Ingakusita Njani Imihlangano YaBoFakazi BaJehova?

Uke wamenywa yini kutsi uye emhlanganweni waBoFakazi BaJehova? Nawungazange sewuye, ungativa wesaba nawuya kwekucala. Kungenteka uyatibuta kutsi: ‘Kwentekani kulemihlangano? Ibaluleke ngani? Kungani kufanele ngiye kuyo?’ Kulesifundvo, utawutfola kutsi kuya kulemihlangano kutakusita njani wena kanye nekutsi kungakusita njani usondzelane naNkulunkulu.

1. Kubaluleke ngani kuhlangana ndzawonye?

Naka kutsi lomunye umbhali weliBhayibheli wakuchaza njani kubaluleka kwekuhlangana ndzawonye, nakatsi: “Ngitamdvumisa Jehova ebandleni lelikhulu.” (Tihlabelelo 26:12) Ngendlela lefanako, BoFakazi BaJehova bayakujabulela kuhlangana ndzawonye. Maviki onkhe, etindzaweni letehlukahlukene emhlabeni wonkhe, bahlangana ndzawonye kute badvumise Nkulunkulu, bahlabele futsi bathantaze. Tikhatsi letimbalwa ngemnyaka, baba nemihlangano lemikhulu kuze bakhonte Nkulunkulu.

2. Yini lotayifundza emihlanganweni yetfu?

Kulemihlangano, sifundziswa liVi laNkulunkulu liBhayibheli, ‘liyachazwa liphindze licaciswe kahle kutsi loko bekufundvwa kusho kutsini.’ (Fundza Nehemiya 8:8.) Ngekuba khona kulemihlangano, utawufundza ngaJehova kanye nangebuntfu bakhe lobumangalisako. Njengobe uchubeka wati tintfo letinyenti letikhombisa kutsi uyakutsandza, utawusondzela kakhulu kuye. Utawuphinde ufundze indlela langakusita ngayo kutsi uphile imphilo lenekuthula.—Isaya 48:17, 18.

3. Kungakusita njani kutihlanganisa nalabanye emihlanganweni yetfu?

Jehova usiyala kutsi “sikhutsatane elutsandvweni nasemisebentini lemihle, singakuyekeli kuhlangana kwetfu ndzawonye.” (KumaHebheru 10:24, 25) Emihlanganweni yetfu, utawutfola bantfu labatsandzana mbamba futsi labafuna kwati lokunyenti ngaNkulunkulu njengawe. Utawubeva basho tintfo letikhutsatako labatitfole eBhayibhelini. (Fundza KubaseRoma 1:11, 12.) Utawuphindze utfole litfuba lekwatana nebantfu labashadile nalabangakashadi labajabulako ngisho nobe banetinkinga. Leti nguletinye tizatfu letenta Jehova afune sihlangane njalo!

CHUBEKA UFUNISISA

4. Imihlangano yaBoFakazi BaJehova

Ngelikhulu lekucala, emaKhristu bekahlangana njalo kute akhonte Jehova. (KubaseRoma 16:3-5) Fundza KubaseKholose 3:16, bese nicoca ngalombuto lolandzelako:

• EmaKhristu angelikhulu lekucala bekamkhonta njani Jehova?

I-VIDEO: Yini Leyentekako EHholweni LeMbuso? (2:12)

• Ngukuphi kufana lokukhona, kuloko lokwenteka eHholweni leMbuso naloko lokufundze KubaseKholose 3:16?

• Kule-video nobe kulesitfombe, kukhona yini lokutsandzile ngemihlangano yetfu?

Fundza 2 KubaseKhorinte 9:7, bese nicoca ngalombuto:

• Kungani emihlanganweni yaBoFakazi BaJehova kute lipulete lemnikelo?

Ukanye naloyo lokufundzela liBhayibheli, bukani loko lokutawube kucocwa ngako emihlanganweni yaleliviki.

• Nguyiphi incenye yalomhlangano locabanga kutsi itakujabulisa nobe itakusita?

Bewati yini?

Ku-website letsi jw.org, ungatfola kutsi imihlangano ibanjelwa kuphi futsi nini emhlabeni wonkhe.

1. Imihlangano yetfu ifaka ekhatsi tinkhulumo, imiboniso kanye nema-video. Lemihlangano icaliswa iphindze iphetfwe ngemthantazo

2. Kuletinye tincenye talemihlangano, labakhona bavumelekile kutsi baphendvule

3. Wonkhe muntfu wemukelekile, kungaba yimindeni, labangakashadi, lesebakhulile kanye nebantfwana

4. Kungenwa mahhala kulemihlangano yetfu, futsi alihanjiswa lipulete lemnikelo

5. Kudzingeka wente imetamo kuze ube khona emihlanganweni

Cabanga ngesibonelo saJesu nemndeni wakubo. Minyaka yonkhe nabaya ethempelini, bekudzingeka bahambe etintsabeni emakhilomitha langu-100 kusuka eNazaretha kuya eJerusalema. Fundza Lukha 2:39-42, bese nicoca ngalemibuto:

• Ucabanga kutsi loluhambo loluya eJerusalema beludzinga imetamo yini?

• Kungani kufanele wente imetamo kuze uye emihlanganweni?

• Ucabanga kutsi kukahle yini kuya kulemihlangano ngisho nobe kumatima? Usho ngani?

• Kungani kufanele siye njalo emihlanganweni?

LOKO LESICOCE NGAKO

Kuba khona kulemihlangano kutakusita kutsi ufundze lokunyenti ngaJehova, ucinise buhlobo bakho naye, uphindze umkhonte ukanye nalabanye.

Yini Loyifundzile?

• Kungani Jehova asikhutsata kutsi sihlangane ndzawonye?

• Yini lotayifundza emihlanganweni yaBoFakazi BaJehova?

• Ucabanga kutsi kukhona yini lokunye lemihlangano lengakusita kuko?

LOKUNYE LONGAKUHLOLA

Kutsiwani nangabe uyesaba kuya emihlanganweni? Buka indlela indvodza lebeyesaba kuya emihlanganweni, leyagcine seyikutsandza ngayo kuya kuyo.

Ngeke Siyikhohlwe Indlela Labasemukela Ngayo (4:16)

Buka indlela lelijaha lebelijabulela ngayo kuya emihlanganweni naloko lelakwenta kute lichubeke liya kuyo.

Bengiyitsandza Kakhulu Imihlangano! (4:33)

Fundza indlela labanye labativa ngayo ngekuya emihlanganweni.

“Kungani Kufanele Ngiye Emihlanganweni LebaseHholweni LeMbuso?” (Sihloko lesiku-internet)

Tfola indlela indvodza lebeyililunga lelicembu lelineludlame leyashintja ngayo kuphila kwayo ngemuva kwekuya emihlanganweni yaBoFakazi BaJehova.

“Ngangihamba Nesibhamu Sami Nomaphi Lapho Ngangiya Khona” (Sicongosekulindza saJuly 1, 2014, lesitfolakala ngesiZulu)

5. Kusukela nga-1914, tintfo tashintja emhlabeni

Dlala le-VIDEO.

I-VIDEO: Kusukela Nga-1914, Tintfo Tashintja Emhlabeni (1:10)

Jesu waphrofetha kutsi timo betitawuba njani emhlabeni nasekayiNkhosi. Fundza Lukha 21:9-11, bese nicoca ngalombuto:

• Ngutiphi timo letishiwo ngulombhalo lotibonile nobe love ngato?

Umphostoli Pawula wachaza kutsi bantfu bebatawuba njani ngemalanga ekugcina ekubusa kwebantfu. Fundza 2 KuThimothi 3:1-5, bese nicoca ngalombuto:

• Uke wababona yini bantfu labatiphatsa ngalendlela lamuhla?

6. Kubusa kweMbuso waNkulunkulu kufanele kusikhutsate

Fundza Matewu 24:3, 14, bese nicoca ngalemibuto:

• Ngumuphi umsebenti lobalulekile lokhombisa kutsi uMbuso waNkulunkulu sewuyabusa?

• Ungahlanganyela njani kulomsebenti?

UMbuso waNkulunkulu sewuyabusa, futsi lilanga lotawubusa ngalo ngalokuphelele emhlabeni selisondzele. Fundza KumaHebheru 10:24, 25, bese nicoca ngalombuto:

• Yini ngamunye wetfu lokufanele ayente ‘njengobe sibona lilanga lisondzela’?