Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
OCTOBER 7-13
UMCEBO LOSEVINI LANKULUNKULU JAKOBE 3-5
“Khombisa Kuhlakanipha KwaNkulunkulu”
(Jakobe 3:17) Kodvwa kuhlakanipha lokuvela ezulwini, kwekucala kunako konkhe kumsulwa, futsi kunekuthula, kuyacabangela, kulungele kulalela, kugcwele umusa netitselo letinhle, akukhetsi, akutentisi.
cl-ZU 221-222 ¶9-10
“Kuhlakanipha Lokuvela Ezulwini” Kuyasebenta Yini Ekuphileni Kwakho?
9 “Kwekucala kunako konkhe kumsulwa.” Kuba msulwa kusho kungasoleki nekuhlanteka hhayi ngaphandle kuphela kodvwa nangekhatsi. LiBhayibheli lihlobanisa kuhlakanipha nenhlitiyo, kodvwa kuhlakanipha lokuvela ezulwini angeke kungene enhlitiyweni lengcoliswe yimicabango lemibi, tifiso letimbi, kanye netisusa letimbi. (Taga 2:10; Matewu 15:19, 20) Nobe kunjalo, nangabe tinhlitiyo tetfu timsulwa ngekwelizinga lemuntfu lonesono, ‘sitawukhwesha ebubini, sente lokuhle.’ (Tihlabelelo 37:27; Taga 3:7) Kuyafaneleka kuphetsa ngekutsi bumsulwa bubuntfu bekucala lobubonisa kuhlakanipha. Ngetulu kwako konkhe, nangabe singakahlanteki enyameni nasebuhlotjeni betfu naNkulunkulu, angeke sikhone kuveta lobunye buntfu lobubonisa kuhlakanipha lokuvela ezulwini.
10 “Bese kuba nekuthula.” Kuhlakanipha lokuvela ezulwini kwenta sifune kuba nekuthula lokusitselo semoya waNkulunkulu. (Galathiya 5:22) Senta konkhe lokusemandleni etfu kugcina ‘sibopho sekuthula’ lesenta bantfu baJehova babe nebunye. (Efesu 4:3) Siphindze sente konkhe lokusemndleni etfu kute silungise kungevani nangabe bunye buphatamiseka. Kungani kumcoka loko? LiBhayibheli litsi: “Chubekani . . . niphila ngekuthula; futsi Nkulunkulu welutsandvo nekuthula utawuba nani.” (2 Khorinte 13:11) Nangabe sichubeka siphila ngekuthula, sitawuba nekuthula kwaNkulunkulu. Indlela lesiphatsa ngayo bazalwane betfu isho lokunyenti ngebuhlobo betfu naJehova. Yini lengakhombisa kutsi sibantfu labanekuthula? Cabanga nganasi sibonelo.
(Jakobe 3:17) Kodvwa kuhlakanipha lokuvela ezulwini, kwekucala kunako konkhe kumsulwa, futsi kunekuthula, kuyacabangela, kulungele kulalela, kugcwele umusa netitselo letinhle, akukhetsi, akutentisi.
cl-ZU 223-224 ¶12
“Kuhlakanipha Lokuvela Ezulwini” Kuyasebenta Yini Ekuphileni Kwakho?
12 “Kuyacabangela.” Kusho kutsini kucabangela? Ngekusho kwetati, ligama lekucala lesiGriki lelikuJakobe 3:17 lelisho ‘kucabangela,’ kumatima kulihumusha. Bahumushi basebentise emagama lafana nalelitsi “bumnene,” “kubeketela” “nekucabangela.” Umbhalo longentasi we-Lihumusho Lemhlaba Lomusha uveta kutsi nakuhunyushwe njengoba kunjalo kusho ‘kwemukela imibono yalabanye.’ Singabonisa njani kutsi lobuntfu bekuhlakanipha lobuvela ezulwini bukhona kitsi?
cl-ZU 224-225 ¶14-15
“Kuhlakanipha Lokuvela Ezulwini” Kuyasebenta Yini Ekuphileni Kwakho?
14 “Kulungele kulalela.” Ligama lesiGriki lelitsi ‘lungela kulalela,’ kute lenye indzawo lalitfolakala khona emiBhalweni YemaKhristu YesiGriki. Ngekusho kwalesinye sati, leligama “livame kusetjentiswa emasotjeni lalalelako nakacondziswa.” Liniketa umcondvo “wekufundziseka melula” nobe ‘kulalela.’ Umuntfu lonekuhlakanipha lokuvela ezulwini kuba mulula kulalela loko lokushiwo liBhayibheli. Akakadvumi ngekutsi ungumuntfu losheshe ashintje ingcondvo bese akasafuni kwemukela emaciniso langahambisani nawo. Kunaloko, usheshe ashintje ingcondvo nobe kucabanga kwakhe nabamkhombisa ngalokusuka eBhayibhelini kutsi wente liphutsa. Bantfu bakwati njengemuntfu lonjalo yini wena?
“Kugcwele Umusa Netitselo Letinhle”
15 “Kugcwele umusa netitselo letinhle.” Umusa uyincenye lebalulekile lovela ezulwini, futsi kuhlakanipha lokunjalo kutsiwa “kugcwele umusa.” Naka kutsi “umusa” ‘netitselo letinhle’ kukhulunywa ngako kanyekanye. Loku kuhlangana kahle ngobe esikhatsini lesinyenti liBhayibheli nalikhuluma ngemusa lisho kubonisa labanye luvelo, lokuyintfo leveta titselo letinhle letihlobana nemusa. Lolunye lucwaningo luchaza umusa kutsi “usento sekuvela lomunye buhlungu nakasesimeni lesibi futsi etame kwenta lokutsite ngaloko.” Ngako, ngeke sitsi kuhlakanipha lokuvela kuNkulunkulu kute luvelo, kunenhlitiyo lembi nobe kukuhlakanipha lokufana nekwebantfu. Kunaloko, kuneluvelo, kunelutsandvo futsi kuyacabangela. Singakhombisa njani kutsi sigcwele umusa?
(Jakobe 3:17) Kodvwa kuhlakanipha lokuvela ezulwini, kwekucala kunako konkhe kumsulwa, futsi kunekuthula, kuyacabangela, kulungele kulalela, kugcwele umusa netitselo letinhle, akukhetsi, akutentisi.
cl-ZU 226-227 ¶18-19
“Kuhlakanipha Lokuvela Ezulwini” Kuyasebenta Yini Ekuphileni Kwakho?
18 “Akuhlukanisi bantfu ngekubakhetsa.” Umuntfu lonekuhlakanipha lokuvela kuNkulunkulu akababandlululi bantfu balobunye buve futsi akatigabatisi ngebuve bakhe. Nangabe silawulwa ngulokuhlakanipha, silwa kamatima kute sisuse nobe ngabe ngumuphi umkhuba wekubandlululana lokungenteka usetinhlitiyweni tetfu. (Jakobe 2:9) Siphatsa bantfu bonkhe ngendlela lefanako, ngisho nobe bafundzile nobe bangakafundzi, banemali nobe baphuyile, banemalungelo latsite ebandleni nobe bete; futsi asibabukeli phansi labo lesikholwa nabo ngisho nobe bangahle babe bantfu lababukeleka phansi. Nangabe Jehova, abaniketa lutsandvo lwakhe, natsi nakanjani kufanele sibatsatse njengalokubafanele kubanika lutsandvo lwetfu.
19 “Akutentisi.” Ligama lesiGriki lelisho “kutentisa” lingasho “umdlali welifilimu.” Kadzeni, badlali basesiteji labangemaGriki kanye nalabangemaRoma bebagcoka tintfo letibambonya buso nabenta lemidlalo yabo. Kungako, ligama lesiGriki lelisho “kutentisa” lisebenta kumuntfu lodlala imidlalo futsi atente abe nguloko langasiko. Kuhlakanipha lokuvela kuNkulunkulu akukafaneli nje kutsintse indlela lesibaphatsa ngayo bazalwane betfu lesikholwa nabo, kodvwa kufanele kutsintse nendlela lesitiva ngayo ngabo.
Kufunisisa Umcebo EVini LaNkulunkulu
(Jakobe 4:5) Nobe nicabanga kutsi umbhalo umane usho ngaphandle kwesizatfu yini kutsi: “Umoya wemona lohlala kitsi uchubeka ufuna tonkhe tintfo”?
w08-ZU 11/15 20 ¶6
Emaphuzu Lagcamile Lasencwadzini YaJakobe NeyaPhetro
4:5—Jakobe ukhuluma ngamuphi umbhalo lapha? Jakobe akakhulumi ngelivesi lelicondzile kulombhalo. Nobe kunjalo, lamavi lawa laphefumulelwe kungenteka anemcondvo wemibhalo lenjengaGenesisi 6:5; 8:21; Taga 21:10; naGalathiya 5:17.
(Jakobe 4:11, 12) Bazalwane, yekelani kukhulumana kabi. Umuntfu lokhuluma kabi ngemzalwane wakhe nobe amehlulele, ukhuluma kabi ngeMtsetfo futsi wehlulela uMtsetfo. Nangabe wehlulela uMtsetfo usuke ungasuye logcina uMtsetfo, kodvwa ungumehluleli. 12 Munye losishayamtsetfo nalongumehluleli, loyo lokwati kusindzisa nekubhubhisa. Kodvwa ungubani-ke wena kutsi ungehlulela makhelwane wakho?
w97-ZU 11/15 20-21 ¶8
Kukholwa Kusisita Kutsi Sibeketele Futsi Sihlale Sithantaza
8 Kusono kukhuluma kabi ngemzalwane wakho. (Jakobe 4:11, 12) Nobe kunjalo, labanye bagceka lamanye emaKhristu, mhlawumbe ngenca yekutsi batibona bancono nobe ngobe bafuna kutiphakamisa ngekutsi bente labanye babukeleke phansi. (Tihlabelelo 50:20; Taga 3:29) Ligama lesiGriki lelitsi “kukhulumana kabi” lisho kwakha butsa nobe kukhuluma intfo lengasilo liciniso ngalabanye, uyente ibe yinkhulu kunaloko beyingiko. Loku kufana nekutsi sibahlulela kabi bazalwane. Sisho ngani kutsi kukhuluma kabi ngemzalwane kusho ‘kukhuluma kabi ngemtsetfo kanye nekuwehlulela’? Ecinisweni, basadusi nebaFarisi ‘bebanemacebo ekulahla imitsetfo yaNkulunkulu’ futsi behlulele bantfu ngendlela labafuna ngayo. (Makho 7:1-13) Ngendlela lefanako, nangabe silahla umzalwane ngentfo Jehova langeke amlahle ngayo, akufani yini ‘nekwehlulela uMtsetfo waNkulunkulu’ futsi siwusebentise kabi? Nasibakhuluma kabi bazalwane, kutawusho kutsi sephula umtsetfo wekutsi kufanele sitsandze bazalwane.—Roma 13:8-10.
Kufundvwa KweliBhayibheli
(Jakobe 3:1-18) Bazalwane, labanyenti benu akukafaneli babe bafundzisi, njengobe sati kutsi sitawutfola sehlulelo lesimatima. 2 Ngobe sonkhe siyona tikhatsi letinyenti. Nangabe kukhona longoni ngemavi, loyo muntfu uphelele, uyakwati nekulawula umtimba wakhe wonkhe. 3 Emahhashi nasiwafaka ematomu kuze atewusilalela, sisuke silawula nemitimba yawo yonkhe. 4 Ngisho nemikhumbi, nanobe imikhulu futsi ihanjiswa ngumoya lomkhulu, icondziswa ngeliphini lelincane kakhulu iye lapho loyo loshayelako lafuna iye khona.
5 Lulwimi nalo lusitfo semtimba lesincane kodvwa kutigabatisa kwalo kukhulu. Asewubuke nje kutsi mncane kangakanani umlilo lodzingekako kute kulunyekwe lihlatsi lelikhulu! 6 Nelulwimi lungumlilo. Lumelela live lekungalungi etitfweni temitimba yetfu, ngobe lungcolisa wonkhe umtimba luphindze lukulumeke ngemlilo konkhe kuphila, kantsi nalo lushiswa yiGehena. 7 Tonkhe tinhlobo tetilwane tesiganga, tetinyoni, temihumane, netetilwane taselwandle tiyafundziswa futsi bantfu ngibo labatifundzisako. 8 Kodvwa kute umuntfu longacecesha lulwimi. Alulawuleki, luyalimata, kantsi lugcwele nashevu lobulalako. 9 Ngalo sibonga Jehova, longuBabe, futsi ngalo siphindze sicalekise bantfu labentiwe “ngemfanekiso waNkulunkulu.” 10 Umlomo munye uyabusisa uphindze ucalekise. Bazalwane, akukafaneli kutsi tintfo tenteke ngalendlela. 11 Angitsi umtfombo awukhiphi emanti lamnandzi nalababako ngemlomo munye? 12 Bazalwane, angitsi sihlahla semkhiwa ngeke sitsele titselo temncuma, nesihlahla semagilebisi ngeke sitsele emakhiwa? Nemanti laneluswayi ngeke akhiphe emanti lamnandzi. 13 Ngubani lohlakaniphile nalonekucondza emkhatsini wenu? Ngekutiphatsa kwakhe lokuhle, akavete imisebenti leyentiwa ngemoya lophansi loletfwa kuhlakanipha. 14 Kodvwa nangabe ninemona lomkhulu nemibango etinhlitiyweni tenu, ningabotigabatisa futsi nicalele liciniso emanga. 15 Loko akusiko kuhlakanipha lokuvela ezulwini, kodvwa kwasemhlabeni, kubulwane, futsi kubudimoni. 16 Ngobe nobe ngukuphi lapho kunemona nemibango khona, kutawuba netiphitsiphitsi nayo yonkhe inhlobo yebubi. 17 Kodvwa kuhlakanipha lokuvela ezulwini, kwekucala kunako konkhe kumsulwa, futsi kunekuthula, kuyacabangela, kulungele kulalela, kugcwele umusa netitselo letinhle, akukhetsi, akutentisi. 18 Ngetulu kwaloko, sitselo sekulunga sihlanyelwa etimeni letinekuthula kulabo labakha kuthula.
OCTOBER 14-20
UMCEBO LOSEVINI LANKULUNKULU 1 PHETRO 1–2
“Kufanele Nibe Ngcwele”
(1 Phetro 1:14, 15) Njengebantfwana labalalelako, yekelani kucondziswa tifiso lebeninato ngesikhatsi nisengakati lutfo, 15 kepha ngekuvumelana naLoyo Longcwele lowanibita, nani banini ngcwele kuko konkhe kutiphatsa kwenu,
Umhlatjelo—‘Sipho Lesihle’ Lesisiphiwe NguBabe
5 Singakhombisa njani kutsi siyalitsandza libito laJehova? Singakhombisa ngendlela lesitiphatsa ngayo. Jehova ufuna sibe ngcwele. (Fundza 1 Phetro 1:15, 16.) Loku kusho kutsi kufanele sikhonte Jehova kuphela futsi silalele imiyalo yakhe ngenhlitiyo yonkhe. Ngisho nome sishushiswa, senta konkhe lokusemandleni etfu kutsi siphile ngekuvumelana netimiso takhe letilungile kanye nemitsetfo yakhe. Nangabe senta tento letilungile, sisuke sivumela kukhanya kwetfu kubonakale kubantfu futsi loko kuletsa ludvumo egameni laJehova. (Mat. 5:14-16) Njengebantfu labangcwele, nangabe siphila ngetimiso taNkulunkulu, sisuke sikhombisa kutsi imitsetfo yaJehova ilungile kodvwa tinsolo taSathane tingemanga. Nangabe senta emaphutsa, sivele siphendvuke ngebucotfo futsi sishiye yonkhe imikhumba lengamjabulisi Jehova.—Hla. 79:9.
(1 Phetro 1:16) ngobe kubhaliwe kutsi: “Kufanele nibe ngcwele, njengobe nami ngingcwele.”
lvs-E 77 ¶6
Indlela Yekukhetsa Tekutijabulisa
6 Jehova usitjela kutsi “Kufanele nibe ngcwele, njengobe nami ngingcwele.” (1 Phetro 1:14-16; 2 Phetro 3:11) Jehova utayemukela indlela yekumkhonta nangabe ingcwele nobe ihlantekile. (Dutheronomi 15:21) Kukhonta kwetfu ngeke kube ngulokuhlantekile nangabe senta tintfo Jehova latenyanyako, tintfo letinjengekutiphatsa kabi ngekwelicansi, budlova, nobe letinye tintfo letihlobene nemadimoni. (Roma 6:12-14; 8:13) Kodvwa kungaphindze kungamjabulisi Jehova nangabe sitijabulisa ngaletintfo. Loku kungakungcolisa kukhonta kwetfu, kuphindze kungemukeleki kuJehova futsi kulimate buhlobo betfu naye.
Kufunisisa Umcebo EVini LaNkulunkulu
(1 Phetro 1:10-12) Mayelana nalokusindziswa, baphrofethi labaphrofetha ngemusa waNkulunkulu lebenitawutfola, bakuphenya ngekutimisela baphindze bakuhlolisisa. 11 Bachubeka bahlola kutsi umoya lokubo ukhomba siphi sikhatsi nobe luphi luhlobo lwesikhatsi nawukhuluma ngaKhristu, ngesikhatsi ufakaza kusengaphambili mayelana nekuhlupheka kwaKhristu nangenkhatimulo lebeyitawulandzela. 12 Bembulelwa kutsi bebangatisebenteli bona kepha bebasebentela nine, ngekwaloko lenatjelwa kona ngulabo labamemetele kini tindzaba letimnandzi ngemoya longcwele lotfunyelwe uvela ezulwini. Netingilosi tiyafisa kutibona letintfo.
w08-ZU 11/15 21 ¶10
Emaphuzu Lagcamile Lasencwadzini YaJakobe NeyaPhetro
1:10-12. Tingilosi betifuna kucondza emaciniso lajulile labhalwa baphrofethi baNkulunkulu basendvulo mayelana nelibandla lemaKhristu lagcotjiwe. Nobe kunjalo, letintfo tacala kucaca ngesikhatsi Jehova acala kusebentelana nalelibandla. (Ef. 3:10) Akukafaneli yini silandzele sibonelo setingilosi futsi silwele kutfola tintfo “letijulile taNkulunkulu”?—1 Khor. 2:10.
(1 Phet. 2:25) Ngobe naninjengetimvu letidukako, kodvwa nyalo senibuyele kumelusi nembonisi wemiphefumulo yenu.
it-2-E 565 ¶3
Umbonisi
Umbonisi Lophakeme. Incwadzi yekucala yaPhetro 2:25 icaphuna emavi laku-Isaya 53:6 nayikhuluma ngalabo labafana ‘netimvu letidukako,’ futsi ubese utsi: “Kodvwa nyalo senibuyele kumelusi nembonisi wemiphefumulo yenu.” Kufanele kube lamavi lawa ashiwo kuJehova Nkulunkulu, ngoba labo Phetro lebekababhalela abazange bakhweshe kuKhristu Jesu, kunaloko babuyela kuJehova Nkulunkulu ngaJesu, longuMelusi Lomkhulu webantfu. (Hla. 23:1; 80:1; Jer. 23:3; Hez. 34:12) Jehova uphindze abe ngumbonisi, ngoba nguye lohlolisisa tintfo. (Hla. 17:3) Lokuhlolwa (ngesiGriki., e·pi·sko·peʹ) kuhambelana nekwehlulela kwaJehova lokukhulu, njengoba kwenteka ngelikhulu lekucala eJerusalema, leyo lengazange ibone kutsi sikhatsi ‘sekuhlolwa [Gr., e·pi·sko·pesʹ]’ kwayo sesifikile. (Luk. 19:44) Lokuhlolwa kungaphindze kujabulise kuphindze kuzuzise, njengobe kwenteka kulabo labadvumisa Nkulunkulu ngelilanga ‘lakhe lekuhlola [Gr., e·pi·sko·pesʹ].’—1 Phet. 2:12.
Kufundvwa KweliBhayibheli
(1 Phetro 1:1-16) Mine Phetro, umphostoli waJesu Khristu, ngibhalela labo labahleti kwesikhashana eveni, labasakatekele ePhontusi, eGalathiya, eKhaphadosiya, e-Asiya, kanye naseBhithiniya, lokungulabakhetfwe 2 ngekwatinchanti kwaNkulunkulu longuBabe, nangekungcweliswa ngemoya, kuze balalele futsi bafafatwe ngengati yaJesu Khristu: Shengatsi umusa nekuthula lokuvela kuNkulunkulu kungandziswa kini.3 Akabongwe Nkulunkulu longuBabe weNkhosi yetfu Jesu Khristu, ngobe ngemusa wakhe lomkhulu wasenta satalwa kabusha etsembeni leliphilako, ngekuvuswa kwaJesu Khristu ekufeni, 4 wasinika nelifa lelingonakali, lelihlantekile nalelingaphuphi. Letintfo nibekelwe tona ezulwini, 5 nine lenilondvolotwa ngemandla aNkulunkulu ngekukholwa, ngenca yensindziso letawembulwa esikhatsini sekugcina. 6 Ngesizatfu saloku, nijabula kakhulu nanobe kwesikhashana benike nacindzetelwa tilingo letehlukahlukene, 7 kuze kuvivinywa kwekukholwa kwenu lokuligugu kakhulu kwengca ligolide leliphelako ngisho nobe livivinywe ngemlilo, kube sizatfu sekudvunyiswa, senkhatimulo neseludvumo nasekwembulwa Jesu Khristu. 8 Nanobe ningakake nambona, niyamtsandza. Nanobe ningamboni kwanyalo, niyakholwa kuye futsi nijabula kakhulu ngenjabulo lengachazeki nalekhatimulako, 9 njengobe nitfola umphumela wekukholwa kwenu, lokukusindziswa kwekuphila kwenu. 10 Mayelana nalokusindziswa, baphrofethi labaphrofetha ngemusa waNkulunkulu lebenitawutfola, bakuphenya ngekutimisela baphindze bakuhlolisisa. 11 Bachubeka bahlola kutsi umoya lokubo ukhomba siphi sikhatsi nobe luphi luhlobo lwesikhatsi nawukhuluma ngaKhristu, ngesikhatsi ufakaza kusengaphambili mayelana nekuhlupheka kwaKhristu nangenkhatimulo lebeyitawulandzela. 12 Bembulelwa kutsi bebangatisebenteli bona kepha bebasebentela nine, ngekwaloko lenatjelwa kona ngulabo labamemetele kini tindzaba letimnandzi ngemoya longcwele lotfunyelwe uvela ezulwini. Netingilosi tiyafisa kutibona letintfo. 13 Ngako-ke yentani tingcondvo tenu tilungele umsebenti, nichubeke nicabangisisa kahle; bekani litsemba lenu emseni waNkulunkulu lenitawuboniswa wona ekwembulweni kwaJesu Khristu. 14 Njengebantfwana labalalelako, yekelani kucondziswa tifiso lebeninato ngesikhatsi nisengakati lutfo, 15 kepha ngekuvumelana naLoyo Longcwele lowanibita, nani banini ngcwele kuko konkhe kutiphatsa kwenu, 16 ngobe kubhaliwe kutsi: “Kufanele nibe ngcwele, njengobe nami ngingcwele.”
OCTOBER 21-27
UMCEBO LOSEVINI LANKULUNKULU
“Kuphela Kwato Tonkhe Tintfo Sekusondzele”
(1 Phetro 4:7) Kuphela kwato tonkhe tintfo sekusondzele. Ngako-ke philani engcondvweni, nikuphaphamele nekuthantaza.
‘Nikuphaphamele Kuthantaza’
LENYE indvodza lebeyikadze isebenta ebusuku itsi: “Sikhatsi lesimatima kakhulu sekuhlala uphapheme, kulapho sekutakusa.” Kungenteka kutsi nalabanye lokufanele bangalali busuku bonkhe bangavumelana naloku. EmaKhristu lamuhla abhekana nesimo lesifanako ngobe aphila ekupheleni kwalelive lelibuswa nguSathane. Kufana nangalesikhatsi sekumnyama khwishi ebusuku. Ngako-ke emaKhristu kufanele alwele kuhlale aphapheme. (Rom. 13:12) Kungaba yingoti kakhulu kitsi kulala kulesikhatsi sekuphela. Kubalulekile kutsi ‘siphile engcondvweni’ futsi silalele lokushiwo yimiBhalo kute ‘sikuphaphamele kuthantaza.’—1 Phet. 4:7.
(1 Phetro 4:8) Ngetulu kwako konkhe, tsandzanani ngelutsandvo lolukhulu, ngobe lutsandvo lumbonya tono letinyenti.
w99-ZU 4/15 22 ¶3
Indlela Yekubona Lawubutsakatsaka Khona Ebuhlotjeni Bakho NaJehova Nendlela Yekulwisana Nako
Ekugcineni, awuhlale usengcondvweni yakho lomyalo welutsandvo umphostoli Pawula lasinika wona lotsi: “Kuphela kwato tonkhe tintfo sekusondzele. Ngako-ke philani engcondvweni, nikuphaphamele nekuthantaza. Ngetulu kwako konkhe, tsandzanani ngelutsandvo lolukhulu, ngobe lutsandvo lumbonya tono letinyenti.” (1 Phetro 4:7, 8) Kumelula kakhulu kuvumela butsakatsaka lobubangwa sono, setfu nobe salabanye, kutsi bungene enhlitiyweni yetfu nobe engcondvweni futsi bube lugibe nobe sikhubekiso. Sathane ubati kahle lobutsakatsaka lobukubantfu. Kwehlukanisa nekuncoba kungulenye yetindlela takhe tebucili. Ngako-ke, kufanele sisheshe kutimbonya tono letinjalo ngelutsandvo lolusuka enhlitiyweni ngalomunye nalomunye futsi ‘singamniki Develi litfuba.’—Efesu 4:25-27.
(1 Phetro 4:9) Nibonakekelana ngaphandle kwekukhonona.
Kwemukela Tivakashi Kuyintfo Lenhle Futsi Kubalulekile!
2 Phetro wakhutsata emaKhristu labekanye nawo kutsi: ‘Anakekelane.’ (1 Phet. 4:9) Ligama lelitsi “nakekela” ngesiGriki lisho kutsi “sikhombise lutsandvo nemusa bantfu lesingabati.” Naka kutsi Phetro wakhutsata bazalwane nabodzadze labangemaKhristu kutsi ‘banakekele’ lababatiko nalabatihlanganisa nabo. Kunakekelana bekutabasita njani?
3 Bekutabenta babe nebunye. Cabanga ngalokwenteka kuwe. Uke walijabulela yini lilungelo lekumenywa ngulotsite ekhaya lakhe? Kuliciniso kutsi wajabula futsi uhlale usikhumbula leso sikhatsi. Bungani benu abuzange bucine yini ngesikhatsi umeme labatsite ebandleni lokulo? Kumemela bazalwane nabodzadze emakhaya etfu futsi sibanakekele, kusenta satane kancono kunendlela lebesingabati ngayo kuletinye tindzawo. EmaKhristu angesikhatsi saPhetro bekudzingeka asondzelane kakhulu njengobe timo betiya tiba timbi. Kungulokufanako nakumaKhristu laphila ‘kulamalanga ekugcina.’—2 Thim. 3:1.
Kufunisisa Umcebo EVini LaNkulunkulu
(1 Phetro 3:19, 20) Nakakulesimo, wahamba wayewushumayela emimoyeni lebeyiboshiwe, 20 lebeyingalaleli ngesikhatsi Nkulunkulu alindze ngekubeketela emalangeni aNowa, ngalesikhatsi kwakhiwa umkhumbi lokwatsi ngawo bantfu labambalwa, lokuyimiphefumulo lesiphohlongo, bahamba ngekuphepha etikwemanti.
Imibuto Levela Kubafundzi
LiBhayibheli lisho kutsini nalitsi Jesu ‘washumayela imimoya leboshiwe’? (1 Phet. 3:19)
▪ Umphostoli Phetro uchaza kutsi lemimoya nguleyo ‘leyala kulalela Nkulunkulu ngesikhatsi Nkulunkulu alindze ngekubeketela ngemalanga ekwakhiwa kwemkhumbi waNowa.’ (1 Phet. 3:20) Kuyacaca kutsi Phetro abekhuluma ngetidalwa temoya letakhetsa kuhlubuka naSathane. Juda ukhuluma ngetingilosi ‘letalahla tikhundla tato ngekushiya likhaya lato,’ watsi Nkulunkulu “watigcina ebumnyameni tiboshwe ngetinketane letingasoze tikhunyulwe. Letingilosi timele lilanga lelikhulu lekwehlulelwa.”—Juda 6.
Letidalwa temoya tangemalanga aNowa betingalaleli ngayiphi indlela? Ngaphambi kwekutsi kufike Zamcolo, letingilosi letimbi tatigucula taba nemitimba yenyama—intfo Nkulunkulu labengakatidaleli yona. (Gen. 6:2, 4) Ngetulu kwaloko, leto tingilosi letaya ecasini nebantfu labasikati betenta intfo lephambene nemvelo. Nkulunkulu abengakatidaleli kutsi tihlanganyele buhlobo bebulili nebantfu labasikati. (Gen. 5:2) Letingilosi letimbi futsi letingalaleli, titawubhujiswa ngesikhatsi saNkulunkulu lesifanele. Kwanyalo, kunjengobe Juda asho, ‘tisebumnyameni’—kunjengekutsi tiboshiwe.
Jesu wayishumayela nini futsi njani ‘lemimoya leboshiwe’? Phetro wabhala kutsi loku kwenteka ngemuva kwekutsi Jesu ‘avuswe ngemoya waNkulunkulu.’ (1 Phet. 3:18, 19) Caphela nekutsi Phetro utsi Jesu ‘washumayela.’ Kusebentisa kwaPhetro inkhulumo yesikhatsi lesendlulile kukhombisa kutsi lokushumayela kwacala ngaphambi kwekutsi abhale incwadzi yakhe yekucala. Ngako-ke, kubonakala shengatsi ngemuva kwekuvuswa kwakhe, Jesu wamemetela kuletingilosi letimbi mayelana nesijeziso lesitifanele letitawusitfola. Jesu akazange atinikete litsemba. Abeshumayela ngesehlulelo. (Jona 1:1, 2) Ngemuva kwekutsi Jesu asakhombise kukholwa kwakhe nekwetsembeka kwakhe kwaze kwaba sekufeni futsi wavuswa—wafakazela kutsi Develi ute emandla kuye—Jesu abesakufanele kukhipha lesimemetelo sesehlulelo.—Joh. 14:30; 16:8-11.
Esikhatsini lesitako, Jesu utawubopha Sathane naleto tingilosi futsi abajikijele emgodzini longenamkhawulo. (Luk. 8:30, 31; Semb. 20:1-3) Kuze kube nguleso sikhatsi, lemimoya lengalaleli ivalelwe ebumnyameni, futsi itawugcine ibhujisiwe.—Semb. 20:7-10.
(1 Phetro 4:6) Ecinisweni kungako tindzaba letimnandzi tamenyetelwa nakulabafile, kuze kutsi nanobe behlulelwa enyameni njengabo bonkhe bantfu, baphile ngekuvumelana nemoya ngekwembono waNkulunkulu.
w08 11/15 21 ¶8
Emaphuzu Lagcamile Lasencwadzini YaJakobe NeyaPhetro
4:6—Bobani ‘lelebebafile’ labo “tindzaba letimnandzi letamenyetelwa” kubo? Laba ngulabo ‘lebebafile ngenca yetiphambeko netono tabo,’ nobe lebebafile ebuhlotjeni babo naNkulunkulu ngemuva kwekutsi beve tindzaba letimnandzi. (Ef. 2:1) Kodvwa ngemuva kwekukholwa etindzabeni letimnandzi, bacala ‘kuphila’ ebuhlotjeni babo naNkulunkulu.
Kufundvwa KweliBhayibheli
(1 Phet. 3:8-22) Kwekugcina, nonkhe cabangani ngekuvumelana, nivelane, nitsandzane njengebazalwane, nibe nesihawu, futsi nitfobeke. 9 Ningaphindziseli lokubi ngalokubi, nobe kwetfukwa ngekwetfuka. Esikhundleni saloko busisani, ngobe nabitelwa kulendlela yekuphila kute nitfole sibusiso. 10 Ngako “nobe ngubani lotsandza kuphila nalofuna kuba nemalanga lamahle, kufanele abambe lulwimi lwakhe kulokubi, netindzebe takhe ekukhohliseni. 11 Akashiye lokubi, ente lokuhle, afune kuthula futsi akulondvolote. 12 Ngobe emehlo aJehova akulabalungile, netindlebe takhe tisekuncuseni kwabo; kodvwa buso baJehova bumelene nalabo labenta lokubi.” 13 Ngubani lotanilimata nangabe nikhutsalela kwenta lokuhle? 14 Ngisho nobe kungenteka nihlushwe ngenca yekulunga, niyajabula. Kepha-ke ningakwesabi loko labakwesabako, futsi ningaphatamiseki. 15 Kunaloko ngcwelisani Khristu njengeNkhosi etinhlitiyweni tenu, nihlale nikulungele kutiphendvulela embikwabo bonkhe labafuna kwati sizatfu selitsemba lenu, kodvwa nente njalo ngemoya lomuhle nangenhlonipho lenkhulu. 16 Londvolotani nembeza lomuhle, kuze kutsi kunobe yini labanikhuluma kabi kuyo, bahlazeke ngenca yekutiphatsa kwenu lokuhle njengebalandzeli baKhristu. 17 Kuncono kuhlupheka ngobe nenta lokuhle nangabe loko kuyintsandvo yaNkulunkulu, kunekuhlupheka ngobe nenta lokubi. 18 Ngisho naKhristu wafa kwaba kanye kuphela ngenca yetono, umuntfu lolungile wafela labangakalungi, kuze aniyise kuNkulunkulu. Wabulawa ayinyama, kodvwa wavuswa angumoya. 19 Nakakulesimo, wahamba wayewushumayela emimoyeni lebeyiboshiwe, 20 lebeyingalaleli ngesikhatsi Nkulunkulu alindze ngekubeketela emalangeni aNowa, ngalesikhatsi kwakhiwa umkhumbi lokwatsi ngawo bantfu labambalwa, lokuyimiphefumulo lesiphohlongo, bahamba ngekuphepha etikwemanti. 21 Lubhabhatiso loluhlobene naloku seluyanisindzisa (hhayi ngekususwa kwekungcola kwenyama, kodvwa ngekucela nembeza lomuhle kuNkulunkulu,) ngekuvuswa kwaJesu Khristu. 22 Ungesekudla saNkulunkulu ngobe waya ezulwini, futsi tingilosi, emagunya nemandla ato, kwabekwa ngephansi kwakhe.
OCTOBER 28–NOVEMBER 3
UMCEBO LOSEVINI LANKULUNKULU
“Nihlale Nikhumbula Kuba Khona Kwelilanga LaJehova”
(2 Phetro 3:9, 10) Jehova akephuti macondzana nesetsembiso sakhe njengobe labanye bacabanga kanjalo, kodvwa uyanibeketelela ngobe akafisi kutsi kubhubhe ngisho namunye, kepha ufisa kutsi bonkhe bantfu baphendvuke. 10 Nanobe kunjalo, lilanga laJehova litawufika njengelisela, futsi ngalo emazulu atawendlula ngemsindvo lomkhulu losheshako, kodvwa tintfo letisezulwini nasemhlabeni titawuncibilika njengobe titawube tishisa kakhulu, nemhlaba kanye nemisebenti lekuwo kutawembulwa.
w06-ZU 12/15 27 ¶11
Jehova Utawubentela ‘Lokulungile Bantfu Bakhe’
11 Singakucondza njani kusicinisekisa kwaJesu kwekutsi “ngekushesha” Jehova utawubentela lokulungile bantfu bakhe? Livi LaNkulunkulu litsi, “ngesikhatsi lesifanako abe [Jehova] ababeketelela,” ngekushesha utawukhipha sehlulelo nasekusikhatsi lesikahle. (Lukha 18:7, 8; 2 Phetro 3:9, 10) Nakusaphila Nowa, ngesikhatsi kufika zamcolo, bantfu lababi babhujiswa ngekushesha. Ngendlela lefanako, ngesikhatsi saLoti, kwana imvula ivela ezulwini futsi yacotfula bantfu lababi. Jesu watsi: “Kutawuba njalo nangelilanga lekwembulwa kweNdvodzana yemuntfu.” (Lukha 17:27-30) Ngako, “kubhujiswa kuyawubatuma ngekushesha lokukhulu” bantfu lababi. (1 Thesalonika 5:2, 3) Singaciniseka kutsi Jehova angeke alivumele live laSathane kutsi lichubeke likhona futsi lindlule ngisho nangelilanga linye, kumalanga lalisalele.
(2 Phetro 3:11, 12) Njengobe-ke tonkhe letintfo titawubhidlitwa kanjalo, nine-ke kufanele nibe bantfu labanjani? Kufanele nitinikele ngalokuphelele kuNkulunkulu, niphile ngekumesaba yena, 12 nilindzele kufika kwelilanga laNkulunkulu, nisebentele kutsi lisheshe lifike. Lelo langa liyawuncibikilisa emazulu ngemlilo, netinkhanyeti tincibilikiswe kushisa.
w06-ZU 12/15 19 ¶18
“Lilanga Lelikhulu LaJehova Selisondzele”
18 Uphostoli Phetro usincenga kutsi sihlale sikukhumbula “kuba khona kwelilanga laJehova”! Singakwenta njani loko? Lenye indlela lesingakwenta ngayo ifaka ekhatsi kutiphatsa “lokungcwele nangetento tekutinikela kuNkulunkulu.” (2 Phetro 3:11, 12) Kuhlale simatasa ngetento letinjalo kutasisita kutsi sihlale sikulangatelela kufika “kwelilanga laJehova.” Ligama lesiGriki lelihunyushwe ngekutsi “nilindzele” nalihunyushwe njengoba linjalo lisho kutsi “nilisheshisa.” Angeke sikhone kusheshisa sikhatsi lesisele kutsi kufike lilanga laJehova. Kodvwa njengobe sililindzele lelolanga, kutawubonakala ngatsi sikhatsi sihamba ngekushesha nangabe simatasa emsebentini waNkulunkulu.—1 Khorinte 15:58.
Kufunisisa Umcebo EVini LaNkulunkulu
(2 Phetro 1:19) Ngako sinanemavi esiphrofetho lacinisekiswe kakhulu; futsi nenta kahle ngekuwalalela njengekungatsi asibane lesikhanya endzaweni lemnyama, (kuze kube sentsatsakusa futsi kuphume likhweti) etinhlitiyweni tenu.
w08-ZU11/15 22 ¶2
Emaphuzu Lagcamile Lasencwadzini YaJakobe neyaPhetro
1:19—Ngubani “likhweti,” laphuma nini futsi sati njani kutsi loko kwenteka? “Likhweti” nguJesu Khristu asemandleni eMbuso. (Semb. 22:16) Nga-1914, Jesu waphakama embikwayo yonkhe indalo waba yiNkhosi lenguMesiya futsi wamemetela kusa kwelilanga lelisha. Lokuguculwa kwakhe kwasinika umbono wenkhatimulo nemandla eMbuso Jesu lanako futsi kwagcizelela kubaluleka kwekutsi siletsembe livi laNkulunkulu lesiphrofetho. Kunakisisa lelivi kukhanyisa tinhlitiyo tetfu, futsi ngaleyondlela kusente sati kutsi Likhweti seliphumile.
(2 Phetro 2:4) Ecinisweni Nkulunkulu akayekelanga kujezisa tingilosi letona, kodvwa ngekutijika eThartharusi, watifaka emigodzini yebumnyama lobukhulu kuze tigcinelwe sehlulelo.
w08-ZU11/15 22 ¶3
Emaphuzu Lagcamile Lasencwadzini YaJakobe neyaPhetro
2:4—Iyini ‘iThartharusi,’ futsi tingilosi letavukela tajikijelwa nini kuyo? Ithartharusi isimo lesifana nelijele lapho tidalwa letingumoya—hhayi letibantfu—tivalelwa khona. Isimo sebumnyama lobukhulu bengcondvo mayelana netinjongo taNkulunkulu tekukhanya. Tidalwa temoya letiseThartharusi tite litsemba ngelikusasa. Nkulunkulu wajikijela tingilosi letingalaleli eThartharusi ngesikhatsi saNowa, futsi titawuhlala kuleso simo lesiphansi kakhulu kuze kufike sikhatsi sekubhujiswa kwato.
Kufundvwa KweliBhayibheli
(2 Phetro 1:1-15) Mine Simoni Phetro, sigcili nemphostoli waJesu Khristu, ngibhalela labo labanekukholwa lokuligugu njengekwetfu, ngekulunga kwaNkulunkulu wetfu kanye nekweMsindzisi longuJesu Khristu: 2 Shengatsi umusa waNkulunkulu nekuthula kungandza kini ngelwati lolungulonalona lwaNkulunkulu nelwaJesu iNkhosi yetfu, 3 ngobe ngemandla aNkulunkulu sinikwe tonkhe tintfo letisenta siphile naletisenta sitinikele kuye, ngelwati lolungulonalona lwaloyo lowasibita ngenkhatimulo nangebuhle. 4 Ngaletintfo, usinike tetsembiso letinhle naletinkhulu kakhulu, kuze kutsi ngato nibe njengaye, njengobe senikubalekele konakala kwelive lokuletfwa tinkhanuko letingalawulwa. 5 Ngaleso sizatfu, yentani konkhe lokusemandleni enu kutsi nengete buhle ekukholweni kwenu, ebuhleni benu nengete lwati, 6 elwatini lwenu nengete kutibamba, ekutibambeni kwenu nengete kucinisela, ekuciniseleni kwenu nengete kutinikela kuNkulunkulu, 7 ekutinikeleni kwenu nengete kutsandza bazalwane, ekutsandzeni kwenu bazalwane nengete lutsandvo ngalabanye bantfu. 8 Nangabe letintfo tikhona kini futsi tiphuphuma, titawunivikela kutsi ningapholi nobe ningabi ngulabangatseli ngalokuphatselene nelwati lolungulonalona lweNkhosi yetfu Jesu Khristu. 9 Nangabe umuntfu ete letintfo, uyimphumphutse, uvale nemehlo akhe kutsi angakuboni kukhanya, futsi sewukukhohliwe nekuhlantwa kwakhe etonweni takadzeni. 10 Ngesizatfu saloko bazalwane, kubalulekile kutsi nente konkhe lokusemandleni enu kuze niciniseke kutsi nihlala netsembekile njengalababitiwe nalabakhetsiwe; ngobe nanichubeka nitenta letintfo, ngeke nize nehluleke. 11 Ecinisweni, ngalendlela nitawunikwa ngalokuphuphumako lilungelo lekungena eMbusweni waphakadze weNkhosi kanye neMsindzisi wetfu Jesu Khristu. 12 Ngaleso sizatfu ngitawuchubeka nginikhumbuta ngaletintfo, nanobe nitati futsi nicinile ecinisweni lenikulo. 13 Kodvwa ngikubona kukuhle kutsi nginikhutsate ngekunikhumbuta, yingci nje nangisesekulelithende, 14 ngobe ngiyati kutsi lelithende lami selitawususwa, njengobe nje iNkhosi yetfu Jesu Khristu yakwenta kwacaca loko kimi. 15 Ngako ngaso sonkhe sikhatsi ngitawukwenta konkhe lokusemandleni ami kuze kutsi nasengihambile, nikwati kutikhumbulela nine letintfo.