SIHLOKO SENYANGA: ‘SHUMAYELA LIVI, LOKO UKWENTE NGEKUTIMISELA.’—2 THIM. 4:2.
Wasebentise Kahle Ematfuba Lakuvulekelako Ekushumayela Umlayeto WeMbuso!
1. Ngusiphi sifundvo lesingasitfola esibonelweni saDavide?
1 INkhosi Davide ayizange ivumele timo tayo kutsi tiyiphazamise. Nasi sibonelo: Davide abefuna kwakhela Jehova indlu. Ngesikhatsi angavunyelwa kutsi ayakhe, Davide washintja imigomo yakhe futsi wasita ekulungiseni tintfo lebetitawudzingwa nguSolomoni nakakha lelithempeli. (1 Khos. 8:17-19; 1 Khr. 29:3-9) Esikhundleni sekunaka loko labengeke akhone kukwenta, Davide wanaka loko labengakhona kukwenta. Singasilingisa njani sibonelo saDavide njengobe sifuna tindlela tekushumayela umlayeto weMbuso?
2. Ngukuphi kutihlola lesingakwenta?
2 Yenta Loko Longakhona Kukwenta: Bantfu labanyenti bente kuphila kwabo kwaba melula kuze bakhone kuba ngemahlahlandlela lasitako nobe lavamile. (Mat. 6:22) Ungakwenta yini nawe loko? Njengobe uthantaza futsi uhlola timo takho, utawubona kutsi uvulekelwe “ngumnyango lomkhulu loholela emsebentini.” Nangabe kunjalo, lisebentise kahle lelo tfuba!—1 Khor. 16:8, 9.
3. Ngumaphi ematfuba lesingawasebentisa kuze sishumayele ngisho nobe timo tetfu tingasivumeli kutsi sibe ngemahlahlandlela?
3 Kutsiwani-ke nangabe timo takho tingakuvumeli kutsi ube lihlahlandlela? Ungawayekeli lamanye ematfuba lakuvulekelako. Nasi sibonelo: Nangabe usebenta nebantfu labangakholwa, kungani ungawasebentisi kahle ematfuba lavulekako ekufakaza kubo? Nobe nangabe unetinkinga temphilo, ungawasebentisa yini ematfuba ekufakaza etisebentini tasesibhedlela? Khumbula kutsi kunelilungiselelo lekutsi labo labangakhoni kwenta lokunyenti emsebentini wekushumayela ngenca yekukhula ngeminyaka nobe imphilo, babike imizuzu lengu-15. Nawubhala umbiko wakho, ciniseka kutsi uyasifaka sikhatsi losicitse ushumayela ungakahleli, futsi ubhale nobe nguyiphi incwadzi loyihambisile, kuhlanganise nemapheshana kanye netimemo teSikhumbuto netemhlangano lomkhulu. Utawumangala kutsi siba ngakanani leso sikhatsi nasewusihlanganisile.
4. Yini lotimisele kuyenta?
4 Ngisho nobe timo tetfu tinjani, asiwasebentise kahle onkhe ematfuba lavulekako kuze sishumayele tindzaba letimnandzi. Nasenta njalo sitawutfola kwenetiseka ngekwati kutsi senta konkhe lokusemandleni etfu ngenca yeMbuso.—Mak. 14:8; Luk. 21:2-4.