Bekunengcondvo yini kutsi Davide alindzele Nkulunkulu kutsi amnake? Nkulunkulu unendzaba yini nawe? Bantfu labanyenti bakutfola kumatima kukholelwa kutsi Nkulunkulu lonemandla unendzaba nabo. Kungani?

Lesinye sizatfu kutsi Nkulunkulu uneluhlobo lwekuphila loluphakeme kakhulu kunebantfu. Njengobe asesikhundleni lesiphakeme, ubona tive “tifanana nelitfonsi embiteni, titsatfwa njengelutfuli esikalweni.” (Isaya 40:15) Lomunye umbhali logceka inkholo waze wephetsa ngekutsi “kukutiphakamisa lokukhulu kukholelwa kutsi kunaNkulunkulu lokunakako futsi lonendzaba netintfo lotentako.”

Ngakulokunye, labanye bantfu beva shengatsi kutiphatsa kwabo kubenta bangakufaneli kunakwa nguNkulunkulu. Nasi sibonelo: Lenye indvodza lesemkhatsini ngeminyaka, lebitwa ngekutsi nguJim itsi: “Bengihlale ngithantazela kuthula nekutibamba, kodvwa ngekushesha intfukutselo yami beyiphindze ibuye. Ekugcineni, ngephetsa ngekutsi bengimubi kakhulu futsi Nkulunkulu abengakhoni kungisita.”

Nkulunkulu ukhashane kakhulu nebantfu kangangekutsi akakhoni kubanaka yini? Utiva njani vele ngetidalwa takhe letinesono? Ngaphandle kwekutsi Nkulunkulu atembule kubantfu, kute umuntfu longamkhulumela kahle, futsi aphendvule leyo mibuto. Nobe kunjalo, liBhayibheli, lelingumlayeto waNkulunkulu lophefumulelwe, lisicinisekisa ngekutsi akasuye Nkulunkulu lokhashane, longenandzaba nebantfu. LiBhayibheli litsi: ‘Ecinisweni akekho khashane kuloyo naloyo kitsi.’ (Imisebenti 17:27) Kuletihloko letine letilandzelako, sitawucoca ngaloko Nkulunkulu lasitjela kona ngekuba nendzaba nebantfu kanye nekutsi ukukhombise njani loko kubantfu labafana nawe.

LOKUBANGELA LABANYE BANGABATE: Ngekusho kwelucwaningo lwamuva, ticheme temaplanethi kanye netinkhanyeti tingaba nemaplanethi latigidzigidzi letingu-100. Nababuka bukhulu bendalo yonkhe, bantfu labanyenti babuta kutsi: ‘UMdali lophakeme angakunakelani loko lokwentiwa bantfu labaphansi labakuplanethi lencane kangaka?’

LOKO LOKUFUNDZISWA LIVI LANKULUNKULU: Nkulunkulu akazange agcine nje ngekusinika liBhayibheli, ngemuva kwaloko wabese akasasinaki. Kunaloko, Jehova usicinisekisa ngekutsi atsi: ‘Ngitakweluleka, liso lami lingesuki kuwe.’​—Tihlabelelo 32:8.

Cabanga ngemfati longumGibhithe, Hagari labephila ngelikhulu lesi-20 B.C.E. Hagari abengamhloniphi Sarayi, umkankhosi yakhe, ngako Sarayi wamphatsa kabi, futsi Hagari wabaleka waya ehlane. Njengobe Hagari abente liphutsa, Nkulunkulu wabese akasamnaki yini? LiBhayibheli libika kutsi: “Ingilosi yaSimakadze yakhandza Hagari.” Leyo ngilosi yamcinisekisa, yatsi: “Simakadze ukuvile kuhlupheka kwakho.” Hagari wase utsi kuJehova: “UnguNkulunkulu longibonako.”​—Genesisi 16:4-13.

‘Nkulunkulu lobonako’ uyakunaka nawe. Nasi sibonelo: Make lonelutsandvo ubanaka kakhulu bantfwana bakhe labasebancane, ngobe nangabe umntfwana asesemncane ukudzinga kakhulu kunakwa ngumtali wakhe. Ngendlela lefanako, natsi Nkulunkulu usinaka kakhulu nasicindzetelekile futsi sisengotini. Jehova utsi: “Ngihlala etulu endzaweni lengcwele, kodvwa nakuye lodzabukile nalotfobekile emoyeni, kutewuvuselela umoya walabatfobekile nekuvuselela tinhlitiyo talabephukile emoyeni.”​—Isaya 57:15.

Nobe kunjalo, ungase utibute: ‘Nkulunkulu unginaka njani? Ungehlulela ngendlela lengibukeka ngayo yini, nobe ubona ngale kwaloko futsi acondze kutsi ngingumuntfu lonjani?’

LOKUBANGELA LABANYE BANGABATE: Bantfu labanyenti babona shengatsi Nkulunkulu ubuka bantfu njengalabatoni, labangcolile nalabangakufaneli kunakwa nguye. Kendra abecindzetelekile, ngako watisola ngobe abengakhoni kukwenta kahle konkhe loko Nkulunkulu lakufunako. Ngaleso sizatfu utsi: “Ngayekela kuthantaza.”

LOKO LOKUFUNDZISWA LIVI LANKULUNKULU: Jehova ubuka ngale kwemaphutsa akho futsi uyakucondza loko longiko. LiBhayibheli litsi: “Ngobe uyakwati kubunjwa kwetfu, uyakhumbula kutsi silutfuli nje.” Ngetulu kwaloko “akasivuzi njengekwemacala etfu,” kodvwa usitsetselela ngemusa nasiphendvuka.​—Tihlabelelo 103:10, 14.

Cabanga ngaDavide, inkhosi yaka-Israyeli lokukhulunywe ngayo encenyeni yekucala yaletihloko letiluchungechunge. Nakathantaza kuNkulunkulu, Davide watsi: “Wangibona ngiselihlwili. Onkhe emalanga ami abhalwa encwadzini yakho . . . Ngihlolisise, Nkulunkulu, wati inhlitiyo yami.” (Tihlabelelo 139:16, 23) Davide abeciniseka kutsi nanobe ona, futsi ngaletinye tikhatsi enta tono letimatima, Jehova abecondza kutsi inhlitiyo yakhe iphendvukile.

Jehova ukucondza kahle kwendlula indlela nobe ngumuphi umuntfu lakucondza ngayo. LiBhayibheli litsi: “Umuntfu ubuka lingaphandle lemuntfu, kodvwa Simakadze ubuka inhlitiyo.” (1 Samuweli 16:7) Nkulunkulu uyati kutsi kungani wenta ngendlela lowenta ngayo​—kutsi lufuto, indlela lowakhula ngayo, indzawo lohlala kuyo, kanye nebuntfu bakho kukwenta njani ube nguloluhlobo lwemuntfu longilo. Nanobe unemaphutsa, uyabona kutsi ufuna kuba ngumuntfu lonjani futsi loko kuligugu kuye.

Nkulunkulu ulusebentisa njani lwati lwakhe lolujulile lwekutsi ungumuntfu lonjani kuze akudvudvute?

LOKUBANGELA LABANYE BANGABATE: Ngisho nalapho bakudzinga khona kakhulu kudvudvutwa, labanye bantfu baba nemuva wekutsi akukalungi kucela Nkulunkulu kutsi abasite babeketelele tinkinga tabo. Lomunye make lokutsiwa nguRaquel utsi: “Nangibuka bantfu labanyenti labakhona emhlabeni kanye netinkinga labanato, tinkinga tami ngivele ngitibone titincane kakhulu kangangekutsi ngibese ngiyangabata kucela lusito kuNkulunkulu.”

LOKO LOKUFUNDZISWA LIVI LANKULUNKULU: Kunesinyatselo lesikhulu Nkulunkulu lasavele asitsetse kuze asite futsi advudvute bantfu. Bonkhe bantfu emhlabeni lamuhla banesono labasitfola ngelufuto, lesibangela kutsi bangakhoni kukwenta ngelizinga leliphelele loko Nkulunkulu lakufunako. Kodvwa-ke Nkulunkulu wasitsandza “watfumela iNdvodzana yakhe [Jesu Khristu] kutsi ibe ngumhlatjelo wekuhlawulela tono tetfu.” (1 Johane 4:10) Ngekufa kwaJesu lokwaba ngumhlatjelo, Nkulunkulu wenta kutsi sikhone kutsetselelwa tono tetfu, sibe nanembeza lohlantekile, futsi sibe nelitsemba lekuphila phakadze emhlabeni lomusha lonekuthula.a Kodvwa-ke lowo mhlatjelo uzuzisa bantfu babonkhe yini, nobe ukhombisa kutsi Nkulunkulu unendzaba nawe uwedvwa?

Cabanga ngemphostoli Pawula. Watsintseka kakhulu ngemhlatjelo waJesu, waze watsi: “Ecinisweni kuphila lengikuphila enyameni ngikuphila ngekukholwa eNdvodzaneni yaNkulunkulu, leyangitsandza futsi yatinikela ngenca yami.” (Galathiya 2:20) Kuliciniso kutsi Jesu wafa ngaphambi kwekutsi Pawula abe ngumKhristu. Nobe kunjalo, watsatsa lowo mhlatjelo njengesipho sakhe lesivela kuNkulunkulu.

Kufa kwaJesu lokwaba ngumhlatjelo kusipho sakho nawe lesivela kuNkulunkulu. Leso sipho sifakazela kutsi uligugu kuNkulunkulu. Singakunika “indvudvuto yaphakadze nelitsemba lelihle” futsi ‘sikucinise ngayo yonkhe imisebenti nemavi lamahle.’​—2 Thesalonika 2:16, 17.

Jesu wanikela ngekuphila kwakhe kwaba ngumhlatjelo eminyakeni lengaba ngu-2 000 leyendlulile. Ngubuphi bufakazi lobukhona lamuhla bekutsi Nkulunkulu uyafuna kuba nebuhlobo nawe?

LOKUBANGELA LABANYE BANGABATE: Bantfu labanyenti labakholelwa kuNkulunkulu abativa basondzele kuye. Lomunye make wase-Ireland lobitwa ngekutsi nguChristina, lobekaya esontfweni njalo ngeliviki, utsi: “Nkulunkulu bengimtsatsa ngekutsi nguye lowadala tonkhe tintfo. Kodvwa bengingamati. Angizange ngisho nakanye ngitive ngisondzelene naye.”

LOKO LOKUFUNDZISWA LIVI LANKULUNKULU: Nasitiva silahliwe, Jehova akayekeli kusisita. Nayi indlela Jesu lafanisa ngayo indlela Nkulunkulu lasinakekela ngayo: “Nangabe indvodza letsite inetimvu letilikhulu bese yinye yato iyalahleka, ngeke yini itishiye etintsabeni leti letingemashumi layimfica nemfica, ihambe iyewufuna lena lelahlekile?” Sifundzani kuloku? “Ngendlela lefanako, Babe losezulwini akafisi kutsi kubhubhe ngisho namunye kulaba labanjengebantfwana.”​—Matewu 18:12-14.

Ngamunye “kulaba labanjengebantfwana” uligugu kuNkulunkulu. Nkulunkulu ‘umfuna njani loyo lolahlekile’? Ngekusho kwembhalo locashunwe ekucaleni, Jehova udvonsela bantfu kuye.

Naka kutsi Nkulunkulu wasitsatsa njani sinyatselo kucala sekudvonsela bantfu labacotfo kuye. Ngelikhulu lekucala C.E., Nkulunkulu watfumela Filiphu, umfundzi longumKhristu kutsi asondzele enkalishini yendvuna yesigodlo saseTopiya futsi acoce nayo ngenchazelo yesiphrofetho seliBhayibheli lebeyisifundza. (Imisebenti 8:26-39) Ngekuhamba kwesikhatsi, Nkulunkulu wacondzisa umphostoli Phetro kutsi avakashele likhaya laKhoneliyuse, indvuna yelibutfo laseRoma, lebekasolo athantaza futsi etama kukhonta Nkulunkulu. (Imisebenti 10:1-48) Nkulunkulu waphindze wacondzisa umphostoli Pawula kanye nalabo labekanye nabo kutsi baye emfuleni lowawungephandle kwelidolobha laseFiliphi. Nabefika lapho, batfola ‘sikhonti saNkulunkulu,’ lobekutsiwa nguLidiya, futsi “Jehova wavula inhlitiyo yakhe kute inake.”​—Imisebenti 16:9-15.

Endzabeni ngayinye, Jehova wacinisekisa kutsi labo lebebamfuna bayalitfola litfuba lekumati. Bobani lamuhla labaya kubantfu emakhaya abo nasetindzaweni tawonkhe wonkhe kuze bacoce nabo ngaloko liBhayibheli lelikushoko ngaNkulunkulu? Bantfu labanyenti bangaphendvula ngekutsi “BoFakazi BaJehova.” Tibute: ‘Kungenteka yini kutsi Nkulunkulu usebentisa bona kuze angisite ngibe nebuhlobo naye?’ Sikukhutsata kutsi uthantaze kuNkulunkulu kuze akusite wemukele imetamo layentako yekukudvonsela kuye.a