1-3. (a) Yini leyenta Joshuwa abe sibonelo lesihle semuntfu lowenta sincumo lesikahle ekuphileni? (b) Yini lokufanele siyikhumbule nakudzingeka sente tincumo?

LIGAMA lelitsi ‘khetsa’ linemandla kakhulu. Umuntfu lonenkhululeko yekutikhetsela uyaticondzisa ngekutsi atikhetsele tindlela latatisebentisa ekuphileni kwakhe. Ase sifanekise: Ase ucabange ngendvodza lehamba endleleni, njengobe ihamba ikhandza kutsi lendlela lehamba ngayo yehlukana ekhatsi. Itawukhetsa kuhamba ngayiphi indlela? Nangabe lendvodza yati kutsi ilibangise endzaweni letsite, kuletindlela kunaleyo letawusheshe iyifikise lapho iya khona kantsi lena lenye ingase itsatse sikhatsi lesidze.

² LiBhayibheli linetibonelo letinyenti tebantfu lababa sesimeni lesifananako. Nasi sibonelo: Khayini kwadzingeka akhetse kutsi utawuvumela kutfukutsela kumlawule yini nobe yena akulawule. (Gen. 4:6, 7) NaJoshuwa kwadzingeka akhetse emkhatsini wekukhonta Nkulunkulu weliciniso nobe bonkulunkulu bemanga. (Josh. 24:15) Umgomo waJoshuwa bewukuhlala asondzele kuJehova; ngako wakhetsa indlela leyamcondzisa kulomgomo wakhe. Khayini bekete umgomo lonjalo, futsi wakhetsa indlela leyamkhweshisa kuJehova.

³ Ngaletinye tikhatsi, natsi kungase kudzingeke kutsi sente tincumo letibalulekile kute sihlale endleleni lefanele. Nangabe loko kwenteka kuwe, cabanga lapho uya khona nobe ngemgomo wakho—kudvumisa Jehova ngako konkhe lokwentako futsi ubalekele kwenta nobe yini lengakukhweshisa kuye. (Fundza Hebheru 3:12.) Kulesihloko nakulesi lesilandzelako, sitawuhlola tintfo letisikhombisa ekuphileni lokungakafaneli sitivumele tisikhweshise kuJehova.

UMSEBENTI NEMIGOMO

4. Yini leyenta kubaluleke kuba nemsebenti wekutiphilisa?

⁴ EmaKhristu kufanele atinakekele aphindze anakekele nemindeni yawo. LiBhayibheli litsi nangabe umuntfu angafuni kunakekela umndeni wakhe, mubi kakhulu kunemuntfu longakholwa. (2 Thes. 3:10; 1 Thim. 5:8) Kuyacaca-ke kutsi umsebenti wekutiphilisa uyincenye yekuphila lebalulekile, kodvwa nawungakanaki umsebenti nemigomo yakho kungakukhweshisa kuJehova. Kungenteka njani loko?

5. Ngukuphi lokufanele ucabangisise ngako ngembikwekutsi wemukele umsebenti lotsite?

⁵ Ase sitsi ufuna umsebenti. Nangabe uhlala eveni lokumatima kutfola umsebenti kulo, ungase ulingeke kutsi utsatse nome ngumuphi umsebenti lowutfolako. Kutsiwani-ke nangabe lomsebenti unetintfo letiphikisana netimiso teliBhayibheli? Utawenta njani nangabe ungakuvumeli kutsi wente imisebenti yebuKhristu nobe ube nesikhatsi nemndeni wakho? Kufanele yini uwemukele lomsebenti ngobe ucabanga kutsi kuncono kuba nalowo msebenti lonetinkinga kunekutsi ungasebenti? Khumbula kutsi kukhetsa indlela lengakalungi kungakukhweshisa kuJehova. (Heb. 2:1) Nangabe ufuna umsebenti nobe uhlolisisa umsebenti lonawo nyalo, ungatenta njani tincumo letihlakaniphile?

6, 7. (a) Ngumiphi imigomo umuntfu langaba nayo ngemsebenti wekutiphilisa? (b) Ngumuphi umgomo longakusondzeta kuJehova, futsi kungenteka njani loko?

⁶ Njengobe kuvetiwe ekucaleni, cabangisisa ngalapho uya khona. Ungase utibute: ‘Yini lomsebenti lotangentela yona?’ Nangabe utsatsa umsebenti njengendlela yekutiphilisa—yekutinakekela wena nemndeni wakho emsebentini waJehova—Jehova utayibusisa imetamo yakho. (Mat. 6:33) Jehova akadideki nawulahlekelwa ngumsebenti nobe uba netinkinga tetemnotfo. (Isa. 59:1) ‘Uyakwati kubakhulula ekulingweni labo labesaba Yena.’—2 Phet. 2:9.

⁷ Kutsiwani-ke nangabe umgomo wakho ukuba nemcebo? Mhlawumbe ungaphumelela kuloko. Kodvwa ngisho nobe kunjalo, khumbula kutsi ‘kuphumelela’ kungaba nemiphumela longeke ukhone kuyetfwala. (Fundza 1 Thimothi 6:9, 10.) Kunaka kakhulu umcebo nemigomo yakho, kungakukhweshisa kuJehova.

8, 9. Yini batali lokufanele bacabangisise ngayo ngemsebenti wabo wekutiphilisa? Chaza.

⁸ Nangabe ungumtali, cabanga ngekutsi sibonelo sakho sibatsintsa njani bantfwana bakho. Yini labayibona ibaluleke kakhulu kuwe—ngumsebenti wakho nobe buhlobo bakho naJehova? Nangabe babona kutsi tintfo letita kucala kuwe kufuna kwatiwa bantfu, kuhlonishwa ngesizatfu setintfo lonato nekuba nemcebo, bangase basilingise yini lesibonelo sakho lesiyingoti? Bangase bangakuhloniphi yini njengemtali wabo? Lomunye umKhristu losemusha utsi: “Nangikhumbula kahle, babe wami abematasatasa kakhulu ngemsebenti wakhe. Ekucaleni, bekubonakala shengatsi usebenta matima ngobe afuna umndeni wakitsi ube nalokuncono kakhulu. Abengafuni seswele lutfo. Kodvwa eminyakeni lembalwa leyendlulile, kukhona lokwashintja. Wagcine sekasebenta njalo futsi asitsengela tintfo letidulile lesingatidzingi. Ngaleso sizatfu, bantfu besebati kutsi umndeni wakitsi unemali lenyenti kunekutsi basati ngekutsi singumndeni lokhutsata bantfu kutsi babe nebuhlobo lobuhle naNkulunkulu. Kuloko babe langinika kona, ngingakhetsa kungisekela kwakhe kutsi ngibe nebuhlobo lobuhle naNkulunkulu hhayi imali langinika yona.”

⁹ Batali, ningatikhweshisi kuJehova ngekutsi ninake kakhulu imisebenti yenu. Ngesibonelo senu, khombisani bantfwana benu kutsi niyakholelwa kutsi umcebo loncono kakhulu lesingaba nawo kuba nebuhlobo lobuhle naNkulunkulu, hhayi tintfo lesinato.—Mat. 5:3.

10. Yini umuntfu losemusha langacabanga ngayo nakafuna kutibekela umgomo lotsite?

¹⁰ Nangabe usemusha futsi ufuna kutibekela umgomo lotsite, ungayikhetsa njani indlela lefanele? Njengobe sesicoce ngako loku, kudzingeka wati kutsi uyaphi. Kuceceshwa kanye nemsebenti lofuna kuwutsatsa kungakuvumela yini kutsi ufune uMbuso kucala nobe kutakukhweshisa kuJehova? (2 Thim. 4:10) Umgomo wakho kufuna kulingisa labo injabulo yabo lelawulwa kuba nemali lenyenti ebhange yini? Nobe utawukhetsa kuciniseka njengaDavide, lowabhala watsi: “Bengingumntfwana, manje sengimdzala, angizange sengimbone lolungile alahliwe, ngisho nebantfwabakhe abahambi bacela kudla.” (Hla. 37:25) Khumbula kutsi lenye indlela ingakukhweshisa kuJehova, kantsi lenye ingakuholela ekuphileni lokuncono kakhulu. (Fundza Taga 10:22; Malakhi 3:10.) Nguyiphi indlela wena lotayikhetsa?a

KUTIJABULISA

11. LiBhayibheli litsini ngekutijabulisa, kodvwa yini lokufanele siyikhumbule?

¹¹ LiBhayibheli alisho kutsi kubi kutijabulisa nobe litsi kutijabulisa kudlala ngesikhatsi. Pawula wabhalela Thimothi watsi: “Kwetayeta umtimba ngekwelula imisipha kunenzuzo kwesikhashana nje.” (1 Thim. 4:8) LiBhayibheli lize litsi ‘kunesikhatsi sekuhleka’ ‘nesikhatsi sekugidza,’ futsi lisikhutsata kutsi sibe nesikhatsi lesenele sekuphumula. (Shu. 3:4; 4:6) Nobe kunjalo, nawungakanaki, kutijabulisa kungakukhweshisa kuJehova. Njani? Ingoti lenkhulu iseticini letimbili—luhlobo lwekutijabulisa lolukhetsako kanye nesikhatsi losicitsa kuko.

12. Ngutiphi tintfo lokufanele ucabange ngato nawukhetsa tekutijabulisa?

¹² Kwekucala, kufanele sicabangisise ngeluhlobo lwekutijabulisa lesilukhetsako. Ciniseka ngekutsi ungatitfola tindlela tekutijabulisa letikahle. Kuliciniso kutsi tindlela tekutijabulisa letikhona lamuhla tikhutsata tintfo Nkulunkulu langatitsandzi, letifaka ekhatsi budlova, kusebentisa imimoya nekutiphatsa kabi ngekwemacasi. Ngako-ke, kudzingeka siluhlolisise luhlobo lwekutijabulisa lesilukhetsako. Loko kukutsintsa njani wena? Kukukhutsata kutsi ube silwi, utigcabhe ngaloko lonako nobe ube nelubandlululo ngebantfu bakulamanye emave? (Taga 3:31) Kukucedzela imali yini? Kungabakhuba yini labanye bantfu? (Rom. 14:21) Kutijabulisa lokukhetsako kukwenta utihlanganise nebantfu labanjani? (Taga 13:20) Kukukhutsata kutsi wente tintfo letimbi yini?—Jak. 1:14, 15.

13, 14. Yini lokudzingeka ucabange ngayo mayelana nesikhatsi losicitsa utijabulisa?

¹³ Cabanga nangesikhatsi losicitsa utijabulisa. Tibute: ‘Ngicitsa sikhatsi lesinyenti yini ngitijabulisa ngize ngingabi naso nesikhatsi sekwenta imisebenti yaNkulunkulu?’ Nangabe ukhetsa kucitsa sikhatsi lesinyenti utijabulisa, utawutfola kutsi awujabuli ngendlela lobowungatsandza kujabula ngayo. Liciniso likutsi labo labangacitsi sikhatsi lesinyenti batijabulisa, bajabula kakhulu. Yini lebangela loko? Kungobe bayati kutsi bacale benta “lokuncono” kakhulu, ngako bete umuva wekutisola nasebatijabulisa.—Fundza Filiphi 1:10, 11.

¹⁴ Nanobe kucitsa sikhatsi lesinyenti sitijabulisa kungabonakala kukuhle, kodvwa kutsatsa leyo ndlela kungase kusikhweshise kuJehova. Kim, dzadze loneminyaka lengu-20 budzala wahlangabetana nesimo lesinjalo. Utsi: “Bengiba khona kuyo yonkhe imicimbi. Njalo ngetimphelasontfo—ngaLesihlanu, uMgcibelo nangeliSontfo, bekuba nemicimbi lemikhulu. Kodvwa nyalo ngiyabona kutsi kunetintfo letinyenti letibalulekile lokufanele ngitente. Sibonelo saloku kutsi njengobe ngilihlahlandlela, ngivuka ekuseni ngensimbi yesitfupha kute ngiye ensimini, ngako angeke ngikhone kuba semicimbini kute kushaye insimbi yesibili ekuseni. Ngiyati kutsi akusiyo yonkhe imicimbi lemibi, kodvwa ingakuphatamisa kakhulu. Kufanele ibekwe endzaweni yayo, njengobe kunjalo ngaletinye tintfo.”

15. Batali bangabasita njani bantfwana babo kutsi babe netikhatsi letimnandzi tekutijabulisa?

¹⁵ Batali banemtfwalo wekutinakekela kanye newekunakekela tidzingo tebantfwana babo, kutifundzisa bona kanye nebantfwana babo ngaNkulunkulu nekunaka imivelo yabo. Loko kufaka ekhatsi nekutijabulisa. Nangabe ungumtali, ungatsatsi tonkhe tindlela tekutijabulisa njengaletimbi. Kodvwa-ke, kufanele uticaphele tindlela tekutijabulisa letimbi. (1 Khor. 5:6) Nawenta imetamo yekukhetsa kahle tekutijabulisa, ungatitfola tindlela letitawusebenta emndenini wenu.b Ngaleyo ndlela, wena nebantfwana bakho nitawukhetsa indlela letawunisondzeta kuJehova.

BUHLOBO BEMNDENI

16, 17. Ngusiphi simo lesibuhlungu lesehlele batali labanyenti, futsi sati njani kutsi Jehova uyabucondza lobo buhlungu?

¹⁶ Kusondzelana lokusemkhatsini wemtali nemntfwana, kunemandla kakhulu futsi naJehova usebentisa lobo buhlobo kute afananise lutsandvo lanalo ngebantfu bakhe. (Isa. 49:15) Ngako-ke, kuyintfo levamile kudzabuka lapho lilunga lemndeni lesilitsandzako lishiya Jehova. Naku lokwashiwo ngulomunye dzadze, indvodzakati yakhe leyayekeliswa kuba nguFakazi: “Ngaba lusizi kakhulu, futsi ngatibuta nekutsi, ‘Yini lemente washiya Jehova?’ Ngaba nemuva welicala futsi bengitisola mine.”

¹⁷ Jehova uyabucondza buhlungu lobuvako. Naye “watisola” ngesikhatsi lilunga lemndeni wakhe wasemhlabeni lihlubuka, nalapho bantfu labebaphila ngembikwaZamcolo nabo bahlubuka. (Gen. 6:5, 6) Kungase kube matima kulabo labangakase balahlekelwe ngalendlela kubona kutsi kubuhlungu kangakanani kuba kuleso simo. Nobe kunjalo, angeke kube kuhlakanipha kuvumela kuyekeliswa kwelilunga lemndeni kuba nguFakazi kutsi kusikhweshise kuJehova. Ngako-ke, singabubeketelela njani buhlungu lobubangelwa kutsi lilunga lemndeni lishiye Jehova?

18. Yini lokufanele yente batali bangatisoli bona nangabe umntfwana ashiya Jehova?

¹⁸ Ungatisoli ngaloko lokwentekile. Jehova unike bantfu inkhululeko yekutikhetsela, futsi lilunga ngalinye lemndeni lelitinikele laphindze labhajatiswa, kufanele ‘litetfwalele umtfwalo walo.’ (Gal. 6:5) Jehova ubuka lesoni—hhayi wena—njengaleso lesiyolandzisa ngaloko lesikwentile. (Hez. 18:20) Ngako-ke, ungasoli labanye bantfu. Tihloniphe tindlela taJehova tekuniketa siyalo. Melana naDeveli, hhayi nebelusi labavikele libandla.—1 Phet. 5:8, 9.

19, 20. (a) Yini lengentiwa batali bebantfwana labayekelisiwe kuba boFakazi kute babeketelele buhlungu lababuvako? (b) Nguliphi litsemba batali labanjalo labanalo?

¹⁹ Ngakulokunye, nangabe ukhetsa kulahla Jehova, usuke utikhweshisa kuye. Ecinisweni, kuto tonkhe tintfo lelilunga lemndeni wakho lelifuna kukubona utenta, kuba sedvute naJehova—lokufaka ekhatsi kuba nebuhlobo lobuhle nemndeni wakho. Ngako-ke, kute ubeketelele lesimo, bani nebuhlobo lobuhle naNkulunkulu. Ungatehlukanisi nebazalwane kanye nabodzadze labangemaKhristu letsembekile. (Taga 18:1) Thantaza kuJehova umtjele ngendlela lotiva ngayo. (Hla. 62:7, 8) Ungenti taba kute utihlanganise nelilunga lemndeni leliyekelisiwe kuba nguFakazi, mhlawumbe ulitfumelele imilayeto. (1 Khor. 5:11) Bani matasatasa ngemisebenti yaNkulunkulu. (1 Khor. 15:58) Lodzadze lesikhulume ngaye ngenhla, utsi: “Ngiyati kutsi kufanele ngibe matasatasa emsebentini waJehova futsi ngigcine buhlobo bami naye bucinile kute ngikhone kusita indvodzakati yami nayibuya kuJehova.”

²⁰ LiBhayibheli litsi lutsandvo “lwetsemba tintfo tonkhe.” (1 Khor. 13:4, 7) Akusikubi kuba nelitsemba lekutsi umuntfu lomtsandzako utawubuya akhonte Nkulunkulu. Njalo ngemnyaka, bantfu labanyenti labebayekelisiwe kuba boFakazi bayaphendvuka babuye enhlanganweni yaJehova. Jehova akabatfukutseleli ngekuphendvuka kwabo. Ngalokwehlukile kuloko, ‘ukulungele kutsetselela.’—Hla. 86:5.

YENTA TINCUMO LETIHLAKANIPHILE

21, 22. Yini lotimisele kuyenta ngenkhululeko yakho yekutikhetsela?

²¹ Jehova unike bantfu bakhe inkhululeko yekutikhetsela. (Fundza Dutheronomi 30:19, 20.) Kodvwa njengobe banalenkhululeko, banemitfwalo yekwenta tincumo. UmKhristu ngamunye kufanele atibute: ‘Mine ngikuyiphi indlela? Ngiwuvumele yini umsebenti, kutijabulisa nobe buhlobo bami nemndeni wami kutsi kungikhweshise kuJehova?’

²² Lutsandvo Jehova lanalo ngebantfu bakhe alupheli. Singatikhweshisa kuJehova nangabe sikhetsa kulandzela indlela lengakalungi. (Rom. 8:38, 39) Ngako-ke, akukafaneli loko kwenteke! Kwente umgomo wakho kutsi ungavumeli nobe yini ikukhweshise kuJehova. Sihloko lesilandzelako sitawucoca ngetindlela letine lesingakukhombisa ngato loko.

1, 2. (a) Ayini “emachinga” aSathane? (b) Yini letawusisita kutsi sisondzele kuNkulunkulu?

NKULUNKULU JEHOVA wadala bantfu banesidzingo sekufuna kusondzela kuye. Kodvwa-ke Sathane ufuna sicabange njengaye—kutsi asimdzingi Jehova. Lawa ngemanga Sathane labesolo awakhutsata kusukela adukisa Eva ngawo ensimini yase-Edeni. (Gen. 3:4-6) Kute kube ngulamuhla, bantfu labanyenti bayachubeka benta leliphutsa.

² Lokujabulisako kutsi tsine asifuni kuwela kulesilingo saSathane. “Siyawati emachinga aSathane.” (2 Khor. 2:11) Sathane wetama kusehlukanisa naJehova ngekusenta sitsatse tincumo letimbi. Njengobe sihloko lesendlulile sivetile, singakwati kwenta tincumo letinhle mayelana nemsebenti, tekutijabulisa nasetindzabeni letimayelana nemndeni. Lesihloko sitawukhombisa kutsi kubeka bucwepheshe, imphilo, imali nekutigcabha endzaweni yako, kungasisita njani kutsi ‘sisondzele kuNkulunkulu.’—Jak. 4:8.

BUCWEPHESHE

3. Niketa sibonelo sekutsi bucwepheshe bungasetjentiswa njani kahle nobe kabi.

³ Tintfo letisembili tebucwepheshe tandzile emhlabeni wonkhe. Natisetjentiswe kahle, tingaba ngemathulusi lalusito. Kutisebentisa kabi letintfo tebucwepheshe, kungasehlukanisa naBabe wetfu wasezulwini. Cabanga ngabongcondvomshini. Lomagazini lowufundzako ubhalwe waphindze washicilelwa kusetjentiswa bongcondvomshini. Ngcondvomshini ungaba lithulusi lelihle lekucwaninga, lekuchumana nalabanye nelekutijabulisa. Nobe kunjalo, singaba tigcili tebucwepheshe babongcondvomshini. Ngekuhlakanipha, betekukhangisa bacinisekisa bantfu kutsi kufanele babe nato tintfo letinsha letisandza kuphuma. Lelinye lijaha belinesifiso lesikhulu sekuba nangcondvomshini loyi-tablet, ladzimate latsengisa inso yalo ngansense kute likwati kuwutsenga. Cabanga nje kutsi latihlekisela kabuhlungu kangakanani kube kute sidzingo!

4. Lomunye umKhristu wasilungisa njani simo labekuso sekusebentisa kabi ngcondvomshini?

⁴ Kubuhlungu kakhulu kuvumela kusebentisa kabi bucwepheshe kusicedzele buhlobo betfu naJehova. Jon, longumKhristu loseminyakeni yabo-20,a utsi: “Ngiyati kutsi liBhayibheli litsi kufanele ‘sibambisise ematfuba,’ kodvwa ngiyehluleka kwenta njalo kubongcondvomshini.” Jon uvame kutikhandza asahleti sikhatsi lesidze ebusuku avule i-Internet. Utsi: “Nangitiva sengidziniwe, kuba matima kakhulu kutsi ngiyekele kucoca nalabanye nobe kubukela ema-video—futsi lamanye awo awawafaneli emaKhristu.” Kute Jon ayekele lomkhuba wakhe lomubi, wente ngcondvomshini wakhe kutsi uticishe nasekufike sikhatsi sekutsi alale.—Fundza Efesu 5:15, 16.

5, 6. (a) Yini batali lokufanele bayentele bantfwana babo? (b) Batali bangenta njani kute bantfwana babo batihlanganise nebantfu labakahle?

⁵ Batali, akudzingeki nilandzelele konkhe lokwentiwa bantfwana benu, kodvwa kufanele niyinake indlela labasebentisa ngayo ngcondvomshini. Ningabashiyi bodvwa bavule i-Internet babukela kutiphatsa lokubi, imidlalo lenebudlova, kusebentisa imimoya futsi batihlanganisa nebangani lababi, kute nje nibagcine bamatasa futsi banganiphatamisi. Nanenta njalo bangase batsi, ‘BoMake naBabe abanendzaba naloko, kusho kutsi kulungile.’ Kungumsebenti wenu njengebatali kuvikela bantfwana benu—lokufaka ekhatsi labo labaseminyakeni yekutfomba—kunobe yini lengabehlukanisa naJehova. Ngisho netilwane tiyabavikela bantfwana bato engotini. Ase ucabange nje kutsi libhele lelisikati lingenta njani nalingabona kutsi kunalotsite lofuna kutsatsa litfole lalo.—Catsanisa naHoseya 13:8.

⁶ Sitani bantfwana benu kutsi bahlele imicimbi leyakhako letawuba nemaKhristu lasibonelo lasemasha nalakhulile. Khumbulani kutsi bantfwana benu badzinga kucitsa sikhatsi nani. Ngako-ke, banini nesikhatsi sekuhleka nabo, sekudlala, sekusebenta ‘nesekusondzela kuNkulunkulu’ nikanye nabo.b

IMPHILO

7. Yini lesenta sifune kuhlala siphilile?

⁷ “Unjani?” Lawa ngemavi ekubingelela laveta liciniso lelibuhlungu. Ngesizatfu sekutsi batali betfu bekucala bavumela Sathane wabehlukanisa naJehova, sonkhe siyagula. Kugula kufeza injongo yaSathane, ngobe nasigula kuba matima kutsi sikhonte Jehova. Nasifa, sehluleka ngalokuphelele kumkhonta. (Hla. 115:17) Ngako-ke, sifuna kwenta konkhe lokusemandleni etfu kute sitigcine siphilile.c Kufanele futsi sikhatsateke ngemphilo yebazalwane betfu nangenhlalakahle yabo.

8, 9. (a) Singakubalekela njani kukhatsateka kakhulu ngemphilo yetfu? (b) Ngutiphi tinzuzo tekujabula?

⁸ Nobe kunjalo, kubalulekile kutsi singakhatsateki kakhulu ngemphilo yetfu. Labanye bashisekela kakhulu kukhangisa ngetintfo tekwehlisa umtimba, imitsi yemphilo, nobe tintfo tekutilungisa, kwendlula indlela labashumayela ngayo tindzaba letimnandzi teMbuso waNkulunkulu. Bangase bacabange kutsi basita labanye. Ngisho nobe kunjalo, akusikuhle kukhangisa ngemitsi yetemphilo neyekutilungisa nobe ngemibono yetfu, ekucaleni nobe ekupheleni kwemihlangano eHholweni leMbuso nasemihlanganweni lemincane nalemikhulu. Yini leyenta kungabi kuhle kwenta njalo?

⁹ Kungobe nasihlangene sisuke sicoca ngetintfo letitsintsa buhlobo betfu naNkulunkulu, sitfutfukise injabulo yetfu, lesitselo semoya waNkulunkulu longcwele. (Gal. 5:22) Etimeni letinjalo, kunika bantfu teluleko temphilo nobe imitsi, uceliwe nobe ungakacelwa, kungaphatamisa injongo yetfu yekuhlangana futsi kwente labanye baphelelwe yinjabulo. (Rom. 14:17) Indlela umuntfu latelapha ngayo kufanele atikhetsele yena. Ngetulu kwaloko, kute umuntfu longelapha konkhe kugula. Ngisho nabodokotela labatiwako bayaguga, bagule ekugcineni bafe. Kukhatsateka kakhulu ngemphilo yetfu angeke kwandzise emalanga etfu ekuphila. (Luk. 12:25) Ngakulokunye, “kuhlala ujabulile kungumutsi lophilisako.”—Taga 17:22.

10. (a) Ngutiphi tici tebuntfu letibukeka titinhle kuJehova? (b) Singayijabulela njani imphilo lencono?

¹⁰ Ngendlela lefanako, kuhle kukhatsateka ngendlela lesibukeka ngayo. Kodvwa-ke, akukadzingeki kutsi setame kamatima kususa timphawu tekuguga. Leto timphawu tingakhombisa kutsi uvutsiwe, uyahlonipheka futsi tivete nebuhle bakho bangekhatsi. Nasi sibonelo: LiBhayibheli litsi: “Budzala bungumvuzo wemphilo yekulunga; timvu tingumchele walabalungile.” (Taga 16:31) Jehova usibuka ngaleyo ndlela futsi natsi kufanele setame kutibuka ngendlela lasibuka ngayo. (Fundza 1 Phetro 3:3, 4.) Ngako-ke, kukuhlakanipha yini kutifaka engotini ngalokungakafaneli ngekutsi sihlindvwe nobe sisebentise imitsi letsite kute sishintje indlela lesibukeka ngayo? ‘Injabulo levela kuJehova’ ingumtfombo webuhle lobuvela ngekhatsi kumuntfu, ngisho nobe angakanani ngeminyaka nobe akusiphi simo semphilo. (Neh. 8:10) Kuseveni lelisha kuphela lapho sitawuphila saka futsi sibuyele sibe basha. (Jobe 33:25; Isa. 33:24) Njengobe singakefiki leso sikhatsi, kuba nekuhlakanipha kanye nekukholwa, kutasisita sihlale sisondzelene naJehova njengobe setama kujabulela kuphila kwetfu kwanyalo.—1 Thim. 4:8.

IMALI

11. Imali ingaba njani sitsiyo?

¹¹ Imali ayisiso sono futsi akusikubi kuvula libhizinisi ngendlela lefanele. (Shu. 7:12; Luk. 19:12, 13) Nobe kunjalo, “kutsandza imali” kungasehlukanisa naJehova. (1 Thim. 6:9, 10) “Tinhlupheko macondzana nalemphilo” nekukhatsateka ngekutfola tintfo lesitidzingako, kungacedza buhlobo betfu naNkulunkulu. “Nelutsandvo lwebunjinga,” lokukucabanga lokuliphutsa kutsi injabulo lengapheli nekulondzeka kutfolakala ngekuba nemali, nako kungabucedza buhlobo betfu naNkulunkulu. (Mat. 13:22) Jesu wakwenta kwacaca kutsi “kute umuntfu” longakhonta Nkulunkulu nemcebo.—Mat. 6:24.

12. Ngutiphi titsiyo tetemnotfo letivamile lamuhla, futsi singatibalekela njani?

¹² Kuba nembono loliphutsa ngemali kungasenta sitsatse tincumo letimbi. (Taga 28:20) Tetsembiso tekutfola imali melula tente bantfu labanyenti batsenga emathikithi e-lotto nobe baba nemabhizinisi latabentela imali melula, baze ngisho bangenise nemalunga elibandla kute nawo atfole imali. Labanye bayengwe ngekutsi nababolekisa ngemali yabo itawubuya seyinentalo. Ungavumeli bugovu bukwente uyengeke. Bani nekwahlulela lokuhle. Nangabe ubona kutsi loko lowetsenjiswa kona akusilo liciniso, kungenteka kusuke kunjalo.

13. Umbono waJehova ngemali wehluke njani kulowo welive?

¹³ Nasenta “umbuso waNkulunkulu kanye nekulunga kwakhe” kute kucala, Jehova uyayibusisa imetamo yetfu yekulinganisela nasifuna loko lesikudzingako. (Mat. 6:33; Ef. 4:28) Akafuni silale nakuchubeka imihlangano ngesizatfu sekutsi sisebenta kakhulu nobe sikhatsateke ngemali nasiseHholweni leMbuso. Nobe kunjalo, bantfu labanyenti lesiphila nabo emhlabeni bakholelwa kutsi nabatimisela ngekufuna kuba nemali lenyenti bangaba nelikusasa lelihle futsi ngekuhamba kwesikhatsi bangakhatsateki ngalutfo ekuphileni. Bavame kucindzetela bantfwana babo kutsi nabo batibekele imigomo letabenta babe nemali. Jesu waveta kutsi kucabanga lokunjalo kuliphutsa. (Fundza Lukha 12:15-21.) Loku kungase kusikhumbute Gehazi labecabanga kutsi angaba nemcebo ngesikhatsi lesifanako abe nebuhlobo lobuhle naJehova.—2 Khos. 5:20-27.

14, 15. Yini leyenta kube liphutsa kwetsembela emcebeni walelive kute sitfole kulondzeka? Niketa sibonelo.

¹⁴ Kubikwa kutsi letinye tinyoni letibitwa ngekutsi tingculungculu tamita emantini tafa ngobe tingafuni kuyekela imfishi lesindzako futsi tifune kuyetfwala. Intfo lefanana nalena ingenteka yini kumKhristu? Alex, longulomdzala welibandla utsi: “Ngiyatsandza konga, nangabe ngibona kutsi ngitsele insipho lenyenti yekugeza, ngiphindze ngiyibuyisele lenye ebhodleleni.” Nobe kunjalo, Alex wangenela libhizinisi lekutsenga nekutsengisa emasheya, acabanga kutsi utawusheshe awuyekela umsebenti wakhe bese uba lihlahlandlela. Wagcine sekanake kakhulu kufundza ngetindlela letehlukehlukene tekutsenga nekutsengisa emasheya kanye nemibiko yetimakethe. Wasebentisa imali labetigcinele yona waboleka lenye kulabanye batsengisi, watsenga emasheya betemnotfo labebacabanga kutsi atamletsela imali lenyenti. Esikhundleni saloko, aphelelwa sisindvo sawo. Alex uyalandzisa: “Bengitimisele kutsi ngiphindze ngiyitfole imali yami, futsi ngatitjela kutsi kufanele ngibeketele kute lamasheya ami angingenisele imali.”

¹⁵ Kwaphela tinyanga, Alex acabanga ngalesimo lakuso. Wakutfola kumatima kucabanga ngebuhlobo bakhe naNkulunkulu futsi abengakhoni nekulala. Emasheya akhe awazange andze. Walahlekelwa yimali labetigcinele yona kwadzingeka nekutsi atsengise indlu yakhe. Alex utsi: “Ngawuvisa buhlungu lobukhulu umndeni wami.” Kodvwa wafundza sifundvo lesibalulekile kuloko, ngobe uchubeka atsi: “Nyalo ngiyati kutsi nobe ngubani lowetsembela kulelive laSathane utawudvumateka kabuhlungu.” (Taga 11:28) Kuliciniso kutsi kwetsembela emalini lesitigcinele yona, ekubeni nemali lenyenti nobe ekusebentiseni emakhono latsite latasenta sibe nemali kulelive lelibi, kusho kutsi setsembele ‘kunkulunkulu walomhlaba,’ Sathane. (2 Khor. 4:4; 1 Thim. 6:17) Kusukela lapho, Alex wente kuphila kwakhe kwaba melula ‘ngenca yeliVangeli.’ Angakutjela kutsi kwenta njalo kwente kuphila kwakhe nekwemndeni wakhe kwajabulisa futsi kwabasondzeta kuJehova.—Fundza Makho 10:29, 30.

KUTIGCABHA

16. Kutigcabha lokuhle kwehluke njani kunekutigcabha lokubi?

¹⁶ Kutigcabha ngetintfo letifanele, kungaba kuhle. Sibonelo saloku kutsi kufanele sitigcabhe ngekuba boFakazi BaJehova. (Jer. 9:24) Kutihlonipha ngendlela lefanele kungasisita sente tincumo letinhle futsi singatibukeli phansi. Kantsi kucabanga kutsi imibono yetfu nobe sikhundla setfu sibaluleke kakhulu, kungasehlukanisa naJehova.—Hla. 138:6; Rom. 12:3.

17, 18. (a) Shano tibonelo letiseBhayibhelini tebantfu labebatfobekile netalabo labebatigcabha. (b) Lomunye umzalwane wakubalekela njani kutsi kutigcabha kumehlukanise naJehova?

¹⁷ LiBhayibheli linetibonelo tebantfu labatigcabhako nalabatfobekile. Ngekutfobeka iNkhosi Davide yetsembela kuJehova kute ayicondzise, futsi yabusiswa. (Hla. 131:1-3) Jehova wafundzisa iNkhosi Nebukhadnezari kanye naBhelshasari kutfobeka ngesizatfu sekutsi bebatigcabha. (Dan. 4:30-37; 5:22-30) Nalamuhla, kunetimo letivelako letivivinya kutfobeka kwetfu. Ryan, loyinceku lesebentako leneminyaka lengu-32 budzala, watfutsela kulelinye libandla. Utsi: “Bengilindzele kutsi bangibeke ngibe ngulomdzala, kodvwa kwaphela umnyaka loku kungenteki.” Ryan abetawutfukutsela yini nobe eve buhlungu acabange kutsi labadzala belibandla abafuni kumbeka abe ngulomdzala? Abetawuyekela yini kuya emihlanganweni yelibandla, avumele kutigcabha kumehlukanise naJehova nebantfu baKhe? Wena bowutawenta njani?

¹⁸ Ryan uyakhumbula: “Ngafundza tonkhe tincwadzi lebetikhuluma ngekwephuta kwekufezeka kwematsemba.” (Taga 13:12) “Ngabona kutsi kudzingeka ngifundze kubeketela nekutfobeka. Bekufanele ngivumele Jehova angiceceshe.” Ryan wayekela kutinaka yena, wase usita labanye ebandleni nasensimini. Ngekushesha abesachuba tifundvo teliBhayibheli letinyenti letitfutfukako. Utsi: “Ngamangala kakhulu ngesikhatsi ngibekwa kutsi ngibe ngulomdzala ngemuva kwemnyaka netinyanga letimbalwa, futsi ngaleso sikhatsi bengingakakhatsateki ngako, ngobe besengijabulela umsebenti wekushumayela.”—Fundza Tihlabelelo 37:3, 4.

SONDZELA KUJEHOVA!

19, 20. (a) Singaciniseka njani kutsi tintfo lesitentako atisikhweshisi kuJehova? (b) Ngutiphi tibonelo talabo labahlala basondzele kuJehova lesingatilingisa?

¹⁹ Tonkhe tintfo lesicoce ngato kulesihloko nakulesi lesendlulile tinencenye lebalulekile ekuphileni kwetfu. Siyatigcabha ngekuba tinceku taJehova. Umndeni lojabulako nekuba nemphilo lenhle kusemkhatsini wetipho taJehova letinkhulu. Siyati kutsi umsebenti wekutiphilisa nemali kungasisita sinakekele tidzingo tetfu. Siyati nekutsi kutijabulisa kungenta imphilo ibe mnandzi futsi netebucwepheshe tingaba lusito. Kodvwa kusebentisa letintfo ngesikhatsi lesingakafaneli, nekutisebentisa kakhulu nobe ngendlela lengasenta singasakunaki kukhonta Nkulunkulu, kungasikhweshisa kuJehova.

²⁰ Kuliciniso kutsi Sathane angatsandza kubona loko kwenteka. Nobe kunjalo, ungakwati kuvimbela inhlekelele lenjalo kutsi ingakuveleli wena nemndeni wakho. (Taga 22:3) Sondzela kuJehova futsi uchubeke usedvute naye. Sinetibonelo letinyenti letiseBhayibhelini letingasisita kutsi sente njalo. Bo-Enoki naNowa ‘bahamba naNkulunkulu.’ (Gen. 5:22; 6:9) Mosi “wacinisela kwaba shangatsi uyambona longabonwa.” (Heb. 11:27) Jesu abehlale asekelwa nguNkulunkulu ngobe abenta loko lokujabulisa Babe wakhe wasezulwini. (Joh. 8:29) Tilingise tibonelo letifanana naleti. “Tfokotani njalo. Thandazani ningayekeli. Bongani kuko konkhe.” (1 Thes. 5:16-18) Ungavumeli lutfo lukukhweshise kuJehova!