3. Yini lesingayenta kuze sikhombise kutsi siyabonga?

Asesitsi ucwila emantini bese umuntfu lotsite uyakusindzisa. Bewungavele ukhohlwe yini ngaloko lomuntfu lakwentele kona? Nobe bewungafuna tindlela tekukhombisa kutsi uyabonga ngaloko lakwentele kona?

Sikweleta Jehova ngekuphila kwetfu. Fundza 1 Johane 4:8-10 bese nicoca ngalemibuto:

• Yini leyenta umhlatjelo waJesu ube sipho lesikhetsekile?

• Utiva njani ngaloko Jehova naJesu labakwentela kona?

Singakhombisa njani kutsi siyabonga ngaloko Jehova naJesu labasentela kona? Fundza 2 KubaseKhorinte 5:15 na-1 Johane 4:11; 5:3. Ngemuva kwekufundza umbhalo ngamunye, cocani ngalombuto:

• Ngekusho kwalombhalo, yini lesingayenta kuze sikhombise kutsi siyabonga?

1. Yini lekhutsata umuntfu kutsi atinikele?

Indlela lesimtsandza ngayo Jehova isenta kutsi sitinikele kuye. (1 Johane 4:10, 19) LiBhayibheli liyasikhutsata litsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho, nangawo onkhe emandla akho.” (Makho 12:30) Sikhombisa kutsi siyamtsandza Nkulunkulu hhayi ngemavi kuphela kodvwa nangetento tetfu. Njengobe nebantfu labatsandzanako bashada, natsi indlela lesimtsandza ngayo Jehova isenta sitinikele kuye futsi sibhajatiswe.