Bantfu labanyenti batsi bayakholelwa kuNkulunkulu. Nawubabuta kutsi ungubani Nkululunkulu, utfola timphendvulo letehlukahlukene. Labanye batsi Nkulunkulu ungumehluleli lonelunya lofuna kujezisa bantfu ngemaphutsa labawentile. Kantsi labanye batsi unguNkulunkulu lohlala anelutsandvo nalotsetselelako ngisho nobe ngabe yini loyentile. Nome kunjalo, labanye bakholelwa kutsi Nkulunkulu ukhashane kakhulu futsi akanandzaba natsi. Ngenca yalemibono leyehlukahlukene, bantfu labanyenti bangase bacabange kutsi angeke kwenteke kutsi bamati Nkulunkulu.

Kubalulekile yini vele kwati Nkulunkulu? Yebo, kubalulekile. Kwati Nkulunkulu kancono kungenta kutsi imphilo yakho ibe nenjongo. (Imisebenti 17:26-28) Nangabe uchubeka usondzela kuNkulunkulu, naye utawuchubeka akutsandza kakhulu futsi akusita. (Jakobe 4:8) Nangabe sewumati kahle Nkulunkulu, ungaba setfubeni lekutfola kuphila lokuphakadze.​—Johane 17:3.

Ungamati njani Nkulunkulu? Ase ucabange ngemuntfu lomati kahle, mhlawumbe umngani wakho losondzelene naye kakhulu. Bacala njani lobungani benu? Kungenteka kutsi wacala ngekwati ligama lakhe, buntfu bakhe, tintfo latitsandzako nalangatitsandzi, netintfo latentile nalabehlela kutenta, kanye nalokunye lokunyenti. Nguloko lokwakwenta wasondzela kuye, wafundza ngaye.

Ngendlela lefanako, singamati Nkulunkulu ngekutsi sicabangisise ngalemibuto lelandzelako:

• NGUBANI LIBITO LANKULUNKULU?

• UNGUMUNTFU LONJANI?

• YINI NKULUNKULU LAYENTILE?

• YINI NKULUNKULU LATOYENTA?

• KUNGAKUSITA NGANI KUFUNDZA NGANKULUNKULU?

Lomagazini ulungiselelwe kutsi unikete timphendvulo letiseBhayibhelini talemibuto. Letihloko titokusita kutsi ungagcini-nje ngekwati kutsi Nkulunkulu ungubani, kodvwa titawuphindze tikufundzise kutsi ngutiphi tibusiso longatitfola nawuba nebuhlobo lobuhle naye.

Nawubona umuntfu kwekucala, uvame kumbuta kutsi: “Ungubani ligama lakho?” Nakungatsiwa ubuta Nkulunkulu loyombuto, angaphendvula atsini?

“NginguJehova. Lelo libito lami.”​—Isaya 42:8.

Uyacala yini kuliva leligama? Kungenteka uyacala ngoba bahumushi beliBhayibheli labanyenti abakavami kulisebentisa nome abalisebentisi sanhlobo. Bavame kufaka sicu sakhe lesitsi “NKHOSI” esikhundleni salo. Nome kunjalo, ligama laNkulunkulu livela tikhatsi letingaba ngetulu kwa-7 000 emibhalweni yekucala yeliBhayibheli. Leligama lakhiwa bongwaca labane besiHebheru, lokungu-YHWH nome JHVH, futsi sekuphele sikhatsi lesidze latiwa ngekutsi “nguJehova” ngesiNgisi.

Ligama laNkulunkulu liyavela emibhalweni yesiHebheru futsi liyatfolakala nasemahumushweni lamanyenti

LIBALULEKE NGANI LIGAMA LANKULUNKULU

Leligama libalulekile kuNkulunkulu lucobo lwakhe. Kute lowetsa Nkulunkulu leligama, kodvwa watetsa yena. Jehova wamemetela watsi: “Leli libito lami kuze kube phakadze futsi ngitawukhunjulwa ngalo kuto tonkhe titukulwane.” (Eksodusi 3:15) EBhayibhelini, ligama laNkulunkulu livela kanyenti kwendlula ticu takhe njengaletitsi; Somandla, Babe, Nkhosi, nobe Nkulunkulu, futsi livela kanyenti kwendlula emagama ebantfu lavela eBhayibhelini njengalatsi, Abrahama, Mosi, Davide kanye nalelitsi Jesu. Ngetulu kwaloko, kuyintsandvo yaJehova kutsi silati ligama lakhe. LiBhayibheli litsi: “Shengatsi bantfu bangati kutsi libito lakho nguJehova, nekutsi nguwe wedvwa Losetikwako Konkhe emhlabeni wonkhe.”​—Tihlabelelo 83:18.

Leligama libalulekile kuJesu. Emthantazweni lowatiwa kakhulu ngekutsi nguBabe Wetfu Losezulwini nobe uMthantazo weNkhosi, Jesu wafundzisa balandzeli bakhe kutsi bancuse kuNkulunkulu ngalamavi latsi: “Alingcweliswe libito lakho.” (Matewu 6:9) NaJesu wathantaza kuNkulunkulu watsi: “Babe, khatimulisa libito lakho.” (Johane 12:28) Jesu wakwenta umgomo kukhatimulisa libito laNkulunkulu ekuphileni kwakhe, futsi kungaleso sizatfu athantaza watsi: “Ngibafundzisile ngelibito lakho, futsi ngitawuchubeka ngibafundzisa ngalo.”​—Johane 17:26.

Leligama libalulekile kubantfu labamatiko Nkulunkulu. Bantfu baNkulunkulu esikhatsini lesendlulile bebati kutsi kuvikeleka nekusindziswa kwabo bekuhlobene neligama laNkulunkulu, lokuligama lakhe kuphela. “Libito laJehova lingumbhoshongo locinile. Umuntfu lolungile ubalekela kulo futsi avikeleke.” (Taga 18:10) “Wonkhe umuntfu lobita libito laJehova utawusindziswa.” (Joweli 2:32) LiBhayibheli likhombisa kutsi ligama laNkulunkulu litawuveta umehluko emkhatsini webantfu labamkhontako nalabangamkhonti. “Nguleso naleso sive sitawuhlonipha nkulunkulu waso, Kodvwa tsine sitawuhlonipha Jehova Nkulunkulu wetfu kuze kube phakadze.”​—Mikha 4:5; Imisebenti 15:14.

LOKO LOKUSHIWO LIBITO LANKULUNKULU

Leligama lichaza Nkulunkulu ngendlela lekhetsekile. Tati letinyenti tiphetsa ngekutsi ligama lelitsi Jehova lisho kutsi “Ubangela Kutsi Kube Khona.” Jehova wasinika inchazelo yelibito lakhe ngalamavi lawatjela Mosi latsi: “Ngitawuba Nguloko Lengifuna Kuba Ngiko.” (Eksodusi 3:14) Ligama laNkulunkulu aligcini nje ngekusitjela indzima yakhe yekuba nguMdali lobangela kutsi tonkhe tintfo tibe khona, kodvwa liveta nekutsi yena lucobo lwakhe kanye nendalo yakhe bangaba ngunobe yini ledzingekako kute afeze injongo yakhe. Kuyavunywa kutsi ticu taNkulunkulu tichaza sigaba sakhe, ligunya lakhe, nobe emandla akhe, kodvwa ligama lakhe kuphela, lelitsi Jehova, lelimelela konkhe loko langiko naloko langabangiko.

Leligama liveta kutsi Nkulunkulu uyasitsandza. Inchazelo yeligama laNkulunkulu isho kutsi uyayitsandza indalo yakhe lefaka ekhatsi natsi. Ngetulu kwaloko, Nkulunkulu usitjele ligama lakhe ngobe ufuna kutsi simati. Liciniso kutsi, nguye lowatsatsa sinyatselo kucala sekusitjela ligama lakhe. Kuyacaca-ke kutsi Nkulunkulu akafuni simtsatse njengankulunkulu longacondzakali nalokhashane, kodvwa ufuna simtsatse njengeMuntfu lesingasondzelana naye.​—Tihlabelelo 73:28.

Kusebentisa ligama laNkulunkulu kusho kutsi siyamtsandza. Nasi sibonelo, ungase ucele umuntfu lofisa abe ngumngani wakho kutsi akubite ngeligama lakho. Ungaphatseka njani nangabe loyo muntfu angafuni kukubita ngeligama lakho? Ngekuhamba kwesikhatsi ungatibuta kutsi lomuntfu uyafuna yini kuba ngumngani wakho. Kuyafana nangaNkulunkulu. Jehova utjele bantfu ligama lakhe futsi usikhutsata kutsi silisebentise. Nasilisebentisa sisuke sikhombisa kutsi sifuna kusondzelana naye. Kuyacaca-ke, kutsi yini leyenta abanake ‘labo labahlale bacabangisisa [nobe ‘labazindla,’ umbhalo longentasi] ngelibito lakhe’!​—Malakhi 3:16.

Kwati ligama laNkulunkulu kusinyatselo sekucala lesibalulekile sekumati, kodvwa akukafaneli sigcine lapho. Kufanele simati kahle uMnikati walelogama. Kufanele sifundze kutsi ungumuntfu lonjani.

Nangabe sichubeka sifundza ngebuntfu balotsite, sibese simati kahle loyo muntfu futsi nebungani betfu buyacina. Kuyafanana nangaJehova, nangabe sati lokunyenti ngebuntfu bakhe sibese simati kancono kutsi ungumuntfu lonjani futsi buhlobo betfu naye buyacina. Buntfu baJehova lobuhamba embili ngemandla, kuhlakanipha, bulungisa kanye nelutsandvo.

NKULUNKULU UNEMANDLA

“Awu Nkhosi Lephakeme Jehova! Wena wente emazulu nemhlaba ngemandla akho lamakhulu.”​—JEREMIYA 32:17.

Bufakazi bemandla aNkulunkulu sibubona endalweni yakhe. Nasi sibonelo, nangabe ume ngephandle emini libalele, uvani esikhumbeni sakho? Uva kushisa kwelilanga. Ecinisweni usuke uva umphumela wemandla aJehova ekudala. Linemandla kangakanani lilanga? Bososayensi batsi kushisa kwalo kulinganiselwa ku-15 000 000°C (27 000 000 degrees Fahrenheit). Njalo ngemzuzu, lilanga likhipha emandla lalingana nekuchuma kwemabhomu e-nuclear latitigidzigidzi.

Noma kunjalo, lilanga lincane nalicatsaniswa netinkhanyeti letitigidzigidzi letisesibhakabhakeni. Bososayensi balinganisela kutsi bubanti bayinye yetinkhanyeti letinkhulu lebitwa ngekutsi yi-UY Scuti bungalingana nebukhulu belilanga naliphindvwe ka-1 700. Uma bewungatsatsa i-UY Scuti, uyibeke endzaweni yelilanga, beyingambonya wonkhe umhlaba ize iyewufika lapho kune-Jupiter khona. Mhlawumbe loku kungasisita siwacondze kancono emavi aJeremiya latsi Jehova Nkulunkulu wadala emazulu nemhlaba, nako konkhe lokukhona ngemandla akhe lamakhulu.

Sizuza njani emandleni aNkulunkulu? Kuphila kwetfu kusekelwa yindalo yaNkulunkulu, lefaka ekhatsi lilanga kanye nato tonkhe tintfo letilusito emhlabeni. Ngetulu kwaloko, Nkulunkulu usebentisa emandla akhe kuze umuntfu ngamunye azuze. Kanjani? Ngesikhatsi Jesu alapha emhlabeni, Nkulunkulu wamniketa emandla ekwenta timangaliso. UmBhalo utsi: “Labangaboni emehlweni sebayabona, labachutako sebahamba kahle, labanebulephelo bayahlanjululwa, labangeva etindlebeni sebayeva, labafile bayavuswa.” (Matewu 11:5) Kutsiwani ngesikhatsi salamuhla? LiBhayibheli litsi: “Umniketa emandla lodziniwe,” futsi lichubeka litsi: “labo labetsembele kuJehova batawutfola emandla kabusha.” (Isaya 40:29, 31) Nkulunkulu angasinika “emandla lamakhulu kakhulu” kute sikhone kubhekana nobe sibeketelele tinkinga netilingo ekuphileni. (2 KubaseKhorinte 4:7) Asingabati kutsi nawe uyafuna kuba nebuhlobo naNkulunkulu lositsandza kangangekutsi usebentisa emandla akhe lamakhulu kuze kuzuze tsine.

NKULUNKULU UHLAKANIPHILE

“Awu Jehova, maye minyenti imisebenti yakho! Yonkhe uyente ngekuhlakanipha.”​—TIHLABELELO 104:24.

Nasichubeka sifundza kabanti ngetintfo letidalwe nguNkulunkulu, kuba kunyenti lokusimangalisako ngekuhlakanipha kwakhe. Kunelucwaningo lwabososayensi lapho bahlolisisa khona tintfo letidalwe nguJehova bese bakopa indlela latidale ngayo kuze bakhe tabo tintfo. Lolucwaningo lubitwa ngekutsi yi-biomimetics nobe i-biomimicry. Loku kusukela ekwakheni tintfo tekufasa kuya ekwakhiweni kwetindiza.

Kuhlakanipha kwaNkulunkulu kuphindze kubonakale nakakhulu endleleni ladale ngayo umtimba wemuntfu. Cabanga ngendlela umtimba wemntfwana lowakheka ngayo. Loku kucala nge-cell lencane leyakheka nakuhlangana babe namake. Le-cell isuke inayo yonkhe imininingwane yetakhi telufuto letidzingekile. Le-cell bese yehlukana ekhatsi iba ngema-cells lamanyenti lafananako. Lama-cells abese acala kwehlukana abe ngema-cells lamanyenti lahlukahlukene njengema-blood cells, nerve cells, kanye nema-bone cells. Ngekushesha nje bese kucala kwakheka titfo temtimba, futsi ticale kusebenta. Ngetinyanga letiyimfica, le-cell yekucala ibese iba ngumntfwana lophelele lowakhiwe ngema-cells latigidzigidzi. Lokuhlakanipha lesikubona kuloku lesicoce ngako kwenta bantfu labanyenti bavumelane nalamavi embhali weliBhayibheli latsi: “Ngiyakudvumisa ngobe ungidale ngendlela lemangalisako.”​—Tihlabelelo 139:14.

Sizuza njani ekuhlakanipheni kwaNkulunkulu? UMdali uyati kutsi yini lesiyidzingako kuze sijabule. Ngenca yekutsi unelwati lolunyenti futsi usati kahle, usiniketa seluleko lesihlakaniphile lesiseVini lakhe liBhayibheli. Nasi sibonelo, liBhayibheli litsi: “Chubekani . . . nitsetselelana ngekukhululeka.” (KubaseKholose 3:13) Siyasita yini leseluleko? Yebo, siyasita. Bodokotela batfole kutsi kucolela kungenta umuntfu alale kahle futsi kwehlise sifo se-B.P. Kungaphindze kunciphise ematfuba ekuba nesifo sekucindzeteleka kanye naletinye tifo. Nkulunkulu ufanana nemngani lohlakaniphile nalokukhatsalelako longayekeli kukusita nekukuniketa seluleko lesilusito. (2 KuThimothi 3:16, 17) Angeke sewutsandze yini kuba nemngani lofana nalona?

NKULUNKULU WEHLULELA NGEKULUNGA

“Jehova uyakutsandza kulunga.”​—TIHLABELELO 37:28.

Nkulunkulu wenta lokulungile ngaso sonkhe sikhatsi. LiBhayibheli litsi: “Nkulunkulu weliciniso akakucabangi ngisho nekukucabanga kwenta lokubi, futsi Somandla akabenti bubi!” (Jobe 34:10) Tehlulelo takhe tilungile, kunjengobe nje umhlabeli asho lamavi nakakhuluma naJehova: “Ngobe wena utawehlulela bantfu ngendlela lelungile.” (Tihlabelelo 67:4) Ngesizatfu sekutsi “Jehova ubona lokusenhlitiyweni,” uyakhona kubona kutentisa futsi uyakhona nekubona liciniso bese wehlulela ngendlela lelungile. (1 Samuweli 16:7) Ngetulu kwaloko, Nkulunkulu uyatibona tintfo letilungile letentiwa bantfu kanye nekukhohlakala lokwenteka emhlabeni, futsi wetsembisa nekutsi bantfu “lababi batawucedvwa emhlabeni.”​—Taga 2:22.

Nobe kunjalo, Nkulunkulu akasuye umehluleli lonelunya lohlale agadze kujezisa bantfu. Unemusa nangabe kudzingeka. LiBhayibheli litsi: “Jehova unesihawu neluvelo,” ngisho nakubantfu lababi, nangabe baphendvuka ngebucotfo. Loko akusiko yini kwehlulela ngeliciniso?​—Tihlabelelo 103:8; 2 Phetro 3:9.

Kusizuzisa njani kwehlulela kwaNkulunkulu ngekulunga? Umphostoli Phetro watsi: “Nyalo sengiyacondza kutsi Nkulunkulu akakhetsi, kodvwa wonkhe umuntfu lomesabako nalowenta lokulungile uyemukeleka kuye.” (Imisebenti 10:34, 35) Siyazuza ekwahluleleni kwaNkulunkulu ngekulunga ngobe akakhetsi muntfu. Singemukeleka kuye futsi sibe tikhonti takhe ngisho nobe sinelibala lelingafani, buve lobungafani, sifundze ngelizinga lelingafanani, sinjingile nobe siphuyile.

Ngesizatfu sekutsi Nkulunkulu ufuna siyicondze kahle indlela yakhe yekwehlulela, usiphe bonembeza. ImiBhalo ichaza kutsi nembeza usebenta ‘njengemtsetfo lobhalwe etinhlitiyweni tetfu, lovumelana natsi’ nangabe senta lokulungile nobe usilahle nasenta lokungakalungi. (KubaseRoma 2:15) Kusisita ngani loko? Nangabe bonembeza betfu baceceshwe kahle, bangasikhutsata kutsi singatenti tintfo letingasilimata netento letingakalungi. Nasenta liphutsa, lonembeza ungasenta siphendvuke bese siyalungisa lapho sone khona. Asingabati kutsi kwati indlela yaNkulunkulu yekwehlulela ngekulunga kuyasisita futsi kusenta sisondzele kuye!

NKULUNKULU ULUTSANDVO

“Nkulunkulu ulutsandvo.”​—1 JOHANE 4:8.

Nanobe Nkulunkulu anemandla, kuhlanipha nekulunga, liBhayibheli alisho kutsi Nkulunkulu ungemandla, ukuhlakanipha nobe ukulunga. Kunaloko, litsi ulutsandvo. Leni? Sizatfu kutsi emandla akhe ngiwo lawasebentisako kuze atsatse sinyatselo futsi kulunga kanye nekuhlakanipha kwakhe kucondzisa loko lakwentako. Lutsandvo lwakhe ngilo lolumenta ente nobe ngabe yini. Ngako lutsandvo ngilo lolulawula konkhe lakwentako.

Jehova bekangadzingi lutfo, kodvwa lutsandvo lwakhe ngilo lolwamenta wadala tidalwa letihlakaniphile ezulwini nasemhlabeni. Letidalwa tiyazuza kulolutsandvo lwakhe futsi tijabulele nekunakekelwa nguye. Walungiselela umhlaba kutsi ube likhaya lelikahle labo bonkhe bantfu. Nalamuhla usabatsandza bantfu ngobe “wenta lilanga liphumele bantfu lababi nalabahle, aphindze ente imvula inele bantfu labalungile nalabangakalungi.”​—Matewu 5:45.

Ngetulu kwaloko, “Jehova unelutsandvo lolukhulu futsi unemusa.” (Jakobe 5:11) Uyabatsandza bantfu labatsatsa tinyatselo tekumati kancono baphindze basondzele kuye. Kulabanjalo, Nkulunkulu unakekela sidzingo semuntfu ngamunye. Ecinisweni liBhayibheli litsi “uyanikhatsalela.”​—1 Phetro 5:7.

Lusisita njani lutsandvo lwaNkulunkulu? Siyabujabulela buhle bekushona kwelilanga. Siyachazeka nasibona umntfwana ahleka. Kumnandzi kusondzelana nemalunga emndeni. Letintfo tingabonakala titincane, kodvwa tenta imphilo yetfu ibe mnandzi.

Siphindze sizuze nasithantaza, lokungulenye yetindlela Nkulunkulu lakhombisa ngayo kutsi uyasitsandza. LiBhayibheli litsi: “Ningakhatsateki ngalutfo, kodvwa kuko konkhe ticelo tenu atatiwe nguNkulunkulu ngekuthantaza, ngekuncusa nangekubonga.” Njengababe lonelutsandvo, Nkulunkulu ufuna sicele lusito lwakhe nangabe sibhekene netinkinga letimatima. Ngelutsandvo lwakhe lolute umona, Jehova usetsembisa “kuthula kwaNkulunkulu lokwendlula konkhe kucondza.”​—KubaseFiliphi 4:6, 7.

Lobuntfu baNkulunkulu lobuyinhloko lesesicoce ngabo lobufaka ekhatsi emandla, kuhlakanipha, kulunga kanye nelutsandvo, abukakusiti yini wabona kancono kutsi Nkulunkulu ungumuntfu lonjani? Kuze uchubeke ubonga Nkulunkulu, sicela kutsi ufundze ngaloko lakwentile nangaloko latakwentela bantfu.

Nangabe ufuna kwati umuntfu kancono, kungakusita kufundza ngetintfo latentile kanye netinkinga latincobile. Ngendlela lefanako, nangabe ufuna kumati kancono Nkulunkulu, kudzingeka ufundze ngetintfo latentile. Nawusachubeka ufundza ngaye, kungenteka kukumangalise kutfola tintfo latenta esikhatsini lesendlulile letisizuzisako, naleto letitsintsa likusasa letfu.

KONKHE KWADALWA NGUNKULUNKULU KUZE SIJABULE

Jehova Nkulunkulu unguMdali Lomkhulu, futsi ‘nanobe angabonakali, kepha kusukela ekudalweni kwelive kuchubeke bantfu bakhonile kuwabona emandla akhe langapheli etintfweni latidalile.’ (KubaseRoma 1:20) LiBhayibheli litsi: “Nkulunkulu wadala umhlaba ngemandla akhe, ngekuhlakanipha kwakhe wamisa umhlaba wacina futsi wendlala emazulu ngekucondza kwakhe.” (Jeremiya 10:12) Indalo yaNkulunkulu iphindze ivete kutsi uyasitsandza.

Asesicabange ngendlela Jehova labusise ngayo kuphila kwetfu ngekutsi asidale sibe “ngumfanekiso wakhe.” (Genesisi 1:27) Ngako singakhona kulingisa buntfu bakhe ngelizinga lelitsite. Usidale saba nelikhono lekucondza tintfo letingcwele nobe likhono lekucondza imicabango yakhe netimiso takhe. Nasichubeka senta konkhe lokusemandleni kuze siphile ngetimiso takhe, sitfola injabulo lenkhulu siphindze siphile imphilo lencono. Ngetulu kwaloko, singakhona kuba nebuhlobo lobuhle naye.

Indlela umhlaba lodalwe ngayo usiniketa bufakazi bekutsi Nkulunkulu utiva njani ngatsi. Emavi lashiwo ngumphostoli Pawula atsi Nkulunkulu ‘wasentela lokuhle, wativeta kitsi kutsi ungubani. Wasehlisela imvula ezulwini, wasiletsela netikhatsi tenala, wasinika nekudla lokunyenti futsi wagcwalisa tinhlitiyo tetfu ngenjabulo.’ (Imisebenti 14:17) Nkulunkulu akagcini nje kuphela ngekusinika tintfo lesitidzingako, kodvwa usinika tintfo ngebunyenti nangetinhlobonhlobo tato kuze sikujabulele kuphila. Konkhe loku kumane nje kungemazwibela aloko lafuna kusentela kona.

Jehova wadala umhlaba kuze bantfu bakhone kuphila kuwo kuze kube phakadze. LiBhayibheli litsi: “Umhlaba uwunikete bantfu,” futsi ‘akazange awudalele lite nje, kodvwa wawudalela kutsi kuhlalwe kuwo.’ (Tihlabelelo 115:16; Isaya 45:18) Nkulunkulu bekafuna kuhlale bobani emhlabeni futsi bahlale sikhatsi lesingakanani? LiBhayibheli litsi: “Labalungile batawudla lifa lemhlaba, futsi bahlale kuwo kuze kube phakadze.”​—Tihlabelelo 37:29.

Ngekuvumelana naloko, Nkulunkulu wadala indvodza nemfati wekucala, bo-Adamu na-Eva, futsi wababeka ensimini lelipharadisi emhlabeni ‘kuze bayilime futsi bayinakekele.’ (Genesisi 2:8, 15) Nkulunkulu wabanika umsebenti lojabulisako lokabili nakatsi: “Talanani nandze nigcwale emhlabeni futsi niwuncobe.” (Genesisi 1:28) Ngaleyondlela, bo-Adamu na-Eva bebanelitsemba lekuphila kamnandzi emhlabeni kuze kube phakadze. Lokubuhlungu kutsi bakhetsa kungamlaleli Nkulunkulu futsi ngaleso sizatfu balahlekelwa litsemba lekuba yincenye yebantfu ‘labalungile labatawudla lifa lemhlaba.’ Nobe kunjalo, kungalaleli kwabo akuzange kuyishintje injongo yaJehova ngatsi nobe ngemhlaba, njengobe kusetawuchazwa kulomagazini. Asesicale ngekucoca ngalokunye lesekwentiwe nguNkulunkulu.

NKULUNKULU WASIPHA LIVI LAKHE

LiBhayibheli liphindze latiwe ngekutsi liliVi laNkulunkulu. Yini leyenta Jehova wasilungiselela liBhayibheli? Ngalokuyinhloko, wasilungiselela lona kuze sifundze ngaye. (Taga 2:1-5) LiBhayibheli aliyiphendvuli yonkhe imibuto lesingase sibe nayo ngaNkulunkulu, njengobe nje kute nalenye incwadzi lengakhona. (Umshumayeli 3:11) Noma kunjalo, konkhe lokubhalwe eBhayibhelini kuyasisita kutsi simati kancono Nkulunkulu. Indlela laphatsa ngayo bantfu isikhombisa kutsi uluhlobo lolunjani lwaNkulunkulu. Siphindze sibone neluhlobo lwebantfu lalutsandzako nalangalutsandzi. (Tihlabelelo 15:1-5) Sifundza ngembono wakhe ngendlela lafuna simkhonte ngayo, ngendlela lafuna sitiphatse ngayo kanye nangembono lokufanele sibe nawo ngetintfo lesinato. LiBhayibheli liphindze lisivetele sitfombe lesicacile ngebuntfu baNkulunkulu ngemavi lashiwo yiNdvodzana yakhe, Jesu Khristu kanye naleyakwenta.​—Johane 14:9.

Lesinye sizatfu lesabangela Jehova wasilungiselela liVi lakhe liBhayibheli kutsi ufuna sati indlela yekuphila lejabulisako nalenenjongo. Asebentisa liBhayibheli, Jehova usitjela kutsi singaba nayo kanjani imindeni lejabulako, singanetiseka njani ekuphileni nekutsi singakubeketelela njani kukhatsateka. Njengobe kusetawuchazwa kulomagazini, liBhayibheli liniketa timphendvulo temibuto lebalulekile njengaletsi: Yini lebangela kutsi kube nekuhlupheka lokungaka? Lisiphatseleni likusasa? Liphindze lichaze naloko Nkulunkulu lasakwentile kuze kuphumelele injongo yakhe yasekucaleni.

LiBhayibheli liyincwadzi levela kuNkulunkulu futsi libaluleke kakhulu nangaletinye tindlela. Kwatsatsa sikhatsi lesiyiminyaka lengetulu kwa-1 600 kutsi libhalwe futsi labhalwa bantfu labangaba ngu-40. Ngisho noma kunjalo, linesihloko sinye ngoba umBhali walo nguNkulunkulu. (2 KuThimothi 3:16) Ngalokungafani naleminye imibhalo yakadzeni, liBhayibheli lilondvolotwe ngekucophelela iminyaka leminyenti, njengobe loku kufakazelwa yimibhalo yeliBhayibheli leminyenti yesandla yakadzeni lesesekhona nanyalo. Lokujabulisa nakakhulu kutsi imetamo yekutsi liBhayibheli lingahunyushwa, lingasakatwa kubantfu futsi lingafundvwa ayiphumelelanga. Lamuhla liBhayibheli liyincwadzi lehunyushwe kakhulu naletfolakala kubantfu labanyenti emhlabeni wonkhe. Kuba khona kweliBhayibheli kubufakazi bekutsi “livi laNkulunkulu wetfu lihlala kuze kube phakadze.”​—Isaya 40:8.

NKULUNKULU WETSEMBISA KUTSI INJONGO YAKHE ITAWUPHUMELELA

Lokunye Nkulunkulu lakwentile kutsi asinikete sicinisekiso sekutsi injongo yakhe itawufezeka. Njengoba sekuvetiwe kulomagazini, injongo yaNkulunkulu kutsi bantfu baphile phakadze emhlabeni. Noma kunjalo, ngalesikhatsi Adamu akhetsa kungalaleli Nkulunkulu futsi ona, yena kanye nebantfwana labekatabatala balahlekelwa litfuba lekuphila phakadze. LiBhayibheli litsi: “Sono sangena ngemuntfu munye eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” (KubaseRoma 5:12) Kungalaleli kwemuntfu kwenta kwangabateka kutsi injongo yaNkulunkulu itawuphumelela. Ngusiphi sinyatselo Jehova lasitsatsa?

Sinyatselo lesatsatfwa nguJehova sahambisana nebuntfu bakhe. Wabajezisa ngendlela lefanele bo-Adamu na-Eva ngesono sabo labasenta, kodvwa ngelutsandvo walungiselela intalelwane yabo likusasa lelihle. Ngekuhlakanipha kwakhe, Jehova wancuma indlela lekahle yekucedza lenkinga futsi ngekushesha wamemetela nekutsi utayicedza kanjani. (Genesisi 3:15) Indlela yekuphunyula esonweni nasekufeni beyitawuletfwa ngeNdvodzana yaNkulunkulu, Jesu Khristu. Bekutakwenteka kanjani loko?

Kuze akhulule bantfu esonweni lesaba khona ngekuvukela kwa-Adamu, Jehova watfumela Jesu emhlabeni kutsi atofundzisa bantfu indlela leholela ekuphileni kanye ‘nekunikela ngekuphila kwakhe kuze kube yinhlawulo yalabanyenti.’a (Matewu 20:28; Johane 14:6) Jesu bekumlungela kuba yinhlawulo ngobe bekete sono njenga-Adamu. Jesu wehluka ku-Adamu ngobe wetsembeka kwaze kwefika sikhatsi lafa ngaso. Jehova wavusela Jesu ekuphileni kwasezulwini ngobe bekungakafaneli kutsi afe. Ngemuva kwaloko, Jesu wakhona kwenta loko lokwehlula Adamu, kuniketa bantfu labatsembekile litsemba lekuphila phakadze. LiVi laNkulunkulu litsi: “Ngobe njengobe ngekungalaleli kwemuntfu munye, bantfu labanyenti baba toni, ngendlela lefanako, ngekulalela kwemuntfu munye, bantfu labanyenti kutawutsiwa balungile.” (KubaseRoma 5:19) Asebentisa inhlawulo yaJesu, Nkulunkulu utawugcwalisa setsembiso sakhe sekutsi bantfu baphile phakadze emhlabeni.

Kunyenti lesingakufundza ngaJehova endleleni lalungisa ngayo inkinga leyabangelwa kungalaleli kwa-Adamu. Kuyacaca kutsi kute lokungavimba Jehova kutsi acedzele nobe ngabe yini layicalile futsi livi lakhe “nakanjani liyawuphumelela.” (Isaya 55:11) Siphindze sifundze nangelutsandvo Nkulunkulu lanalo ngatsi. LiBhayibheli litsi: “Nayi indlela Nkulunkulu lakhombise ngayo kutsi uyasitsandza: Nkulunkulu watfumela iNdvodzana yakhe lekuphela kwayo eveni kuze sitfole kuphila ngayo. Ngulolo-ke lutsandvo, hhayi kutsi ngitsi lesitsandze Nkulunkulu, kodvwa nguye lowasitsandza, watfumela iNdvodzana yakhe kutsi ibe ngumhlatjelo wekuhlawulela tono tetfu.”​—1 Johane 4:9, 10.

Nkulunkulu ‘akayigodlanga iNdvodzana yakhe kodvwa wanikela ngayo ngenca yetfu,’ ngako asingabati kutsi ‘angasinika ngemusa tonkhe letintfo’ lasetsembise tona. (KubaseRoma 8:32) Yini Nkulunkulu latsembise kusentela yona? Chubeka ufundza kuze utfole lokunyenti.

Nawungaba senkingeni, bewungatsandza yini kutsi umngani wakho akusite? Bacabanga ngaloko, labanye batsi Nkulunkulu akusuye umngani ngobe kute labentela kona. Liciniso likutsi Nkulunkulu sewuvele usentele tintfo letisisitako futsi masinyane utawutsatsa tinyatselo kute acedze kuhlupheka netinkinga lesinato lamuhla. Ngutiphi letintfo latasentela tona?

UTAWUCEDZA BONKHE BUBI

Nkulunkulu utawucedza bonkhe bubi ngekutsi asuse loyo lobubangelako. LiBhayibheli liyaveta kutsi ngubani lobubangelako nalitsi: “Lonkhe live lisemandleni alomubi.” (1 Johane 5:19) Jesu watsi ‘lolomubi’ nguSathane Develi ‘umbusi walelive.’ (Johane 12:31) Umoya waSathane losebenta kubantfu nguwo lobangela bubi lobusihluphako. Yini Nkulunkulu latawuyenta ngalesimo?

Madvutane Nkulunkulu Jehova utawusebentisa iNdvodzana yakhe, Jesu Khristu, kute “amente lite loyo lonendlela yekubangela kufa, lokunguDeveli.” (KumaHebheru 2:14; 1 Johane 3:8) Ecinisweni, liBhayibheli litsi naSathane uyati “kutsi unesikhatsi lesincane” ngaphambi kwekutsi abhujiswe. (Sembulo 12:12) Nkulunkulu utawuphindze abhubhise bonkhe bantfu labenta lokubi.​—Tihlabelelo 37:9; Taga 2:22.

UTAWENTA UMHLABA UBE LIPHARADISI

Nasekacedzile kususa bonkhe bubi emhlabeni, uMdali wetfu utawubese wenta loko lebekakuhlosile ekucaleni mayelana nemhlaba nangebantfu. Yini lesilangatelela kuyibona kulomhlaba lomusha?

Kuthula nekulondzeka lokungapheli. “Labamnene batawudla lifa lemhlaba, futsi batawujabulela kuthula lokukhulu.”​—Tihlabelelo 37:11.

Inala yekudla lokunemphilo. “Kutawuba nenala yekudla emhlabeni, kube kunyenti ngisho naseticongweni tetintsaba.”​—Tihlabelelo 72:16.

Emakhaya lamahle nemsebenti lojabulisako. “Bayawukwakha tindlu bahlale kuto, bayawuhlanyela emasimu emagilebisi, badle titselo tawo. . . . Futsi umsebenti wetandla tebantfu bami lengibakhetsile uyawubajabulisa kakhulu.”​—Isaya 65:21, 22.

Ungatsandza yini kuphila endzaweni lenjalo? Madvutane loko kutawujatjulelwa ngibo bonkhe bantfu.

UTAKUCEDZA NYA KUGULA NEKUFA

Lamuhla bonkhe bantfu bahlaselwa kugula nekufa, kodvwa madvutane loko kutawuphela. Nkulunkulu utawusebentisa inhlawulo yaJesu kute ‘wonkhe umuntfu lokholwa nguye angabhubhi, kodvwa atfole kuphila lokuphakadze.’ (Johane 3:16) Loko kutawuba namuphi umphumela?

Angeke kuphindze kube khona kugula. “Kute lohlala khona loyawutsi: ‘Ngiyagula.’ Bantfu labahlala eveni batawube bacolelwe emaphutsa abo.”​—Isaya 33:24.

Kufa angeke kuphindze kuhlasele bantfu. “Uyawugwinya kufa kuze kube phakadze, futsi iNkhosi Lephakeme Jehova iyawusula tinyembeti kubo bonkhe buso.”​—Isaya 25:8.

Bantfu batawuphila phakadze. “Sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.”​—KubaseRoma 6:23.

Labafile batawuvuswa. “Labalungile nalabangakalungi batawuvuswa ekufeni.” (Imisebenti 24:15) Loku Nkulunkulu utakwenta asebentisa sipho senhlawulo yaJesu.

Nkulunkulu utakwenta njani konkhe loku lesesicoce ngako?

UTAWUBEKA UMBUSO LOTE EMAPHUTSA

Nkulunkulu utawufeza injongo yakhe ngemhlaba nangebantfu asebentisa hulumende wakhe, ngaJesu Khristu iNkhosi layibekile. (Tihlabelelo 110:1, 2) Lona ngulohulumende noma nguloMbuso Jesu lafundzisa balandzeli bakhe kutsi bawuthantazele batsi: “Babe wetfu losemazulwini, . . . UMbuso wakho awute.”​—Matewu 6:9, 10.

UMbuso waNkulunkulu utawubusa umhlaba wonkhe ucedze konkhe kuhlupheka nebuhlungu. LoMbuso unguhulumende loyendlula yonkhe imibuso leke yabakhona! Kungaleso sizatfu Jesu Khristu asebenta kamatima kute amemetele “tindzaba letimnandzi teMbuso” futsi watjela bafundzi bakhe kutsi nabo bente lokufanako.​—Matewu 4:23; 24:14.

Ngesizatfu sekutsi Nkulunkulu ubatsandza kakhulu bantfu, ubatsembise tonkhe letintfo letinhle. Loku akukwenti yini ufune kusondzela kuye futsi ufune nekumati? Nangabe usondzela kuye, utawusitakala kanjani? Sihloko lesilandzelako sitawucoca ngaloko.

Kuze kube ngunyalo sesibonile kutsi Ungubani Nkulunkulu. Sicale ngekufundza eBhayibhelini kutsi libito lakhe nguJehova nekutsi buntfu bakhe lobugcamile lutsandvo. Siphindze sabona kutsi bantfu ubenteleni nekutsi yini latabentela yone esikhatsini lesitako. Nanobe kukunyenti kakhulu lesingakufundza ngaNkulunkulu, mhlawumbe uyatibuta kutsi kungakuzuzisa ngani wena kufundza ngaNkulunkulu.

Jehova wetsembisa kutsi “nangabe umfuna, yena utatenta atfolakale kuwe.” (1 Tikhronike 28:9) Cabanga nje kutfola sipho lesiligugu sekuba ‘ngumngani lomkhulu waJehova’ njengoba uchubeka ufundza ngaye! (Tihlabelelo 25:14) Bungani lobunjalo naJehova butakusita ngani?

Injabulo sibili. Jehova ‘unguNkulunkulu lojabulako.’ (1 KuThimothi 1:11) Kusondzelana naye nekwenta loko lakushoko kutakuletsela injabulo sibili endleleni lowenta ngayo tintfo, kanye nasemtimbeni. (Tihlabelelo 33:12) Ungaphindze ukhone kuba nemphilo lejabulisako ngekutsi ubalekele kuphila imphilo leyingoti, bese uphila ngendlela letakuzuzisa nalephephile, uphindze uvane nebantfu. Utawuvumelana nemavi emhlabeleli lowatsi: “Kuyangisita kusondzela kuNkulunkulu.”​—Tihlabelelo 73:28.

Kunakwa nguJehova. Jehova wetsembisa tinceku takhe kutsi ‘utawuteluleka, liso lakhe lingesuki kuto.’ (Tihlabelelo 32:8) Loku kusho kutsi Jehova uyatinakekela tinceku takhe futsi ngayinye yato uyinika loko lekudzingako. (Tihlabelelo 139:1, 2) Nasewunebuhlobo lobuhle naJehova, ngaso sonkhe sikhatsi utakunaka, futsi ahlale akusita.

Likusasa lelihle kakhulu. Ngetulu kwekutsi akunike injabulo sibili nekwenetiseka nyalo, Jehova utawuphindze akunike nelikusasa lelihle kakhulu. (Isaya 48:17, 18) LiBhayibheli litsi: “Kukwati wena lokuphela kwaNkulunkulu weliciniso naloyo lowamtfuma, lokunguJesu Khristu, kuholela ekuphileni lokuphakadze.” (Johane 17:3) Kuletikhatsi letimatima litsemba Nkulunkulu lasinika lona lifanana nelihhuka lemkhumbi lelisenta ‘sihlale sicinile.’​—KumaHebheru 6:19.

Leti nguletinye tetizatfu letimbalwa kuletinyenti lesinato letisenta simati kancono Nkulunkulu futsi sibe nebuhlobo lobuhle naye. Nawufuna kutfola lokunyenti ngalendzaba, kukhuluma nalomunye waBoFakazi BaJehova nobe ungene ku-website letsi letsi jw.org.