?

¹⁷ Thimothi abengulomunye yini ‘wemakholwa’ loweta kutewusita Pawula? Kulandzisa lokusencwadzini yeMisebenti akusho, kodvwa kungenteka kutsi abekhona. Cabanga ngaloko Pawula lakubhala encwadzini yakhe yesibili leya kuThimothi: “Wena ungilandzele kunaku: esifundzisweni, nasekutiphatseni, . . . lokwangehlela e-Antiyokhi [kucoshwa kulelodolobha], nase-Ikhoniyumi [betama kumgcoba ngematje], naseListra [kugcotjwa ngematje]; ngacinisela kuko konkhe lokutingelwa, futsi iNkhosi yangikhulula kuko konkhe.”—2 Thim. 3:10, 11; Imis. 13:50; 14:5, 19.

¹⁸ Thimothi ‘watilandzela’ leto tentakalo futsi abekwati kahle kukhutsatela kwaPawula. Loko kwayitsintsa kakhulu ingcondvo yaThimothi. Ngesikhatsi Pawula avakashela eListra, watfola Thimothi angumKhristu losibonelo, “bazalwane baseListra nase-Ikhoniyumi babemncoma.” (Imis. 16:1, 2) Ngekuhamba kwesikhatsi, Thimothi abesafanele kwenta imisebenti leyengetiwe.—Fil. 2:19, 20; 1 Thim. 1:3.

19. Kukhutsatela kwetfu kungabatsintsa njani labanye?

¹⁹ Kukhutsatela kwetfu ekwenteni intsandvo yaNkulunkulu kungaba nemiphumela lefanako kulabanye—ikakhulukati kulabasha, labanyenti babo labatawukhula babe tinceku taNkulunkulu letiligugu kakhulu. Bafundzi labasebasha abagcini nje ngekubona sibonelo setfu nekufundza indlela yekukhuluma nemakhono latsite nabahamba natsi ensimini, kodvwa baphindze bazuze ngekubona indlela lesenta ngayo nasibhekene netimo letimatima ekuphileni. Pawula ‘wacinisela’ kute kutsi bonkhe labetsembekile ‘bemukele insindziso lekuKhristu Jesu baphiwe nebukhosi baphakadze.’—2 Thim. 2:10.

20. Yini lesenta sifune kuchubeka sifuna ludvumo loluvela kuNkulunkulu?

²⁰ Ngako-ke, akukafaneli yini sichubeke ‘sifuna ludvumo loluvela kuNkulunkulu, lokunguye yedvwa’? (Joh. 5:44; 7:18) Kufanele sente njalo! (Fundza Roma 2:6, 7.) Jehova ubanika ‘kuphila lokuphakadze labo labafuna ludvumo.’ Ngetulu kwaloko, ‘nasichubeka senta lokuhle,’ siyabakhutsata labanye kutsi bachubeke babambelele, kute batfole tinzuzo taphakadze. Ngako-ke, ungavumeli lutfo lukuvimbele kutsi utfole ludvumo Nkulunkulu lasinika lona.