Yini Lesikhutsata Kutsi Sishumayele?
1. Ngubuphi budlelwane lobukhona emkhatsini welutsandvo nemsebenti wetfu wekushumayela?
1 Kushumayela tindzaba letimnandzi ngeMbuso waNkulunkulu kungumsebenti lobaluleke kwendlula nome ngumuphi lomunye lesingawenta esikhatsini salamuhla. Kuliciniso vele kutsi ngekwenta lomsebenti, sisuke sikhombisa kutsi silalela imiyalo lemibili lemikhulu; lokukutsandza Jehova kanye nabomakhelwane betfu. (Makho 12:29-31) Lutsandvo lusifaka umfutfo wekuba tikhonti letinenshisekelo.—1 Johane 5:3.
2. Umsebenti wetfu wekushumayela ukhombisa kanjani kutsi siyamtsandza Jehova?
2 Kutsandza Jehova: Lutsandvo lesinalo ngemngani wetfu lesimtsandza kakhulu, Jehova, lusenta sikhulume ngaye kuze simvikele. Sathane sewumnyundzele iminyaka lecishe ibe ngu-6 000. (2 Khor. 4:3, 4) Ngaleso sizatfu, bantfu bakholelwa kutsi Nkulunkulu uhlupha bantfu esihogweni lesivutsa umlilo, uTicu letintsatfu nekutsi akanendzaba nebantfu. Labanye baze baphetsa ngekutsi akekho nhlobo Nkulunkulu. Sifise kakhulu kutsi bantfu balati liciniso ngaBabe wetfu losezulwini. Kumjabulisa kakhulu Jehova kusibona sibofakazi baKhe labatimiselako, ngakulelinye luhlangotsi, Sathane loko kuyamtfukutselisa—Taga 27:11; Heb. 13:15, 16.
3. Umsebenti wetfu wekushumayela ukhombisa njani kutsi siyamtsandza makhelwane?
3 Kutsandza Makhelwane: Njalo nasishumayela umuntfu lotsite, sisuke sikhombisa kutsi siyamtsandza. Kuletikhatsi letimatima, bantfu bakulambele kakhulu kuva tindzaba letimnandzi. Labanyenti banjengebantfu baseNineve bangesikhatsi saJona ‘lababengakwati kwehlukanisa sandla sabo sekudla nesancele.’ (Jona 4:11) Tindzaba lesitishumayelako tifundzisa bantfu kutsi bangenta njani kuze baphile imphilo lenhle nalejabulisako. (Isa. 48:17-19) Tibaniketa litsemba. (Rom. 15:4) Nangabe balalela futsi bakwente loko labakufundzako, ‘bayawusindziswa’—Rom. 10:13, 14.
4. Yini Jehova langeke ayikhohlwe?
4 Bantfwana labakahle abakhombisi kutsi batsandza batali babo ngetikhatsi letitsite-nje kuphela. Betama kubatsandza ngaso sonkhe sikhatsi. Ngalokufanako, lutsandvo lwetfu ngaJehova nangabomakhelwane lutasenta sihlale siwahlahlele emehlo ematfuba ekufakaza. Sitawuchubeka sishumayela, singehlisi emandla. (Imis. 5:42) Jehova angeke alukhohlwe lutsandvo lolunjalo.—Heb. 6:10.