3. BoFakazi BaJehova balulingisa njani lutsandvo lwaJesu?

Jesu bekabatsandza kakhulu bafundzi bakhe kangangekutsi bebafana nemndeni kuye. (Fundza Makho 3:35.) Ngendlela lefanako, BoFakazi BaJehova bangumndeni lonebunye emhlabeni wonkhe. Kungako sibitana ngabomnaketfu nabodzadze wetfu. (KuFilemoni 1, 2) Siphindze silalele umyalo lotsi: “Nitsandze bonkhe bazalwane.” (1 Phetro 2:17) BoFakazi BaJehova bakhombisa lolutsandvo ngetindlela letinyenti, njengekusita bazalwane babo labasemhlabeni wonkhe nabadzinga lusito.

6. Kubhajatiswa kusho kuba yincenye yemndeni waJehova

Nasibhajatiswa, siba yincenye yemndeni lonebunye, losemhlabeni wonkhe. Ngisho nobe sichamuka kuliphi live, sikholelwa etintfweni letifanako futsi siphila ngetimiso letifanako tekutiphatsa letiseBhayibhelini. Fundza Tihlabelelo 25:14 na-1 Phetro 2:17, bese nicoca ngalombuto:

• Kubhajatiswa kubutsintsa njani buhlobo umuntfu lanabo naJehova kanye nebuhlobo lanabo naletinye tikhonti taKhe?

Nasinalabanye lesikholwa nabo sitiva njengeNkhosi Davide leyatsi: “Maye kuhle futsi kumnandzi kutsi bazalwane bahlale ndzawonye ngebunye!” (Tihlabelelo 133:1) Bunye betfu abusiyo intfo lemane itentakalele. Ngamunye wetfu kufanele ente lokutsite kute abulondvolote.

1. Yini lenakekako ngebantfu baNkulunkulu?

Nawuya emhlanganweni welibandla kulelinye live, ungahle utfole kutsi awulwati lolulwimi lolukhulunywako, kodvwa utawutiva wemukelekile ngetindlela letinyenti. Kungani? Kungobe emhlabeni wonkhe sitadisha liBhayibheli sisebentisa tincwadzi letifanako. Siphindze sisebente kamatima kuze sikhombisane kutsi siyatsandzana. Ngisho nome sihlala kuphi, sonkhe ‘sibita libito laJehova, simkhonte sihlangene ngebunye.’—Zefaniya 3:9, umbhalo longentasi.

2. Yini lesingayenta kuze kube nebunye?

“Tsandzanani kakhulu ngalokusuka enhlitiyweni.” (1 Phetro 1:22) Ungasisebentisa njani leseluleko? Kunekutsi unake emaphutsa alabanye, buka buntfu lobuhle labanabo. Kunekutsi ucitse sikhatsi lesinyenti nebantfu labafana nawe nobe labatsandza tintfo lotitsandzako, yetama kwati bazalwane nabodzadze labehlukile kuwe nalabatsandza tintfo letehlukile kunaleto lotitsandzako. Singaphindze sisebente kamatima kute sicedze lubandlululo lokungenteka sinalo.—Fundza 1 Phetro 2:17.a

3. Utawenta njani nawucabene nemKhristu lokholwa naye?

Sinebunye kodvwa siyawenta emaphutsa. Ngaletinye tikhatsi siyabadvumata labanye nobe sibavise buhlungu. LiVi laNkulunkulu lisitjela kutsi ‘sichubeke . . . sitsetselelana,  . . njengobe nje Jehova asitsetselele ngekukhululeka, natsi sente kanjalo.’ (Fundza KubaseKholose 3:13.) Sike samvisa buhlungu tikhatsi letinyenti Jehova, kodvwa usicolele. Ngako natsi ulindzele kutsi sicolele bazalwane betfu. Nangabe ubona kutsi uvise lotsite buhlungu, tsatsa sinyatselo sekulungisa lenkinga.—Fundza Matewu 5:23, 24.b

CHUBEKA UFUNISISA

4. Ncoba lubandlululo

Sifuna kutsandza bonkhe bazalwane betfu. Nanobe kunjalo, kungaba matima kwemukela umuntfu longafani natsi. Yini lengasisita? Fundza Imisebenti 10:34, 35, bese nicoca ngalemibuto:

• Jehova wemukela lonkhe luhlobo lwebantfu kutsi lube boFakazi bakhe. Loko kufanele kuyitsintse njani indlela lobatsatsa ngayo bantfu labangafani nawe?

• Nguluphi luhlobo lwelubandlululo loluvamile endzaweni yangakini lofuna kulubalekela?

Fundza 2 KubaseKhorinte 6:11-13, bese nicoca ngalombuto:

• Ucabanga kutsi yini longayenta kuze ubatsandze kakhulu bazalwane nabodzadze labangafani nawe?

5. Tsetselela ngekukhululeka futsi wakhe kuthula

Jehova usitsetselela ngekukhululeka ngisho nobe yena angadzingi kutsetselelwa. Fundza Tihlabelelo 86:5, bese nicoca ngalemibuto:

• Yinkhulu kangakanani intsetselelo yaJehova?

• Yini lekwenta ubonge ngekutsi Jehova uyatsetselela?

• Ngutiphi timo letingenta kube matima kugcina kuthula nalabanye?

Ungamlingisa njani Jehova futsi uhlale unebunye nebazalwane nabodzadze? Fundza Taga 19:11, bese nicoca ngalombuto:

• Nangabe lotsite akucansula nobe akuphatsa kabi, yini longayenta kuze wente lesimo sibe ncono?

Ngaletinye tikhatsi sibavisa buhlungu labanye. Nangabe loko kwenteka, yini lokufanele siyente? Dlala le-VIDEO, bese nicoca ngalombuto lolandzelako.

I-VIDEO: Kwakha Kuthula Kuletsa Tibusiso (6:01)

• Kule-video, yini leyentiwe ngulodzadze kuze akhe kuthula?

6. Buka lokuhle kubazalwane nabodzadze

Nasisondzelana nebazalwane nabodzadze, sitokwati buntfu babo lobuhle kanye nebutsakatsaka babo. Singabunaka njani kakhulu lobuntfu babo lobuhle? Dlala le-VIDEO, bese nicoca ngalombuto lolandzelako.

I-VIDEO: Bani Muhle Kakhulu! (5:10)

• Yini lengakusita ubuke buntfu lobuhle kubazalwane nabodzadze?

Jehova unaka kakhulu buntfu betfu lobuhle. Fundza 2 Tikhronike 16:9a, bese nicoca ngalombuto:

• Kwati kutsi Jehova unaka buntfu bakho lobuhle, kukwenta utive kanjani?

LOKO LESICOCE NGAKO

Ungasita ekugcineni bunye ebandleni ngekutsi utsetselele futsi ukhombise bonkhe bazalwane nabodzadze kutsi uyabatsandza.

Yini Loyifundzile?

• Ungaluncoba njani lubandlululo?

• Yini lotayenta nangabe ungevani nemKhristu lokanye naye?

• Yini lekwenta ufune kulingisa sibonelo saJehova sekucolela labanye?

LOKUNYE LONGAKUHLOLA

Buka kutsi umfanekiso Jesu lawusho ungasisita njani sibalekele kwehlulela labanye.

Khipha Lugodvo (6:56)

Sikhona yini sidzingo sekucolisa nangabe siva shengatsi kute lokubi lesikwentile?

“Ukuxolisa—Isihluthulelo Sokudala Ukuthula” (Sicongosekulindza, saNovember 1, 2002 lesitfolakala ngesiZulu)

Buka kutsi emadvodza lamabili lakhulela endzaweni lenelubandlululo abutfola njani bunye sibili.

Johny Na-Gideon: Bake Baba Titsa, Nyalo Sebazalwane (6:42)

Tfola kutsi ungakucatulula njani kungevani nalomunye ngaphambi kwekutsi kuphatamise kuthula kwelibandla.

“Kulungisa Kungevani Ngemoya Welutsandvo” (Sicongosekulindza, saMay 2016)